Efesios 5:1-33
5 Rü ñu̱xma rü Tupanaxacügü ya pexü̃ nangechaü̃güxe pixĩgü. Rü ngẽmaca̱x name i naxca̱x pedauxü̃tae nax naxrüxü̃ pimexü̃.
2 Rü name i pegü pengechaü̃gü yema Cristu tüxü̃ ngechaü̃xü̃rüxü̃. Rü nüma rü taxca̱x nügü inaxã rü taxca̱x nayu nax yemaacü Tupanaca̱x wüxi i ãmare i chi̱xemaxü̃ yixĩxü̃ca̱x.
3 Rü ñu̱xma nax Tupanaarü duü̃xü̃gü pixĩgüxü̃ rü penaxwa̱xe nax norü duü̃xü̃gü i üünexü̃rüxü̃ mea pemaxẽxü̃. Rü ngẽmaca̱x tama name nax to i ngẽxü̃maxã pemaxẽxü̃, rü ẽ̱xna penaxüxü̃ i ta̱xacürü to i chixexü̃, rü ẽ̱xna pexaüexü̃. Rü bai tá nachiga pidexagüxü̃ i ngẽma chixexü̃gü.
4 Rü tama name i ta̱xacürü ore i ãũãchixü̃xü̃ pixu, rü ẽ̱xna ta̱xacürü ore i taxuwama mexü̃xü̃ pixu, rü ẽ̱xna dexa i ãũchigaxü̃ i chixexü̃wa nadaxü̃xü̃ pixu. Erü ngẽma ore i chixexü̃gü rü taxuwama name. Rü narümemae nixĩ nax Tupanana moxẽ pexãgüxü̃.
5 Rü aixcüma pemaxã nüxü̃ chixu rü ngẽxguma texé nai i ngexü̃maxã rü ẽ̱xna nai ya yatümaxã tamaxü̃gu, rüẽ̱xna ta̱xacürü ãũãchixü̃ Tupanape̱xewa taxü̱xgu, rü ẽ̱xna taxaügu (rü yíxema ngẽma nacüma tüxü̃́ ngẽxmaxe rü düxwa namaxã tatupanaã̱x) rü taxucürüwama taxãchica i ngextá tórü Cori ya Cristu rü Tanatü ya Tupana ãẽ̱xgacü íixĩxü̃wa.
6 ¡Rü ngẽxguma texé ta̱xacürü ngu̱xẽẽtae i taxuwama mexü̃maxã pexü̃ womüxẽxẽchaü̃gu rü taxṹ i naga pexĩnüexü̃! Erü ngẽma ngu̱xẽẽtae i taxuwama mexü̃gagu tá nixĩ ya Tupana poraãcü napoxcuexü̃ i ngẽma duü̃xü̃gü i tama naga ĩnüexü̃.
7 Rü ngẽmaca̱x tama name i namaxã pexãmücü rü naga pexĩnüe i ngẽma duü̃xü̃gü.
8 Rü ü̃pa ga pema rü ẽanexü̃wa pemaxẽ, yerü tama Tupanaxü̃ pecua̱x. Natürü i ñu̱xma nax Cori ya Tupanaxü̃ pecuáxü̃, rü ngóonexü̃wa pemaxẽ. Rü ngẽmaca̱x name i duü̃xü̃gü i ngóonexü̃wa ngẽxmagüxü̃ãcü pemaxẽxü̃.
9 Erü ngẽma ngóonexü̃ nixĩ i nango̱xẽẽxü̃ i ngẽma mecüma, rü ngẽma we̱xguxü̃, rü ngẽma aixcüma ixĩxü̃.
10 ¡Rü pegü pengugü rü naxca̱x pedaugü i ngẽma tórü Cori namaxã taãẽxü̃!
11 Rü tama name i pema rü ta nagu pexĩ i ngẽma chixexü̃gü i taxuwama mexü̃ i ngẽma togü i duü̃xü̃gü i ẽanexü̃wa ngẽxmagüxü̃ ügüxü̃. Natürü narümemae nixĩ i penango̱xẽxẽ nax nachixexü̃ i ngẽma naxügüxü̃.
12 Erü ngẽma chixexü̃ i cúãcüma naxügüxü̃ i ngẽma yatügü rü ngexü̃gü, rü woo nachiga idexagümaregu rü wüxi i ãnexüchi nixĩ.
13 Rü ngẽxguma ngẽma ngóonexü̃wa nangẽxmagu i ngẽma chixexü̃gü, rü mea tá nango̱x nax nachixexü̃.
14 Erü guxü̃ma rü ngẽxguma ngóonexü̃wa nangẽxmagu, rü meama nango̱x nax nañuxraxü̃xü̃. Rü ngẽmaca̱x i Tupanaarü orewa rü ñanagürü:“¡Naba̱i̱xãchi i cuma nax cupexü̃, rü írüda i cumax nax icuyarütaxuxü̃!Rü Cristu tá cuxca̱x nanangóonexẽxẽ”,
ñanagürü i ngẽma ore.
15 Rü ngẽmaca̱x name nixĩ i pegüna pedaugü rü mea pemaxẽ. ¡Rü taxṹ i ngẽma duü̃xü̃gü i naechitamare maxü̃xü̃ãcü pemaxẽxü̃! Rü name nixĩ i duü̃xü̃gü i mea naãxẽxü̃ cuáxü̃ãcü pemaxẽxü̃.
16 ¡Rü ñu̱xma nax Tupana pexü̃́ natauxchaxẽẽxü̃ rü peyoxniẽ nax penaxüxü̃ i ngẽma nüma nanaxwa̱xexü̃! Erü ñomaü̃cüü rü muxü̃ma i chixexü̃gü ínangugü.
17 Rü ñu̱xma rü tama name i duü̃xü̃gü i ngẽãẽmarexü̃ãcü pemaxẽ. Rü name nixĩ nax nüxü̃ pecuáxü̃ i ta̱xacü nixĩ i tórü Cori pexü̃́ naxwa̱xexü̃ nax penaxüxü̃.
18 Rü tama name i pengãxẽ, erü ngẽma rü chixexü̃wa tüxü̃ nagagü i ngẽxguma ngẽmaãcü imaxẽgu. Natürü name nixĩ i Tupanaãẽ i Üünexü̃na pegü pexãgü nax pewa nangẽxmaxü̃ca̱x rü pemaxã inacuáxü̃ca̱x.
19 Rü name nixĩ i Tupanaarü orechigagu rü norü wiyaegügu pegümaxã pidexagü rü pegümaxã nüxü̃ pixu. Rü name nixĩ i naguxü̃raü̃xü̃ i norü wiyaegügu pewiyaegü, nax ngẽmaãcü guxü̃ne ya perü maxü̃nemaxã tórü Corixü̃ picua̱xüü̃güxü̃ca̱x.
20 Rü name nixĩ i guxü̃guma tórü Cori ya Ngechuchu ya Cristuégagu Tanatü ya Tupanana moxẽ pexãgü naxca̱x i guxü̃ma i norü ngü̃xẽxẽ.
Ngẽma yaxõgüxü̃arü maxü̃chiga
21 Rü ñu̱xma nax Cristuaxü̃́ peyaxõgüxü̃ rü nüxü̃ pengechaü̃gü̃xü̃, rü name nixĩ i pegüga pexĩnüe i wüxichigü.
22 Rü pemax, Pa Ngexü̃güx, rü ngẽma nax tórü Coriga pexĩnüexü̃rüxü̃ rü name nixĩ nax petega pexĩnüexü̃.
23 Erü nüma ya yatü rü naxma̱xeru nixĩ, ngẽxgumarüxü̃ ya Cristu nax guxü̃ma i yaxõgüxü̃eru nax yixĩxü̃. Rü ngẽma yaxõgüxü̃ rü Cristuxü̃ne nixĩgü, rü Cristu rü norü Maxẽxẽẽruxü̃ nixĩ.
24 Rü ngẽxgumarüxü̃ nax Cristume̱xẽwa nangẽxmagüxü̃ i ngẽma yaxõgüxü̃, rü ngẽxgumarüxü̃ ta i ngẽma ngexü̃gü rü name nax guxü̃guma natega naxĩnüexü̃.
25 Rü pemax, Pa Yatügüx, rü name i pema̱xü̃ pengechaü̃gü, yema nax Cristu guxü̃ma i yaxõgüxü̃xü̃ nangechaü̃xü̃ rü norü maxü̃ naxca̱x inaxãxü̃rüxü̃.
26 Rü yemaacü nanaxü ga Cristu nax nügüxü̃́ tüxü̃ yaxüünexẽẽxü̃ca̱x i guxãma i yixema nax yaxõgüxü̃. Rü norü oremaxã rü ngẽma dexá i nawa íibaiü̃xü̃maxã tüxü̃ nimexẽẽgü nax nape̱xewa imexü̃ca̱x.
27 Rü yemaacü tüxü̃ nimexẽxẽ nax nügütama tüxü̃ nawéxü̃ca̱x nax aixcüma guxü̃wama imexü̃ rü nax nataxuxü̃ma i ta̱xacü i tórü chixexü̃ rü bai i írarüwa. Rü yemaacü tüxü̃ nade nax ixüünegüxü̃ca̱x rü guxü̃wama nape̱xewa imexü̃ca̱x.
28 Rü yema nax Cristu tüxü̃ nangechaü̃xü̃rüxü̃, rü wüxichigü ya yatü rü nanaxwa̱xe nax naxma̱xü̃ nangechaü̃xü̃ ñoma nügüxü̃nexü̃ nax nangechaü̃xü̃rüxü̃. Rü yíxema tümama̱xü̃ ngechaü̃xe rü tügütama nixĩ i tangechaü̃xü̃.
29 Erü tataxuma ya texé ya tümaxü̃nechi aixe, natürü tanaxüwemü rü meama nüxna tadau ngẽma Cristu guxü̃ma i yaxõgüxü̃na dauxü̃rüxü̃.
30 Rü guxãma i yixema nax yaxõgüxü̃ rü Cristuxü̃ne tixĩgü rü wüxigu naxü̃newa taxügü.
31 Rü ngẽmaca̱x i Tupanaarü ore i ümatüxü̃wa rü ñanagürü:“Wüxichigü ya yatü rü nanatüna rü naéna tá nixũgachi nax naxma̱xmaxã nangẽxmaxü̃ca̱x.Rü ngẽmaãcü i ngẽma taxre rü wüxi tátama nixĩgü”,
ñanagürü i ngẽma ore.
32 Rü ngẽma orewa nango̱x i ngẽma ẽxü̃guxü̃ ga noxri Tupanaxicatama nüxü̃ cuáxü̃. Rü ngẽmagu chanangu nax Cristu rü ngẽma yaxõgüxü̃ rü wüxitama yaxĩgüxü̃.
33 Natürü ngẽma ore rü pechiga ta nixĩ. Rü wüxichigü i pema i yatügü rü name nixĩ i pema̱xü̃ nax pengechaü̃xü̃ ngẽma pegütama nax pengechaü̃xü̃rüxü̃. Rü ngẽxgumarüxü̃ ta i pemax, i ngexü̃gü rü penaxwa̱xe i petega pexĩnüe.
