Génesis 40:1-23
40 Rü yexguma Yúche poxcupataü̃wa yexmayane rü wüxi ga ngunexü̃gu rü Equítuanearü ãẽ̱xgacüxü̃ nanuxẽẽgü ga yema norü bínuarü baeruxü̃ rü norü paũarü üruxü̃.
2 Rü yemaca̱x nüma ga ãẽ̱xgacü rü poraãcü namaxã nanu ga yema taxre ga norü ngü̃xẽẽruü̃gü ga yema bínumaxã baegüxü̃arü ãẽ̱xgacü rü yema paũarü üruü̃güarü ãẽ̱xgacü.
3 Rü yemaca̱x yema poxcupataxü̃ ga Potifápatawa yexmaxü̃wa nanamugü. Rü yematama nixĩ ga Yúche nagu poxcuxü̃.
4 Rü nüma ga poxcupataü̃arü ãẽ̱xgacü rü Yúchexü̃ namu nax namaxã inacuáxü̃ca̱x. Rü yema ãẽ̱xgacüarü ngü̃xẽẽruü̃gü rü marü muxü̃ma ga ngunexü̃ yexma napoxcue.
5 Rü wüxi ga chütaxü̃gu rü yema bínumaxã baegüxü̃arü ãẽ̱xgacü rü yema paũarü üruü̃güarü ãẽ̱xgacü rü wüxichigü rü naxãnegü. Rü wüxichigü ga yema nanegü rü nüxü̃́ nayexma ga ta̱xacüchiga nax yixĩxü̃.
6 Rü moxü̃ãcü pa̱xmama ga yexguma Yúche natanüwa íyada̱u̱xgu, rü nüxü̃ nadau ga nax poraãcü naxoegaãẽgüxü̃ ga yema taxre.
7 Rü yemaca̱x nüxna naca, rü ñanagürü: —¿Ta̱xacüca̱x pemaechiwe? —ñanagürü.
8 Rü nümagü rü nanangãxü̃gü, rü ñanagürügü: —Ngewa̱x chütacü rü taxãnegüe. Rü tataxuma ya texé ya tomaxã nüxü̃ ixuxe nax ta̱xacüchiga yixĩxü̃ i ngẽma nagu taxãnegügüxü̃ —ñanagürügü. Rü yexguma ga Yúche rü ñanagürü: —¿Taux ẽ̱xna ya Tupana yixĩxü̃ ya yimá nango̱xẽẽcü nax ta̱xacüchiga yixĩxü̃? ¡Rü chomaxã nüxü̃ pixu i ngẽma penegü! —ñanagürü.
9 Rü yexguma ga yema bínumaxã baegüxü̃arü ãẽ̱xgacü rü nüxíra Yúchemaxã nüxü̃ nixu ga nanegü, rü ñanagürü: —Chaunegüwa rü nüxü̃ chadau ga wüxi ga úbane.
10 Rü yema úbane rü narüxü rü niyachigü rü tomaepü̱x nixĩ ga nachacüxü. Rü naxãchacu rü yema nachacuwa rü naxo rü nixãxya̱xa rü nidau.
11 Rü choma rü chanange ga naxpáü̃ ga Faraóü̃. Rü úbata chicawe, rü yema naxpáü̃gu chanama̱i̱xgütüxü̃. Rü ñu̱xũchi chomatama nüxna chayaxãweü̃ ga Faraóü̃ —ñanagürü.
12 Rü yexguma ga Yúche rü ñanagürü nüxü̃: —Ngẽma cunegü rü ñaxü̃chiga nixĩ: “Rü ngẽma tomaepü̱x i nachacüxü rü tomaepü̱x i ngunexü̃chiga nixĩ.
13 Rü tomaepü̱x i ngunexü̃wa nanguxgu rü nüma ya Faraóü̃ tá nüxü̃ nadau i cupane nax ta̱xacüca̱x cupoxcuxü̃. Rü tá cuxca̱x nangema rü wena ngẽma puracüwa tátama cuxü̃ napuracüxẽxẽ. Rü cuma rü tá wena cunaxaxexẽxẽ ya Faraóü̃ ngẽma noxri cunaxüxü̃rüü̃tama”, ñaxü̃chiga nixĩ.
14 Rü ngẽxguma ngẽmaãcü tá yanguxgu rü chanaxwa̱xe i cuxü̃́ changechaü̃tümüxü̃. ¡Rü choxna nacua̱xãchi, rü Faraóü̃maxã choxü̃ ixu nax choxü̃ ínamuxũchixü̃ca̱x i nua!
15 Rü choma i Ebréutanüxü̃ rü chauchixü̃anewa nixĩ ga choxü̃ yagagüxü̃ rü nuxã chomaxã yataxegüxü̃. Rü taxuca̱xma tü̱xcüü̃ nua poxcupataü̃wa changexma, yerü taxuxü̃ma ga chixexü̃ chaxü —ñanagürü.
16 Rü yexguma yema paũarü üruü̃güarü ãẽ̱xgacü nüxü̃ ĩnügu ga mexü̃chiga nax yixĩxü̃ ga yema Yúche ngo̱xẽẽxü̃ ga nanegüchiga rü ñanagürü: —Choma rü nagu chaxãnegü nax chauerugu chayangexü̃ ga tomaepü̱x ga pexchiãcu ga paũ ga maixcuraxü̃.
17 Rü gumá pexchi ga düxétüwaama ücüwa rü nayexma ga naguxü̃raü̃xü̃ ga paũ ga maixcuraxü̃ ga Faraóü̃ca̱x ixĩxü̃. Natürü ínangugü ga werigü, rü gumá pexchi ga chauerugu chingecüwa tanaca̱u̱xgü ga paũ —ñanagürü ga yema paũarü üruü̃güarü ãẽ̱xgacü.
18 Rü yexguma ga Yúche rü nanangãxü̃ rü ñanagürü: —Rü ngẽma cunegü rü ñaxü̃chiga nixĩ: “Rü yimá tomaepü̱x ya pexchi rü tomaepü̱x i ngunexü̃chiga nixĩ.
19 Rü tomaepü̱x i ngunexü̃wa nanguxgu, rü nüma ya Faraóü̃ tá nüxü̃ nadau i cupane nax ta̱xacüca̱x cupoxcuxü̃. Rü tá nanamu i norü purichíagü nax cuxü̃ nawẽxnaxãgüxü̃ca̱x. Rü naixtanüwa tá cuxü̃ narütuxẽẽgü. Rü ngurucugü tá nanangõ̱xgü i cuxune”, ñaxü̃chiga nixĩ —ñanagürü ga Yúche.
20 Rü tomaepü̱x ga ngunexü̃guwena rü ninguarü taunecüã̱x ga Faraóü̃. Rü nanaxü ga wüxi ga peta naxca̱x ga guxü̃ma ga norü ngü̃xẽẽruü̃gü. Rü yema duü̃xü̃gü ga nüxna naxugüxü̃pe̱xewa, rü Faraóü̃ nanamu nax nape̱xewa nagagüãxü̃ca̱x ga yema bínuarü baeruü̃güarü ãẽ̱xgacü rü yema paũarü üruü̃güarü ãẽ̱xgacü.
21 Rü yema baeruü̃güarü ãẽ̱xgacü, rü wenaxarü yematama puracüwa nanamu. Rü wenaxarü noxrirüü̃tama Faraóü̃xü̃ nayaxaxexẽẽxü̃.
22 Natürü ga yema paũarü üruü̃güarü ãẽ̱xgacü, rü nüma ga Faraóü̃ rü norü purichíagüxü̃ namu nax nawẽxnaxãgüaxü̃ca̱x yema Yúche nüxü̃ ixuxü̃rüxü̃.
23 Natürü ga yema bínuarü baeruü̃güarü ãẽ̱xgacü rü tama Yúchena nacua̱xãchi.
