Génesis 38:1-30
38 Rü yexgumaxü̃cüü ga Yudá rü naenexẽgüna nixũ. Rü wüxi ga yatü ga Aduráü̃cüã̱x ga Irágu ãégacüpatawa nayamaxü̃.
2 38:2-3 Rü yema ĩanewa, rü ngĩxü̃ nacua̱x ga naxacü ga wüxi ga Canaáü̃anecüã̱x ga Chúagu ãégacü. Rü yexguma ngĩmaxã naxãxma̱x. Rü yexguma marü ngĩmaxã naxãxma̱xgu rü nüxü̃́ ixãxacü rü yema ngĩne rü Éxgu inaxüéga.
3 Nüü̃ nadau 38:2
4 Rü wenaxarü ixãxacü, rü nai ga ngĩne ngĩxü̃́ nayexma. Rü gumá ngĩne rü Onáü̃ nixĩ ga naéga.
5 Rü yemawena rü wenaxarü ixãxacü rü gumá ngĩne rü Cherá nixĩ ga naéga. Rü yema ngĩne rü nabu ga yexguma Yudá ĩane ga Quechíxwa nayexmagu.
6 Rü nüma ga Yudá rü nane ga Éxü̃ naxüxmax wüxi ga ngecü ga Tamáragu ãéga̱xcümaxã.
7 Natürü ga Cori ya Tupana, rü tama norü me nixĩ ga yema nacüma ga Éx nagu maxü̃xü̃, rü yemaca̱x nüxna nanayaxu ga norü maxü̃.
8 Rü yemaca̱x ga Yudá rü nane ga Onáü̃xü̃ ñanagürü: —¡Cuenexẽ ya yucü naxma̱xmaxã naxãxma̱x nax ngẽmaãcü cugagu naxãtaxaxü̃ca̱x ya cuenexẽ ya yucü! —ñanagürü.
9 Natürü nüma ga Onáü̃ rü nüxü̃ nacua̱xama nax yema naxacügü ga ngĩwa buexü̃ rü taxũchima naxacüacü nüxü̃ nacua̱xgüxü̃. Rü yemaca̱x ga yexguma ngĩmaxã namaxü̱̃xgu, rü naxuãxẽ nax tama nüxü̃́ naxãxacüxü̃ca̱x nax yemaacü tama nagagu naxãtaxaxü̃ca̱x ga gumá naenexẽ ga yucü.
10 Rü Cori ya Tupana, rü poraãcüma Onáü̃maxã nanu naxca̱x ga yema naxüxü̃, rü yemaca̱x nüxna rü ta nanayaxu ga norü maxü̃.
11 Rü yexguma ga Yudá, rü naneã̱x ga Tamáramaxã ñanagürü: —Pa Ngecü Iyutecüx, ¡rü cunatüpatawa naxũ, rü ngéma nangexma ñu̱xmatáta naya ya chaune ya Cherá! —ñanagürü. Yerü nüma ga Yudá rü nagu narüxĩnü ga nane ga Cherá rü tá ta nayuxü̃ naenexẽgürüxü̃. Rü yemaacü ga Tamára, rü ngĩnatüpataca̱x itaegu rü yéma iyexma.
12 Rü nawena nax ñuxre ga taunecü ngupetüxü̃ rü iyu ga Yudá naxma̱x ga Chúaxacü ixĩ́cü. Rü nüma ga Yudá rü norü ngechaü̃maxã ngĩca̱x naxaure. Rü yexguma marü axuwa nüxü̃ nachauxgu rü ĩane ga Tináxwa naxũ. Erü yéma nayexma ga norü puracütanüxü̃ ga norü carnérugü íyoü̃ta̱xagüxü̃. Rü namücü ga Irá ga Aduráü̃tanüxü̃ ixĩcü rü inayaxümü.
13 38:13-14 Rü yexguma nüxü̃ nacua̱xgu ga Tamára nax ngĩ̱xtüx ga Yudá nax ĩane ga Tináxwa norü carnéruarü yogüta̱xawa naxũxü̃, rü ícu̱xuchi ga ngĩrü yutechiru rü ñu̱xũchi ngĩgü iyadüxeru wüxi ga naxchirumaxã nax taxúema ngĩxü̃ cuáxü̃ca̱x. Rü yemaacü ĩane ga Enaíü̃ca̱x íxücuxü̃wa íyarüto nawa ga yema nama ga Tináxwa nadaxü̃. Rü yéma ixü yerü nüxü̃ icua̱x ga Cherá rü marü nax nayaxü̃, natürü Yudá rü tama namaxã ngĩxü̃ naxüte.
14 Nüü̃ nadau 38:13
15 Rü yema namawa naxüpetüxgu ga Yudá rü nüxü̃ nadau ga wüxi ga ngexü̃. Rü nüma nüxü̃ nacua̱xgu rü wüxi ga ngexü̃ ga naxü̃nemaxã taxexü̃ nixĩ, yerü nügü nidüxchametü.
16 Rü yemaca̱x naxca̱x nixũ ga yema ngexü̃. Natürü tama nüxü̃ nacua̱x nax yema yixĩxü̃ ga naneã̱x. Rü yemaca̱x ñanagürü ngĩxü̃: —¿Rü namexü̃ chi ega ngẽxguma cumaxã chamaxü̱̃xgu? —ñanagürü. Rü ngĩmax, rü inangãxü̃ rü ngĩgürügü: —¿Ta̱xacü tá choxna cuxãxü̃ nax chomaxã cumaxü̃xü̃? —ngĩgürügü.
17 Rü nüma ga Yudá rü ngĩxü̃ nangãxü̃ rü ñanagürü: —Wüxi i chíbuxacü i yatüxü̃ i yea chauxü̃nagütanüwa ngẽxmaxü̃ tá nua cuxca̱x chamu —ñanagürü. Rü ngĩma rü inangãxü̃ga rü ngĩgürügü: —Marü name. ¡Natürü wüxi i curü ngẽmaxü̃ chauxü̃tagu naxǘ nax ngẽxguma marü chíbuxacü chauxü̃tawa cumuxgu rü tá cuxü̃́ chanatáeguxẽxẽ! —ngĩgürügü ga ngĩmax.
18 Rü nüma ga Yudá rü ngĩxna naca rü ñanagürü: —¿Ta̱xacü i cunaxwa̱xexü̃ nax cuxna chanaxãxü̃? —ñanagürü. Rü ngĩma rü inangãxü̃ rü ngĩgürügü: —¡Choxna naxã i ngẽma curü cua̱xruxü̃ natüxümaxã rü ñu̱xũchi yima curü caxü̃ruxü̃ ya cuxme̱xwa ngẽxmane! —ngĩgürügü. Rü nüma ga Yudá rü ngĩxna nanaxã. Rü ñu̱xũchi ngĩmaxã namaxü̃ rü nüxü̃́ ixãxacü.
19 Rü yemawena ga Tamára, rü ínangegü ga yema ngĩgü namaxã yadüxchametüxü̃, rü ñu̱xũchi wenaxarü íyacu̱xcuchi ga ngĩrü yutechiru.
20 Rü nüma ga Yudá rü yixcamaxü̃ra namücü ga Aduráü̃tanüxü̃ yema ngecüxü̃tawa nanagaxẽxẽ ga yema chíbuxacü nax ngĩma nüxü̃́ nawoeguxẽẽãxü̃ca̱x ga norü yemaxü̃gü ga ngĩxna nangãxü̃. Natürü namücü rü marü tama yéma ngĩxü̃ nayanguéxü̃.
21 Rü nüma ga yema Aduráü̃tanüxü̃ rü yémacüã̱x ga duü̃xü̃güna naca rü ñanagürü: —¿Ngexü̃ nixĩ i ngẽma ngexü̃ i Enaíü̃cüã̱x i naxü̃nemaxã taxexü̃ i noxri nua namawa ngẽxmacü? —ñanagürü. Rü yema duü̃xü̃gü, rü nanangãxü̃gü rü ñanagürügü: —Nataxuma i ngexü̃ i ngĩxü̃nemaxã taxexü̃ i nua nüxü̃ tadauxü̃ —ñanagürügü.
22 Rü yexguma ga yema Aduráü̃tanüxü̃ rü nataegu. Rü Yudá íyexmaxü̃wa naxũ rü namaxã nüxü̃ nixu ga yema nüxü̃ ngupetüxü̃ rü ñanagürü: —Tama nüxü̃ ichayangau i ngẽma ngexü̃. Rü ngẽma yatügü i ngémacüã̱x chomaxã nüxü̃ ixugüegu, rü nataxuma i wüxi i ngexü̃ i naxü̃nemaxã taxexü̃ i ngéma nüxü̃ nadaugüxü̃ —ñanagürü.
23 Rü nüma ga Yudá rü nanangãxü̃ rü ñanagürü: —Nüetama ega noxrü yixĩxgu i ngẽma chorü ngẽmaxü̃gü rü ngẽxguma tá nixĩ i taxuxü̃ma i duü̃xü̃ tüxü̃ cugüexü̃. Natürü cuma rü marü nüxü̃ cucua̱x nax choma rü ngéma chanamu i ngẽma chíbuxacü, natürü taxuxü̃ma icuyangau —ñanagürü.
24 Rü nangupetü ga tomaepü̱x ga tauemacü, rü Yudámaxã nüxü̃ nayarüxugüe rü ñanagürügü: —Cuneã̱x i Tamára rü togü i yatügümaxã ipe rü ngẽmaca̱x i ñu̱xma rü ixãxacü rü itacharaü̃ —ñanagürügü. Rü yexguma ga nüma ga Yudá rü aita naxü rü ñanagürü —¡Ípenata̱xüchi rü peyagu! —ñanagürü.
25 Natürü yexguma ngĩxü̃ ínata̱xüchigügu rü ngĩma rü ngĩxtüxü̃tawa ímuga rü ngĩgürügü: —Yima ñaa ngẽmaxü̃güarü yoraã́xü̃ nixĩ i chaxãxacüxü̃. ¡Rü nüxü̃ nadau i cumax! ¿Rü texéarü yixĩxü̃ i ñaa cua̱xruxü̃ natüxümaxã rü ñu̱xũchi ñaa caxü̃ruxü̃? —ngĩgürügü.
26 Rü yexguma nüxü̃ nada̱u̱xgu ga Yudá nax noxrü yixĩxü̃ ga yema yemaxü̃gü rü ñanagürü: —Ñaa ngecü rü mexü̃ ixü. Rü chomawaxi nixĩ i chixexü̃ ngĩmaxã chaxüxü̃, erü tama chaune ya Cherámaxã ngĩxü̃ chaxüte —ñanagürü. Rü yemawena ga Yudá rü taguma wenaxarü ngĩmaxã ínape.
27 Rü yexguma nawa nanguxgu ga yema ngunexü̃ ga nagu naxíraxacüxü̃ ga Tamára, rü taxre ga ngĩne nabue.
28 Rü yexguma naxíraegu, rü gumá wüxi rü naxme̱xíra ínaxuxuchi. Rü yexguma ga yema íxraxacüxẽẽruxü̃, rü daunütane ga tümaxã ínawẽ̱xpü̱xme̱xẽ rü ngĩgürügü: —Daa nixĩ ya nüxíra íxracü —ngĩgürügü.
29 Natürü gumá íxuxuchime̱xẽchirécü rü wenaxarü nügü ínaxũxme̱xẽxẽ. Rü gumá naenexẽ nixĩ ga nüxíra íxracü. Rü yemaca̱x ga yema íxraxacüxẽẽruxü̃ rü Fáregu inaxüéga yerü ngĩgürügü: —¡Cuxü̃ naxüchica nax cuxíra cuxíraxü̃ca̱x! —ngĩgürügü.
30 Rü nawena naxíra ga gumá naenexẽ ga tünüta ga dauxü̃nemaxã ina̱i̱xpü̱xmẽxẽcü, rü Chéragu inaxüéga.
