Génesis 43:1-34
43 Rü Canaáü̃anewa rü niyexeraguchigü nax taiya ngúxü̃.
2 Rü yexguma marü nüxü̃́ nagu̱xgu ga norü trigu ga Equítuanewa ne nangegüxü̃, rü nüma ga Acóbu rü nanegüxü̃ ñanagürü: —¡Wenaxarü ngéma Equítuanewa pexĩ nax wenaxarü to i tórü tríguca̱x peyataxegüxü̃ca̱x! —ñanagürü.
3 Natürü ga gumá nane ga Yudá rü nanangãxü̃, rü ñanagürü: —Pa Papax, natürü ga gumá ãẽ̱xgacü rü ngóxü̃wama toxna naxãga rü ñanagürü: “Rü ngẽxguma taxũtáma nua penagaxgu ya yimá peenexẽ ya rübumaecü, rü noxtacüma ngexrüma i nua nax pexĩxü̃”, ñanagürü toxü̃.
4 Rü ngẽmaca̱x tanaxwa̱xe i Bẽyamíü̃ towe cunamu. Rü ngẽxguma towe cunamu̱xgu, rü marü name nax ngéma triguwa taxĩxü̃.
5 Natürü ngẽxguma taxũtáma ngéma cunamu̱xgux, rü taxũtáma ngéma taxĩ. Yerü meama tomaxã nüxü̃ nixu, rü ñanagürü: “Rü ngẽxguma taxũtáma nua penagaxgu ya yimá peenexẽ ya rübumaecü, rü noxtacüma ngexrüma i nua nax pexĩxü̃” ñanagürü toxü̃ —ñanagürügü.
6 Rü yexguma ga nüma ga Acóbu ga Iraégu ãégacü, rü ñanagürü: —¿Tü̱xcüü̃ poraãcü chixexü̃ chomaxã pexüe? ¿Rü tü̱xcüü̃ ga namaxã nüxü̃ pixuxü̃ ga yema yatü ga pexü̃́ nax nangẽxmaxü̃ ya nai ya peenexẽ? —ñanagürü.
7 Rü nüma ga nanegü rü nanangãxü̃gagü rü ñanagürügü: —Yerü nümatama nixĩ ga tochigaca̱x rü tatanüxü̃chigaca̱x ínaca̱xaxü̃. Rü ñanagürü toxü̃: “¿Tamaxü̃xü̃ ta ya penatü? ¿Rü pexü̃́ nangẽxmaxü̃ ya nai ya peenexẽ?” ñanagürü toxü̃. Rü toma rü tanangãxü̃ ga yema toxna nax naca̱xaxü̃. ¿Rü ñuxũcürüwa chi i nüxü̃ tacuáxü̃ nax nüma rü: “Nua penaga ya peenexẽ”, ñaxü̃maxã toxü̃ nangãxü̃xü̃? —ñanagürügü.
8 Rü yexguma ga Yudá rü nanatü ga Iraéxü̃ ñanagürü: —Rü ngẽxguma tama taiyamaxã iyuechaxü̃gu, rü ẽcü ¡towe namu ya yimá toenexẽ! Rü chomatátama nüxna chadau, rü ñu̱xma tátama itaxĩãchi. Rü ngẽmaãcü taxũtáma taiyamaxã tayue i yixema rü toxocügü.
9 Rü chomatátama nixĩ i nüxna chadauxü̃ ya Bẽyamíü̃. Rü ngẽxguma ta̱xacü nüxü̃ ngupetügu, rü chomatátama nixĩ i chanangenagüxü̃ i ngẽma guxchaxü̃. Rü ngẽxguma taxũtáma cuxca̱x chanatáeguxẽẽgu, rü guxü̃gutáma nagu curüxĩnü nax chaugagu yixĩxü̃.
10 Rü ngẽxguma chi taxũ nuxã toxü̃ cunũxcüxẽẽgu, rü marü chi taxree̱xpü̱xcüna ngéma taxĩ rü tawoegu —ñanagürü ga Yudá.
11 Rü yexguma ga nüma ga nanatü, rü nanangãxü̃ rü ñanagürü: —Ngẽxguma nataxuxgu nax ta̱xacümaxã penangüxmüxẽẽxü̃ ya yimá ãẽ̱xgacü ega Bẽyamíü̃ tama pewe rüxũxgu, rü ñaãcü tá penaxü: ¡Rü perü chacugügu norü ãmare ngéma penge! ¡Rü ngéma penana i ngẽma ngẽmaxü̃gü i mexü̃gü i tórü naanewa ixüxü̃, ngẽxgumarüxü̃ i tuxuneruxü̃, rü pumara, rü míra, rü ira, rü castaña rü arméü̃draarü o!
12 ¡Rü ngẽma diẽru ga noxri yéma ngĩxü̃ pengecü rü wenaxarü ngéma ngĩxü̃ pinge, rü ngĩétü nai i ngẽxgumaepü̱x i diẽru ngĩxü̃ pinge nax nüxna ngĩxü̃ pexãxü̃ca̱x! Yerü ngürüãchi ínatüe rü yemaca̱x perü chacugügu ngĩxü̃ nanucucüraxü̃.
13 ¡Rü ẽcü ipexĩãchi rü ípeyaga ya peenexẽ rü wenaxarü ípeyada̱u̱x i naxü̃tawa i ngẽma yatü!
14 Rü chanaxwa̱xe ya Tupana ya Guxü̃étüwa Ngẽxmacü nüxna naxĩnü ya yimá ãẽ̱xgacü nax nüxü̃́ pengechaü̃tümüxü̃güxü̃ca̱x, rü ínanguxuchixẽẽãxü̃ca̱x ya yimá peenexẽ ya Chimeóü̃, rü taxuxü̃ma nüxü̃ ngupetüxü̃ca̱x ya Bẽyamíü̃. Natürü ngẽxguma Tupana naxwa̱xegu nax changenexü̃, rü marü name nax ngẽmaãcü yixĩxü̃ —ñanagürü ga Acóbu.
15 43:15-16 Rü yexguma ga nanegü rü nanade ga yema ãmaregü rü guxü̃ma ga yema diẽru ga íyangegüchaü̃xü̃. Rü ínayagagü ga Bẽyamíü̃ rü yemaacü Equítuanewa naxĩ. Rü yexguma Yúchexü̃tawa nangugügu rü Bẽyamíü̃xü̃ nada̱u̱xgu nax naenexẽgütanüwa nayexmaxü̃ rü nüma ga Yúche rü yema yatü ga napatamaxã icuáxü̃xü̃ ñanagürü: —¡Chaupatawa nagagü i ñaa yatügü! ¡Rü wüxi i woca ima̱x rü õna naxü! Erü yixcama tocuchigu rü tá wüxiwa namaxã chachibü —ñanagürü.
16 Nüü̃ nadau 43:15
17 Rü gumá yatü ga napatamaxã icuácü, rü nayanguxẽxẽ ga yema Yúche namuxü̃. Rü nümatama Yúchepatawa nanagagü.
18 Natürü ga nümagü, rü naba̱i̱xãchie yerü Yúchepatawa nanagagü, rü nügümaxã ñanagürügü: —Ñaa rü wüxi i womüxẽxẽ nixĩ i tamaxã naxüxü̃. Rü nua tüxü̃ nagagü ngĩca̱x ga yema diẽru ga noxri nua ixĩxgu tüxü̃́ ngĩxü̃ nawoeguxẽẽcü. Rü ñu̱xma rü tá nuxã tüxü̃ ínayauxü̃, rü norü puracütanüxü̃xü̃ tá tüxü̃ nixĩgüxẽxẽ guxü̃ma i tórü búrugümaxã —ñanagürügü.
19 Rü yexguma gumá Yúchepataarü ĩã̱xwa nangugügu, rü yema yatü ga napatamaxã icuáxü̃maxã nidexagü, rü ñanagürügü nüxü̃:
20 —Rü yexguma noxri nua taxĩxgu, Pa Corix, rü aixcüma triguwa nua taxĩ.
21 Natürü yexguma tawoegugu rü yema ítayapegüxü̃wa tangugügu, rü ítayawẽgü ga torü chacugü rü wüxichigü ga torü chacugu ngĩxü̃ itayangaugü ga yema diẽru. Rü guxcüma iyexma. Rü ñu̱xma rü nua ngĩxü̃ tange nax ngĩxü̃ tatáeguxẽẽxü̃ca̱x.
22 Rü ñu̱xma rü yexeracü i diẽru nua ngĩxü̃ tange nax to i tríguca̱x tataxegüxü̃ca̱x. Natürü tama nüxü̃ tacua̱x ga texé torü chacugügu nax ngĩxü̃ nucuxü̃ ga yema diẽru ga noxri nua ngĩxü̃ tangecü —ñanagürügü.
23 Rü yema Yúchepataarü dauruxü̃ rü nanangãxü̃ rü ñanagürü: —¡Perüchianegü, rü taxṹ i pemuü̃exü̃! Rü yimá perü Tupana ya penatüarü Tupana ixĩcü nixĩ ga perü chacugügu ngĩxü̃ nucü. Yerü chomatama ngĩxü̃ chayaxu ga yema diẽru ga ngĩxü̃ pexãgücü ga yexguma nua pexĩxgu —ñanagürü. Rü yexguma ga gumá yatü rü Chimeóü̃xü̃ ínamuxũchi rü yema naenexẽgü íyexmagüxü̃wa nanaga.
24 Rü ñu̱xũchi Yúchepatawa nanagagü ga guxü̃ma ga yema naenexẽgü. Rü dexá nüxna tanaxã nax yayauxgücutüxü̃ca̱x. Rü norü búrugü rü ta nayaxüwemügü.
25 Rü yexguma ga yema naenexẽgü rü nanamexẽxẽ ga ãmaregü, rü Yúchexü̃ ínanangu̱xẽẽgü ga norü puracüwa nax ne naxũxü̃. Yerü nüxü̃ nacua̱xgü nax tocuchigu tá namaxã nachibüxü̃.
26 Rü yexguma napatawa nanguxgu ga Yúche, rü nüma ga naenexẽgü rü nape̱xegu ñaxtüanegu nanangücuchitanü. Rü ñu̱xũchi nüxna nanana ga yema ãmaregü ga yéma nüxü̃́ nangegüxü̃.
27 Rü nüma ga Yúche rü nüxna naca, rü ñanagürü: —¿Ñuxãcü pexü̃ naxüpetüxü̃? ¿Rü ñuxãcü tüxü̃ naxüpetüxü̃ ya penatü ya yáxe ga chomaxã tüxü̃ pixuchigaxe? ¿Ñu̱xma rü ta tamaxü̃xü̃? —ñanagürü.
28 Rü naenexẽgü rü wenaxarü nape̱xegu nanangücuchitanü, rü ñanagürügü: —Pa Torü Ãẽ̱xgacüx, tüma ya tonatü rü taxuxü̃ma tüxü̃ naxüpetü. Rü tamaxü̃ ta nixĩ —ñanagürügü.
29 Rü yexguma ga Yúche rü nügücüwaguama nadawenü, rü nüxü̃ nadau ga Bẽyamíü̃ ga naenexẽxü̃chi ixĩcü ga naéwaü̃cü. Rü ñanagürü: —¿Rü yimá yixĩxü̃ ya peenexẽ ya rübumaecü ga chomaxã nüxü̃ pixucü? ¡Rü Tupana cuxü̃ rüngü̃xẽxẽ̱x, Pa Chaunex! —ñanagürü.
30 Rü yexguma naenexẽ ga Bẽyamíü̃xü̃ nada̱u̱xgu ga Yúche rü poraãcüma nangechaü̃, rü norü maxü̃wa ínangu nax naxaxuxü̃. Rü yemaca̱x paxa norü ucapugu naxücu, rü yéma nayaxaxu.
31 Rü yexguma nüxna nangupetü̱xgux nax naxaxuxü̃, rü nügü naya̱u̱xchametü. Rü ñu̱xũchi ínaxũxũ ga norü ucapuwa, rü ñanagürü: —¡Ipenaxǘ i õna! —ñanagürü.
32 Rü Yúche rü wüxi ga mecha ga nüxicatama nawa natoxü̃wa nachibü. Rü Acóbu nanegü rü to ga mechawa nachibüe. Rü yema Equítuanecüã̱xgü ga Yúchemaxã chibüexü̃ rü to ga mechawa nachibüe yerü Equítuanecüã̱xgüca̱x rü nachu̱xu nax wüxiwa Ebréugümaxã nachibüexü̃.
33 Rü yexguma ga Yúche rü naenexẽgüxü̃ ínarütogüxẽxẽ. Rü gumá rüyamaecüwa inanaxügü nax ínatogüxẽẽãxü̃ rü ñu̱xmata gumá rübumaecüwa nangu. Rü guxü̃ma ga naenexẽgü rü poraãcü naba̱i̱xãchiãẽgü rü nügü narüdaunütanüãchi.
34 Rü nüma ga Yúche rü naenexẽgüxü̃ nanangõ̱xẽxẽ ga yematama õna ga nüma nangṍxü̃ ga norü mechawa yexmaxü̃. Rü yema õna ga Bẽyamíü̃na naxãxü̃ rü poraãcü yema togü ga naenexẽgüna naxãxü̃xü̃ rütamaexü̃ nixĩ. Rü Yúche rü naenexẽgümaxã wüxigu naxaxegü rü nataãẽgü.
