Génesis 24:1-67
24 Rü nüma ga Abraáü̃ rü marü nayaxüchi ga yexguma. Rü Cori ya Tupana rü guxü̃wama poraãcü nüxü̃ narüngü̃xẽxẽ.
2 24:2-3 Rü wüxi ga ngunexü̃ ga Abraáü̃ rü nidexa namaxã ga gumá norü duü̃xü̃ ga rüyamaecü ga norü yemaxü̃maxã icuácü. Rü ñanagürü nüxü̃: —¡Choperematüü̃gu naxǘxme̱x, rü Tupana ya daxũguxü̃ i naane rü ñoma i naanearü yoraégagu chomaxã inaxuneta rü taxũtáma chaune ya Ichaáca̱x ngĩxü̃ cuyaga i wüxi i pacü i ñaa naane i Canaáü̃cüã̱x ĩcü nax naxma̱x yixĩxü̃ca̱x!
3 Nüü̃ nadau 24:2
4 Natürü chanaxwa̱xe i yea chauchixü̃anewa cuxũ nax ngẽxma chautanüxü̃tanügu ngĩxca̱x cuyadauxü̃ i wüxi i nge nax ngẽmamaxã naxãmaxü̃ca̱x ya chaune ya Ichaá —ñanagürü.
5 Rü nüma ga gumá norü duü̃ rü Abraáü̃xü̃ nangãxü̃ rü ñanagürü: —Natürü ngẽxguma ngẽma nge tama chowe naxũxchaü̃gu ¿rü ta̱xacü tá chaxüxü̃ i ngẽxguma? ¿Ẽ̱xna cunaxwa̱xexü̃ nax yema naane ga nawa ícuxũxũxü̃wa chanagaxü̃ ya cune? —ñanagürü.
6 Rü Abraáü̃ nanangãxü̃ rü ñanagürü: —Tama chanaxwa̱xe nax ngéma cunagaxü̃ ya chaune.
7 Erü yimá Cori ya Tupana ya daxũguxü̃ i naanearü yora ga chaunatüchiü̃wa rü chautanüxü̃arü naanewa choxü̃ ímuxũchicü, rü chomaxã inaxuneta nax chautaagüna naxããxü̃ca̱x i ñaa naane i nawa changexmaxü̃. Rü ngẽxgumarüxü̃ ta rü nümatama ya Cori rü cupe̱xegu tá nayamu i norü orearü ngeruxü̃ i daxũcüã̱x nax wüxi i pacü ngéma ngĩxü̃ cuyagaxü̃ca̱x i naxma̱xü̃ ya chaune.
8 Natürü ngẽxguma chi ngẽma nge rü tama cuwe naxũxchaü̃gu rü taxuca̱xma nagu curüxĩnü i ngẽma cuxü̃ chamuxü̃, erü marü cuyanguxẽxẽ i ngẽma cumaxã nüxü̃ chixuxü̃. Natürü taxuca̱xma tü̱xcüü̃ ngéma cunaga ya chaune —ñanagürü.
9 Rü yexguma ga gumá norü duü̃ rü norü cori ga Abraáü̃perematüü̃gu naxǘxme̱x, rü namaxã nüxü̃ nixu rü tá nax yangu̱xẽẽãxü̃ ga yema namuaxü̃.
10 Rü yemawena ga gumá norü duü̃ rü norü coriarü ngã̱xãẽruü̃tanüwa nanade ga yema rümemaegüxü̃ ga ãmareruxü̃. Rü ínayagagü ga 10 ga norü coriarü caméyugü rü inaxũãchi nax nawa naxũxü̃ca̱x ga guma Nacóxarü ĩane ga Mechopotámiaanewa yexmane.
11 Rü nawena ga ñuxre ga ngunexü̃ nax iyaxũxü̃ rü yexguma nachütachaü̃gu rü guma Nacóxarü ĩanepechinüwa nangu naxü̃tawa ga wüxi ga puchu. Rü gumá puchuarü ngaicamagu nanangü̃ẽxẽxẽ ga norü caméyugü. Rü yema ora nixĩ ga ngexü̃gü yéma dexáwa naxĩxü̃.
12 Rü nüma ga Abraáü̃arü duü̃ rü inanaxügü ga nax nayumüxẽxü̃ rü ñanagürü: —Pa Tupana ya Chorü Cori ya Abraáü̃arü Tupanax, rü ¡cuxü̃́ nangechaü̃tümüxü̃ ya chorü cori ya Abraáü̃! ¡Rü ẽcü mea ínanguxuchixẽxẽ i ñu̱xma i ngẽma naxca̱x núma choxü̃ namuxü̃!
13 Rü ñu̱xma rü tá daa puchuxü̃tagu charüxã̱ũ̱x, rü yoxni daa ĩanecüã̱x i pacügü rü nua dexáwa naxĩ.
14 Rü ñu̱xma rü curü ngü̃xẽẽca̱x íchaca. Rü ngẽxguma wüxi i ngẽma pacüna chacaxgu nax ngĩrü tü̃xü̃wa choxü̃ naxaxẽẽxü̃ca̱x rü ñaãcü choxü̃ nangãxü̃gu: “¡Ẽcü, naxaxe! Rü ngẽxgumarüxü̃ tá ta chayaxaxegüxẽxẽ i curü caméyugü”, ñaxü̃maxã choxü̃ nangãxü̃gu, rü ngẽmawa tá nüxü̃ chacua̱x nax ngẽma yixĩxü̃ i cuma ngĩxü̃ cuxunetacü naxca̱x ya yimá curü duü̃ ya Ichaá. Rü ngẽmawa tá nüxü̃ chacua̱x nax cuma rü aixcüma nüxü̃ cungechaü̃xü̃ ya yimá chorü cori ya Abraáü̃ —ñanagürü ga norü yumüxẽwa.
15 Rü yexguma tauta nüxü̃ nachauxgu ga nax nayumüxẽxü̃, rü ngĩxü̃ nadau ga wüxi ga pacü ga yéma ne ũcü ga ngĩrü tü̃xü̃ ngĩãtügu ngĩxü̃ ingecü. Rü ngĩma rü Rebéca iyixĩ ga Betuéacü. Rü nüma ga Betué rü Abraáü̃enexẽ ga Nacóx nane nixĩ. Rü Milcá iyixĩ ga naé.
16 24:16-17 Rü ngĩma ga Rebéca rü imechametüxüchi rü taguma ñuxgu wüxi ga yatü ngĩmaxã namaxü̃. Rü gumá puchuwa ixũ rü yéma ngĩxü̃ ixü̃ãcu ga ngĩrü tü̃xü̃. Rü yexguma nataeguchaü̃gu, rü nüma ga gumá Abraáü̃arü duü̃ rü ngĩxca̱x niña, rü ñanagürü ngĩxü̃: —Pa Pacüx ¿taxũchima cuxü̃́ namexü̃ ega curü tü̃xü̃wa choxü̃ cuxaxexẽẽgu i íxraxü̃ i curü dexá? —ñanagürü.
17 Nüü̃ nadau 24:16
18 Rü yexguma ga ngĩma rü inangãxü̃ rü ngĩgürügü: —¡Ẽcü naxaxe, Pa Corix! —ngĩgürügü. Rü yexgumatama ga ngĩma rü ngĩxü̃ irüxüe ga ngĩrü tü̃xü̃ rü inaxaxẽxẽ.
19 Rü yexguma marü naxaxeguwena ga gumá Abraáü̃arü duü̃, rü ngĩma ga Rebéca rü ngĩgürügü nüxü̃: —Paxa dexá tá chayaxu naxca̱x i curü caméyugü nax nümagü rü ta mea naxaxegüxü̃ca̱x —ngĩgürügü.
20 Rü yexguma ga ngĩma rü paxa yema caméyugüarü axepáxü̃gu ngĩxü̃ ibaãcu ga ngĩrü tü̃xü̃. Rü muẽ̱xpü̱xcüna paxa nawa iña ga yema dexá ga puchuwa ñu̱xmata naxüãcua ga dexápaü̃ naxca̱x ga guxü̃ma ga yema caméyugü.
21 Rü nüma ga gumá Abraáü̃arü duü̃ rü yoxni ngĩxü̃ ínangugü yerü nüxü̃ nacuáxchaü̃ rü aixcüma yema yixĩ ga Tupana ngĩxü̃ unetacü.
22 Rü yexguma marü mea naxaxegügu ga yema norü caméyugü, rü nüma ga gumá Abraáü̃arü duü̃ rü ñu̱xũchi ngĩxna ngĩxü̃ naxã ga wüxi ga ãnera ga úirungixca̱x ga 6 gramu yacü rü ngĩxmaraü̃wa ngĩxü̃ nichocuchi. Rü yexgumarüxü̃ ta ngĩxna nanana ga taxre ga nga̱xcupüxme̱xẽxü̃ ga 100 gramu yaxü̃ ga wüxichigü.
23 Rü ñanagürü ngĩxü̃: —Pa Pacüx ¡chomaxã nüxü̃ ixu rü texéxacü quixĩ! ¿Rü nangemaxü̃ i nachica i cunatüpatawa nax ngẽxma chorü duü̃xü̃gümaxã tapegüxü̃ca̱x i ñoma i chütaxü̃gu? —ñanagürü.
24 Rü ngĩma rü inangãxü̃ rü ngĩgürügü: —Choma rü naxacü chixĩ ya Betué. Rü Milcá iyixĩ i chorü noxẽ rü Nacóx nixĩ ya chorü o̱xi.
25 Rü ngéma tochiü̃wa rü nangema i nachica nax ngẽxma pepegüxü̃ca̱x i ñoma i chütaxü̃gu. Rü ngẽxgumarüxü̃ ta nayima ya maxẽ i perü caméyugüarü ngõ̱xruxü̃ rü maxẽ i pacü i norü caruxü̃ —ngĩgürügü.
26 Rü yexguma ga gumá Abraáü̃arü duü̃ rü yexma nacaxã́pü̱xü rü Tupanaxü̃ nicua̱xüxü̃.
27 Rü ñanagürü: —Cumecümaxü̃chi, Pa Cori ya Chorü Cori ya Abraáü̃arü Tupanax, erü aixcüma cuyanguxẽxẽ i ngẽma chorü cori ya Abraáü̃maxã nüxü̃ quixuxü̃. Erü namaxã cumecüma rü poraãcü nüxü̃ curüngü̃xẽxẽ, rü ngẽmaãcü natanüxü̃tanüwa choxü̃ cunguxẽxẽ —ñanagürü.
28 Rü yexguma ga ngĩma ga Rebéca rü ngĩépatawa iña, rü nüxü̃ iyaxu ga yema ngĩxü̃ ngupetüxü̃.
29 Ngĩma rü ngĩxü̃́ nayexma ga wüxi ga ngĩenexẽ ga Labáü̃gu ãégacü. Rü gumá nixĩ ga puchuwa ñacü nax naxca̱x yadauxü̃ca̱x ga gumá yatü.
30 Yerü ngĩxü̃ nadau ga yema ãnera ga ngĩxmaraü̃wa rütucü rü yema ngaxcupü̱xme̱xẽxü̃gü, rü nüxü̃ naxĩnü ta ga yema nüxü̃ yaxuxü̃ nax ñuxũ ñaxü̃ ga gumá yatü. Rü yexguma yéma nanguxgu ga Labáü̃, rü Abraáü̃arü duü̃ca̱x nixũ ga yématama puchuxü̃tawa norü caméyugümaxã yexmacü.
31 Rü ñanagürü: —¡Pa Duü̃ ya Cori ya Tupana Cuxü̃ Rüngü̃xẽẽcüx, rü chowe rüxũ! ¿Rü ñuxãcü nuxã ĩanearü düxétügu curüxã̱ũ̱x ega tochiü̃wa marü cuxca̱x tanamexẽẽgü i wüxi i ucapu nax ngẽxma cupexü̃ca̱x? Rü ngẽxgumarüxü̃ ta marü tanamexẽxẽ i wüxi i nachica naxca̱x i curü caméyugü —ñanagürü.
32 Rü ñu̱xũchi ga gumá Abraáü̃arü duü̃ rü nawe narüxũ. Rü yexguma ĩwa nangugügu, rü nüma ga Labáü̃ caméyutawa ínananuü̃ ga norü yemaxü̃gü rü ñu̱xũchi nanachibüexẽxẽ ga yema caméyugüxü̃. Rü yemawena rü dexá ta nayayaxu nax yemawa nügü yayauxgücutüxü̃ca̱x ga Abraáü̃arü duü̃ rü namücügü.
33 Rü yexguma õnamaxã nanaxüpe̱xegü nax nachibüxü̃ca̱x, rü nüma ga gumá Abraáü̃arü duü̃ rü ñanagürü: —Taxucürüwa chachibü ega tama pemaxã nüxü̃ chixuxíragu i ngẽma pemaxã nüxü̃ chixuxchaü̃xü̃ —ñanagürü. Rü yexguma ga Labáü̃ rü ñanagürü: —¡Ẽcü, idexa! —ñanagürü.
34 Rü yexguma ga Abraáü̃arü duü̃ rü ñanagürü: —Choma rü Abraáü̃arü duü̃ chixĩ.
35 Rü Cori ya Tupana rü poraãcü nüxü̃ narüngü̃xẽxẽ ya chorü cori ya Abraáü̃, rü nanamuarü ngẽmaxü̃xã̱xẽxẽ. Rü ngẽmaca̱x nüxna nanaxã i muxũchixü̃ i norü carnérugü, rü wocagü rü caméyugü, rü búrugü, rü úirugü, rü diẽrugü, rü norü puracütanüxü̃ i yatüxü̃ rü ngexü̃.
36 Rü ñu̱xũchi naxma̱x i Chára rü nüxü̃́ iyatüne ga woo marü nax nayaxüchichiréxü̃. Rü nüma ya yimá chorü cori ya Abraáü̃ rü yimá nanena nanaxuaxü̃ i guxü̃ma i norü ngẽmaxü̃gü.
37 Rü nüma ya chorü cori ya Abraáü̃ rü choxna naxãga nax Tupanaégagu namaxã ichaxunetaxü̃, rü ñanagürü choxü̃: “¡Taxũtáma cunaxwa̱xe ya yimá chaune ya Ichaá rü wüxi i pacü i nua Canaáü̃cüã̱xmaxã naxãmaxü̃!
38 ¡Rü yea chorü papatanüxü̃tanüwa naxũ rü ngẽxma ngĩxca̱x yadau i wüxi i pacü i chautanüxü̃ ixĩ́cü nax chaunema̱x yixĩxü̃ca̱x!” ñanagürü ga chorü cori.
39 Rü yexguma ga chomax, rü nüxna chaca rü ñacharügü: “¿Pa Chorü Corix, ta̱xacü tá chaxüxü̃ ega ngẽma nge rü tama chowe naxũxchaü̃gu?” ñacharügü.
40 Rü yexguma nüma ga chorü Cori rü choxü̃ nangãxü̃ rü ñanagürü: “Chomax, rü guxü̃guma naga chaxĩnü ya Tupana, rü ngẽmaca̱x i nüma rü tá nua nanamu i daxũcüã̱x i norü orearü ngeruxü̃ nax cuxü̃ naxümücüxü̃ca̱x, rü mea cuxü̃ nangupetüxü̃ca̱x i ngextá ícuxũxü̃wa. Natürü chanaxwa̱xe nax nua ngĩxü̃ cugaxü̃ ya wüxi ya pacü ya chautanüxü̃ ixĩ́cü nax chaune ngĩmaxã ãmaxü̃ca̱x.
41 Rü ngẽxguma ngẽma chautanüxü̃ rü tama wüxi ya pacü cuxna ngĩxü̃ mugüchaü̃gu, rü tá nawa ícunguxuchi i ngẽma chomaxã nüxü̃ quixuxü̃”, ñanagürü choxü̃.
42 24:42-44 Rü ngẽmaãcü i ñu̱xma rü núma changu naxü̃tawa ya yimá puchu. Rü ngéma chayumüxẽ rü chorü cori ya Abraáü̃arü Tupanamaxã nüxü̃ chixu rü ñacharügü: “Ega aixcüma choxü̃ curüngü̃xẽxẽchaü̃gu nax mea choxü̃ ínanguxuchixü̃ca̱x i ngẽma chorü cori nawa choxü̃ muxü̃, rü chanaxwa̱xe i choxü̃ cungãxü̃ga i ñu̱xma nax puchuxü̃tawa changexmaxü̃. Rü yema pacü ya dexáwa nua ũcü rü dexáca̱x ngĩxna chacacü nax choxü̃ naxaxexẽẽxü̃ca̱x rü choxü̃ ngãxü̃cü: ‘¡Ẽcü naxaxe! Rü ngẽxgumarüxü̃ tá ta chayaxaxegüxẽxẽ i curü caméyugü’, ñaxü̃maxã choxü̃ ngãxü̃cü, rü ngẽmawa tá nüxü̃ chacua̱x nax ngẽma yixĩxü̃ i cuma ngĩxü̃ cuxunetacü naxca̱x ya chorü cori nane ya Ichaá”, ñacharügü ga chorü yumüxẽwa.
43 Nüü̃ nadau 24:42
44 Nüü̃ nadau 24:42
45 Rü yexguma taxũta nüxü̃ charüchauxgu ga nax chayumüxẽxü̃, rü ngĩxü̃ chadau ga Rebéca ga tü̃xü̃ ngĩãtügu yéma ngĩxü̃ ne ngecü. Rü puchuca̱x irüxüe, rü dexámaxã ngĩxü̃ ixü̃ãcu ga ngĩrü tü̃xü̃. Rü yexguma ga choma rü ngĩxna chaca rü ñacharügü ngĩxü̃: “Pa Pacüx ¿Taxũchima cuxü̃́ namexü̃ ega choxü̃ cuxaxẽxẽgu i curü dexá?” ñachagürü.
46 Rü yexguma ga ngĩma rü ngĩxü̃ irüxüe ga ngĩrü tü̃xü̃ rü ngĩgürügü choxü̃: “¡Ẽcü, naxaxe, Pa Corix! Rü ngẽxgumarüxü̃ tá ta chanayaxu i dexá naxca̱x i curü caméyugü nax nümagü rü ta naxaxegüxü̃ca̱x”, ngĩgürügü. Rü yexgumatama choxü̃ ixaxẽxẽ rü yaxaxegüxẽxẽ ga chorü caméyugü rü ta.
47 Rü yexguma ga choma rü ngĩxna chaca rü ñacharügü: “¿Texéxacü quixĩ i cumax?” ñacharügü. Rü yexguma ga ngĩma rü choxü̃ ingãxü̃ rü ngĩgürügü: “Chaunatü rü Betué nixĩ i naéga, rü chorü o̱xi nixĩ i Nacóx, rü chorü noxẽ tixĩ ya Milcá”, ngĩgürügü. Rü yexguma ga choma rü ngĩráü̃wa chayachocuchi ga wüxi ga ngĩrü ãnera, rü ñu̱xũchi ngĩpü̱xme̱xẽwa chayachocuchi ga taxre ga ngĩrü ngaxcupüxme̱xẽxü̃.
48 Rü ñu̱xũchi chacaxã́püxü rü moxẽ Tupanana chaxã. Rü nüxü̃ chicua̱xüxü̃ ya chorü cori ya Abraáü̃arü Tupana yerü meama chorü coritanüxü̃xü̃tawa choxü̃ naga nax yimaxacü ngĩxü̃ chigaxü̃ nax chorü cori nane ngĩmaxã ãmaxü̃ca̱x.
49 Rü ñu̱xma rü chanaxwa̱xe nax chomaxã nüxü̃ pixuxü̃ ¿rü aixcüma tá mea penayaxuxü̃ i naga ya yimá chorü cori rü ẽ̱xna tama? Rü chanaxwa̱xe i chomaxã nüxü̃ pixu nax nüxü̃ chacuáxü̃ca̱x i ta̱xacü tá chaxüxü̃ —ñanagürü.
50 Rü yexguma ga Labáü̃ rü Betué rü nanangãxü̃gü, rü ñanagürügü: —Guxü̃ma i ngẽma nüxü̃ quixuxü̃ rü Cori ya Tupanawa ne naxũ. Rü ngẽmaca̱x taxucürüwa ñuxü̃ ñatagürü.
51 Rü dücax, rü ngẽmama iyixĩ i Rebéca. ¡Rü ẽcü, ngĩxü̃ iga nax naxma̱x yixĩxü̃ca̱x ya nane ya yimá curü cori, ngẽma Tupana naxwa̱xexü̃rüxü̃! —ñanagürügü.
52 Rü yexguma yemaxü̃ naxĩnügu ga Abraáü̃arü duü̃ rü Cori ya Tupanape̱xegu nacaxã́pü̱xü rü ñu̱xmata waixü̃mügu yangücuchi.
53 Rü yemawena nanade ga ãmaregü ga úirunaxca̱x rü diẽrumünaxca̱x rü naxchirugü, rü Rebécana nanana. Rü yexgumarüxü̃ ta ga ngĩenexẽ rü ngĩé rü tüxü̃ naxãmareã̱x.
54 Rü yemawena ga nüma ga Abraáü̃arü duü̃ rü namücügü rü meama nachibüe rü yexma napegü. Rü moxü̃ãcü ga yexguma ínadagügu, rü gumá Abraáü̃arü duü̃ rü ñanagürü: —¡Choxü̃ pinge nax wenaxarü chorü corichiü̃ca̱x chataeguxü̃ca̱x! —ñanagürü.
55 Natürü ga ngĩenexẽ rü ngĩé ga Rebéca rü ñatagürügü: —Name nixĩ i 10 i ngunexü̃ nua ingẽxma, rü ngẽmawena rü marü name i cuwe irüxũ —ñatagürügü.
56 Natürü ga gumá Abraáü̃arü duü̃ rü ñanagürü tüxü̃: —¡Taxṹ i nuxã choxü̃ pechu̱xuxü̃! Tupana rü mea ínananguxuchixẽxẽ i ngẽma naxca̱x nua chaxũxü̃. Rü ngẽmaca̱x name nixĩ i chorü corichiü̃ca̱x choxü̃ pemuegu —ñanagürü.
57 Rü yexguma ga tümagü rü tanangãxü̃ rü ñatagürügü: —¡Ngĩxã, ngĩxca̱x taca i Rebéca rü ñuxãcü tüxü̃ nangãxü̃! —ñatagürügü.
58 Rü ngĩxna tacagü rü ñatagürügü: —¿Cüx, nawe curüxũxchaü̃xü̃ ya daa yatü? —ñatagürügü. Rü ngĩma rü tüxü̃ ingãxü̃ rü: —Ngü̃ —ngĩgürügü.
59 Rü yexguma ítayamugü ga gumá Abraáü̃arü duü̃ rü namücügü, rü nawe irüxũ ga Rebéca rü ñu̱xũchi ngĩxü̃taxü̃ ga guxü̃guma ngĩxna daucü.
60 Rü ngĩenexẽgü rü mexü̃ Rebécamaxã naxuegugü rü ñanagürügü: —Pa Toeya̱x, ẽcü muxũchixü̃ i duü̃xü̃güarü mama tá quixĩ. Rü ngẽma cutaagü rü tá narüporamaegü nüxü̃ i norü uanügü —ñanagürügü.
61 Rü yexguma ga Rebéca rü ngĩxü̃taxü̃gümaxã caméyugüétügu ixaugü. Rü nawe irüxĩ ga gumá Abraáü̃arü duü̃. Rü yemaacü nixĩ ga ngĩxü̃ yagaxü̃ ga Rebéca, rü ngĩmaxã ínixũ.
62 Rü yoxni nüma ga Ichaá rü yexwaca̱xtama gumá puchu ga Yimá Maxü̃cü Rü Choxü̃ Daucügu ãégacüwa ne naxũ yerü yexma Négueanegu naxãchiü̃.
63 Rü yáuanecü ga yexguma marü nayaanegu rü nüma ga Ichaá rü yexma nanaxũane. Rü yáxü̃gu nüxü̃ nadau ga ñuxre ga caméyugü ga ingaixcaetanüxü̃.
64 Rü ngĩma rü ta ga Rebéca rü yáxü̃gu nüxü̃ idau ga Ichaá, rü íixüe ga caméyuétüwa.
65 Rü gumá Abraáü̃arü duü̃xü̃na ica, rü ngĩgürügü: —¿Texé nixĩ ya yimá yatü ya meanexü̃wa taxca̱xama ixũcü? —ngĩgürügü. Rü nüma rü ngĩxü̃ nangãxü̃ rü ñanagürü: —Nüma rü chorü cori ya Ichaá nixĩ —ñanagürü. Rü yexguma ga ngĩma rü ngĩrü tüeruxü̃ iyaxu, rü namaxã ngĩgü iyadüxchiwe.
66 Rü gumá Abraáü̃arü duü̃ rü Ichaámaxã nüxü̃ nixu ga guxü̃ma ga yema nüxü̃ ngupetüxü̃.
67 Rü yexguma ga Ichaá rü tauxeta norü mama ga Chárachiü̃wa Rebécaxü̃ naga, rü ngĩmaxã naxãxma̱x. Rü nüma ga Ichaá rü poraãcü ngĩxü̃ nangechaü̃, rü yemaacü nüxü̃́ inarüxo ga naéca̱x nax nangechaü̃xü̃.
