Gálatas 1:1-24
1 1:1-2 Pa Toenexẽgü i Yaxõgüxü̃ i Gárataanearü Ĩanegüwa Ngẽxmagüxü̃x, choma i Pauru rü namaxã i guxü̃ma i taenexẽgü i nua chauxü̃tawa ngẽxmagüxü̃ nixĩ i pexü̃ tarümoxẽgüxü̃ rü pexca̱x tanaxümatüxü̃ i ñaa popera. Rü tama duü̃xü̃gü nixĩ ga choxü̃ unetagüxü̃ nax chanaxüxü̃ca̱x i Tupanaarü puracü. Natürü nüma ya Tanatü ya Tupana ga Ngechuchuxü̃ írüdaxẽẽcü rü nümatama ya Ngechuchu ya Cristu nixĩ ga choxü̃ naxunetagüxü̃.
2 Nüü̃ nadau 1:1
3 Rü chanaxwa̱xe i Tanatü ya Tupana rü tórü Cori ya Ngechuchu ya Cristu poraãcü pexü̃ nangechaxü̃ rü pexü̃ nataãẽgüxẽxẽ.
4 Rü nüma ga tórü Cori ya Ngechuchu rü nügü inaxã nax tórü pecaduca̱x nayuxü̃ca̱x nax nüxna tüxü̃ ínanguxü̃xẽẽxü̃ca̱x i guxü̃ma i ñoma i naanearü chixexü̃, yerü yema nixĩ ga nanaxwa̱xexü̃ ga Tanatü ya Tupana.
5 Rü ngẽmaca̱x name nax guxü̃gutáma Tupanaxü̃ icua̱xüü̃güxü̃. Rü ngẽmaãcü yixĩ.
Nataxuma i to i ore i mexü̃ i tüxü̃ maxẽxẽxẽxü̃
6 Rü Cristuaxü̃́ pengechaü̃tümüxü̃gü, rü yemaca̱x nixĩ ga pexna naxuxü̃ ya Tupana nax penayaxuxü̃ca̱x i maxü̃ i taguma gúxü̃. Rü ñu̱xma rü poraãcü chaba̱i̱xãchiãxẽ, erü paxaxüchi Tupanana pixĩgachi, nax nawe perüxĩxü̃ca̱x i to i ngu̱xẽẽtae i nagu perüxĩnüegu rü tá pexü̃ maxẽxẽxẽxü̃.
7 Rü nataxuma i to i ngu̱xẽẽtae i nawa nayaxuxü̃ i maxü̃ i taguma gúxü̃. Natürü nangẽxma i ñuxre i duü̃xü̃gü i pexü̃ ítüexẽẽchaü̃xü̃ rü íyatoxẽẽgüchaü̃xü̃ i ngẽma ngu̱xẽẽtae i mexü̃ i Cristuchiga.
8 Natürü ngẽxguma chi texé pexü̃ ngúexẽẽgu i wüxi i ore i tama namaxã wüxiguxü̃ i ngẽma ore i mexü̃ i toma pexü̃ tangúexẽẽxü̃, rü name nixĩ i noxtacüma Tupana poxcu tümamaxã naxuegu. Rü woo choma chixĩxgu, rü ẽ̱xna wüxi i Tupanaarü orearü ngeruxü̃ i daxũcüã̱x yixĩxgu i pexü̃ ngu̱xẽẽxü̃ i to i ore, rü name nixĩ i noxtacüma Tupana poxcu tümamaxã naxuegu.
9 Rü ñu̱xma rü wena pemaxã nüxü̃ chixu ga yema noxri pemaxã nüxü̃ chixuxü̃. Rü ngẽxguma chi texé pexü̃ ngúexẽẽgu i wüxi i to i ore i tama namaxã wüxiguxü̃ i ngẽma ore i mexü̃ ga peyaxuxü̃, rü name nixĩ i noxtacüma Tupana poxcu tümamaxã naxuegu.
Ñuxãcü Pauruxü̃ nayaxu ga Ngechuchu ya Cristu nax norü puracüwa namuãxü̃ca̱x
10 Rü choma rü tama naxca̱x chadau nax duü̃xü̃gü chomaxã taãẽgüxü̃, natürü Tupana chomaxã taãẽxü̃ca̱x nixĩ i chadauxü̃. Erü ngẽxguma chi duü̃xü̃güxü̃ chataãẽxẽẽchaü̃gu, rü taxũchima Cristuarü puracütanüxü̃ chixĩ.
11 Natürü, Pa Chauenexẽgüx, chanaxwa̱xe i nüxü̃ pecua̱x nax ñaa ore i mexü̃ i nüxü̃ chixuxü̃, rü tama duü̃xü̃güãẽwa yixĩxü̃ nax ne naxũxü̃.
12 Rü choma rü tama wüxi ga duü̃xü̃xü̃tawa naxca̱x changu̱x i ngẽma ore. Natürü Ngechuchu ya Cristutama nixĩ ga choxü̃ nüxü̃ cua̱xẽẽcü.
13 Pema rü marü nüxü̃ pexĩnüechiga nax ñuxãcü chamaxü̃xü̃ ga ü̃pa ga yexguma Yudíugücümagu chixũxgu. Rü nüxü̃ pexĩnüechiga nax poraãcü nawe chingẽchigüxü̃ ga guxü̃ma ga Tupanaarü duü̃xü̃gü ga yaxõgüxü̃ nax yemaacü nüxü̃ nüxü̃ charüxoxẽẽxü̃ca̱x nax Ngechuchuaxü̃́ yaxõgüãxü̃.
14 Rü muxü̃ma ga chautanüxü̃ ga Yudíugü ga chorü nayaã̱xgüraü̃xü̃arü yexera nagu chixũ ga yema Yudíugücüma. Yerü norü yexera meama chayanguxẽxẽ ga nacümagü ga nũxcümaü̃güxü̃ ga chorü o̱xigü nagu ĩxü̃.
15 1:15-16 Natürü yexguma taxũta chabuxgu, rü woetama Tupana choxü̃ naxuneta nax choxü̃ namuxü̃ca̱x nax chanaxüxü̃ca̱x i norü puracü. Rü nüma rü cha̱u̱xca̱x naca nax noxrü chixĩxü̃ca̱x, yerü poraãcü choxü̃ nangechaü̃. Rü yexguma Tupana naxwa̱xegu, rü choxü̃ nüxü̃ nacua̱xẽxẽ ga Nane ya Cristu. Rü yemaacü nanaxü nax ngẽma duü̃xü̃gü i tama Yudíugü ixĩgüxü̃maxã nüxü̃ chixuxü̃ca̱x nax Ngechuchugagu tüxü̃́ nangẽxmaxü̃ i maxü̃ i taguma gúxü̃. Rü yexguma yemaacü Tupana choxü̃ nüxü̃ cua̱xẽẽgu ga Nane, rü taxúenama chayaca.
16 Nüü̃ nadau 1:15
17 Rü bai ga Yerucharéü̃wa chaxũxü̃ nax nüxna chayaca̱xaxü̃ca̱x ga yema togü ga ngúexü̃gü ga nüxíra Tupana imugüxü̃. Natürü ga choma rü yexgumatama Arábiaanewa chaxũ. Rü yemawena, rü Damácuarü ĩaneca̱x chataegu.
18 Rü tomaepü̱x ga taunecüguwena rü düxwa Yerucharéü̃wa chaxũ nax Pedruxü̃ chacuáxü̃ca̱x. Rü 15 ga ngunexü̃tama naxü̃tawa chayexma.
19 Rü yéma nüxü̃ chadau ta ga Chantiágu ga tórü Cori naenexẽ. Natürü taxuxü̃ma ga togü ga ngúexü̃gü ga tórü Cori imugüxü̃xü̃ chadau.
20 Rü Tupana choxü̃ nadau nax aixcüma yixĩxü̃ i ñaa ore i ñu̱xma pexca̱x chaxümatüxü̃.
21 Rü yemawena, rü Chíriaanewa rü Chiríchiaanewa chaxũ.
22 Natürü yema taenexẽgü ga Cristuaxü̃́ yaxõgüxü̃ ga Yudéaanewa yexmagüxü̃, rü taguma choxü̃xü̃chi nadaugü.
23 Rü chauchigaxicatama nixĩ ga nüxü̃ naxĩnüexü̃ ga ore ga ñaxü̃: “Ngẽma Pauru ga ü̃pa tawe ingẽchigüxü̃, rü ñu̱xma rü duü̃xü̃gümaxã nüxü̃ nixu i Tupanaarü ore i mexü̃ ga noxri iyanaxoxẽẽchaü̃xü̃”, ñaxü̃.
24 Rü yexguma ga yema duü̃xü̃gü rü Tupanaxü̃ nicua̱xüü̃gü nagagu ga yema Tupana chomaxã üxü̃.
