Gálatas 2:1-21
2 Rü 14 ga taunecüwena, rü wenaxarü Yerucharéü̃wa chaxũ namaxã ga Bernabé. Rü Títo rü ta íchayaga.
2 Rü yéma chaxũ yerü Tupana choxü̃ nanawe̱x nax nanaxwa̱xexü̃ nax yéma chaxũxü̃. Rü yéma Yerucharéü̃wa, rü yema yaxõgüxü̃arü ãẽ̱xgacügümaxã changutaque̱xe. Rü meama namaxã nüxü̃ chixu nachiga ga yema Tupanaarü ore i mexü̃ ga yema duü̃xü̃gü i tama Yudíugü ixĩgüxü̃maxã nüxü̃ chixuxü̃. Rü yexguma chaxica namaxã chayexmagu ga yema yaxõgüxü̃arü ãẽ̱xgacügü ga yexera nüxü̃ rücua̱xmaegüxü̃ rü meama namaxã nüxü̃ chixu ga chorü ngu̱xẽẽtaechiga, yerü tama chanaxwa̱xe nax nagu naxĩnüexü̃ nax natüca̱xmamare yixĩxü̃ i ngẽma puracü i chaxüxü̃.
3 Rü yema yaxõgüxü̃arü ãẽ̱xgacü rü norü me nixĩ ga yema namaxã nüxü̃ chixuxü̃. Rü yemaca̱x tama nanamu nax ínawiecha̱xmüü̃pe̱xechiraü̃xü̃ ga chomücü ga Títo woo Griégu nax yixĩxü̃.
4 Natürü nayexma ga ñuxre ga taenexẽgüneta ga bexmamare totanügu chocuxü̃. Rü yemagü nixĩ ga naxwa̱xegüxü̃ nax ínawíü̃cha̱xmüü̃pe̱xechiraü̃xü̃ i ngẽma yaxõgüxü̃ i tama Yudíugü ixĩgüxü̃. Yerü nanangugüchaü̃ rü aixcüma yixĩ nax Cristu nüxna tüxü̃ ínguxü̃xẽẽxü̃ ga yema mugü ga Moiché ümatüxü̃. Rü nanaxwa̱xegü nax wenaxarü nagu ixĩxü̃ ga yema mugü ga guxchaxü̃ ga Moiché ümatüxü̃.
5 Natürü bai ga írarüwa naga nax taxĩnüexü̃ ga yema duü̃xü̃gü. Yerü tanaxwa̱xe nax guxü̃guma naga pexĩnüexü̃ i ngẽma ore i mexü̃ i aixcüma ixĩxü̃.
6 Natürü yema yaxõgüxü̃arü ãẽ̱xgacügü ga Yerucharéü̃wa yexmagüxü̃ rü yexguma nüxü̃ naxĩnüegu ga yema chorü ngu̱xẽẽtae, rü namaxã nataãẽgü rü taxuxü̃ma ga ta̱xacü ga togü ga mugü choxna naxãgü nax namaxã changúexẽẽtaexü̃ca̱x. (Natürü tama yema nax ãẽ̱xgacügü yixĩgüxü̃gu charüxĩnü, erü nüxü̃ chacua̱x nax Tupanape̱xewa rü guxãma wüxiguxü̃.)
7 Natürü nümagü ga yema ãẽ̱xgacügü, rü nüxü̃ nicua̱xãchigü nax choxü̃ yixĩxü̃ ga namuxü̃ ga Tupana nax yema duü̃xü̃gü ga tama Yudíugü ixĩgüxü̃maxã nüxü̃ chixuxü̃ca̱x ga norü ore i mexü̃, yexgumarüxü̃ ga Pedruxü̃ nax namuxü̃rüxü̃ ga Tupana nax Yudíugümaxã nüxü̃ yaxuxü̃ca̱x ga yema ore.
8 Rü yimátama Tupana ga Pedruxü̃ mucü nax Yudíugümaxã nüxü̃ yaxuxü̃ca̱x ga ore i mexü̃, rü yimátama Tupana nixĩ ga choxü̃ mucü nax yema duü̃xü̃gü i tama Yudíugü ixĩgüxü̃maxã nüxü̃ chixuxü̃ca̱x i ngẽma norü ore.
9 Rü yemaca̱x ga Chantiágu rü Pedru rü Cuáü̃ ga yaxõgüxü̃arü ãẽ̱xgacügü, rü nüxü̃ nicua̱xãchigü nax choxü̃ naxunetaxü̃ ga Tupana nax chanaxüxü̃ca̱x i norü puracü. Rü yemaca̱x ga yema ãẽ̱xgacügü, rü toxme̱x niyauxãchigü ga choma rü Bernabé nax toxü̃ nüxü̃ nadauxẽẽgüxü̃ca̱x nax aixcüma namücügü tixĩgüxü̃ i Tupanaarü puracüwa. Rü nümagü rü ta norü me nixĩ nax ngẽma duü̃xü̃gü i tama Yudíugü ixĩgüxü̃tanüwa nax tanaxüxü̃ i Tupanaarü puracü rü nümagü i Yudíugütanüwa.
10 Rü yema namaxã toxü̃ naxucu̱xẽgüxü̃ nixĩ nax nüxü̃ tarüngü̃xẽẽgüxü̃ca̱x ga yema yaxõgüxü̃ ga ngearü diẽruã̱xgüxü̃. Rü yexicatama nixĩ ga toxna nüxü̃ nacua̱xãchixẽẽxü̃. Rü choma rü woetama ngẽma nixĩ i guxü̃guma marü chaxüxü̃.
Pauru rü Antioquíawa Pedruxü̃ naxuxcu̱xẽ
11 Natürü yixcüra ga yexguma Antioquíawa naxũxgu ga Pedru, rü noxtacüma nüxü̃ nüxü̃ chaxĩnüxẽxẽ, yerü tama aixcüma name ga yema naxüxü̃ namaxã ga yema yaxõgüxü̃ ga tama Yudíugü ixĩgüxü̃.
12 Yerü noxri rü yema duü̃xü̃gü ga tama Yudíugü ixĩgüxü̃maxã nachibü ga Pedru. Natürü yexguma yéma nangugügu ga ñuxre ga Yudíugü ga yaxõgüxü̃ ga Chantiágu yéma mugüxü̃, rü Pedru rü marü tama yema duü̃xü̃gü ga tama Yudíugü ixĩgüxü̃maxã nachibüchaü̃. Rü Yudíugümaxãxicatama nachibü ga yexguma, yerü nüxü̃ namuü̃ ga yema Yudíugü ga yéma ngugüxü̃ ga nagu ĩxü̃ ga yema nacüma nax Tupanaca̱x ínawíecha̱xmüü̃pe̱xechiraü̃güxü̃.
13 Rü yema togü ga Yudíugü ga yaxõgüxü̃, rü yexguma nüxü̃ nadaugügu ga yema tama mexü̃ ga Pedru üxü̃, rü nümagü rü ta nanaxügü ga yema. Rü düxwa ga Bernabé rü ta natanügu naxã ga yema ügüxü̃.
14 Natürü yexguma nüxü̃ chada̱u̱xgu nax tama Tupanaarü ore i mexü̃ tüxü̃ ngu̱xẽẽxü̃ãcüma namaxẽxü̃ ga yema yatügü, rü guxü̃ ga yaxõgüxü̃pe̱xewa Pedruxü̃ nüxü̃ chaxĩnüxẽxẽ. Rü ñacharügü nüxü̃: “Dücax i cuma nax Yudíuchire̱x quixĩxü̃, rü ngẽma tama Yudíugü ixĩgüxü̃ãcü cumaxü̃. ¿Rü ñuxãcü i ñu̱xma i cunaxwa̱xexü̃ nax Yudíugücümagu naxĩxü̃ i ngẽma duü̃xü̃gü i tama Yudíugü ixĩgüxü̃?” ñacharügü nüxü̃.
Yudíugü rü woo ngẽma duü̃xü̃gü i tama Yudíugü ixĩgüxü̃ rü norü õgagu nixĩ i nayauxgüãxü̃ i maxü̃ i taguma gúxü̃
15 Rü cumaxã nüxü̃ chixu rü yixema rü woetama torü bucümatama Yudíugü tixĩgü rü tama ngẽma togü i duü̃xü̃gü i pecaduã̱xgüxü̃ tixĩgü.
16 Rü nüxü̃ tacua̱xgü rü yema mugü ga Moiché ümatüxü̃ rü tama aixcüma tüxü̃ nimexẽxẽ i Tupanape̱xewa, yerü taxúema aixcüma naga taxĩnüe ga yema mugü. Natürü i ñu̱xma rü Tupana tüxü̃ nadau nax imexü̃ erü Ngechuchu ya Cristuaxü̃́ tayaxõgü. Rü yemaca̱x i yixema rü Ngechuchu ya Cristuaxü̃́ tayaxõgü nax ngẽmagagu Tupana tüxü̃ nadauxü̃ nax imexü̃. Rü ngẽmawa nüxü̃ tacua̱xgü rü tama ngẽma mugügagu nixĩ nax Tupanape̱xewa imexü̃, erü taxúema aixcüma naga taxĩnü i ngẽma mugü nax ngẽmaãcü Tupanape̱xewa imexü̃ca̱x.
17 Rü ñu̱xma i yixema rü Cristuaxü̃́ tayaxõgü, rü ngẽmaca̱x nixĩ i Tupanape̱xewa imexü̃. Natürü ngẽxguma chi wüxi i ngunexü̃gu rü yixema nagu rüxĩnüegu rü Cristugagu nüxna taxĩgachi i ngẽma mugü rü ngẽmaca̱x tipecaduã̱xgü, rü ngürüãchi tá nagu tarüxĩnüe nax Cristu tüxü̃ pecaduã̱xẽẽxü̃. Natürü tama ngẽmaãcü nixĩ, erü Cristu rü tagutáma texéxü̃ napecaduã̱xẽxẽ.
18 Natürü ngẽxguma chi wenaxarü naxca̱x chataegugu i ngẽma nũxcümaü̃güxü̃ i mugü rü chi nüxü̃ charüxoxgu nax Cristuaxü̃́ chayaxõxü̃, rü chi aixcüma wüxi i pecaduã́xü̃ chixĩ.
19 Yerü yexguma yema mugüwa changu̱xgu, rü düxwa nüxü̃ chicua̱xãchi nax tama yanguxü̃ ga yema mugü nax choxü̃ namexẽẽxü̃ Tupanape̱xewa. Rü ngẽmaca̱x i ñu̱xma rü Cristuaxü̃́ chayaxõ nax Tupanape̱xewa chamexü̃ca̱x rü naxca̱xicatama chamaxü̃xü̃ca̱x. Rü Cristu rü curuchagu nayu nax iyanaxoxü̃ca̱x ga nũxcümaü̃xü̃ ga chorü maxü̃ ga choxü̃́ yexmaxü̃ ga yexguma yema mugügu chixũxgu.
20 Rü choma rü wüxigu Cristumaxã curuchawa chipota. Rü ñu̱xma rü marü tama chaugümaxãtama ichacua̱x, natürü Cristu nixĩ ya chomaxã icuácü erü chowa namaxü̃. Rü ñu̱xma rü Tupana Nane ya Cristuaxü̃́ chayaxõõcüma nixĩ i chamaxü̃xü̃. Rü nüma nixĩ ga choxü̃ nangechaü̃xü̃, rü nügü inaxãxü̃ nax cha̱u̱xca̱x nayuxü̃ca̱x.
21 Rü tama nüxü̃ chaxoxchaü̃ i Tupanaarü ngechaü̃. Rü yexguma chi yema mugügu ixĩxü̃gagu Tupanape̱xewa imexgu, rü natüca̱xmamare chi nixĩ nax nayuxü̃ ga Cristu.
