Génesis 37:1-36
37 Rü nüma ga Acóbu rü Canaáü̃anegu naxãchiü̃ nagu ga yema naane ga ü̃pa nanatü ga Ichaá nagu ãchiü̃xü̃.
Yúche rü naenexẽgü
2 Rü ñaa nixĩ i nachiga i natanüxü̃ ga Acóbu ga Iraégu ãégacü. Rü yexguma nane ga Yúche rü 17 ga taunecü nüxü̃́ yexmagu, rü nüxna nadau ga nanatüarü carnérugü wüxigu namaxã ga yema naenexẽgü ga nanatüxü̃taxü̃ ga Biráwaü̃güxü̃ rü Chipáwáü̃güxü̃. Rü nüma ga Yúche rü nanatümaxã nüxü̃ nayarüxugüxü̃ ga naenexẽgüchiga nax chixexü̃ naxügüxü̃.
3 Rü nüma ga Iraé rü poraãcü Yúchexü̃ nangechaü̃ guxü̃ma ga togü ga nanegüarü yexera, yerü yexguma marü naya̱xgu ga Iraé nixĩ ga nabuxü̃ ga Yúche. Rü yemaca̱x ga nanatü rü nüxü̃́ tanaxü ga wüxi ga naxchiru ga mámüxü̃ ga mexẽchixü̃.
4 Natürü yexguma naenexẽgü nüxü̃ icua̱xãchitanügu nax norü yexera Yúchexü̃ tangechaü̃xü̃ ga nanatü, rü yemaca̱x Yúchechi naxaie, rü tama nüxü̃ narümoxẽgüchaü̃.
5 37:5-6 Rü wüxi ga chütaxü̃ ga Yúche, rü naxãnegü, rü naenexẽgümaxã nüxü̃ nixu ga yema nanegü. Natürü ga naenexẽgü rü yexeraãcü naxchi naxaie, yerü ga Yúche rü ñanagürü nüxü̃: —¡Iperüxĩnüe rü tá pemaxã nüxü̃ chixu i ngẽma chaunegü!
6 Nüü̃ nadau 37:5
7 Rü nagu chaxãnegü nax guxãma i yixema rü wüxi i trigunecüwa ingẽxmagüxü̃ rü yachexexü̃ rü ínagoxü̃cütaxü̃. Natürü i ngẽma chorü cüta rü ngürü nüechama inachicüta rü meama ínarüto. Natürü ngẽma perü cütagü rü ngẽma choxrüxü̃ ínachomaeguãchi, rü ngẽma chorü cütape̱xegu nayarüma̱xaxgütanüãchi rü choxrüxü̃ nicua̱xüü̃gü —ñanagürü.
8 Rü yexguma ga naenexẽgü rü nanangãxü̃gagü rü ñanagürügü: —¿Ẽ̱xna cuma nagu curüxĩnügu rü cuma tá nixĩ i torü ãẽ̱xgacü quixĩxü̃ rü tomaxã tá icucuáxü̃? —ñanagürügü. Rü yemaacü yexeraãcü naxchi naxaie naxca̱x ga yema nanegü ga nüxü̃ yaxuxü̃.
9 Rü yemawena ga Yúche rü wenaxarü naxãnegü. Rü yema rü ta naenexẽgümaxã nüxü̃ nixu, rü ñanagürü: —Pemaxã tá nüxü̃ chixu rü wena chaxãnegü. Rü ngẽma chaunegüwa nüxü̃ chadau ya üa̱xcü rü tauemacü rü 11 ga ẽxtagü rü chope̱xegu nanangücuchitanü rü choxü̃ nicua̱xüü̃gü —ñanagürü.
10 Rü yexguma Yúche nanatümaxã rü naenexẽgümaxã nüxü̃ ixuxgu ga yema nanegü, rü nanatü rü ítanangaxüchi. Rü ñatagürü nüxü̃: —¿Ta̱xacüchiga nixĩ i ngẽma cunegü i tomaxã nüxü̃ quixuxü̃? ¿Ẽ̱xna cuma rü nagu curüxĩnügu rü cué rü cuenexẽgü rü choma rü tá cupe̱xegu tanangücuchitanü nax cuxü̃ ticua̱xüü̃güxü̃ca̱x? —ñatagürü.
11 Rü yemaca̱x ga naenexẽgü rü yexeraãcü nixãũãchie. Natürü ga nanatü rü bexma tüxica nagu tarüxĩnü ga yema nanegü.
Yúchemaxã nataxegü ga naenexẽgü
12 Rü wüxi ga ngunexü̃gu rü ĩane ga Chiquéü̃arü ngaicamana naxĩ ga Yúcheeneegü nax yexma maxẽ ne yadaugüxü̃ca̱x naxca̱x ga nanatüarü carnérugü.
13 Rü yemaca̱x ga nanatü ga Iraé, rü Yúchexü̃ ñatagürü: —¡Paxa cueneegüwe rüxũ rü íyadau i yea Chiquéü̃wa i carnérugüna ínadaugüxü̃wa! —ñatagürü. Rü nüma ga Yúche rü tüxü̃ nangãxü̃ rü ñanagürü: —Marü name, Pa Papax, rü taãẽãcüma tá ngéma chaxũ —ñanagürü.
14 Rü nüma ga Iraé rü nanangãxü̃, rü ñatagürü: —¡Ẽcü íyadau i cuenexẽgü rü ngẽma carnérugü! ¡Rü ñu̱xũchi nataegu nax chomaxã nüxü̃ quixuxü̃ca̱x nax ñuxãcü ínangupetüxü̃! —ñatagürü. Rü yemaacü Ebróü̃wa inaxũãchi ga Yúche ga Chiquéü̃wa nax naxũxü̃.
15 Natürü yexguma Chiquéü̃wa nanguxgu, rü tama nüxü̃ nacua̱x ga ngextá nax nayexmagüxü̃ ga yema naenexẽgü. Rü wüxi ga yatü yexma Yúchexü̃ nangau, rü nüxna naca rü ñanagürü: —¿Ta̱xacüca̱x cudau? —ñanagürü.
16 Rü yexguma ga Yúche rü nanangãxü̃, rü ñanagürü: —Chauenexẽgüca̱x chadau. ¿Tama nüxü̃ cucuáxü̃ nax ngextá yixĩxü̃ i carnérugüna nadaugüxü̃? —ñanagürü.
17 Rü nüma ga yema duü̃xü̃ rü nanangãxü̃ rü ñanagürü nüxü̃: —Marü nixĩgachi i nua. Rü nüxü̃ chaxĩnügu rü Dotáü̃wa nixĩ nax naxĩxü̃ —ñanagürü. Rü yexguma ga Yúche rü naenexẽgüwe narüxũ nax naxca̱x yadauxü̃ca̱x. Rü Dotáü̃gu nüxü̃ inayangau.
18 Rü nüma ga naenexẽgü rü yáxü̃gu nüxü̃ nadaugü, rü naxü̃pa ga natanüwa nax nanguxü̃ rü nügü nixugücu̱xẽ nax yama̱xgüãxü̃ca̱x.
19 Rü nügümaxã ñanagürügü: —¡Dücax! Yéa nixĩ rü ngéma ne naxũ i ngẽma ãnegüechaxü̃.
20 ¡Rü ngĩxã tayama̱xgü, rü ñu̱xũchi wüxi ya puchugu tayata̱xcuchigü! Rü ngẽxguma Papa tüxna caxgux, rü ñatagürügü tá: “Rü wüxi ya ai nanangõ̱x”, ñatagürügü tá. Rü ngẽmaãcü tá nüxü̃ tacua̱x rü aixcüma tá yangu i ngẽma nanegügü —ñanagürügü.
21 37:21-22 Rü yexguma yemaxü̃ naxĩnügu ga Rubéü̃, rü Yúchexü̃ ínapoxü̃ nüxna ga naenexẽgü. Rü ñanagürü nüxü̃: —Tama name nax yamáxü̃ rü nagü ipenabaxẽẽxü̃. ¡Rü ñaa ãxmaxü̃gu peyata̱xcuchimare, rü taxṹ i peyamáxü̃! —ñanagürü. Rü yema ñanagürü ga Rubéü̃ yerü Yúcheétüwa nachogü nax tama yama̱xgüãxü̃ca̱x rü nanatüca̱x nax natáeguxẽxẽxü̃ca̱x.
22 Nüü̃ nadau 37:21
23 Natürü yexguma naenexẽgütanüwa nanguxgu ga Yúche, rü nüxna nanapugü ga yema naxchiru ga mexẽchixü̃ ga nagu yacúxü̃.
24 Rü nayayauxgü, rü yema ãxmaxü̃gu nayata̱xcuchigü.
25 Rü yemawena rü ínarütogü rü nachibüe. Rü yexguma nachibüeyane rü yáxü̃gu nüxü̃ nadaugü ga Ismaétanüxü̃ ga Garaáxanewa ne ĩxü̃. Rü norü caméyutagu nayana ga pumaragü rü tuxuneruü̃gü rü pumara ga míra ga Equítuanewa nanaxü̃.
26 Rü yexguma ga Yudá rü naenexẽgüxü̃ ñanagürü: —¿Ta̱xacüwa tüxü̃́ namexü̃ nax yamáxü̃ ya taenexẽ rü nax yacúxü̃ i norü yu?
27 Rü narümemae nixĩ nax Ismaétanüxü̃xü̃ namaxã itaxegüxü̃ rü tama nax yamáxü̃, erü taenexẽxü̃chi nixĩ —ñanagürü. Rü guxü̃ma ga yema togü ga naenexẽgü rü marü norü me nixĩ ga yema.
28 Rü yexguma yema taxetanüxü̃ yéma chopetüxgu, rü Yúchexü̃ ínatúxuchigü ga ãxmaxü̃wa. Rü yema Ismaétanüxü̃xü̃ namaxã nataxegü ga 20 tachinü ga diẽruca̱x. Rü yemaacü Yúchexü̃ Equítuanewa nagagü.
29 Rü yexguma ínanguxgu ga Rubéü̃ rü íyada̱u̱xgu ga yema ãxmaxü̃wa, rü marü nataxuma ga Yúche ga yéma aixepewa. Rü nüma ga Rubéü̃ rü norü ngechaü̃maxã nügüchirugu nagáugü.
30 Rü naenexẽgütanüwa naxũ, rü ñanagürü nüxü̃: —Ngẽma buxü̃ rü marü nataxuma i ngẽma ãxmaxü̃wa. ¿Rü ta̱xacü tá chaxüxü̃ i ñu̱xmax? —ñanagürü.
31 Rü yexguma ga yema naenexẽgü rü nanayauxgü ga Yúchechiru. Rü wüxi ga carnéru tüxü̃ nima̱xgü rü guxemagümaxã nanaduchara ga Yúchechiru.
32 Rü nanatüxü̃tawa nanamugü ñaxü̃ ga dexamaxã: —Nüxü̃ itayangau i ñaa naxchiru. ¡Rü mea nüxü̃ nadau rü bexmana ngẽma yixĩ i cunechiru! —ñanagürügü.
33 Rü yexguma Acóbu nüxü̃ da̱u̱xgu ga nanechiru nax yixĩxü̃, rü ñanagürü: —Ngẽmáacü chaunechiru nixĩ. Rü wüxi ya ai ya idüracü nagu nawagü rü nanangõ̱x —ñanagürü.
34 Rü yexguma ga Acóbu rü nügü narügáutechiru, rü norü ngechaü̃maxã naneca̱x naxaure. Rü ñuxre ga yüxü naxauxecha.
35 Rü guxü̃ma ga nanegü rü naxacügü rü nanataãẽxẽxẽgütaa̱x. Natürü ga nüma rü tama nüxü̃́ nanayaxu. Rü naneca̱x naxauxama, rü ñanagürü: —Chauneca̱x tá chaxaure ñu̱xmatáta chayu̱x rü naxü̃tawa changu —ñanagürü.
36 Rü yexguma Equítuwa Yúchemaxã nangugü ga yema Madiáü̃tanüxü̃ rü Yúchemaxã nataxegü nüxü̃ ga wüxi ga yatü ga Potifágu ãégaxü̃. Rü nüma ga Potifá rü Equítuanearü ãẽ̱xgacüarü churaragüeru nixĩ.
