Efesios 3:1-21
3 Rü ñu̱xma i choma i Pauru rü chapoxcu erü Ngechuchu ya Cristuarü puracü chaxü nax pexü̃ charüngü̃xẽẽxü̃ca̱x i pemax i tama Yudíugü nax pixĩgüxü̃.
2 Rü pemax, rü marü nüxü̃ pecuáchiga nax Tupana rü choxü̃ nangechaü̃xü̃ca̱x choxü̃ namuxü̃ nax pemaxã nüxü̃ chixuxü̃ca̱x ga norü ore i mexü̃.
3 Rü Tupana rü choxü̃ nüxü̃ nacua̱xẽxẽ ga norü ĩnü ga nüxicatama nüxü̃ nacuáxü̃. Rü yemachiga nixĩ ga írarüwa marü pexca̱x chanaxümatüxü̃ ga noxrix.
4 Rü ngẽxguma mea nawa pengúegu i ngẽma popera rü tá nüxü̃ pecua̱x nax aixcüma yixĩxü̃ ga yema ore ga noxri Tupana nüxicatama nüxü̃ cuáxü̃ nax Cristugagu duü̃xü̃güxü̃ namaxẽxẽẽxü̃.
5 Rü yema ore ga nüxicatama nüxü̃ nacuáxü̃ ga Tupana rü taxúexü̃ma nüxü̃ nacua̱xẽẽxü̃ ga noxrix. Natürü i ñu̱xma ya Tupana rü Naãxẽ ya Üünexü̃wa marü nanango̱xẽxẽ i ngẽma ore naxca̱x i Tupanaarü duü̃xü̃gü i üünexü̃ i yamugüxü̃ rü norü orearü uruü̃gü.
6 Rü ngẽma ĩnü ga noxri Tupanaxicatama nüxü̃ cuáxü̃ nixĩ nax ngẽma ore i mexü̃maxã Tupana nüxna uxü̃ i guxü̃ma i duü̃xü̃gü i tama Yudíugü ixĩgüxü̃ nax Ngechuchu ya Cristuaxü̃́ yaxõgüãxü̃ca̱x rü nayauxgüãxü̃ca̱x i maxü̃ i taguma gúxü̃. Rü ñu̱xma rü Cristugagu ngẽma duü̃xü̃gü i tama Yudíugü ixĩgüxü̃ rü Yudíugümaxã wüxitama i duü̃xü̃gü nixĩgü. Rü ngẽma tama Yudíugü ixĩgüxü̃ca̱x nixĩ i ngẽma Tupanaarü unetagü ga noxri Iraétanüxü̃maxã nüxü̃ yaxuxü̃.
7 Rü Tupana rü choxü̃ namu nax nüxü̃ chixuxü̃ca̱x i ngẽma norü ore i mexü̃, erü poraãcü nüxü̃́ changechaü̃tümüxü̃ rü chomaxã namecüma. Rü yemaacü chowa inanawe̱x ga taxü̃ ga norü pora.
8 Rü chaugüca̱x rü choma nixĩ i guxü̃ i Tupanaarü duü̃xü̃güarü ñaxtüwaama chaxüxü̃. Natürü Tupana choxü̃ nangechaü̃ rü choxna nanaxã i ngẽma puracü i mexü̃ nax ngẽma tama Yudíugü ixĩgüxü̃maxã nüxü̃ chixuxü̃ca̱x ga yema mexü̃gü ga taguma iyagúxü̃ ga taxca̱x naxüxü̃ ga Cristu.
9 Rü nüma ga Tupana ya guxü̃arü üruxü̃ ixĩcü, rü choxü̃ namu nax guxü̃ i duü̃xü̃güxü̃ nüxü̃ chacua̱xẽẽxü̃ca̱x i ngẽma norü ĩnü ga nũxcüma nüxicatama nüxü̃ nacuáxü̃.
10 Rü yemaacü choxü̃ namu ga Tupana nax ngẽma yaxõgüxü̃wa guxü̃ma i ngẽma daxũcüã̱x i poraexü̃ rü guxü̃ma i ngẽma daxũcüã̱x i ãẽ̱xgacügü ixĩgüxü̃ nüxü̃ cua̱xgüxü̃ca̱x i Tupanaarü cua̱x i naguxü̃raxü̃ãcü ngóxü̃.
11 Rü Tupana rü yemaacü nanaxü, yerü woetama nũxcüma nagu narüxĩnü nax tórü Cori ya Ngechuchu ya Cristuwa tá yangu̱xẽẽãxü̃ ga yema norü ĩnü.
12 Rü ñu̱xma nax Cristuarü duü̃xü̃gü ixĩgüxü̃ rü nüxü̃́ nax yaxõgüxü̃, rü tüxü̃́ natauxcha nax Tupanana ingaicamagüxü̃ rü taxuca̱xma nüxü̃ nax imuü̃exü̃.
13 Rü ngẽmaca̱x i ñu̱xma nax pexca̱x ngúxü̃ chingexü̃ rü pexü̃ chaca̱xaxü̃ nax tama cha̱u̱xca̱x pexoegaãẽgüxü̃ca̱x. Erü ngẽma ngúxü̃ nax chingexü̃ rü perü meruxü̃ nixĩ i ngẽma.
Cristu rü poraãcü tüxü̃ nangechaü̃
14 Rü ngẽmaca̱x, ngẽxguma nagu charüxĩnügu i ngẽma Tanatü ya Tupana taxca̱x mexẽẽxü̃, rü nape̱xegu chacaxã́pü̱xü nax nüxü̃ chicua̱xüxü̃xü̃ca̱x.
15 Rü nüma nixĩ i Tanatü yixĩxü̃ i guxãma i yixema nax norü duü̃xü̃gü ixĩgüxü̃ i ñoma i naanewa rü daxũguxü̃ i naanewa ngẽxmagüxü̃.
16 Rü nüxna chaca ya Tanatü nax guxü̃ma i norü mexü̃wa pexna naxããxü̃ca̱x i ngẽma pora i Naãxẽ ya Üünexü̃wa ne ũxü̃ nax peãẽwa aixcüma peporaexü̃ca̱x.
17 3:17-18 Rü ngẽxgumarüxü̃ ta nüxna naxca̱x chaca nax perü õgagu pewa namaxü̃xü̃ca̱x ya Cristu. Rü nüxna chaca nax ngẽma Tupanaarü ngechaü̃ i pewa ngẽxmaxü̃ca̱x rü pema rü wüxigu guxü̃ma i yaxõgüxü̃maxã nüxü̃ pecuáxü̃ nax ñuxãcü nataxüchixü̃ i norü ngechaü̃ i namaxã tüxü̃ nangechaü̃xü̃ ya Cristu.
18 Nüü̃ nadau 3:17
19 Rü woo tama yanguxgu i tórü cua̱x nax nüxü̃ icuáxü̃ca̱x nax nañuxraü̃xü̃ i ngẽma ngechaü̃ i namaxã Cristu tüxü̃ ngechaü̃xü̃, natürü Tupanana naxca̱x chaca nax pexca̱x nango̱xẽẽãxü̃ca̱x nax ñuxãcü nax yixĩxü̃ i ngẽma ngechaü̃ nax aixcüma pewa nangẽxmaxü̃ i guxü̃ma i Tupanacümagü.
20 Rü ñu̱xma rü name nax nüxü̃ icua̱xüü̃güxü̃ ya Tupana. Erü nüma rü nüxü̃́ nangẽxma i pora nax tüxna naxããxü̃ i ngẽma naxca̱x íicaxü̃arü yexeraxüchi rü ngẽma nagu rüxĩnüexü̃arü yexeraxüchi. Rü ngẽma norü pora i tawa ngẽxmaxü̃maxã nixĩ i naxüaxü̃ i guxü̃ma i ngẽma.
21 Rü ñu̱xma rü name nax guxü̃ma i yaxõgüxü̃ guxü̃gutáma Tupanaxü̃ nicua̱xüü̃gü naxca̱x i ngẽma Ngechuchu ya Cristu üxü̃. Rü ngẽmaãcü yixĩ.
