Efesios 2:1-22
2 Rü ü̃pa ga pema rü perü chixexü̃gagu rü perü pecadugagu ñoma peyuexü̃rüxü̃ pixĩgü.
2 Yerü ga pemax rü nagu pexĩ ga yema chixexü̃ i ñoma i naanecüã̱x i duü̃xü̃gü nagu ĩxü̃. Rü pema rü naga pexĩnüe ga Chataná i ngo̱xogüarü ãẽ̱xgacü ixĩxü̃. Rü nüma nixĩ i nüxü̃́ nangúchaü̃xẽẽãxü̃ nax chixexü̃ naxügüxü̃ca̱x i ngẽma duü̃xü̃gü i tama Tupanaga ĩnüexü̃.
3 Rü guxãma ga yixema rü yemaacü chixexü̃gu tamaxẽ ga ü̃pa. Rü tóxrütama ngúchaü̃ ga chixexü̃we tarüxĩ, rü nagu taxĩ ga yema taxü̃ne naxwa̱xexü̃ rü yema taãxẽ nagu rüxĩnüxü̃. Rü yemagagu tüxna nangu i ngẽma poxcu ya Tupana norü numaxã mexẽẽxü̃ naxca̱x i guxü̃ma i ngẽma tama naga ĩnüexü̃.
4 Natürü ga Tupana rü poraãcü nüxü̃́ tangechaü̃tümüü̃gü rü poraãcü tüxü̃ nangechaü̃.
5 Rü yemaca̱x, woo tórü pecadugagu ñoma iyuexü̃rüxü̃ tixĩgü, natürü ga Tupana rü tüxna nanaxã ga maxü̃ ga yexguma Cristuxü̃ ínadaxẽẽgu. Rü ñu̱xma rü pexü̃́ nangẽxma i maxü̃ i taguma gúxü̃, erü Tupana pemaxã namecüma.
6 Rü yema nax Ngechuchu ya Cristuxü̃ wena namaxü̃rüxü̃, rü tüxü̃ rü ta namaxẽxẽxẽ ga Tupana. Rü yemaacü nanaxü nax yixema rü ta wüxigu Cristumaxã tüxü̃ narütogüxẽxẽ i daxũguxü̃ i naanewa.
7 Rü yemaacü nanaxü ga Tupana erü yimá taunecügü ya íngugücügu tá duü̃xü̃güxü̃ nanawe̱x nax aixcüma Cristugagu poraãcü tüxü̃ nangechaü̃xü̃ rü tamaxã namecümaxü̃.
8 Rü Tupanaarü ngechaü̃gagu penayaxu i maxü̃ i taguma gúxü̃ yerü peyaxõgü. Rü ngẽma maxü̃ rü tama pegünatama penaxã, natürü Tupana nixĩ ga pexna naxãmarecü ga yema.
9 Rü tama ta̱xacü i mexü̃ i pexüxü̃gagu nixĩ i pexü̃́ nangẽxmaxü̃ i ngẽma maxü̃, natürü Tupana nixĩ ya pexna naxãmarecü nax ngẽmaãcü taxúema tügü icua̱xüxü̃xü̃ca̱x.
10 Rü Tupana nixĩ ga tüxü̃ ngo̱xẽẽcü rü tüxü̃ maxẽxẽẽcü. Rü ñu̱xma rü Cristugagu tüxna nanaxã i ngẽma maxü̃ nax mexü̃ ixügüxü̃ca̱x. Rü ngẽmaãcü i ñu̱xma rü nagu taxĩ i ngẽma nacüma ga nũxcüma Tupana taxca̱x nagu rüxĩnüxü̃.
Cristu nixĩ ya yigümaxã tüxü̃ rüngüxmüexẽẽcü
11 2:11-12 Rü ngẽmaca̱x i pemax nax tama Yudíugü pixĩgüxü̃, rü name i nüxna pecua̱xãchie nax tama toma i Yudíugü i togü ítawíecha̱xmüü̃pe̱xechiraü̃güxü̃rüxü̃ pexĩgüxü̃ ga noxri. Rü toma nüxü̃ tixugüe nax tama Tupanape̱xewa pimexü̃ yerü tama pegü ípewíecha̱xmüxü̃pe̱xechiraü̃gü. Rü yexguma ga pema rü tama Cristuxü̃ pecua̱xgü, rü Iraétanüxü̃na peyáxü̃gugü. Rü tama pexca̱x nixĩ ga yema unetagü ga Tupana Yudíugüna ãxü̃. Rü ñoma ga naanewa pemaxẽmare, rü tama Tupanaxü̃ pecua̱x, rü taxuxü̃ma ípenangu̱xẽxẽ.
12 Nüü̃ nadau 2:11
13 Natürü i ñu̱xma nax Ngechuchu ya Cristuaxü̃́ peyaxõgüxü̃ rü pexca̱x nagü nabaxẽẽãxü̃, rü norü duü̃xü̃gü pixĩgü. Rü pema ga noxri Tupanana peyáxü̃gugü rü ñu̱xma rü nüxna pengaicamagü.
14 Rü nüma ya Cristu nixĩ ga yigümaxã tüxü̃ nangüxmüexẽẽxü̃. Rü ñu̱xma rü wüxitama i duü̃xü̃gü tüxü̃ nixĩgüxẽxẽ i toma i Yudíugü nax tixĩgüxü̃ rü pema i tama Yudíugü nax pixĩgüxü̃. Rü nagu napogü ga yema toxyepe̱xe ga yigüna tüxü̃ yáxü̃guxẽẽxü̃. Rü yexguma nayu̱xgu inayanaxoxẽxẽ nax yigüarü uanügü ixĩgüxü̃.
15 Rü nüma ya Cristu rü nayacua̱xẽxẽ ga yema nũxcümaü̃güxü̃ ga mugü ga noxri natüü̃wa tayexmagüxü̃. Rü nümatama rü wüxitama i duü̃xü̃gü i ngexwaca̱xü̃xü̃ tüxü̃ nixĩgüxẽxẽ i toma i Yudíugü nax tixĩgüxü̃ rü pema i tama Yudíugü nax pixĩgüxü̃. Rü yemaacü yigümaxã tüxü̃ inarüngü̃xmü̃exẽxẽ.
16 Rü yexguma curuchagu nayu̱xgu ga Cristu, rü inayanaxoxẽxẽ nax yigüchi ixaiexü̃. Rü yemaacü Tupanamaxã tüxü̃ inarüngüxmüẽxẽxẽ, rü wüxitama i duü̃xü̃güxü̃ tüxü̃ nixĩgüxẽxẽ.
17 Rü yexguma Cristu núma ũxgu, rü taxca̱x núma nanange ga ore i mexü̃ ga marü yigümaxã rü Tupanamaxã nax rüngüxmüexü̃. Rü yema ore rü toxca̱x nixĩ i toma i Yudíugü ga toxíra Tupanaxü̃ nax tacuáxü̃. Rü yema ore rü pexca̱x rü ta nixĩ ga woo tama Tupanaxü̃ nax pecua̱xgüxü̃ ga noxrix.
18 Rü ñu̱xma rü guxãma i yixema rü Cristugagu tüxü̃́ natauxcha nax Tanatü ya Tupanana ingaicamagüxü̃. Rü ngẽmatama Naãxẽ ya Üünexü̃ nixĩ i tüxü̃ rüngü̃xẽẽxü̃ nax nüxna ingaicamagüxü̃ca̱x ya Tanatü ya Tupana.
19 Rü ngẽmaca̱x i pemax, rü woo tama Tupanaxü̃ pecua̱xgü ga noxrix, rü woo tama norü duü̃xü̃gü pixĩgü ga yexguma, natürü i ñu̱xmax rü tama ngẽmaãcü pixĩgü. Erü ñu̱xma rü natanüxü̃ pixĩgü i guxü̃ma i ngẽma duü̃xü̃gü i Tupanaarü ixĩgüxü̃. Rü aixcüma Tupanaxacügüxüchi pixĩgü i ñu̱xmax.
20 Pema rü ñoma wüxi ya ĩpata ya mexü̃nerüxü̃ pixĩgü. Rü yima ĩpata namaxã ixügüne nixĩ i norü ngu̱xẽẽtae ga yema ngúexü̃gü ga Tupana imugüxü̃ rü yema norü orearü uruü̃gü. Rü nüma ya Cristu nixĩ ya yimá nüxíraü̃cü ya nuta ga naétüwa inaxügücü ya yimá ĩpata.
21 Rü Cristu nixĩ i yaxüchigücü ya yima ĩpata ñu̱xmatáta mea yangu nax wüxi ya Tupanapata ya üünene nax yixĩxü̃ca̱x.
22 Rü ngẽmaãcü i pemax nax Cristuarü pixĩgüxü̃, rü wüxigu wüxichigü i pemax rü Tupanapata i Naãxẽ ya Üünexü̃ nawa maxü̃ne pixĩgü.
