Génesis 32:1-32
32 Rü nüma ga Acóbu rü inixũchigüama. Rü namagu nüxü̃ nangau ga ñuxre ga daxũcüã̱x ga Tupanaarü orearü ngeruü̃gü.
2 Rü yexguma Acóbu nüxü̃ da̱u̱xgu rü ñanagürü: —Ñaagü rü Tupanaarü churaragü nixĩ —ñanagürü. Rü yemaca̱x Maanaíü̃gu nanaxüéga ga yema nachica.
3 Rü Acóbu rü inanamuãchitanü ga ñuxre ga norü duü̃xü̃gü nax Cheíarü naanewa ga Edóü̃wa naxĩxü̃ca̱x nax naenexẽ ga Echaúmaxã nüxü̃ yanaxugüxü̃ca̱x ga yéma tá nax nanguxü̃.
4 Rü ñaa dexamaxã yéma nanamugü: —¡Ñapegürü tá nüxü̃ ya chauenexẽ ya Echaú: “Cuenexẽ ya Acóbu ya curü duü̃xü̃ ixĩcü rü cuxca̱x nua namuga. Rü marü ñuxre ya taunecü rü tórü tutü ya Labáü̃xü̃tawa chayexma.
5 Rü choxü̃́ nangẽxma i chauxü̃nagü i wocagü rü búrugü, rü carnérugü rü chorü duü̃xü̃gü iyatüxü̃gü rü ingexü̃gü. Rü ngẽmaca̱x chaugüpe̱xegu cuxca̱x ngéma chanamugü i chorü duü̃xü̃gü nax cumaxã nüxü̃ yanaxugüxü̃ca̱x i ñaa chorü ore nax marü chataeguxü̃. Rü chierüna mea choxü̃ cuyauxgu i ngẽxguma cuxü̃tawa changuxgu!” ñapegürü tá —ñanagürü ga Acóbu.
6 Rü yexguma marü Acóbuca̱x nawoegu̱xgu ga norü duü̃xü̃gü, rü ñanagürügü: —Marü naxü̃tawa tangugü ya cuenexẽ ya Echaú. Rü nüma rü tá nua naxũ nax nümatama cuxü̃ íyadauxü̃ca̱x namaxã i 400 i norü duü̃xü̃gü —ñanagürügü.
7 Rü yexguma yemaxü̃ naxĩnügu ga Acóbu, rü poraãcü namuü̃ rü naxoegaãxẽ. Rü yemaca̱x taxregu nayatoye ga norü duü̃xü̃gü rü norü carnérugü rü wocagü rü caméyugü.
8 Yerü ñaxü̃gu narüxĩnü: —Ngẽxguma Echaú nua nguxgu rü ngürüãchi nadaiãgu i ngẽma wüxitücumü i duü̃xü̃gü, rü ngẽma totücumü rü yoxni nibuxmü —ñaxü̃gu narüxĩnü.
9 Rü ñu̱xũchi inanaxügü ga nax nayumüxẽxü̃, rü ñanagürü: —Pa Cori Pa Tupana Ya Chorü O̱xi Ya Abraáü̃arü Tupana, Rü Chaunatü Ya Ichaáarü Tupanax, cuma rü marü chomaxã nüxü̃ quixu nax chorü naaneca̱x rü chautanüxü̃ca̱x chataeguxü̃ rü cuma rü tá mea choxna cudauxü̃.
10 Choma rü taxuwama chame nax ngẽmaãcü chomaxã cumecümaxü̃ rü aixcüma mea choxü̃ curüngü̃xẽẽxü̃. Rü yexguma noxri chaunatüna íchaxũxũ̱xgux rü ñaatama Yudáü̃ i natüwa chixüegu rü taxuxü̃ma choxü̃́ nayexma rü chorü naixmena̱xãxicatama. Natürü i ñu̱xma nax chataeguxü̃ rü choxü̃́ nangẽxma i muxü̃ma i duü̃xü̃gü i taxretücumü ixĩxü̃.
11 Rü ñu̱xma rü cuxna chaca rü chanaxwa̱xe i choxü̃ ícupoxü̃ nüxna ya chauenexẽ ya Echaú. Rü nüxü̃ chamuü̃ erü ngürüãchi nuxã toxü̃ nayadai rü ngẽmaãcü tüxü̃ nadai ya cho̱xma̱xgü rü chauxacügü.
12 Cuma rü marü meama chomaxã nüxü̃ quixu rü tá choxna nax cudauxü̃ nax ngẽmaãcü taxuxü̃ma choxü̃ üpetüxü̃ca̱x rü ngẽmaãcü i chautaagü rü ñoma márpechinüwa ngẽxmacü ya naxnücüte̱xerüxü̃ namuxũchixü̃ca̱x, rü ngẽmaãcü düxwa taxucürüwa texé yaxugüxü̃ca̱x —yemaacü nayumüxẽ.
13 Rü yema chütaxü̃gu rü Acóbu rü yexmatama nape. Rü nüxü̃ nidaugü ga naxü̃nagü rü yematanüwa nayadexechi ga naenexẽ ga Echaúarü ãmareruxü̃.
14 32:14-15 Rü nayamugü ga 200 ga chíbugü ga ingexü̃, rü 20 ga chíbugü ga iyatüxü̃, rü 200 ga carnérugü ga ingexü̃, rü 20 ga carnérugü ga iyatüxü̃, rü 30 ga caméyugü ga yexwacax buexacüxü̃, rü 40 ga wocagü, rü 10 ga wocaxacügü ga yexwacax yaexü̃, rü 20 ga búrugü ga ingexü̃ rü 10 ga búrugü ga iyatüxü̃.
15 Nüü̃ nadau 32:14
16 Rü ñu̱xũchi norü duü̃xü̃güna nanamugü ga wüxitücumüchigü, rü ñanagürü nüxü̃: —¡Cü, chopexegu namaxã pexĩ, rü pegüna tá piyáxü̃guetanüxü̃ namaxã i wüxitücumüchigü! —ñanagürü.
17 32:17-18 Rü yema nüxíra inamuãchixü̃ ga norü duü̃xü̃, rü nanaxucu̱xẽ, rü ñanagürü nüxü̃: —Ngẽxguma tá cuxü̃ iyangauxgu ya chauenexẽ ya Echaú, rü cuxna nacaxgu: “Rü texé nixĩ ya curü cori, rü ngextá cuxũ, rü texéarügü nixĩ i ñaa naxü̃nagü i quigagüxü̃”, rü cuma rü tá ñaãcü cunangãxü̃: “Pa Chorü Cori ya Echaúx, rü ñaa rü wüxi i curü ãmare nixĩ i cuxca̱x nua namuxü̃ ya curü duü̃ ya Acóbu. Rü nüma rü toweama ne naxũ”, ñacurügü tá —ñanagürü ga Acóbu.
18 Nüü̃ nadau 32:17
19 Rü yexgumarüxü̃ ta ga yema togü ga duü̃xü̃gü ga inamuãchigüxü̃ rü ñanagürü nüxü̃: —Ngẽxguma tá pexü̃ inangauxgu ya Echaú, rü ¡ngẽmatama orexü̃ namaxã pixu!
20 Rü ¡ñapegü nüxü̃: “Acóbu ya cuenexẽ ya cuxü̃ ngechaü̃cü rü toweama ne naxũ”, ñapegü nüxü̃! —ñanagürü ga Acóbu. Rü yemaacü nayaxucu̱xẽ ga yema duü̃xü̃gü yerü ñaxü̃gu narüxĩnü: —Ñaa ãmaregü i chope̱xegu chimugüxü̃maxã tá chanangüxmüxẽxẽ ya chauenexẽ. Rü ngẽmawena rü chomaxü̃chi tá nüxü̃ chadau. Rü bexmana ngẽmaãcü tá mea choxü̃ nayaxu —ñaxü̃gu narüxĩnü.
21 Rü yemaacü ga yema ãmaregü rü nüxíra nügüpe̱xegu nayamugü. Rü nüma ga Acóbu rü yexmatama nape ga yema chütaxü̃gu.
Acóbu rü wüxi ga Tupanaarü orearü ngeruxü̃ i daxũcüã̱xmaxã nügü nawogü
22 32:22-23 Rü yematama chütaxü̃gu rü ínarüda ga Acóbu, rü tüxü̃ namuãchitanü ga guxema taxre ga naxma̱x rü yema taxre ga naxü̃taxü̃, rü guma 11 ga nanegü. Rü wüxigu, namaxã ga guxü̃ma ga norü yemaxü̃gü, tüxü̃ nimuü̃ nawa ga yema natü ga Yabóxarü nuxtamaxü̃.
23 Nüü̃ nadau 32:22
24 Rü yexguma Acóbu nüxicatama yéma yaxüãchigu, rü wüxi ga duü̃xü̃ namaxã nügü nawogü rü ñu̱xmata yangunemare.
25 Natürü yema duü̃xü̃ rü nüxü̃ nacua̱x ga tama Acóbuxü̃ nax naporamaexü̃. Rü yemaca̱x düxwa Acóbutacugu nidagü, rü nanatüxüchitacu ga yexguma nügü inawogügu.
26 Rü yexguma ga yema duü̃xü̃ rü ñanagürü Acóbuxü̃: —¡Choxü̃ inge̱x erü marü ningóonechaü̃! —ñanagürü. Rü yexguma ga Acóbu rü nanangãxü̃ rü ñanagürü: —Ngẽxguma taxũtáma mexü̃ chomaxã cuxuegu̱xgu, rü taxũtáma cuxü̃ chinge̱x —ñanagürü.
27 Rü Acóbuna naca ga yema duü̃xü̃ rü ñanagürü: —¿Ta̱xacü nixĩ i cuéga? —ñanagürü. Rü Acóbu nanangãxü̃, rü ñanagürü: —Acóbu nixĩ i chauéga —ñanagürü.
28 Rü yexguma ga yema duü̃xü̃ ga nügü namaxã inawogüxü̃, rü ñanagürü nüxü̃: —Ñu̱xmawena rü marü taxũtáma Acóbu nixĩ i cuéga. Rü Iraé tá nixĩ i cuéga i ñu̱xmax, erü Tupanamaxã rü duü̃xü̃gümaxã cugü icuwogü rü curüporamae —ñanagürü.
29 Rü yexguma ga Acóbu rü nüxí nüxna naca rü ñanagürü: —Ñu̱xma chanaxwa̱xe i chomaxã nüxü̃ quixu ¿rü ta̱xacü nixĩ i cuéga? —ñanagürü. Natürü ga yema duü̃xü̃ rü nanangãxü̃ rü ñanagürü: —¿Tü̱xcüü̃ nüxü̃ cucuáxchaü̃ i chauéga? —ñanagürü. Rü ñu̱xũchi ga yema duü̃xü̃ rü yématama Acóbumaxã mexü̃ naxuegu.
30 Rü yexguma ga Acóbu rü Penuégu nanaxüéga ga yema nachica yerü ñanagürü: —Woo Tupanachiwexü̃ chadau, natürü chamaxãma —ñanagürü.*
31 Rü pa̱xmama noxri üa̱xcü irügoxgu ga Acóbu rü marü Penuéxü̃ naxüpetü. Natürü yema nax yatüxüchitacuxü̃ rü chixri ínixũ, rü ninanechigü.
32 Rü ngẽmaca̱x nixĩ i woo i ñu̱xma i Iraétanüxü̃ i tama nangõ̱xgüãxü̃ i ngẽma namachi i natacuwaama üxü̃, yerü Acóbu rü yexma nixĩ ga nüxü̃́ yadagüxü̃.
Notas
^ 32:30 Ngẽma naéga i Penué rü Tupanachiwe, ñaxü̃chiga nixĩ.
