Eclesiastés 9:1-18
9 Poraãcü chaugü naxca̱x ichaxã nax nüxü̃ chacuáxü̃ca̱x i guxü̃ma i ngẽma Tupana üxü̃. Rü ngẽma namaxã icharüxũxü̃ nixĩ nax guxü̃ma i duü̃xü̃gü i mexü̃ ügüxü̃ rü ngẽma cua̱x nüxü̃́ ngẽxmagüxü̃ rü guxü̃ma i ngẽma naxügüxü̃ rü Tupaname̱xẽwa yixĩxü̃ i nangẽxmagüxü̃. Rü yima yatü rü tama nüxü̃ nacua̱x nax ta̱xacüchiga yixĩxü̃ nax yigü ingechaxü̃xü̃ rü yigüchi ixaiexü̃ woo naxetümaxã nüxü̃ nada̱u̱xgu.
2 Rü nüxü̃ chacua̱x rü guxü̃táma i duü̃xü̃gü rü tá nayue, rü woo ngẽma duü̃xü̃ i mexü̃gu maxü̃xü̃, rü woo ngẽma chixexü̃gu maxü̃xü̃, rü woo ngẽma mecümaxü̃, rü woo ngẽma chixecümaxü̃, rü woo ngẽma duü̃xü̃ i Tupanape̱xewa nügü mexẽẽxü̃, rü woo ngẽma tama Tupanape̱xewa nügü mexẽẽxü̃, rü woo ngẽma duü̃xü̃ i naxü̃na Cori ya Tupanaca̱x imáxü̃, rü woo ngẽma tama naxü̃na Cori ya Tupanaca̱x imáxü̃, rü woo ngẽma mexü̃ üxü̃, rü woo ngẽma pecadu üxü̃, rü woo ngẽma Tupanamaxã ixunetaxü̃, rü woo ngẽma tama Tupanamaxã ixunetaxü̃, rü guxü̃táma nayue.
3 Rü guxü̃ma i ngẽma ngupetüxü̃ i ñoma i naanewa, rü taxü̃ i guxchaxü̃ nixĩ nax wüxi i ngunexü̃ rü guxãtáma yuexü̃. Rü to nixĩ nax guxü̃ma i norü ĩnü ya yima yatü rü nachixe. Rü ngẽxguma namaxyane rü guxü̃ma i ngẽma nagu naxĩnüxü̃ rü taxuwama name. Rü norü gu̱x nixĩ nax tauquewa naxũxü̃.
4 Rü ngẽxguma imaxü̃gu rü nawa tangu i ta̱xacü i naxwa̱xexü̃. Rü ngẽmaca̱x ngẽma airu i maxü̃xü̃ rü leóü̃ i yuxü̃arü yexera mexü̃wa nangẽxma.
5 Rü ngẽma duü̃xü̃gü i maxẽxü̃ rü nüxü̃ nacua̱xgü nax wüxi i ngunexü̃gu rü tá nayuexü̃. Natürü ngẽma marü yuexü̃ rü taxuxü̃ma nacua̱xgü rü taxuguma narüxĩnüe erü ngẽma nachica i nagu nüxü̃ iyanangü̃maexü̃wa nayata̱xgü.
6 Rü ngẽxma marü nayacua̱x nax toguxexü̃ nangechaü̃xü̃, rü toguxechi naxaixü̃ rü naxauxãchiwa̱xexü̃. Rü marü taxuxü̃táma i ta̱xacü naxü i ñoma i naanewa.
7 Rü ngẽmaca̱x, ¡taãẽãcüma nangõ̱x i paũ rü yaxaxü ya bínu! Erü Cori ya Tupana rü namaxã nataãxẽ i guxü̃ma i ngẽma mexü̃ i ñoma i naanewa cuxüxü̃.
8 ¡Rü guxü̃guma cómüxü̃ i naxchirugu icu̱x rü guxü̃guma pumaramaxã cugü nachaeru!
9 ¡Rü cuxma̱x i ngĩxü̃ cungechaü̃cümaxã taãẽãcü nangupetüxẽxẽ i curü maxü̃ nagu i wüxichigü i ngunexü̃ i Cori ya Tupana cuxna ãxü̃ i ñoma i naanewa! Rü ngexicatama nixĩ i cuxna üxü̃ nawa i ngẽma puracü i ñoma i naanewa cuxüxü̃.
10 Rü guxü̃ma i ngẽma puracü i nüxü̃ cucuáxü̃ nax cunaxüxü̃, ¡rü mea naxü! Erü ngẽxguma cuyu̱xgu rü tauquewa cungexmagu, rü taxuxü̃ma cuxü rü taxuguma curüxĩnü erü ngéma rü nataxuma i ta̱xacürü cua̱x.
Ngẽma taxuwama mexü̃ i ñoma i naanewa
11 Rü to i ñoma i naanewa nüxü̃ chadauxü̃ nixĩ nax ngẽma ñaãchiwa poraexü̃ rü tama guxü̃guma nüxíra ínangugüxü̃. Rü ngẽma daiwa poraexü̃ rü tama guxü̃guma narüporamaegü. Rü ngẽma cua̱x nüxü̃́ ngẽxmagüxü̃ rü tama guxü̃guma nüxü̃́ nangẽxma i norü õna. Rü ngẽma naãẽxü̃ cuáxü̃ rü tama guxü̃guma nidiẽruã̱x. Rü ngẽma poperawa ngu̱x nüxü̃́ ngẽxmagüxü̃ i duü̃xü̃gü rü tama guxü̃guma namaxã nataãẽgü. Rü guxãca̱x ínangu i tümaarü taãxẽ rü tümaarü guxchaxü̃.
12 Rü yixema rü taxúema nüxü̃ tacua̱x nax ta̱xacü tá ngürüãchi tüxü̃ ngupetüxü̃, ñoma choxnigü i püxchagu chogüxü̃rüxü̃, rü ñoma werigü i yütagügu chogüxü̃rüxü̃. Rü ngẽxgumarüxü̃ ta ya yimá yatü rü tama nüxü̃ nacua̱x i ñuxgu tá ngürüãchi chixexü̃gu nangu̱x.
13 Rü ñoma i naanewa rü nüxü̃ chadau i ta̱xacü i nawa nüxü̃ chicua̱xãchixü̃.
14 Rü nayexma ga wüxi ga ĩanexacü ga íxrane ga ñuxretama ga duü̃xü̃gü nagu ãpatagüne. Rü wüxi ga ãẽ̱xgacü ga poraxüchicü naxca̱x ínayagoõchi, rü norü máquinagü ga dairuxü̃ namaxã ínanuegu ga guma ĩanexacü.
15 Natürü guma ĩanexacügu naxãpata ga wüxi ga yatü ga ngearü diẽruã́cü natürü nüxü̃ cua̱xüchicü. Rü nüma rü norü cua̱xmaxã chi ínanapoxü̃ ga guma ĩanexacü. Natürü nawena taxúema nüxna tacua̱xãchi ga gumá yatü.
Ngẽma cua̱x rü guxü̃étüwa nangẽxma
16 Rü choma rü nüxü̃ chixu rü ngẽma yigü nax írüporaxü̃arü yexera rümemaexü̃ nixĩ nax cua̱x tüxü̃́ ngẽxmaxü̃, woo ega tama naga naxĩnüegu i ngẽma norü cua̱x ya yimá yatü ya ngearü diẽruã́cü, rü tama nüxü̃ naxĩnüechaü̃gu i norü ore.
17 Rü ngẽma duü̃xü̃gü i naechitamare maxẽxü̃arü ãẽ̱xgacüarü ore i tagaãcü nüxü̃ yaxuxü̃arü yexera narümemae i norü ore i tama tagaãcü nüxü̃ yaxugüxü̃ i ngẽma yatügü i cua̱x nüxü̃́ ngẽxmagüxü̃.
18 Rü yimá naxnegüarü yexera narümemae i ngẽma cua̱x. Natürü wüxie̱xpü̱xcüna nax chixexü̃ ixüxü̃ rü inayanaxoxẽxẽ i muxü̃ma i mexü̃gü.
