Génesis 29:1-35
29 Rü Acóbu rü ínixũchigü, rü düxwa yema duü̃xü̃gü ga éstewaama yexmagüxü̃arü naanewa nangu.
2 Rü yema naanewa nüxü̃ nadau ga wüxi ga puchu. Rü gumá puchuxü̃tagu narüngü̃gü ga tomaepü̱xtücumü ga carnérugü, yerü gumá puchuwa nixĩ ga naxaxegüxü̃xü̃. Rü gumá puchu rü wüxi ga nuta ga tacümaxã narüxüta.
3 Rü yexguma yexma naxĩtaque̱xegügu ga carnérugü, rü yema norü dauruü̃gü rü ínanaxügachigüxü̃ ga gumá nuta nax norü carnérugü yaxaxegüxẽẽxü̃ca̱x. Rü ñu̱xũchi wenaxarü nanaxǘtaü̃güxü̃ ga gumá puchu.
4 Rü nüma ga Acóbu rü yema carnéruarü dauruü̃güna naca, rü ñanagürü: —¿Nge̱xtácüã̱x pixĩgü i pemax, Pa Duü̃xü̃güx? —ñanagürü. Rü nümagü nanangãxü̃gü rü ñanagürügü: —Toma rü Aráü̃anecüã̱x tixĩgü —ñanagürügü.
5 Rü yexguma ga Acóbu rü ñanagürü: —¿Nüxü̃ pecuáxü̃ i pemax ya Labáü̃, ya Nacóxtaxa ixĩcü? —ñanagürü. Rü nümagü rü nanangãxü̃gü rü: —Ngü̃, Ngẽmáacüx nüxü̃ tacua̱x —ñanagürügü.
6 Rü yexguma ga Acóbu rü wena ínicachigü rü ñanagürü: —¿Ñuxãcü yixĩxü̃ i nümax? ¿Rü tama yada̱xawexü̃? —ñanagürü. Rü nümagü rü nanangãxü̃gü rü ñanagürügü: —Tama nida̱xawe rü taxuxü̃ma nüxü̃ naxüpetü. ¡Rü dücax, rü yea nadau! Rü yea iyixĩ i naxacü i Raqué i ngĩrü carnérugümaxã ngéma ne ũcü —ñanagürügü.
7 Rü yexguma ga Acóbu, rü nanangãxü̃ rü ñanagürü: —Rü nangunexü̃chitama nixĩ nax naxpüxü̃gu penamucuxü̃ca̱x i carnérügü. ¿Tü̱xcüü̃ tama paxa peyaxaxẽẽgü nax wenaxarü maxẽ nüxü̃ ne peyangõ̱xẽẽxü̃ca̱x? —ñanagürü.
8 Natürü nümagü, rü nanangãxü̃gü rü ñanagürügü: —Taxucürüwa ngẽma taxü. Erü tanaxwa̱xe nax guxü̃ma i carnérugü nua ngugüxü̃ nax norü dauruü̃gü wüxigu ínaxügachigüxü̃ca̱x ya yimá nuta ya namaxã nangataü̃cü ya daa puchu nax ngẽmaãcü wüxigu naxaxegüxü̃ca̱x i guxü̃ma i carnérugü —ñanagürügü.
9 Rü yexguma yema carnérugüarü dauruü̃gümaxã íyadexayane ga Acóbu, rü yéma ingu ga Raqué namaxã ga ngĩnatüarü carnérugü yerü ngĩma nixĩ ga nüxna nadauxü̃.
10 Rü yexguma nata ga Labáü̃arü carnérugüxü̃ nada̱u̱xgu ga Acóbu, rü paxãma puchuca̱x niña rü ínayaxügachi ga gumá nuta ga puchu namaxã rüngataü̃cü rü nataarü carnérugüxü̃ nixaxexẽẽgü.
11 Rü yemawena rü Raquéxü̃ narümoxẽ wüxi ga chúxumaxã rü naxaxu.
12 Rü yexguma Acóbu ngĩmaxã nügü ixuxgu rü nüma rü Rebéca ngĩne nax yixĩxü̃ rü Labáü̃taxa nax yixĩxü̃, rü ngĩma ga Raqué rü iñaãchi nax ngĩnatümaxã nüxü̃ yanaxuxü̃ca̱x.
13 Rü yexguma Labáü̃ nüxü̃ ĩnüchigagu ga yéma nax nanguxü̃ ga Acóbu ga naeya̱x ngĩne, rü paxa inañaãchi nax íyadauãxü̃ca̱x. Rü nüxna nana̱i̱xãchiãcüma nüxü̃ narümoxẽ, rü nüxü̃ nachúxu. Rü nachiü̃wa nanaga. Rü yixcüamaxü̃ra rü Acóbu nüxü̃ nixu ga guxü̃ma ga yema nanatüchiü̃wa nüxü̃ ngupetüxü̃.
14 Rü Labáü̃ rü ñanagürü nüxü̃: —Aixcümaxü̃chi cuma rü chautanüxü̃xüchi quixĩ —ñanagürü. Rü wüxi ga tauemacü Labáü̃xü̃tawa nayexma ga Acóbu.
Acóbu rü Raquéca̱x rü Léaca̱x napuracü
15 Rü marü gumá tauemacü ngupetü̱xguwena, rü Labáü̃ rü Acóbuxü̃ ñanagürü: —Ngẽma nax chautanüxü̃ quixĩxü̃, rü taxũtáma ngẽmaca̱x ngetanüãcüma choxü̃́ cupuracüechamare. ¡Rü chomaxã nüxü̃ ixu rü ñuxregu i cunaxwa̱xexü̃ nax cuxü̃́ chanaxütanüxü̃! —ñanagürü.
16 Rü nüma ga Labáü̃ rü nüxü̃́ iyexma ga taxre ga naxacü. Rü yema rüyamaecü rü Léa nixĩ ga ngĩéga. Rü yema rübumaecü rü Raqué nixĩ ga ngĩéga.
17 Rü ngĩma ga Léa rü ingechaü̃etücüraxü̃, natürü ga Raqué rü guxü̃wama imexẽchi.
18 Rü nüma ga Acóbu, rü Raqué iyixĩ ga yema ngĩxü̃ nangẽ̱xẽ̱xcü. Rü yemaca̱x Labáü̃xü̃ nangãxü̃ rü ñanagürü: —Ngẽma cuxacü i irübumaecü i Raquéca̱x rü tá 7 ya taunecü cuxü̃tawa chapuracü —ñanagürü.
19 Rü yexguma ga Labáü̃ rü nanangãxü̃ rü ñanagürü: —Narümemae nax cuxna ngĩxü̃ chamuxü̃ rü tama i wüxi i duü̃xü̃ i tama nüxü̃ chacuáxü̃na. ¡Rü nua chauxü̃tawa nangẽxma! —ñanagürü.
20 Rü yemaacü ga Acóbu rü 7 ga taunecü ngĩxca̱x napuracü ga Raqué. Natürü Acóbuca̱x rü gumá 7 ga taunecü rü tama nũxcücüraxü̃ nixĩ yerü poraãcü nüxü̃́ ingúchaü̃xü̃chi.
21 Rü yexguma marü yanguxgu ga gumá 7 ga taunecü, rü nüma ga Acóbu rü Labáü̃maxã nidexa rü ñanagürü: —¡Choxna ngĩxü̃ namu i Raqué nax ngĩmaxã chaxãmaxü̃ca̱x, erü marü chayanguxẽxẽ ya yimá taunecügü ya nagu cumaxã chaxunetacü nax ngĩxca̱x chapuracüxü̃! —ñanagürü.
22 Rü yexguma ga Labáü̃ rü naxacüxü̃ naxüchíxü ga nax naxãtexü̃. Rü yemaca̱x nüxna naxu ga guxü̃ma ga duü̃xü̃gü ga norü ngaicamagu pegüxü̃.
23 Natürü yema chütaxü̃gu ga Labáü̃, rü naxacü ga Léaxü̃ nayaga rü Acóbuxü̃ ngĩxü̃ napexẽxẽ. Rü yemaacü ga Acóbu rü ngĩmaxã namaxü̃.
24 Rü nüma ga Labáü̃ rü naxacü ga Léaxü̃ naxãmareã̱x ngĩmaxã ga wüxi ga ngĩxü̃taxü̃ nax naxacüaxü̃́ napuracüxü̃ca̱x. Rü yema ngĩxü̃taxü̃ rü ngĩéga nixĩ ga Chipá.
25 Rü moxü̃ãcü ga Acóbu rü nüxü̃ nacua̱x nax Léa yixĩxü̃ ga yema ngĩmaxã inapecü. Rü nuãcüma Labáü̃na nayaca, rü ñanagürü: —¿Ta̱xacü chomaxã cuxü? ¿Tama ẽ̱xna Raquéca̱x yixĩxü̃ ga cuxü̃́ chapuracüxü̃? ¿Rü tü̱xcüü̃ i ñu̱xma i choxü̃ cuwomüxẽẽxü̃? —ñanagürü.
26 Rü Labáü̃ rü nanangãxü̃ rü ñanagürü: —Dücax, tama tocüma nixĩ nax ngẽma rübumaecüxíra taxütexü̃.
27 ¡Ẽcü ínangu̱xẽxẽ i wüxi i yüxü nax yagúexü̃ i ngẽma ngĩchíxü i Léa! Rü ngẽmawena tá nixĩ i cuxna ngĩxü̃ tamuxü̃ i Raqué ega cuma rü curü me yixĩxgu nax nai ya 7 ya taunecü choxü̃́ cupuracüxü̃ —ñanagürü ga Labáü̃.
28 Rü nüma ga Acóbu rü nanayaxu ga yema Labáü̃ namaxã nüxü̃ ixuxü̃. Rü yexguma marü yagúegu ga Léachíü, rü nüma ga Labáü̃ rü Acóbuna ngĩxü̃ namu ga Raqué nax ngĩmaxã naxãmaxü̃ca̱x.
29 Rü nüma ga Labáü̃, rü naxacü ga Raquéna rü ta wüxi ga ngĩxü̃taxü̃ ngĩxü̃ namu nax naxacüaxü̃́ napuracüxü̃ca̱x. Rü yema ngĩxü̃taxü̃ rü ngĩéga nixĩ ga Birá.
30 Rü yexguma ga Acóbu rü Raquémaxã rü ta naxãxma̱x. Rü Léaarü yexera ngĩxü̃ nangechaü̃ woo ga Labáü̃ nai ga 7 ga taunecü ngĩxca̱x nanapuracüxẽxẽ.
Acóbu nanegü
31 Rü nüma ga Cori ya Tupana nüxü̃ nadau nax tama Léamaxã nataãẽxü̃ ga Acóbu. Rü yemaca̱x ga Tupana rü nanaxwa̱xe nax Acóbuaxü̃́ naxãxacüxü̃ ga Léa. Natürü ga Raqué rü ngĩxü̃ nangexacüxẽxẽ.
32 Rü yemaacü ga Léa rü Acóbuaxü̃́ ixãxacü, rü Rubéü̃gu inaxüéga. Rü yemagu inaxüéga yerü ñaxü̃gu irüxĩnü: —Tupana choxü̃ nadau nax changechaü̃xü̃, rü ñu̱xma ya yimá chaute rü tá choxü̃ nangechaü̃ —ngĩgürügü ga ngĩãẽwa.
33 Rü gumá ngĩnewena rü wena ixãxacü ga Léa, rü gumá rü Chimeóü̃gu inaxüéga. Rü yemagu inaxüéga yerü ñaxü̃gu irüxĩnü: —Tupana rü marü nüxü̃ naxĩnü nax tama chomaxã nataãẽxü̃ ya chaute, rü ngẽmaca̱x wena chaxãxacü —ngĩgürügü ga ngĩãẽwa.
34 Rü wenaxarü ixãxacü, rü gumá rü Lebígu inaxüéga. Rü yemagu inaxüéga yerü ñaxü̃gu irüxĩnü: —Rü ñu̱xma ya chaute rü chomaxã tá inarüxã̱ũ̱x, erü marü tomaepü̱xcüna nüxü̃́ chaxãxacü —ngĩgürügü ga ngĩãẽwa.
35 Rü wenaxarü Acóbuaxü̃́ ixãxacü ga Léa, rü gumá rü Yudágu inaxüéga. Rü yemagu inaxüéga yerü ñaxü̃gu irüxĩnü: —Rü ñu̱xma rü tá Tupanaxü̃ chicua̱xüxü̃ —ñaxü̃gu irüxĩnü. Rü yemawena rü iyangeyexacü.
