Génesis 42:1-38
42 Rü yexguma Acóbu nüxü̃ cuáxchigagu ga Equítuanewa nax nayexmaxü̃ ga trigu, rü nanegüxü̃ ñanagürü: —¿Ta̱xacü nua pexüe i pegü nua perüdaunümarexü̃?
2 Rü chomaxã nüxü̃ nixugügü rü Equítuanewa nax nangemaxü̃ i trigu ¡Rü ngéma pexĩ nax triguta peyataxegüxü̃ca̱x nax ngẽmaãcü tama iyuexü̃ca̱x! —ñanagürü.
3 Rü ñu̱xũchi 10 ga Yúcheenexẽgü rü Equítuanewa naxĩ nax triguta yataxegüxü̃ca̱x.
4 Natürü ga Acóbu rü tama nanaxwa̱xe ga nane ga Bẽyamíü̃ ga Yúcheenexẽ yéma ũxü̃, yerü nagu narüxĩnü rü ngürüãchi ta̱xacürü chixexü̃ yexma nüxü̃ nayaxüpetü.
5 Rü nanegü ga Acóbu ga Iraégu ãégacü rü togü ga taxetanüxü̃tanügu naxãgü, yerü guxü̃ma ga Canaáü̃anewa rü taiya nangu̱x.
6 Rü Yúche nixĩ ga ãẽ̱xgacü ixĩcü ga Equítuanewa. Rü nüma nixĩ ga duü̃xü̃gü ga togü ga nachixü̃anewa ne ĩxü̃xü̃ namaxã nataxexü̃ ga trigu Rü yexguma naenexẽgü naxü̃tawa ngugügu, rü nape̱xegu ñaxtüanegu nanangücuchitanü.
7 Rü nüma ga Yúche rü naenexẽgüxü̃ nacua̱x ga yexguma nüxü̃ nada̱u̱xgu, natürü ñoma tama nüxü̃ nacuáxü̃rüxü̃ nügü nixĩxẽxẽ. Rü nugaãcü naenexẽgüna naca, rü ñanagürü: —¿Rü pemax, rü ngextá ne pexĩ? —ñanagürü. Rü nümagü rü nanangãxü̃gü rü ñanagürügü: —Toma rü Canaáü̃anewa ne taxĩ, rü trigu nuata tayataxegü —ñanagürügü.
8 Rü nüma ga Yúche rü naenexẽgüxü̃ nacua̱x, natürü ga naenexẽgü rü tama Yúchexü̃ nacua̱xgü.
9 Rü yexguma ga Yúche rü nüxna nacua̱xãchi ga yema ü̃pa nagu naxãnegüxü̃ ga naenexẽgüchiga ixĩxü̃. Rü ñanagürü nüxü̃: —Pemax rü tochixü̃anearü ngugütaeruü̃gü pixĩgü. Rü pema rü nua ngugütaewa pexĩ nax naxca̱x pedaugüxü̃ca̱x nax ngextá pexü̃́ natauxchaxü̃ nax toechita pichocuxü̃ca̱x nawa i ñaa naane —ñanagürü.
10 Rü nüma ga naenexẽgü rü nanangãxü̃gü rü ñanagürügü: —Tama nixĩ, Pa Corix. Toma i curü duü̃xü̃gü rü tríguarü taxewa nua taxĩmare.
11 Rü guxãma i toma rü wüxitama nixĩ ya tonatü. Rü duü̃xü̃gü i mexü̃ tixĩgü. Rü taguma ngugütaeruxü̃ tixĩgü —ñanagürügü.
12 Natürü ga Yúche rü ñanagürüama: —Rü tama aixcüma nixĩ i ngẽma. Rü pema rü nua pexĩ nax naxca̱x pedaugüxü̃ca̱x i ngextá pexü̃́ natauxchaxü̃ nax toechita pichocuxü̃ca̱x nawa i ñaa naane —ñanagürüama.
13 Natürü nümagü rü nanangãxü̃gü rü ñanagürügü: —Toma i curü duü̃xü̃gü rü 12 tixĩgü i togüenexẽ. Rü wüxitama tixĩ ya tonatü, rü Canaáü̃anegu nixĩ i taxãchiü̃güxü̃. Rü yimá toenexẽ ya rübumaecü rü ngẽxma tonatüxü̃tagu narüxã̱ũ̱x, rü guma nai ga toenexẽ rü marü nataxuma i toxü̃tawa —ñanagürügü.
14 Natürü nüma ga Yúche rü wena ñanagürüama: —Pema rü ngugütaewa nua pexĩ.
15 Rü ñu̱xma rü tá pexü̃ chaxü, rü Faraóü̃égagu pemaxã nüxü̃ chixu rü taxũtáma nua pewoegu ega tama nua penagaxgu ya yimá peenexẽ ya rübumaecü.
16 ¡Rü wüxíe táegu nax tayagaxü̃ca̱x! Rü yíxema nuxã rüchoxe rü tá tapoxcue. Rü ngẽmawa tá nüxü̃ chacua̱x rü aixcüma yixĩ i ngẽma chomaxã nüxü̃ pixuxü̃. Rü ngẽxguma taxũtáma aixcüma yixĩxgu, rü ngẽmawa tá nüxü̃ chacua̱x nax ngugütaewa nua pexĩmarexü̃. Rü Faraóü̃égagu pemaxã nüxü̃ chixu i ngẽma —ñanagürü.
17 Rü yexguma ga Yúche rü poxcupataü̃gu nanawocu tomaepü̱x ga ngunexü̃.
18 Natürü yema tomaepü̱x ga ngunexü̃guwena rü ñanagürü nüxü̃: —Choma rü Tupanaxü̃ chamuü̃. ¡Rü Ñaa tá pexü! Rü ngẽxguma tá nixĩ i taxũtáma pexü̃ chadaixü̃.
19 Rü ngẽxguma aixcüma mexü̃ i duü̃xü̃gü pexĩgügu, rü chanaxwa̱xe i wüxi i peenexẽ nua poxcupataü̃wa peta̱x. Rü ñu̱xũchi i pema i tama poxcuexü̃ rü marü name i petanüxü̃ca̱x pewoegu namaxã i perü trigu nax ngẽma nangõ̱xgüxü̃ca̱x.
20 ¡Rü nua penaga ya yimá peenexẽ ya rübumaecü! Rü ngẽmaãcü tá nüxü̃ chacua̱x rü aixcüma yixĩ i ngẽma nüxü̃ pixuxü̃. Rü ngẽxguma taxũtáma nua penagaxgu, rü tá peyue —ñanagürü. Rü yexguma ga nümagü rü: —Ngü̃ —ñanagürügü.
21 Natürü ga wüxichigü rü nügümaxã ñanagürügü: —Aixcümaxü̃chi poraãcü chixexü̃ namaxã taxü ga taenexẽ ga Yúche. Yerü woo nüxü̃ nax idauxü̃ nax ngúxü̃ yangexü̃, natürü tama naga taxĩnüe ga yexguma tüxü̃ naca̱a̱xü̃gu nax tüxü̃́ nangechaü̃tümüxü̃xü̃ca̱x. Rü ngẽmaca̱x nixĩ i ñu̱xma taxca̱x ínanguxü̃ i ñaa guxchaxü̃ —ñanagürügü nügümaxã.
22 Rü nüma ga Rubéü̃ rü naenexẽgüxü̃ ñanagürü: —Choma rü marü pemaxã nüxü̃ chixu nax tama chixexü̃ namaxã pexügüxü̃ca̱x ga gumá bucü, natürü tama chauga pexĩnüechaü̃. Rü ngẽma nixĩ i tórü natanü ga nax nayuxü̃ —ñanagürü.
23 Natürü ga nümagü rü tama nüxü̃ nacua̱xgü nax Yúche rü bexma nüxü̃ naxĩnüxü̃. Yerü ga Yúche rü Equítuanegawa naenexẽgümaxã nidexa rü to ga duü̃xü̃ rü Ebréugawa namaxã nüxü̃ nixuchigü ga yema Yúche nüxü̃ ixuxü̃.
24 Rü yexguma ga Yúche rü nüxna nixũgachi rü yéma nayaxaxu. Rü wenaxarü naenexẽgü íyexmagüxü̃wa naxũ, rü wenaxarü namaxã nidexa. Rü Chimeóü̃xü̃ nigagachi rü naenexẽgüpe̱xewa purichíaxü̃ namu nax yana̱i̱xgüãxü̃ca̱x.
25 Rü yemawena norü duü̃xü̃güxü̃ namu nax trigumaxã yaxüãcugüãxü̃ca̱x ga naenexẽgüarü chacugü. Rü yema diẽru ga naenexẽgü nüxna ngĩxü̃ ãgücü, rü nanamu nax yexmatama norü chacugügu ngĩxü̃ yanuxü̃. Rü ñu̱xũchi norü duü̃xü̃gümaxã nüxü̃ nixu nax naenexẽgüarü namawaxü̃ ga õna nüxna naxãgüxü̃. Rü yemaacü nanaxügü ga norü duü̃xü̃gü.
26 Rü yexguma ga naenexẽgü rü norü búruétügu nananugü ga norü trigupüü̃gü, rü ínixĩ.
27 Rü yexguma nawa nangugügu ga yema nachica ga nagu napegüchaü̃xü̃, rü wüxi ga natanüwa rü nayawẽã́xü̃ ga norü chacu nax norü búruxü̃ nachibüxẽẽxü̃ca̱x. Rü yema chacua̱xgu ngĩxü̃ nayangau ga norü diẽru.
28 Rü naenexẽgümaxã nüxü̃ nixu, rü ñanagürü: —¡Dücax, choxü̃́ ngĩxü̃ natáeguxẽẽgü i chorü diẽru! Rü nua chorü chacuwa ingẽxma —ñanagürü. Rü yexguma ga yema togü rü guxü̃ma poraãcü naba̱i̱xãchiãẽgü. Rü muü̃maxã nidu̱xrue, rü nügümaxã ñanagürügü: —¿Ta̱xacü nixĩ i tamaxã naxüxü̃ ya Tupana? —ñanagürügü.
29 42:29-30 Rü yexguma Canaáü̃wa nangugügu, rü nanatü ga Acóbumaxã nüxü̃ nixugüe ga guxü̃ma ga yema nüxü̃ ngupetüxü̃. Rü ñanagürü: —Ngẽma Equítuanearü ãẽ̱xgacü rü tomaxã naporaga rü ngugütaeruü̃ca̱x toxü̃ nacua̱xgü.
30 Nüü̃ nadau 42:29
31 Natürü i tomax rü mea namaxã nüxü̃ tixu nax toma rü mexü̃ i duü̃xü̃gü tixĩgüxü̃, rü tama nax ngugütaeruü̃gü tixĩgüxü̃.
32 Rü namaxã ta nüxü̃ tixu nax 12 gü tixĩgüxü̃ i togüenexẽgü rü nax wüxitama yixĩxü̃ i tonatü, rü wüxi i toenexẽ rü nax marü nayuxü̃. Rü yimá toenexẽ ya rübumaecü rü nax cuxü̃tawatama nangẽxmaxü̃ i Canaáü̃anewa.
33 Natürü nüma ya ãẽ̱xgacü rü toxü̃ ñanagürü: “Rü ñu̱xma rü tá pexü̃ chaxü rü ngẽmawa tá nüxü̃ chacua̱x rü aixcüma i pema rü mexü̃ i duü̃xü̃gü pixĩgü. ¡Rü ẽcü nuxã chauxü̃tawa penatá i wüxi i peenexẽ rü petanüxü̃ca̱x ípeyana i trigu!
34 Natürü chanaxwa̱xe nax nua penagaxü̃ ya yimá peenexẽ ya rübumaecü nax ngẽmawa nüxü̃ chacuáxü̃ca̱x rü aixcüma mexü̃ i duü̃xü̃gü pixĩgüxü̃ rü tama ngugüwa nua pexĩxü̃. Rü ngẽxguma i chomax rü tá íchanamuxũchi i ñaa peenexẽ i ñu̱xmax nuxã pemuxü̃, rü ñu̱xũchi tauxchaãcü tá ñaa nachixü̃anewa peyataxegü”, ñanagürü toxü̃ —ñanagürügü.
35 Rü ñu̱xũchi yexguma wüxichigüarü choca yawẽgügu rü nagüãcugüãgu, rü yexmatama tüxü̃ nayangaugü ga norü diẽrugü ga chocamaxã ináixpüü̃güxe. Rü yexguma yemaxü̃ nada̱u̱xgu ga Acóbu rü nanegü, rü poraãcü naba̱i̱xãchiãẽgü.
36 Rü yexguma nüma ga Acóbu rü nanegüxü̃ nangãxü̃, rü ñanagürü: —Pema rü ngẽmatama choxü̃́ penagu̱xẽxẽ ya chaunegü. Rü Yúche rü marü nataxuma i tatanüwa. Chimeóü̃ rü ta marü nataxuma. Rü ñu̱xma rü ngématama peyaga ya Bẽyamíü̃. Rü guxü̃guma rü choma nixĩ i ngúxü̃ chingexü̃ —ñanagürü ga Acóbu.
37 Rü yexguma ga Rubéü̃ rü nanatüxü̃ ñanagürü: —¡Cha̱u̱xme̱xgu namu ya Bẽyamíü̃! Rü choma tá mea nüxna chadau rü wena cuxca̱x chanatáeguxẽxẽ. Rü ngẽxguma taxũtáma cuxca̱x chanatáeguxẽẽgu ¡rü ẽcü nadai ya yimá taxre ya chaunegü! —ñanagürü.
38 Natürü nüma ga Acóbu rü nanangãxü̃ rü ñanagürü: —Yimá chaune ya Bẽyamíü̃ rü tama nixĩ i pewe chanamuxü̃. Yerü gumá naenexẽ ga Yúche rü marü nayu. Rü Bẽyamíü̃xicatama nixĩ ya íyaxücü. ¿Rü ngẽxguma tá ta̱xacü nüxü̃ ngupetügu i namawa rü ta̱xacü tá pexüxü̃ i pemax? Rü choma nax chayaxü̃ rü pegagu tá nixĩ i ngechaü̃maxã chayuxü̃ —ñanagürü ga Acóbu.
