Génesis 34:1-31
34 Rü Acóbuacü ga Dína ga Léawaü̃cü rü inaxũane natanügu ga guma ĩanecüã̱xarü paxü̃gü.
2 Rü nüma ga Ebéutanüxü̃ ga Amóx ga guma ĩanearü ãẽ̱xgacü nane ga Chiquéü̃ ngĩxü̃ nadau. Rü ngĩxü̃ niyaxu rü ngĩmaxã namaxü̃.
3 Rü nüma ga Chiquéü̃ rü poraãcü ngĩxü̃ nangẽ̱xẽ rü nüxü̃́ ingúchaü̃ rü yemaca̱x ngĩmaxã namecüma.
4 Rü yemaca̱x nanatü ga Amóxmaxã nidexa rü ñanagürü: —¡Pa Papax, choxü̃́ ngĩxca̱x íyaca i ngẽma pacü nax ngĩmaxã chaxãmaxü̃ca̱x! —ñanagürü.
5 Rü nüma ga Acóbu rü nüxü̃ nacuáchiga nax Chiquéü̃ rü naxacü ga Dínaxü̃ yayaxuxü̃. Natürü yema nanegü rü naanewa nayexmagü rü naxü̃nagüna yéma nadaugü. Rü yemaca̱x taxu ñanagürümare, yerü nanegüxü̃ ínanangu̱xẽxẽ.
6 Rü yoxni nüma ga Amóx ga Chiquéü̃ nanatü rü Acóbuxü̃tawa naxũ nax Acóbumaxã yadexaxü̃ca̱x.
7 Rü yexguma Acóbu nanegü naanewa ne ĩxgu rü nüxü̃ nacuáchigagügu ga yema ngupetüxü̃, rü poraãcüma nanue. Yerü yema Chiquéü̃ Dínamaxã üxü̃ rü Iraéca̱x rü wüxi ga taxü̃ma ga dauxcüraü̃ nixĩ, rü ñu̱xũchi poraãcüma chu̱xuxü̃ nixĩ.
8 Natürü nüma ga Amóx rü Acóbu nanegümaxã nidexa rü ñanagürü: —Yimá chaune ya Chiquéü̃ rü poraãcüma nangĩxwa̱xe rü ngĩxü̃ nangẽ̱xẽ i ngẽma peeya̱x. Rü pexü̃ chaca̱a̱xü̃ nax nüxna ngĩxü̃ pemuxü̃ca̱x nax ngĩmaxã naxãmaxü̃ca̱x.
9 Rü ngẽmaãcü tá yigütanüxü̃ tixĩgü. Rü toma rü pexacügümaxã tá tixãxma̱xgü, rü pema rü toxacügümaxã tá pixãxma̱xgü.
10 ¡Rü nua totanügu pexãchiü̃gü! Rü ñaa torü naane rü pexrü nixĩ nax pema penaxwa̱xexü̃ i nachicawa pemaxẽxü̃ca̱x. Rü name nixĩ i nua petaxegü rü naxca̱x petaxegü i perü naane —ñanagürü ga Amóx.
11 Rü yexgumarüxü̃ ta nüma ga Chiquéü̃ rü Acóbuxü̃ rü Dínaene̱xẽgüxü̃ ñanagürü: —Ngẽxguma chi choxna ngĩxü̃ pimu̱xgu i Dína nax ngĩmaxã chaxãmaxü̃ca̱x, rü pexna chi chanaxã i ngẽma choxna naxca̱x pecaxü̃.
12 Rü nüetama ega woo nataxgu i ngẽma diẽru rü ãmaregü i ngĩxca̱x choxna naxca̱x pecaxü̃, rü choma rü tá pexna chanaxã. ¡Natürü choxna ngĩxü̃ pemux i Dína nax ngĩmaxã chaxãmaxü̃ca̱x! —ñanagürü ga Chiquéü̃.
13 Natürü yema nax Dínaxü̃ yayaxuxü̃gagu ga Chiquéü̃, rü nüma ga Acóbu nanegü rü Chiquéü̃xü̃ rü nanatü ga Amóxü̃ nangãxü̃gü, rü nanawomüxẽẽgü.
14 Rü ñanagürügü: —Tomax, rü taxucürüwa toeya̱x nüxna ngĩxü̃ tamu i wüxi i yatü i tama íwiecha̱xmüü̃pe̱xechiraü̃xü̃, erü toxca̱x rü wüxi i ãne chi nixĩ i ngẽma.
15 Natürü ngẽxguma chi guxãma i pema nax piyatüxü̃ rü toxrüxü̃ pixĩgügu rü ípewíü̃cha̱xmüü̃pe̱xechiráü̃gügu rü chi cuxna ngĩxü̃ tamu i toeya̱x.
16 Rü ngẽmaãcü chi toxacügümaxã pixãxma̱xgü, rü ngẽxgumarüxü̃ i tomax rü chi pexacügümaxã tixãxma̱xgü, rü petanüwa tamaxẽ, rü ngẽmaãcü wüxitama i duü̃xü̃ tixĩgü.
17 Natürü ngẽxguma chi tama perü me yixĩxgu i ngẽma nax pegü ípiwiecha̱xmüü̃pe̱xechiraü̃güxü̃ rü tá ítachoxü̃ i nua rü tá ngĩxü̃ tiga i toeya̱x —ñanagürügü ga Acóbu nanegü.
18 Rü nüma ga Amóx rü nane ga Chiquéü̃ rü nanayauxgü ga yema ore ga Acóbu nanegü namaxã nüxü̃ ixugüxü̃.
19 34:19-21 Rü nüma ga Chiquéü̃ rü tama nanũxcüãxẽ nax ínawiecha̱xmüü̃pe̱xechiraü̃xü̃, yerü yema Acóbuxacü rü poraãcü nüxü̃́ ingúchaü̃. Rü nüma ga Chiquéü̃ rü nanatüpatawa rü yexera nüxü̃ nangechaxü̃gücü nixĩ. Rü nüma rü nanatü ga Amóx rü guma ĩaneca̱x ixücuxü̃wa naxĩ ga ngextá duü̃xü̃gü ítaxegüxü̃wa. Rü yéma duü̃xü̃gümaxã nüxü̃ nixu rü ñanagürügü: —Ngẽma Acóbu nanegü rü wüxi i mexü̃ i duü̃xü̃gü nixĩ. Rü nua tá naxãchiü̃gü rü tá nataxegü, erü tórü naane rü nata nax nawa nangẽxmagüxü̃ca̱x. Rü ngẽmaãcü i yixemax rü tá naxacügümaxã tixãxma̱xgü, rü ngẽxgumarüxü̃ ta i nümagü rü tá taxacügümaxã nixãxma̱xgü.
20 Nüü̃ nadau 34:19
21 Nüü̃ nadau 34:19
22 Natürü ngẽma nax tatanüwa nangẽxmagüxü̃ca̱x i nümagü rü wüxitama i ĩanewa nax imaxẽxü̃ca̱x, rü nümagü rü nanaxwa̱xegü nax guxü̃ma i ngẽma tórü yatüxü̃gü rü íyawiecha̱xmüü̃pe̱xechiráü̃güxü̃ ngẽma nümagü nagu naxacümagüxü̃rüxü̃.
23 Rü ngẽmaãcü i ngẽxguma tá yigütanüwa namaxẽxẽẽgu rü tá tóxrü nixĩgü i ngẽma norü ngẽmaxü̃gü rü naxü̃nagü —ñanagürügü.
24 Rü guxü̃ma ga yema iyatüxü̃ ga marü churarawa mexü̃ rü norü me nixĩ ga yema Amóx rü Chiquéü̃ nüxü̃ ixuxü̃. Rü yemaacü ga guxü̃ma rü ínawiü̃cha̱xmüü̃pe̱xechiráü̃gü.
25 Natürü nüma ga Chimeóü̃ rü Lebí ga Acóbu nanegü ga Dína ngĩenexẽgü, rü tomaepü̱x ga ngunexü̃wena rü guma ĩanewa naxĩ ga yexguma yema yatügü poraãcü ngúxü̃ yangegüyane namaxã ga nax ínawiü̃cha̱xmüü̃pe̱xechiráü̃güxü̃. Rü taramaxã nanadai ga guxü̃ma. Rü nümagü rü taxuacüma nügü ínapoxü̃gü yerü yema norü o̱xrigü rü taxũtáma nixegü.
26 Rü yemaacü taramaxã Amóxü̃ rü Chiquéü̃xü̃ nadai. Rü ñu̱xũchi Chiquéü̃patawa Dínaxü̃ ínayagaxüchigü rü nibuxmü.
27 34:27-28 Rü yéma nangugü ta ga yema togü ga Acóbu nanegü. Rü naétüwa nachopetü ga yema yuexü̃, rü nanade ga guxü̃ma ga yemaxü̃gü ga guma ĩanewa yexmagüxü̃. Rü yemaacü nayangutanüxẽẽgü ga yema Dínaxü̃ ngupetüxü̃. Rü nayagagü ga guxü̃ma ga carnérugü rü wocagü rü búrugü ga guma ĩanewa rü yema naanewa yexmagüxü̃.
28 Nüü̃ nadau 34:27
29 Rü naxca̱x nangĩ̱xgü ga guxü̃ma ga yemaxü̃gü ga ĩpatagüwa yexmagüxü̃. Rü tüxü̃ nigagü ga guxãma ga buxegü rü ngexegü.
30 Rü yexguma nüma ga Acóbu rü nanegü ga Chimeóü̃xü̃ rü Lebíxü̃ nanga rü ñanagürü: —Pemax i ñu̱xmax rü taxü̃ i guxchawa choxü̃ pengexmaxẽxẽ. Rü ñu̱xmax i ngẽma duü̃xü̃gü i ñaa naanewa maxẽxü̃ i Canaáü̃cüã̱xgü, rü Ferechéugü rü tá chauxchi naxaie. Rü nügü tá cha̱u̱xca̱x nanutaque̱xe rü tá cha̱u̱xca̱x ínayaxüãchi. Rü ñu̱xma nax noxretama i yatügü choxü̃́ ngẽxmaxü̃ rü tá choxü̃ nima̱x wüxigu namaxã i guxü̃ma i chopatacüã̱xgü —ñanagürü.
31 Natürü ga nümagü rü nanatü ga Acóbuxü̃ nangãxü̃gü rü ñanagürügü: —¿Tama ẽ̱xna nagu curüxĩnü nax ñoma wüxi i ngexü̃ i naxü̃nemaxã taxexü̃ãcü toeya̱xmaxã namaxü̃xü̃? —ñanagürügü.
