Génesis 22:1-24
22 Rü yemawena ga Tupana rü Abraáü̃arü õxü̃ naxü. Rü naégamaxã nüxna naca. Rü nüma ga Abraáü̃ nanangãxü̃ rü ñanagürü: —Daxe chixĩ, rü nua changexma —ñanagürü.
2 Rü Tupana rü ñanagürü nüxü̃: —¡Íyaga ya cune ya Ichaá ya nügümaxã wüxicacü rü poraãcü nüxü̃ cungechaü̃cü! ¡Rü yéa Moríaanewa namaxã naxũ! Rü ngẽxguma ngéma cunguxgu rü chanaxwa̱xe i ngẽxma cha̱u̱xca̱x cuyama̱x rü cuyagu nagu ya yima ma̱xpǘne ya choma tá cumaxã nüxü̃ chaxunetane —ñanagürü.
3 Rü moxü̃ãcü ga pa̱xmamaxü̃chi rü Abraáü̃ ínarüda. Rü üxüta nadaü̃ nax yemamaxã Tupanaca̱x yaguaxü̃ca̱x ga gumá nane. Rü ñu̱xũchi nanamexẽxẽ ga norü búru rü ínayaga ga nane ga Ichaá rü taxre ga norü duü̃xü̃gü. Rü inaxũãchi nax yema nachica ga Tupana namaxã ixunetaxü̃wa naxũxü̃.
4 Rü yexguma marü tomaepü̱x ga ngunexü̃ íyaxũxgu ga Abraáü̃, rü yáxü̃gu nüxü̃ nadau ga yema nachica ga nawa naxũxü̃.
5 Rü yexguma ga Abraáü̃ rü norü duü̃xü̃güxü̃ ñanagürü: —¡Nuxã perücho namaxã i ñaa búru! Rü daa bucü rü choma rü tá yéamaxü̃ra taxĩ. Rü ngéma tá Tupanaxü̃ tayarücua̱xüxü̃gü, rü ngẽmawena rü pexca̱x tawoegu —ñanagürü.
6 Rü Abraáü̃ nanayauxcüta ga üxü ga Tupanaca̱x ãmare tá nawa yaguxü̃ rü Ichaáétügu nanaxǘnagücüta. Rü ñu̱xũchi ngĩxü̃ nayaxu ga cüxchi rü wüxi ga üxü ga naixü̃ne. Rü wüxigu guma ma̱xpǘnewa naxĩ.
7 Natürü yixcüamaxü̃ra rü Ichaá rü nanatüna naca rü ñanagürü: —Pa Papax —ñanagürü. Rü Abraáü̃ nanangãxü̃ rü ñanagürü: —¿Ta̱xacü cunaxwa̱xe, Pa Chaunex? —ñanagürü. Rü Ichaá nanatüxü̃ nangãxü̃ rü ñanagürü: —Dücax, tüxü̃́ nangẽxma i üxücüta, rü tüxü̃́ nangẽxma ya üxü ya naixü̃ne ¿natürü ngexü̃ i ngẽma carnéru i tá iguxü̃? —ñanagürü.
8 Rü nanatü nanangãxü̃ rü ñanagürü: —Pa Chaunex, nüma ya Tupana tá nixĩ ya nüxü̃ cuácü nax nangẽxmaxẽẽãxü̃ i wüxi i carnéruxacü nax naxca̱x yaguxü̃ —ñanagürü. Rü yemaacü wüxigu inaxĩ.
9 Rü yexguma nawa nanguxgu ga yema nachica ga Tupana namaxã nüxü̃ ixuxü̃, rü Abraáü̃ rü yexma nanaxü ga wüxi ga naxü̃naarü guruxü̃. Rü yemaétügu nananutanü ga üxü. Rü ñu̱xũchi nane ga Ichaáxü̃ nina̱i̱x rü yema üxütanügu nanaxǘnagü.
10 22:10-11 Natürü yexguma cüxchi ngĩxü̃ nayaxugu ga nanexü̃ tá nax yamáxü̃, rü Cori ya Tupanaarü duü̃xü̃ rü daxũwa nüxna nacagü rü ñanagürü: —Pa Abraáü̃x, Pa Abraáü̃x —ñanagürü. Rü nüma ga Abraáü̃ nanangãxü̃ rü ñanagürü: —Daxe chixĩ rü nua changexma —ñanagürü.
11 Nüü̃ nadau 22:10
12 Rü yexguma ga yema daxũcüã̱x i orearü ngeruxü̃ rü ñanagürü nüxü̃: —¡Taxṹ i cuyamáxü̃ ya yimá bucü! Erü marü nüxü̃ chacua̱x nax aixcüma Tupanaga cuxĩnüxü̃ rü tama choxna cunachu̱xu ya yimá cune ya nügümaxã wüxicacü —ñanagürü.
13 Rü yexguma ga Abraáü̃ rü nadauegu, rü nüxü̃ nadau ga wüxi ga carnéru ga naxchata̱xcuremaxã chuchuxü̃chapa̱xagu choxü̃. Rü ínayadau, rü nayayaxu. Rü yema nima̱x rü nayagu nanechicüxü.
14 Rü yemawena ga Abraáü̃ rü nanaxüéga ga yema nachica ñaxü̃maxã: —Cori ya Tupana rü tüxna nanaxã i ngẽma inaxwa̱xexü̃ —ñaxü̃maxã. Rü ngẽmaca̱x i ñu̱xma rü ta duü̃xü̃gü nüxü̃ nixu rü ñanagürügü: —Yima ma̱xpǘnewa Tupana tüxna nanaxã i ngẽma inaxwa̱xexü̃ —ñanagürügü.
15 Rü yexguma ga yema Tupanaarü orearü ngeruxü̃ i daxũcüã̱x rü wenaxarü daxũwa Abraáü̃na nacagü.
16 22:16-17 Rü ñanagürü nüxü̃: —Nüma ya Cori ya Tupana rü ñanagürü cuxü̃: “Ngẽma cuxüxü̃wa nüxü̃ chacua̱x nax aixcüma chauga cuxĩnüxü̃, erü tama choxna cunachu̱xu ya yimá cune ya nügümaxã wüxicacü. Rü ngẽmaca̱x chauégagutama cumaxã nüxü̃ chixu rü tá poraãcü cuxü̃ curüngü̃xẽxẽ. Rü ngẽma cutaagü rü tá chayamuxẽxẽ. Rü ẽxtagüe̱xpü̱x rü naxnücüte̱xe ya taxtüpechinüwa ngẽxmacüe̱xpü̱x tá nixĩ i norü mu. Rü nümagü rü guxü̃gutáma norü uanügüxü̃ narüporamaegü.
17 Nüü̃ nadau 22:16
18 Rü cutaagügagu tá nixĩ i nüxü̃ charüngü̃xẽxẽxü̃ i guxü̃ma i nachixü̃anegü, erü aixcüma mea chauga cuxĩnü”, ñanagürü cuxü̃ ya Cori ya Tupana —ñanagürü.
19 Rü nüma ga Abraáü̃ rü norü duü̃xü̃ca̱x nataegu rü wüxigu nawoegu nachiü̃wa ga Bechébawa. Rü yexma nixĩ ga naxãchiü̃xü̃ ga Abraáü̃.
Nacóx nanegüchiga
20 Rü ñuxre ga taunecü ngupetü̱xguwena, rü Abraáü̃na nanguchiga ga nax Milcá rü naenexẽ ga Nacóxaxü̃́ naxãxacüxü̃.
21 Rü Nacóx nane ga nüxíra bucü nixĩ ga Úx, rü gumáwena nabu ga Búx, rü gumáweama naxü ga Quemué. Rü gumá nixĩ ga Aráü̃ nanatü ixĩcü.
22 Rü gumá tomaepü̱xweama naxügü ga Queché, rü Achóru, rü Pidá, rü Iráx, rü Betué.
23 Rü Betué nixĩ ga Rebéca ngĩnatü. Rü yema 8 nixĩ ga Abraáü̃ naenexẽ ga Nacóx nanegü ga Milcáwa buexü̃.
24 Rü yemaétüwa ga Nacóx rü nüxü̃́ nayexma ga to ga nanegü ngĩwa ga Reumá ga nai ga naxma̱x. Rü yemawaxü̃güxü̃ nixĩ ga Téba, rü Gáxaü̃, rü Taá, rü Maacá.
