Génesis 20:1-18
20 Abraáü̃ rü yema nachica ga nawa nayexmaxü̃wa ínaxũxũ, rü Négueanewa naxũ. Rü guma ĩanegü ga Cadé rü Chúxarü ngãxü̃wa yexmane ga ĩane ga Gueráxgu nayaxãchiü̃.
2 Rü yexguma yéma nayexmagu ga Abraáü̃ rü yema nama̱x ga Chára rü ñoma naeya̱xacü ngĩxü̃ nixu, rü tama ngĩxü̃ nixu nax nama̱x yixĩxü̃. Rü yemaca̱x ga Gueráxarü ãẽ̱xgacü ga Abimeréx rü ngĩxca̱x nangema nax yéma ngĩxü̃ nagagüxü̃ca̱x rü ngĩmaxã naxãmaxü̃ca̱x.
3 Natürü yema chütaxü̃gu rü nanegüwa Abimeréxmaxã nayarüdexa ga Tupana rü ñanagürü nüxü̃: —Cuyu tá erü ngẽma nge i cugüxü̃tawa ngĩxü̃ cugacü rü ixãte —ñanagürü.
4 Natürü nüma ga Abimeréx rü taxũta ngĩmaxã namaxü̃. Rü yemaca̱x Tupanaxü̃ nangãxü̃ rü ñanagürü nüxü̃: —Pa Chorü Corix, ¿ẽ̱xna nagu curüxĩnü nax tüxü̃ quimáxü̃ ya wüxíe ya taxuxü̃ma i chixexü̃ üxe?
5 Rü nümatama i Abraáü̃ rü chomaxã nüxü̃ nixu nax ngẽma nge rü naeya̱xmare yixĩxü̃, rü ñu̱xũchi ngĩmatama nüxü̃ iyaxu nax nüma rü ngĩenexẽ yixĩxü̃. Rü ngẽmaca̱x nixĩ i choma rü chayaxõxü̃. Natürü taxuxü̃ma i chixexü̃ chaxü —ñanagürü.
6 Rü nüma ga Tupana rü nanangãxü̃ ga nanegüwa rü ñanagürü nüxü̃: —Choma nüxü̃ chacua̱x nax mea nagu curüxĩnüãcüma cunaxüxü̃ i ngẽma. Rü ngẽmaca̱x tama cuxü̃́ ngĩxü̃ changúxchaü̃xẽxẽ nax ngĩmaxã cumaxü̃ nax tama chope̱xewa pecadu cuxüxü̃ca̱x.
7 Natürü i ñu̱xma rü ¡naxca̱x ngĩxü̃ namuegu i naxma̱x ya yimá yatü, erü nüma rü chorü orearü ngeruxü̃ nixĩ! Rü nüma rü cuxca̱x tá nayumüxẽ nax ngẽmaãcü tama cuyuxü̃ca̱x. Natürü ngẽxguma taxũtáma ngĩxü̃ cumueguxgu rü aixcüma tá cuyu wüxigu namaxã i cutanüxü̃ —ñanagürü.
8 Rü moxü̃ãcü ẽxü̃wa ga yexguma ínadaxgux ga Abimeréx, rü norü ngü̃xẽẽruü̃güca̱x naca, rü namaxã nüxü̃ nixu ga guxü̃ma ga yema nagu naxãnegüxü̃. Rü nümagü rü yexguma yemaxü̃ naxĩnüegu rü poraãcü namuü̃e.
9 Rü yemawena ga Abimeréx rü Abraáü̃ca̱x naca rü ñanagürü nüxü̃: —Dücax i ngẽma tomaxã cuxüxü̃. ¿Rü ta̱xacürü chixexü̃ ẽ̱xna cumaxã chaxü rü ngẽmaca̱x wüxi i pecadu i ãũcümaxü̃ cha̱u̱xca̱x, rü ñu̱xũchi chorü duü̃xü̃güca̱x ícunguxẽẽxü̃? Ngẽma nacüma rü tama name nax naxüxü̃.
10 20:10-11 ¿Rü ta̱xacügu ẽ̱xna icurüxĩnü ga yexguma cunaxü̱xgu ga guxü̃ma ga yema cuxüxü̃? —ñanagürü. Rü yemaacü Abraáü̃maxã nidexa ga Abimeréx. Rü Abraáü̃ nanangãxü̃ rü ñanagürü nüxü̃: —Choma nagu charüxĩnügu rü ñaa naanewa rü tama Tupanaga naxĩnüe i duü̃xü̃gü rü ngẽmaca̱x chi cho̱xma̱xca̱x choxü̃ nima̱xgü.
11 Nüü̃ nadau 20:10
12 Natürü aixcüma nixĩ nax chaueya̱x yixĩxü̃ erü chaunatüxacü iyixĩ natürü tama i chauéwáxü̃. Rü ngẽmaca̱x nixĩ i ngĩmaxã chaxãmaxü̃.
13 Rü yexguma Tupana choxü̃ íxũxü̃xẽẽgu ga chaunatüpatawa, rü choma ngĩmaxã nüxü̃ chixu nax ngextá ngĩmaxã íchinguchigüxü̃wa rü nüxü̃ yaxuxü̃ca̱x nax choma rü ngĩenexẽ chixĩxü̃ —ñanagürü.
14 20:14-15 Rü yexguma ga Abimeréx rü Abraáü̃na ngĩxü̃ namu ga naxma̱x ga Chára. Rü ñu̱xũchi nüxna nanamugü ga carnérugü, rü wocagü, rü duü̃xü̃gü ga puracütanüxü̃ruxü̃ ga iyatüxü̃, rü ingexü̃. Rü ñu̱xũchi nüxü̃ ñanagürü: —¡Dücax, ñaa nixĩ i chorü naanegü! ¡Rü nayaxu i ngẽma naane i yexera cuxü̃́ ngúchaü̃xü̃ nax ngẽxma cuxãxchiü̃xü̃ca̱x! —ñanagürü.
15 Nüü̃ nadau 20:14
16 Rü Cháraxü̃ ñanagürü: —Rü ngẽma cuenexẽna chaxãxü̃ rü 1,000 tachinü i diẽru naxãtanü. Rü ngẽmaãcü guxü̃ma i ngẽma duü̃xü̃gü i cumaxã ngẽxmagüxü̃ rü tá nüxü̃ nacua̱x nax taxuxü̃ma i chixexü̃ cuxüxü̃. Rü taxúetama chixri cuchiga tidexa —ñanagürü.
17 Rü yexguma ga Abraáü̃ rü yumüxẽwa Tupanana naca. Rü Tupana rü Abimeréxca̱x, rü ñu̱xũchi naxma̱xca̱x nayataanexẽxẽ. Rü yexgumarüxü̃ ta ngĩxca̱x nayataanexẽẽgü ga yema norü ngü̃xẽẽruü̃gü nax yemaacü wenaxarü yaxãxacüxü̃ca̱x.
18 Yerü noxri ga Tupana rü Cháragagu nanaxü nax taxúema ixãxacüxü̃ca̱x ga guxema ngexegü ga Abimeréxchiü̃wa yexmagüxe.
