Gálatas 3:1-29
3 Pa Chauenexẽgü i Gárataanecüã̱x, pema rü tama peãẽxü̃ pecua̱x. Rü yexguma petanüwa tayexmagügu rü meama guxãpe̱xewa pemaxã nüxü̃ tixu nax curuchagu taxca̱x nayuxü̃ ga Ngechuchu ya Cristu. ¿Rü texé pexü̃ tawomüxẽxẽ i ñu̱xma nax tama naga pexĩnüexü̃ca̱x i ngẽma ore i aixcüma ixĩxü̃ ga pemaxã nüxü̃ tixuxü̃?
2 Rü ñu̱xma rü pexna chaca, rü chanaxwa̱xe nax choxü̃ pengaxü̃xü̃. ¿Ẽ̱xna yema mugü nax pingu̱xẽxẽgüxü̃gagu yixĩxü̃ ga penayaxuxü̃ ga Tupanaãxẽ ya Üünecü, rü ẽ̱xna ngẽma ore i mexü̃ ga nüxü̃ pexĩnüexü̃ rü pixõgüxü̃gagu yixĩxü̃ ga penayaxuxü̃?
3 Pema rü tama peãẽxü̃ pecua̱x. Noxri rü Cristuaxü̃́ peyaxõgü yerü Tupanaãxẽ ya Üünecü pewa napuracü. ¿Rü ñuxãcü i ñu̱xma i nagu perüxĩnüexü̃ nax wena naxca̱x pewoeguxü̃ i ngẽma duü̃xü̃güarü ĩnümare ixĩxü̃?
4 ¿Ẽ̱xna natüca̱xmamare nixĩ ga yema mexü̃ ga Tupana pexca̱x üxü̃? Rü chierüx tama natüca̱xmamare yixĩxgu ga yema.
5 Rü yexguma Tupana pexna namuxgu ga Naãxẽ ya Üünexü̃, rü petanüwa naxüãgu ga taxü̃ ga mexü̃gü ga norü poramaxã naxüxü̃, ¿rü ta̱xacügagu nixĩ ga naxüaxü̃ ga yema? ¿Pexca̱x rü mugü nax pingu̱xẽẽxü̃gagu yixĩxü̃ ga Tupana naxüxü̃ ga yema? Tama yemagagu nixĩ. Tupana rü petanüwa nanaxü ga yema taxü̃ ga mexü̃gü yerü nüxü̃́ peyaxõgü ga norü ore ga nüxü̃ pexĩnüexü̃.
6 Rü dücax, torü o̱xi ga Abraáü̃ rü Tupanaaxü̃́ nayaxõ, rü yemaca̱x Tupana nüxü̃ nadau nax namexü̃.
7 Rü ngẽmawa nüxü̃ pecua̱x rü ngẽma duü̃xü̃gü i Tupanaaxü̃́ yaxõgüxü̃ nixĩ i aixcüma Abraáü̃tanüxü̃ ixĩgüxü̃ i Tupanape̱xewa.
8 Rü Tupanaarü ore i ümatüxü̃wa rü nüxü̃ nixu nax Tupanape̱xewa yamexü̃ i ngẽma duü̃xü̃gü i yaxõgüxü̃ i woo tama Yudíugü ixĩgüxü̃. Rü yemaca̱x ga Tupana rü Abraáü̃maxã nüxü̃ nixu ga ñaa ore i mexü̃ i ñaxü̃:“Rü cugagu tá nüxü̃ charüngü̃xẽxẽxü̃ i guxü̃ma i nachixü̃anecüã̱x i duü̃xü̃gü”,
ñaxü̃.
9 Rü ngẽmaca̱x i ñu̱xma rü Tupana nüxü̃ nixu nax nape̱xewa namexü̃ i guxü̃ma i duü̃xü̃gü i yaxõgüxü̃, yexgumarüxü̃ ga Abraáü̃ rü norü õgagu Tupanape̱xewa namexü̃.
10 Natürü chixexü̃wa nangẽxmagü i guxü̃ma i ngẽma nagu rüxĩnüexü̃ nax mugü yanguxẽẽgüxü̃gagu Tupanape̱xewa yamexü̃. Erü Tupanaarü ore i ümatüxü̃wa rü ñanagürü:“Rü guxü̃ma i duü̃xü̃gü i tama aixcüma yanguxẽẽgüxü̃ i guxü̃ma i ngẽma mugü i ümatüxü̃, rü chixexü̃wa nangẽxmagü”,
ñanagürü.
11 Rü ngẽmaãcü meama nango̱x nax tama ngẽma mugü inguxẽẽxü̃ca̱x yixĩxü̃ nax Tupanape̱xewa imexü̃. Erü Tupanaarü ore i ümatüxü̃wa rü ñanagürü:“Rü yíxema tümaarü õgagu Tupanape̱xewa mexẽ, rü yíxema tá tixĩ ya aixcüma tüxü̃́ nangẽxmaxẽ i maxü̃ i taguma gúxü̃”,
ñanagürü.
12 Natürü ngẽma mugü rü tama ngẽma õwa ne naxũ. Erü Tupanaarü orewa rü ñanagürü:“Rü yíxema aixcüma naga ĩnüxe i guxü̃ma i ngẽma mugü, rü ngẽmagagu tá tüxü̃́ nangẽxma i tümaarü maxü̃”,
ñanagürü.
13 Natürü ga Cristu rü nawa tüxü̃ ínanguxü̃xẽxẽ ga yema mugü ga chixexü̃gu tüxü̃ yixẽẽxü̃. Rü nüma ga Cristu rü chixexü̃wa nügü nayexmaxẽxẽ ga yexguma curuchagu nayu̱xgu. Erü Tupanaarü ore i ümatüxü̃wa, rü ñanagürü:“Rü guxãma ya yíxema wüxi i naiwa tüxü̃ natuxẽẽgüãcüma yuxe, rü chixexü̃wa tangexma”,
ñanagürü.
14 Rü yemaacü curuchagu nayu ga Ngechuchu ya Cristu nax nüxü̃ nangü̃xẽẽxü̃ca̱x i guxü̃ma i ngẽma tama Yudíugü ixĩgüxü̃, yema Tupana Abraáü̃maxã ixunetaxü̃rüxü̃. Rü ngẽmaca̱x tórü õgagu guxãma tanayaxu i Tupanaãxẽ ya Üünecü ga Tupana tamaxã nüxü̃ ixuxü̃.
Tupanaarü uneta rü ngẽma mugüarü yexera name
15 Pa Chauenexẽgüx, ñu̱xma rü tá pemaxã nüxü̃ chixu i wüxi i cua̱xruxü̃. Rü ngẽxguma wüxi ya yatü rü texémaxã ta̱xacüca̱x inaxunetagu, rü wüxi i poperagu nanaxümatü rü ñu̱xũchi naéga nagu naxümatü, rü ngẽmaãcü taxucürüwa texé itayanaxoxẽxẽ rü ẽ̱xna tanaxüchicüü i ngẽma norü uneta.
16 Rü dücax, rü yexgumarüü̃tama nixĩ ga nangupetüxü̃ ga yexguma Tupana rü Abraáü̃maxã rü Abraáü̃taamaxã inaxunetagu. Rü Tupanaarü ore i ümatüxü̃wa rü tama “Abraáü̃taagü”, ñanagürü, yerü tama muxü̃ma ga duü̃xü̃güchiga nidexa. Natürü yema ore rü “Abraáü̃taxa”, ñanagürümare, yerü wüxitama ga duü̃xü̃chiga nixĩ ga yadexaxü̃. Rü yema rü Cristuchiga nixĩ.
17 Rü ngẽmaãcü pemaxã chanango̱xẽxẽ nax Tupana rü Abraáü̃maxã namexẽẽãxü̃ rü namaxã inaxunetaxü̃ nax Cristugagu tá yixĩxü̃ i duü̃xü̃güxü̃ nangü̃xẽẽxü̃. Rü ngẽmaca̱x i ñu̱xma rü yema Moiché ümatüxü̃ ga mugü ga 430 ga taunecü yema unetawena ínguxü̃, rü taxucürüwama inayanaxoxẽxẽ ga yema Tupanaarü uneta ga Abraáü̃maxã nüxü̃ yaxuxü̃.
18 Rü ngẽxguma chi yema mugügagu yixĩxgu nax Tupana inaxunetaxü̃ rü natüca̱xmamare chi nixĩ ga yema Tupanaarü uneta ga nüxíra Abraáü̃maxã nüxü̃ yaxuxü̃. Natürü aixcüma nixĩ nax ngetanüãcüma Abraáü̃maxã nüxü̃ yaxuxü̃ ga yema uneta.
19 Rü ñu̱xma rü ¿ta̱xacüwa namexü̃ i ngẽma mugü ga Moiché ümatüxü̃? Rü dücax, Tupana rü marü Abraáü̃maxã inaxunetaguwena nixĩ ga inaxããxü̃ ga yema mugü, nax yemaacü duü̃xü̃güxü̃ nüxü̃ nadauxẽẽxü̃ca̱x ga norü pecadugü. Rü yemaacü nixĩ ñu̱xmata ínangu ga gumá Abraáü̃taxa ya Cristu. Rü gumáchiga nixĩ ga Abraáü̃maxã inaxunetaxü̃ ga Tupana ga noxrix. Rü yema mugü, rü Tupana rü norü orearü ngeruü̃gü ga daxũcüã̱xmaxãxíra nüxü̃ nixu. Rü yemagü nixĩ ga nüxĩ́ Moichémaxã nüxü̃ ixugüxü̃, rü nüma ga Moiché rü duü̃xü̃gümaxã nüxü̃ nixu.
20 Natürü yexguma Tupana Abraáü̃maxã ixunetagu, rü nümaxüchitama ga Tupana nixĩ ga Abraáü̃maxã nüxü̃ yaxuxü̃ ga yema norü uneta. Rü tama togümaxãxíra nüxü̃ nixu nax yemagü nüxĩ́ Abraáü̃maxã nüxü̃ ixugüexü̃ca̱x.
Ta̱xacüca̱x duü̃xü̃güna nanaxã ga Tupana ga yema mugü
21 ¿Rü ñuxũ ñapegüxü̃ i ñu̱xmax? ¿Pexca̱x ẽ̱xna rü yema Moiché ümatüxü̃ ga mugü rü inayanaxoxẽxẽ i Tupanaarü unetagü? Rü dücax, tama ngẽmaãcü nixĩ. Yerü yexguma chi naporagu ga yema mugü nax tüxna naxããxü̃ i maxü̃ i taguma gúxü̃, rü chi Tupanape̱xewa time i ngẽxguma meama yanguxẽẽgu i ngẽma mugü.
22 Natürü tama ngẽmaãcü nixĩ. Erü Tupanaarü ore i ümatüxü̃wa nüxü̃ tadau nax guxü̃ma i duü̃xü̃gü rü pecadutüü̃wa nangẽxmagüxü̃. Rü ngẽmaca̱x i ñu̱xma rü yíxema Ngechuchu ya Cristuaxü̃́ yaxõgüxexicatama tixĩ ya nayauxgüxe i ngẽma maxü̃ i aixcüma mexü̃ ya Tupana tamaxã ixunetaxü̃.
23 Rü yexguma tauta ínanguxgu ga Cristu nax nüxü̃́ yaxõgüxü̃ca̱x, rü mugütüü̃wa tayexmagü rü tamaxã inacua̱x. Rü yemaacü tixĩgü rü ñu̱xmata Tupana taxca̱x ínanguxẽxẽ ga Ngechuchu ya Cristu nax nüxü̃́ yaxõgüxü̃ca̱x.
24 Rü yemaacü ga yema mugü rü tamaxã inacua̱x ñu̱xmata ínangu ga Cristu nax nüxü̃́ yaxõgüxü̃ca̱x rü ngẽmaãcü Tupanape̱xewa imexü̃ca̱x.
25 Natürü i ñu̱xma nax marü ínanguxü̃ ya Cristu nax nüxü̃́ yaxõgüxü̃ca̱x, rü marü tama ngẽma mugütüü̃wa tangexmagü. Rü ñu̱xma rü marü taxuca̱xma tü̱xcüü̃ tamaxã inacua̱x i ngẽma mugü.
26 Rü ñu̱xma nax Ngechuchu ya Cristuaxü̃́ peyaxõgüxü̃, rü Tupanaxacügü pixĩgü i guxãma i pemax.
27 Rü ñu̱xma nax Cristuégagu ípebaiü̃xü̃, rü Cristuarü pixĩgü, rü nüma rü pemaxã inacua̱x nax naxrüxü̃ pixĩgüxü̃ca̱x.
28 Rü ñu̱xma rü Tupanape̱xewa rü nüetama nixĩ ega woo Yudíugü pixĩgügu rü ẽ̱xna tama. Rü nüetama ega woo wüxi i coriarü duü̃xü̃gü pixĩgügu rü ẽ̱xna taxúearü duü̃xü̃gü pixĩgügu. Rü nüetama ega woo piyatügu rü ẽ̱xna pingexgu. Erü ñu̱xma nax Ngechuchu ya Cristuarü duü̃xü̃gü nax pixĩgüxü̃, rü wüxitama i duü̃xü̃ pixĩgü i guxãma i pemax.
29 Rü ñu̱xma nax Cristuarü pixĩgüxü̃, rü ngẽmaca̱x nixĩ i aixcüma Abraáü̃taagü pixĩgü. Rü ngẽmaca̱x i pema rü tá ta penayaxu i guxü̃ma ga yema Abraáü̃maxã inaxunetaxü̃ ga Tupana.
