Gálatas 5:1-26
5 Rü ñu̱xma ya Cristu rü marü tüxü̃ ínanguxü̃ẽxẽ nax tama ngẽma mugütüü̃wa ingexmagüxü̃ca̱x. Rü ngẽmaca̱x name nixĩ i pegüna pedaugü nax tama wena natüü̃wa pegü pengẽxmagüxẽẽxü̃ca̱x i ngẽma mugü.
2 ¡Rü choxü̃́ iperüxĩnüe! Rü choma i Pauru rü pemaxã nüxü̃ chixu, rü ngẽxguma chi nagu pexĩxgu nax pegü ípewíecha̱xmüü̃pe̱xechiraü̃xü̃ nax ngẽmaãcü penayaxuxü̃ca̱x i perü maxü̃, rü ngẽxguma ya Cristu rü chi taxuwama pexü̃́ name.
3 Rü wena pemaxã nüxü̃ chixu rü ngexü̃rüüxü̃ i yatü i nügü íwíecha̱xmüü̃pe̱xechiraü̃chaü̃xü̃ nax ngẽmaãcü Tupanape̱xewa namexü̃ca̱x, rü name nixĩ i nüxna nacua̱xãchi nax taxucürüwa ngẽmaãcü naya̱u̱xãxü̃ i norü maxü̃ ega tama aixcüma naga naxĩnügu i guxü̃ma i ngẽma mugü.
4 Rü pema i nagu rüxĩnüexe nax Tupanape̱xewa pimexü̃ ega nagu pexĩxgu i ngẽma mugü, rü pemaxã nüxü̃ chixu rü marü Cristuna pixĩgachi. Rü ngẽxgumarüxü̃ ta nüxü̃ pexoe i ngẽma ngechaü̃ ga Tupana namaxã pexü̃ ngechaü̃xü̃.
5 Natürü yixema rü Tupanaãxẽ i Üünexü̃arü ngü̃xẽẽmaxã ítanangu̱xẽxẽ nax Cristuaxü̃́ yaxõgüxü̃gagu Tupanape̱xewa imexü̃.
6 Rü ngẽmaca̱x i ñu̱xma nax Ngechuchu ya Cristuarü duü̃xü̃gü ixĩgüxü̃, rü taxuwama name ega woo íiwíecha̱xmüpe̱xechiraü̃gu rüe̱xna tama, erü tama ngẽma nixĩ i Tupanape̱xewa tüxü̃ mexẽẽxü̃. Rü ngẽma Tupana naxwa̱xexü̃ i ñu̱xma nixĩ nax aixcüma yaxõgüxü̃ rü ngẽmaãcü yigü nax ingechaü̃güxü̃.
7 Pema rü meama ipenaxügü nax Cristuwe perüxĩxü̃. ¿Rü texé pexü̃́ nüxü̃ taxoo̱x nax tama naga pexĩnüexü̃ca̱x i ngẽma ore i aixcüma ixĩxü̃?
8 Rü pemaxã nüxü̃ chixu, rü tama Tupana ga noxri pexca̱x cacü nixĩ ya yimá pexü̃́ nüxü̃ oócü.
9 Rü wüxi i íxraxü̃ i paũarü pu̱xẽẽruxü̃ rü guxü̃ma i ngẽma paũchara nipu̱xẽxẽ.*
10 Choma rü chayaxõ nax tórü Cori tá pexü̃ rüngü̃xẽẽxü̃ nax choma nagu charüxĩnüxü̃gu perüxĩnüexü̃ca̱x. Natürü ngẽma duü̃xü̃ i pexü̃ chixeãẽxẽẽxü̃, rü Tupana rü tá nanapoxcu woo texé tixĩxgu.
11 Rü dücax, Pa Chauenexẽgüx, rü ngẽxguma chi pexü̃ changúexẽẽgu nax pegü ípewíü̃cha̱xmüü̃pe̱xechiraü̃xü̃, rü ngẽma Yudíugü rü taxũchima chauxchi naxaie rü taxũchima chowe ingẽxü̃tanü, erü taxũchima naãxẽwa nangu̱x i ngẽma ore i nüxü̃ chixuxü̃ nachiga ya Cristu ga curuchagu taxca̱x yucü.
12 Natürü ngẽma duü̃xü̃gü i pexü̃ chixeãẽgüxü̃ rü pexü̃ ucu̱xẽgüxü̃ nax pegü ípewíü̃cha̱xmüü̃pe̱xechiraü̃xü̃ca̱x, rü ¿tü̱xcüü̃ ẽ̱xna i nümagü i taxũ noxtacüma nügü yacaugüpü̱xücharexexü̃ ta?
13 Natürü pemax, Pa Chauenexẽgüx, rü Tupana pexca̱x naca nax ngẽma mugüna ípenguxü̃xü̃ca̱x. Rü ñu̱xma nax nüxna ípenguxü̃xü̃, rü tama name i ngẽmaca̱x pexenearü ngúchaü̃ pexügü. Natürü name nixĩ nax pegü pengechaü̃güxü̃ rü ngẽmaãcü pegü perüngü̃xẽẽgüxü̃ i wüxichigü.
14 Erü guxü̃ma i Tupanaarü mugü rü wüxitama i muwa nüxü̃ nixu rü ñanagürü:“¡Nüxü̃ nangechaü̃ i cumücü nax cugütama cungechaü̃xü̃rüxü̃!”
ñanagürü.
15 ¡Pexũãxẽgü! Erü ngẽxguma chi pegümaxã penuegu rü pegüchi pexaiegu, rü ngürüãchi tá pegü pewoone rü tá pegütama ipeyanaarüxoxẽxẽ.
Ngẽma taxü̃nearü ngúchaü̃ rü tama Tupanaãxẽ i Üünexü̃arü ngúchaü̃maxã nawüxigu
16 Rü ñu̱xma rü pemaxã nüxü̃ chixu, rü name nixĩ i Tupanaãxẽ ya Üünecü naxwa̱xexü̃ãcüma pemaxẽ. Rü ngẽxguma ngẽmaãcü pemaxẽgu, rü taxũtáma pexenearü ngúchaü̃ pexügü.
17 Erü ngẽma taxü̃nearü ngúchaü̃ rü tama Tupanaãxẽ i Üünexü̃arü ngúchaü̃maxã nawüxigu. Rü ngẽma Tupanaãxẽ i Üünexü̃arü ngúchaü̃ rü tama taxü̃nearü ngúchaü̃maxã nawüxigu. Erü ngẽma taxre i ngúchaü̃gü, rü nügüchi naxaie erü wüxichigü rü tamaxã inacuáxchaü̃. Rü ngẽmaca̱x i pema rü taxucürüwa penaxü i ngẽma pematama penaxwa̱xexü̃.
18 Natürü ngẽxguma Tupanaãxẽ ya Üünecü pemaxã icua̱xgux, rü marü tama ngẽma nũxcümaü̃güxü̃ i mugütüü̃wa pengẽxmagü.
19 Rü meama nango̱x nax ñuxãcü namaxẽxü̃ i ngẽma duü̃xü̃gü i naxü̃nearü ngúchaü̃ ügüxü̃. Rü nümagü rü nai i ngexü̃maxã namaxẽ, rü chixriãcü nügümaxã namaxẽ. Rü tama naxãnẽ nax ngẽmaãcü nügümaxã namaxẽxü̃.
20 Rü tupananetachicüna̱xãgüxü̃ nicua̱xüü̃gü, rü yuüca̱x nangúe, rü aigu narüxĩnüe, rü nachoxü̃gawa̱xegü, rü ta̱xacü ninuxü̃wa̱xegü, rü nanuxwa̱xegü, rü duü̃xü̃güxü̃ naxucu̱xẽgü nax tama wüxigu naxĩnüexü̃ca̱x. Rü nayatoye i duü̃xü̃gü, rü nügü nixüxchimüü̃gü.
21 Rü nixãũxãchiwa̱xegü, rü nangãxẽwa̱xegü, rü nanaxügü i petagü i nawa chixexü̃ naxügüxü̃, rü nanaxügü i muxü̃ma i togü i chixexü̃gü i ngẽxgumarüxü̃ ixĩxü̃. Rü ngẽmaca̱x, wena pemaxã nüxü̃ chixu rü guxü̃ma i ngẽma duü̃xü̃gü i ngẽmagu maxẽxü̃, rü nataxutama i nachica ya Tupana ãẽ̱xgacü íyixĩxü̃wa.
22 Natürü ngẽxguma Tupanaãxẽ ya Üünecü tawa ngẽxmagu, rü yigü tangechaü̃gü, rü tataãẽgü, rü tama yigümaxã tanue, rü yáxna yigümaxã taxĩnüe, rü yigümaxã tamecümagü, rü yigü tarüngü̃xẽẽgü, rü tayanguxẽxẽ i ngẽma nüxü̃ ixuxü̃ rü aixcüma Tupanaaxü̃́ tayaxõgü.
23 Rü ngẽxguma Tupanaãxẽ ya Üünecü tawa ngẽxmagu, rü tama yigü ítarüta, rü mea yigümaxã itacua̱x rü yigüna tadau nax tama chixexü̃gu iyixü̃ca̱x. Rü nataxuma i mugü i nachu̱xuxü̃ i ngẽma nacümagü i mexü̃.
24 Rü ngẽma aixcüma Ngechuchu ya Cristuarü duü̃xü̃gü ixĩgüxü̃, rü marü nüxü̃ narüxoe ga naxü̃nearü ngúchaü̃gü, rü guxü̃ma ga yema ngúchaü̃gü ga tama mexü̃.
25 Rü ñu̱xma nax Tupanaãxẽ ya Üünecü tawa maxü̃xü̃ rü name nixĩ nax nüxna yigü ixãxü̃ nax nüma tamaxã inacuáxü̃ca̱x.
26 Rü tama name i yigü ticua̱xüü̃gü rü yigü ítarüta rü bai nax togüxü̃ rüyexeragüchaü̃xü̃, rü bai nax ta̱xacüca̱x ixãũxãchixü̃.
Notas
^ 5:9 Wüxitama i ngu̱xẽẽtaeruxü̃neta rü nanachixexẽxẽ i guxü̃ma i natanüxü̃.
