Gálatas 4:1-31
4 Rü dücax, ngẽxguma wüxi i buxü̃ yunatügu, rü ngẽma buxü̃ rü tama ngẽxgumatama nanayaxu i nanatüarü ngẽmaxü̃gü. Rü woo guxü̃ma i nanatüarü ngẽmaxü̃arü yora yixĩxgu, natürü ngexü̃rüüxü̃ i nanatüarü mugüruü̃mare nixĩ ñu̱xmata naya̱x.
2 Rü ngẽmaca̱x nangẽxma i ngẽma buxü̃arü dauruxü̃ i namaxã icuáxü̃ rü nüxü̃́ nüxna dauxü̃ i ngẽma nanatüarü ngẽmaxü̃gü ñu̱xmata nawa nangu ya yimá taunecü ya noxri nanatü nagu unetacü nax ngẽma buxü̃ rü nügümaxã inacuáxü̃ca̱x.
3 Rü yexgumarüxü̃ ta nixĩ ga tamaxã nangupetüxü̃ ga noxrix. Yerü yexguma tauta Cristuxü̃ icua̱xgu, rü natüü̃wa tayexmagü ga yema mugü i ñoma i naanemaxã icua̱xgüxü̃.
4 Natürü yexguma nawa nanguxgu ga yema ngunexü̃ ga inaxunetaxü̃ ga Tupana, rü núma nanamu ga Nane. Rü duü̃xü̃gürüxü̃ wüxi ga ngewa nabu ga gumá Nane. Rü yema Moiché ümatüxü̃ ga mugütüü̃wa nayexma ga yexguma nabuxgu.
5 Rü núma nangu ga Tupana Nane nax tüxü̃ ínanguxü̃xẽẽxü̃ca̱x i guxãma i yixema ga noxri mugütüü̃wa nax iyexmagüxü̃. Rü yemaacü tüxü̃ narüngü̃xẽxẽ ga nüma ga Tupana Nane nax Nanatü ya Tupanamaxã tüxü̃ yaxuxü̃ca̱x nax aixcüma naxacügüxüchi ixĩgüxü̃.
6 Rü Tupana tüxna nanamu ga Naãxẽ ya Üünexü̃ nax tüxü̃ nüxü̃ nadauxẽẽxü̃ca̱x nax aixcüma naxacügüxüchi ixĩgüxü̃. Rü ngẽmaca̱x i ñu̱xma rü marü name i “Pa Chaunatüx”, ñatarügü nüxü̃ ya Tupana.
7 Rü ngẽmaca̱x i ñu̱xma rü Tupanaxacüxüchi quixĩ, rü tama norü mugüruü̃mare quixĩ. Rü ñu̱xma nax naxacüxüchi quixĩxü̃, rü norü ngúchaü̃ nixĩ nax Cristugagu cuxna naxããxü̃ i ngẽma maxü̃ i taguma gúxü̃.
Pauru rü naxca̱x naxoegaãxẽ ga yema yaxõgüxü̃ ga Gárataanewa yexmagüxü̃
8 Rü ü̃pa ga yexguma taxũta Tupanaxü̃ pecua̱xgu, rü perü tupananetagütüü̃wa peyexmagü rü nüxü̃ picua̱xüü̃gü ga yema tama aixcüma Tupana ixĩgüxü̃.
9 Natürü i ñu̱xma nax Tupanaxü̃ pecuáxü̃ rü nüma nax pexü̃ nacuáxü̃, rü ¿tü̱xcüü̃ wena naxca̱x pewoeguchaü̃ i ngẽma mugü i ñoma i naanemaxã icua̱xgüxü̃? ¿Rü tü̱xcüü̃ penaxwa̱xe nax wena natüü̃wa pegü pengẽxmagüxẽẽxü̃ i ngẽma mugü i tama aixcüma poraexü̃ i natüca̱xmamare ixĩgüxü̃?
10 Rü dücax i pemax, rü ñu̱xma rü ta rü ngẽma nũxcümaü̃güxü̃ i Yudíugücümagu pexĩãma woo Cristuaxü̃́ nax peyaxõgüxü̃. Rü penaxaure i ñuxre i ngunexü̃gü rü ñuxre ya tauemacügü rü ñuxre ya taunecügü rü ñuxre i petagü, erü nagu perüxĩnüe nax ngẽmaãcü Tupanape̱xewa tá pimexü̃.
11 Rü ngẽmaca̱x poraãcü chaxoegaãxẽ, erü ngürüãchi natüca̱xmamare tá nixĩ ga yema puracü ga petanüwa chaxüxü̃.
12 Pa Chauenexẽgüx, pexü̃ chaca̱xaxü̃ nax chauxrüxü̃ tama nagu pexĩxü̃ i ngẽma nacümagü i chixexü̃. Rü ngẽxgumarüxü̃ nax pema nüxü̃ perüxoexü̃ i pecümagü i chixexü̃, rü choma rü ta nüxü̃ charüxo nax ngẽma Yudíugüarü mugügu chixũxü̃. Rü dücax, yexguma noxri petanüwa chayexmagu rü tama choxü̃ pexo, rü ngẽmaca̱x chanaxwa̱xe i ñu̱xma rü ta chauga pexĩnüe.
13 Rü pema rü marü nüxü̃ pecua̱x rü yexguma noxri pemaxã nüxü̃ chixuxgu ga Tupanaarü ore i mexü̃, rü yema nax chida̱xawexü̃gagu nixĩ ga petanügu charüxã́ũxü̃ rü pemaxã nüxü̃ chixuxü̃ ga Tupanaarü ore.
14 Rü yema da̱xawe ga choxü̃́ yexmaxü̃, rü woo pexca̱x rü wüxi ga guxchaxü̃ nixĩ, natürü tama choxü̃ pexo rü tama choxü̃ ípeta̱xüchi. Rü meama choxü̃ peyauxgü ñoma wüxi ga Tupanaarü orearü ngeruxü̃ i daxũcüã̱xrüxü̃. Rü ñoma Ngechuchu ya Cristu chixĩxü̃rüxü̃, meama choxü̃ peyauxgü.
15 ¿Natürü ta̱xacü ẽ̱xna nangupetü namaxã ga yema perü taãxẽ ga noxri pexü̃́ yexmaxü̃? Erü pemaxã nüxü̃ chixu rü noxri petanüwa chayexmagu rü poraãcü chomaxã petaãẽgü. Rü yexguma chi pexü̃́ natauxchagu, rü chi pexetü peyaxu nax choxna penaxãxü̃ca̱x, yerü yemaacü poraãcü chomaxã petaãẽgü ga yexguma.
16 ¿Rü ñu̱xmax rü pexca̱x rü perü uanü chixĩ, erü aixcüma chanango̱xẽxẽ i ngẽma guxchaxü̃gü i pexü̃́ ngẽxmaxü̃?
17 Rü ngẽma duü̃xü̃gü i pexü̃ ngúexẽẽxü̃ nax Yudíugücümagu pexĩxü̃ca̱x, rü tama mexü̃ i ĩnümaxã pexü̃ nangúexẽxẽ, erü nümagü rü toxna pexü̃ nixĩgachixẽẽchaü̃ nax ngẽmaãcü naga pexĩnüexü̃ca̱x.
18 Rü ngẽma orearü uruü̃gü rü marü name nax pegu naxĩnüexü̃, natürü nanaxwa̱xe nax perü mexü̃ca̱x nadaugüxü̃ i guxü̃guma. Rü tama name nax petanüwa changexmaguxicatama perü mexü̃ca̱x nax nadaugüxü̃ i ngẽma duü̃xü̃gü.
19 Pa Chauxacügüx, wenaxarü ñoma wüxi i mama ngĩxacümaxã ngu̱xnecacürüxü̃ poraãcü pexca̱x ngúxü̃ chinge nax aixcüma mea Cristuaxü̃́ peyaxõgüxü̃ca̱x rü aixcüma naxca̱x nax pemaxẽxü̃ca̱x. Rü ngẽmaãcü tá chixĩ ñu̱xmatáta Cristu naxwa̱xexü̃rüxü̃ pixĩgü i perü maxü̃wa.
20 Rü chierü petanüwa changexmagu i ñu̱xma nax mea pemaxã chidexaxü̃ca̱x. Erü ñu̱xma nax pexna chayáxü̃guxü̃ rü tama nüxü̃ chacua̱x nax ñuxãcü tá pexü̃ charüngü̃xẽxẽxü̃.
Ore i cua̱xruxü̃ i Abraáü̃xü̃taxü̃ ga Agáchiga rü naxma̱xü̃chi ga Chárachiga
21 Rü pema nax ngẽma Moiché ümatüxü̃ i mugütüü̃wa pegü pengẽxmagüxẽẽchaü̃xü̃, rü chanaxwa̱xe i chomaxã nüxü̃ pixu rü aixcüma nüxü̃ pecuá nax ñuxũ ñaxü̃ i ngẽma mugü.
22 Erü ngẽma mugüwa nüxü̃ tadau rü Abraáü̃ rü nüxü̃́ nayexma ga taxre ga nane. Rü wüxi ga nane rü naxü̃taxü̃ ga Agáwa nüxü̃́ nayexma, rü nai ga nane rü naxma̱xü̃chi ga Chárawa nüxü̃́ nayexma.
23 Rü gumá nane ga naxü̃taxü̃wa nüxü̃́ yexmacü, rü nabu yerü yema nixĩ ga norü ngúchaü̃ ga Abráü̃. Natürü gumá nane ga naxma̱xü̃chiwa nüxü̃́ yexmacü, rü nabu yerü yemaacü inaxuneta ga Tupana.
24 4:24-25 Rü ngẽma orewa nangẽxma i cua̱xruü̃gü i pexca̱x chango̱xẽẽchaü̃xü̃. Rü yema taxre ga ngexü̃gü rü taxre i cua̱xruü̃gü nixĩgü nax ngẽmawa nüxü̃ icuáxü̃ca̱x nax ñuxãcü Tupana duü̃xü̃güxü̃ rüngü̃xẽẽxü̃ nax naxü̃tawa nangugüxü̃ca̱x. Rü yema nüxíraxü̃xü̃ ga norü ngü̃xẽxẽ nixĩ ga yexguma Chinaíarü ma̱xpǘnewa Moichéna naxããgu ga norü mugü nax naga naxĩnüexü̃ca̱x ga duü̃xü̃gü. Rü yema mugü ga Moichéna naxãxü̃ ga Chinaíwa rü Agá iyixĩ ga norü cua̱xruxü̃. Rü yema nge ga Agá rü naxü̃taxü̃ iyixĩ ga Abráü̃ rü yemaca̱x ga ngĩxacügü rü ngĩxrüü̃tama togütüü̃wa nayexmagü rü tama ínanguxü̃. Rü yemaacü ga yema nge rü wüxi i cua̱xruxü̃ iyixĩ nachiga i ngẽma Yudíugü i ñu̱xma maxẽxü̃ rü ngẽma mugüwe rüxĩxü̃. Erü nümagü rü ñu̱xma rü ta natüü̃wa nangẽxmagü i ngẽma mugü ga Moiché yaxuxü̃ ga ma̱xpǘne ga Chinaí ya Arábiaanewa ngẽxmanewa. Rü ñu̱xma rü ta ngẽma mugügu naxĩ rü tama nüxü̃ narüxoe.
25 Nüü̃ nadau 4:24
26 4:26-28 Natürü yema nge ga Abráü̃ naxma̱xü̃chi rü tama Agárüxü̃ iyixĩ. Rü ngĩne ga Ichaá rü nabu yerü Tupanaaxü̃́ nayaxõ ga Abráü̃ ga yexguma Tupana namaxã nüxü̃ ixuxgu rü tá nax nüxü̃́ nangẽxmaxü̃ ga wüxi ga nane. Rü ñu̱xma Pa Chauenexẽgüx, yixema rü ta tayaxõ i ngẽma Tupana tamaxã ixunetaxü̃. Rü ngẽmaca̱x i ñu̱xma rü tama ngẽma nũxcümaü̃güxü̃ i mugütüü̃wa tangexmagü. Rü ngẽmaãcü Abráü̃ naxma̱xü̃chixacügürüxü̃ tixĩgü. Rü ngẽmaãcü nüxü̃ tadau nax aixcüma Tupana yanguxẽẽxü̃ i norü ore ga Abráü̃ naxma̱xü̃chichiga ümatüxü̃ i ñaxü̃:“¡Nataãxẽ, Pa Ngecü i Ngexacücü!¡Rü curü taãẽmaxã rüxáixnaxü̃ woo tagumachire̱x nax cuxãxãcüxü̃!Erü tá cuxãxãcü, rü ngẽma ngexü̃ i cuxü̃taxü̃ i cuteaxü̃́ ãxacüxü̃arü yexera tá cuxü̃́ nangẽxma i cuxacügü”,
ñaxü̃.
27 Nüü̃ nadau 4:26
28 Nüü̃ nadau 4:26
29 Natürü gumá Abráü̃ nane ga naxü̃taxü̃wa nüxü̃́ yexmacü, rü naxchi naxai ga gumá Abráü̃ nane ga Tupanaarü unetagagu bucü. Rü ngẽxgumarüxü̃ ta i yixema nax Tupanaãxẽ i Üünexü̃gagu tüxü̃́ nangẽxmaxü̃ i maxü̃, rü taxchi naxaxaie i ngẽma Yudíugü i naxwa̱xegüxü̃ nax nagu ixĩxü̃ i ngẽma mugü ga Moiché ümatüxü̃.
30 ¿Natürü ñuxũ ñaxü̃ i Tupanaarü ore i ümatüxü̃wa? Rü dücax, ngẽmawa Abraáü̃maxã nüxü̃ nixu nax ngĩxü̃ ínatáxü̃ca̱x ga naxü̃taxü̃ ngĩnemaxã, yerü taxucürüwama yema naxü̃taxü̃waxü̃cü ga nanemaxã nayayauxye ga norü yemaxü̃ ga naxma̱xwaxü̃cü ga nanearü tá ixĩxü̃.
31 Rü ngẽmaãcü, Pa Chauenexẽgüx, rü nüxü̃ tadau rü tama Abráü̃ naxü̃taxü̃xacügürüxü̃ tixĩgü, erü tama ngẽma mugütüü̃wa tangexmagü. Natürü Abráü̃ naxma̱xwaxü̃güxe tixĩgü, erü Tupanaarü unetagagu tüxü̃́ nangẽxma i tórü maxü̃.
