Efesios 6:1-24
6 Pa Buxü̃güx, ñu̱xma nax Cristuarü pixĩgüxü̃, rü name nixĩ i penatüga rü peéga pexĩnüe, erü ngẽma nixĩ i aixcüma mexü̃.
2 6:2-3 Yerü yema mugü ga Moiché ü̃matüxü̃tanüwa rü yema mu ga nüxíraxü̃xü̃ wüxi ga unetamaxã Tupana nüxü̃ ixuxü̃, rü ñanagürü:“¡Tüxü̃ nangechaü̃ ya cunatü rü cué nax cutaãẽxü̃ca̱x rü namáxü̃ca̱x i curü maxü̃ i ñoma i naanewa!”
ñanagürü.
3 Nüü̃ nadau 6:2
4 Rü pemax, Pa Papagü rü Pa Mamagüx, rü tama name i penanuexẽxẽ i pexacügü. Rü name nixĩ i mea peyaxucu̱xẽgü rü naãxẽxü̃ nüxü̃ pecua̱xẽxẽ rü penangúexẽxẽ i ngẽma tórü Coriarü ore.
5 Rü pemax, Pa Mugüruü̃güx, rü name nixĩ i mea naga pexĩnüe i ngẽma perü corigü i ñoma i naanewa ngẽxmagüxü̃. Rü penaxwa̱xe i nüxü̃ pengechaü̃güãcüma rü nüxü̃ pemuü̃ẽãcüma mea naga pexĩnüe ñoma Cristuaxü̃́ pepuracüexü̃rüxü̃.
6 Rü tama name ega perü corigü pexü̃ dawenüguxicatama mea nüxü̃́ pepuracüe nax ngẽmaãcü pemaxã nataãẽxü̃ca̱x. Natürü ñu̱xma nax Cristuarü duü̃xü̃gü pixĩgüxü̃, rü name nixĩ i guxü̃ma i perü ngúchaü̃maxã penaxü i ngẽma Tupana pexü̃́ naxwa̱xexü̃.
7 Rü ngẽma puracü i perü cori pexna ãxü̃, rü name nixĩ i petaãẽãcüma penaxü, ñoma tórü Cori ya Ngechuchuaxü̃́ pepuracüexü̃rüxü̃. Erü aixcüma nüxü̃́ nixĩ i pepuracüexü̃ rü tama i duü̃xü̃güaxü̃́.
8 Rü name nixĩ i ngẽmaãcü mea pepuracüe, erü nüxü̃ pecua̱x rü wüxichigü i pema rü woo wüxi i coriarü mugüruxü̃ pixĩgügu rü ẽ̱xna taxúxearü mugüruxü̃ pixĩgügu, natürü tórü Cori ya Ngechuchu tá pexü̃́ nanaxütanü naxca̱x i ngẽma mexü̃ i pexüxü̃.
9 Rü pemax, Pa Corigüx, rü name nixĩ i ngẽxgumarüxü̃ ta mea namaxã ipecua̱x i perü duü̃xü̃gü. Rü tama name i ta̱xacürü chixexü̃maxã penaxãũxũne. Rü nüxna pecua̱xãchie nax pema rü perü mugüruü̃gümaxã wüxigu tórü Cori ya daxũgucüme̱xẽwa pengẽxmagüxü̃. Rü aixcüma guxãma i yixema rü tawüxigumare i nape̱xewa ya tórü Cori ya Cristu.
Cristuarü duü̃xü̃güarü poxü̃ruxü̃gü na̱xcha̱xwa i Chataná
10 Rü ñu̱xmax, Pa Chauenexẽgüx, rü name nixĩ i pegü peporaexẽxẽ namaxã i ngẽma pora i tórü Coriwa ne ũxü̃.
11 ¡Rü pegü penaxǘ i guxü̃ma i ngẽma poxü̃ruxü̃gü ya Tupana pexna ãxü̃ nax ngẽmamaxã pegü ípepoxü̃xü̃ca̱x i ngẽxguma Chataná pexü̃ womüxẽxẽchaü̃gu!
12 Erü tama duü̃xü̃gü i taxrüxü̃ ãmachixü̃ rü ãxchina̱xãxü̃maxã nixĩ i yigü ida̱i̱xü̃. Natürü ngẽma namaxã yigü ida̱i̱xü̃ nixĩ i Chatanáarü duü̃xü̃gü i ngo̱xogü i chixexü̃gü i poraexü̃. Rü nümagü rü namaxã inacua̱x i ñoma i naanearü chixexü̃gü rü guxü̃wama daxũwa nangẽxmagü rü tüxü̃ narüporamaegüchaü̃.
13 Rü ngẽmaca̱x name nixĩ i penayauxgü i guxü̃ma i ngẽma poxü̃ruü̃gü ya Tupana pexna ãxü̃, nax ngẽmaãcü pegü ípepoxü̃xü̃ca̱x i ngẽxguma ngẽma naãxẽgü pexü̃ nachixexẽẽchaü̃gu. Rü ngẽmaãcü taxũtáma pemaxã tapora i ngẽma naãxẽgü i chixexü̃ rü tá nüxü̃ perüporamaegü.
14 Rü ngẽmaca̱x name nixĩ i mea pegüna pedaugü nax tama ngẽma perü uanüme̱xẽgu peyixü̃ca̱x. Rü Tupanaarü ore i aixcüma ixĩxü̃maxã pegü pigoye. Rü pegü picuxcuchi i Tupanacüma i peremüarü poxü̃ruxü̃ ixĩxü̃.
15 Rü mea picua̱i̱xcuchi nax ípememarexü̃ca̱x nax nüxü̃ peyarüxugüexü̃ca̱x i ore i mexü̃ i ngüxmüxẽẽruxü̃.
16 Rü ngẽma guxü̃arü yexera nixĩ nax peyaxõgüxü̃, erü ngẽma perü õmaxã nixĩ i pegü ípepoxü̃güxü̃ na̱xcha̱xwa ya Chatanáarü chuxchigü ya ãũcümane.
17 Rü ñu̱xma nax pexü̃́ nangẽxmaxü̃ i maxü̃ i taguma gúxü̃, rü name nixĩ i ngẽmamaxã pexãpate̱xe nax ngẽmamaxã pegü ípepoxü̃xü̃ca̱x i peeruwa. Rü penayaxu i Tupanaarü ore i perü tara ixĩxü̃ i Naãxẽ ya Üünexü̃ pexna ãxü̃.
18 Rü name i guxü̃guma peyumüxẽgüxü̃. ¡Rü guxü̃guma Tupanaãxẽ i Üünexü̃arü ngü̃xẽẽmaxã Tupanana peca! ¡Rü pexuãxẽ nax taguma nüxü̃ perüxoexü̃ca̱x! Rü ngẽmaãcü name i naxca̱x peyumüxẽgü i guxü̃ma i duü̃xü̃gü i Tupanaaxü̃́ yaxõgüxü̃.
19 Rü ngẽxgumarüxü̃ ta chanaxwa̱xe i cha̱u̱xca̱x peyumüxẽgü nax Tupana choxü̃ rüngü̃xẽẽxü̃ca̱x rü choxna naxããxü̃ca̱x i ngẽma ore i nüma nanaxwa̱xexü̃ nax nüxü̃ chixuxü̃. Rü chanaxwa̱xe i Tupanana naxca̱x peca nax choxü̃ naporaxẽẽxü̃ca̱x nax tama chamuü̃ãcüma nüxü̃ chixuxü̃ca̱x rü mea chanango̱xẽẽxü̃ca̱x i ngẽma norü ore i Cristuchiga ga noxri ẽxü̃guxü̃ i ñu̱xma maxü̃ tüxna ãxü̃.
20 Rü Tupana rü choxü̃́ ningucuchixẽxẽ nax nachicüü duü̃xü̃gümaxã nüxü̃ chixuxü̃ca̱x i norü ore. Rü ngẽma oregagu nixĩ i chapoxcuxü̃ i ñu̱xmax. ¡Rü cha̱u̱xca̱x peyumüxẽgü nax tama chamuü̃ãcüma nüxü̃ chixuxü̃ca̱x i ngẽma norü ore!
Pauru rü wenaxarü yema duü̃xü̃güxü̃ narümoxẽ
21 Rü taenexẽ ya nüxü̃ ingechaü̃cü ya Tíquicu, rü mecü ya chorü ngü̃xẽẽruxü̃ nixĩ i tórü Coriarü puracüwa. Rü nüma tá pemaxã nüxü̃ nixu i guxü̃ma i chauchiga nax ñuxãcü choxü̃ naxüpetüxü̃ i nua.
22 Rü ngẽmaca̱x nixĩ i pexü̃tawa chanamuxü̃, nax pemaxã nüxü̃ yaxuxü̃ca̱x nax ñuxãcü toxü̃ naxüpetüxü̃ rü ngẽmaãcü pexü̃ nataãẽxẽẽxü̃ca̱x.
23 Pa Chauenexẽgü i Yaxõgüxü̃x, chanaxwa̱xe nax Tanatü ya Tupana rü tórü Cori ya Ngechuchu ya Cristu pexü̃ rüngü̃xẽẽgüxü̃ nax pegümaxã petaãẽgüxü̃ca̱x, rü pegü pengechaü̃güxü̃ca̱x rü mea peyaxõgüxü̃ca̱x.
24 Rü chanaxwa̱xe i Tanatü ya Tupana tüxü̃ rüngü̃xẽẽgü ya guxãma ya yíxema tórü Cori ya Ngechuchu ya Cristuxü̃ ngechaü̃güxe. Rü ngẽmaãcü yixĩ.
