Eclesiastés 8:1-17
8 ¿Texé tá ngẽma yatü i cua̱x nüxü̃́ ngẽxmaxü̃gu tügü tangu? ¿Rü texé nüxü̃ tacua̱x i ta̱xacüca̱x nax yixĩxü̃ i guxü̃ma i ñoma i naanewa ngẽxmaxü̃? Rü ngẽma yatü i cua̱x nüxü̃́ ngẽxmaxü̃ rü nataãẽchiwe rü tama nanuchiwe.
Name nax ãẽ̱xgacüga ixĩnüexü̃
2 ¡Yanguxẽxẽ i ngẽma ãẽ̱xgacüarü mugü! Erü ngẽmaãcü nixĩ i Tupanape̱xewa cunaxueguxü̃.
3 ¡Rü taxṹ i cuñuxãẽxü̃ nax naxme̱xwa ícunguxuchixü̃ca̱x! ¡Rü taxṹ i ãẽ̱xgacümaxã cunuxü̃! Erü nüma ya ãẽ̱xgacü rü tá nanaxü i ta̱xacü i nüma nanaxwa̱xexü̃.
4 Rü ngẽma ãẽ̱xgacüarü ore rü napora. Rü taxúema tapora nax nüxna naxca̱x tacaxü̃ i ngẽma naxüxü̃.
5 Rü yíxema ãẽ̱xgacüga ĩnüxe rü taxuxü̃ma i guxchaxü̃ tüxü̃ nangupetü. Rü yíxema tümaãẽxü̃ cuáxe rü nüxü̃ tacua̱x i ñuxgu rü ñuxãcü tá tayanguxẽẽxü̃ i ngẽma ãẽ̱xgacüarü mugü.
6 8:6-7 Rü aixcüma nangẽxma i wüxi i ora rü ngunexü̃ i nagu mexü̃ nax naxüxü̃ i guxü̃ma. Natürü taxü̃ i norü guxchaxü̃ ya yima yatü nixĩ nax tama nüxü̃ nacuáxü̃ i ngẽma tá ngupetüxü̃, rü tataxuma ya texé ya namaxã nüxü̃ ixuxe.
7 Nüü̃ nadau 8:6
Taxúema tixĩ ya maxü̃ rü yuxü̃ rüporamaexe
8 Rü taxúema namaxã tapora i tümaarü maxü̃ nax tama tayuxü̃ca̱x. Rü ngẽxguma tümaarü ngunexü̃wa nanguxgu rü tayu. Rü taxúetama nawa tiña i ngẽma yu. Rü ngẽma yatü i chixexü̃gu maxü̃xü̃ rü ngẽma norü chixexü̃ rü taxũtáma yuwa ínananguxuchixẽxẽ.
9 Rü guxü̃ma ga yema rü nüxü̃ chadau ga yexguma naxca̱x chaugü ichaxãxgu nax nüxü̃ chacuáxü̃ca̱x i ngẽma ñoma i naanewa ixüxü̃. Rü nümaxü̃ i duü̃xü̃gü rü chixri toguxemaxã inacua̱x rü guxchaxü̃ tümaca̱x ínangu̱xẽxẽ.
Nangexma i ta̱xacü i taxuwama mexü̃
10 Rü ngẽxgumarüxü̃ ta nüxü̃ chadau i ngẽma duü̃xü̃ i chixexü̃gu maxü̃xü̃ i Tupanana ixũgachixü̃. Rü ngẽma ngunexü̃ i nagu yata̱xgüãxü̃gu rü duü̃xü̃gü rü nüxü̃ nicua̱xüü̃gü. Natürü nawena rü yima ĩane ya chixexü̃ nawa naxüxü̃newa rü taxúema nüxna tacua̱xãchi. Rü ngẽma rü ta rü natüca̱xmamare nixĩ.
11 Rü ngẽxguma tama paxa napoxcugu i ngẽma chixexü̃arü üruxü̃, rü ngẽma togü i duü̃xü̃gü nagu narüxĩnüe nax nümagü rü ta chixexü̃ naxügüxü̃.
12 Rü ngẽma duü̃xü̃ i chixexü̃ rü mue̱xpü̱xcüna chixexü̃ naxü rü woo mucüma ya taunecü namaxü̃gu, natürü nüxü̃ chacua̱x ya yíxema Tupanaxü̃ ngechaü̃xe rü ngẽma chixexü̃ üxü̃arü yexera mexü̃wa tá tangexma.
13 Natürü ngẽma chixexü̃gu maxẽxü̃ rü taxũtáma mexü̃wa nangẽxmagü rü taxũtáma mucü ya taunecü namaxẽ. Rü ñoma wüxi i gáuxchipetarüxü̃ paxa inarütaxu, erü tama Tupanaxü̃ namuü̃e.
14 Rü ñoma i naanewa nangupetü i ta̱xacü i taxuwama mexü̃. Rü nangẽxma i duü̃xü̃gü i mexü̃ i chixri nüxü̃ ngupetüxü̃ ñoma chi chixexü̃ naxügüxü̃rüxü̃. Rü nangẽxma i duü̃xü̃gü i chixexü̃ ügüxü̃ i mea nüxü̃ ngupetüxü̃ ñoma chi mexü̃ naxügüxü̃rüxü̃. Rü nüxü̃ chixu rü ngẽma rü taxuwama name.
15 Rü ngẽmaca̱x i choma rü ngẽma taãẽétüwa chaxü. Rü ngẽma naxca̱x rümemaexü̃ i wüxi ya yatü i ñoma i naanewa nixĩ nax nachibüxü̃ rü naxaxexü̃ rü ñu̱xũchi nataãẽxü̃. Rü ngexicatama nixĩ i norü puracüwa nayaxuxü̃ ya yima yatü nagu i ngẽma ngunexü̃gü ya Tupana nüxna ãxü̃ nax ñoma i naanewa namaxü̃xü̃.
16 8:16-17 Rü yexguma yexeraãcü chaugü ichaxãxgu nax nüxü̃ chacuáxü̃ca̱x rü chanangugüxü̃ca̱x i guxü̃ma i ñoma i naanewa ixüxü̃, rü taxucürüwama chape woo ngunecü rü chütacü, yerü tama nawa changu̱xetü nax nüxü̃ chadauxü̃ca̱x i guxü̃ma i ngẽma Tupana üxü̃ i ñoma i naanewa. Rü woo pora naxü̱xgu ya yima yatü rü taxucürüwa nüxü̃ nacua̱x nax ta̱xacüchiga yixĩxü̃ i guxü̃ma i ngẽma Tupana üxü̃ i ñoma i naanewa. Rü woo wüxi i yatü i nüxü̃ cua̱xüchixü̃ nagu rüxĩnügu nax nüxü̃ nacuáxü̃, rü taxucürüwa nüxü̃ nacua̱x nax ta̱xacüchiga yixĩxü̃ i guxü̃ma i ngẽma Tupana üxü̃ i ñoma i naanewa.
17 Nüü̃ nadau 8:16
