Génesis 45:1-28
45 Rü düxwa ga Yúche rü marü tama yáxna namaxã naxĩnü ga nax naxauxchaü̃xü̃ ga norü duü̃xü̃güpe̱xewa. Rü yemaca̱x norü duü̃xü̃güxü̃ tagaãcü ñanagürü: —¡Guxãma i pemax, rü ípechoxü̃ i nua! —ñanagürü. Rü nüxicatama naenexẽgümaxã yéma nayaxüãchitanü.
2 Rü poraãcü naxaxu. Rü yema nax poraãcü naxaxuxü̃, rü guxü̃ma ga Equítuanecüã̱x ga ãẽ̱xgacüpatawa yexmagüxü̃ rü nüxü̃ naxĩnüe. Rü düxwa Faraóü̃xü̃tawa nanguchiga ga yema.
3 Rü ñu̱xũchi ga Yúche rü naenexẽgüxü̃ ñanagürü: —Choma chixĩ i Yúche. ¿Rü tamaxü̃xü̃ ya papa? —ñanagürü. Rü nüma ga naenexẽgü rü poraãcü naba̱i̱xãchiãẽgü, rü taxuxü̃maama nanangãxü̃güéga.
4 Natürü ga Yúche rü naenexẽgüxü̃ ñanagürü: —¡Ẽcü nua chauxü̃tawa pexĩ! —ñanagürü. Rü yexguma ga yema naenexẽgü rü naxü̃tawaama naxĩ. Rü nüma rü ñanagürü nüxü̃: —Choma nixĩ i peenexẽ ya Yúche chixĩxü̃ ga pema Equítuanegu chomaxã petaxegüxü̃.
5 Natürü tama chanaxwa̱xe i penaxĩ̱xãchiãẽtanü rü pegüchitama pexaie naxca̱x ga yema chomaxã nax petaxegüxü̃. Yerü Tupana nixĩ ga woetama pepe̱xegu nua choxü̃ mucü nax tama taiyamaxã peyuexü̃ca̱x.
6 Rü ñu̱xma rü marü taxre ya taunecü nixĩ nax taiya ngúxü̃ i ñaa nachixü̃anewa. Rü ñu̱xma rü 5 ya taunecüama ínayaxü i nagu taxuxü̃táma i nanetü rüxüxü̃ ega woo itoegu.
7 Natürü Tupana nixĩ ya pepe̱xegu choxü̃ imucü nax ngẽmaãcü tama taiyamaxã peyuexü̃ca̱x rü íyaxügüxü̃ca̱x i petaagü i ñoma i naanewa. Rü ngẽmaãcü tama nagu íperüxĩnüeyane rü Tupana chaugagu pexü̃ namaxẽxẽxẽ.
8 Rü ngẽmaãcü Tupana nixĩ i ñaa nachicawa choxü̃ mucü, rü tama nixĩ i pema yixĩxü̃ i nua choxü̃ pemuxü̃. Rü nüma nixĩ i nua choxü̃ namuxü̃ nax Faraóü̃arü ucu̱xẽruxü̃ chixĩxü̃ca̱x, rü guxü̃ma i napatacüã̱xmaxã ichacuáxü̃ca̱x, rü ñu̱xũchi Equítuanearü ãẽ̱xgacü nax chixĩxü̃ca̱x.
9 ¡Ẽcü, paxa pewoegu i tümaxü̃tawa ya papa, rü ñapegü tüxü̃: “Cune ya Yúche rü ñanagürü: ‘Tupana rü ãẽ̱xgacüxü̃ choxü̃ ningucuchixẽxẽ nax Equítuanemaxã ichacuáxü̃ca̱x! ¡Rü paxa nua naxũ rü choxü̃ íyadau!
10 Rü Gochéü̃anewa tá cungu wüxigu namaxã i cunegü rü cutaagü rü cuxü̃nagü rü guxü̃ma i ngẽma cuxü̃́ ngẽxmaxü̃. Rü ngẽmaãcü tá chorü ngaicamana cungexma.
11 Rü nua rü tá õna pexna chaxã i cuma rü guxü̃ma i cutanüxü̃ nax taxuxü̃ma pexü̃́ taxuxü̃ca̱x. Erü 5 ya taunecüama ínayaxü nax taiya tá ngúxü̃’ ”, ñapegü tüxü̃ ya papa.
12 Rü chauenexẽ ya Bẽyamíü̃ rü guxãma i pema nixĩ i nüxü̃ pexĩnüexü̃ nax chomatama ngẽma ñachaxü̃ pexü̃.
13 ¡Rü papamaxã nüxü̃ pixu nax choma chixĩxü̃ i ãẽ̱xgacü i nua Equítuanewa! ¡Rü tümamaxã nüxü̃ pixu i guxü̃ma i nua nüxü̃ pedauxü̃ nax ñuxãcü chauga naxĩnüexü̃ i duü̃xü̃gü! ¡Rü paxa pewoegu rü tüxü̃ peyaga ya papa! —ñanagürü.
14 Rü yexguma ga Yúche rü naenexẽ ga Bẽyamíü̃na nana̱i̱xãchi rü naxaxu. Rü yexgumarüxü̃ ta ga Bẽyamíü̃ rü naxaxu rü Yúchena nana̱i̱xãchi.
15 Rü ñu̱xũchi ga Yúche rü guxü̃ma ga naenexẽgüxü̃ nachúxu, rü naxauxãcüma nüxna nana̱i̱xãchichigü. Rü yemawena ga naenexẽgü rü marü tama namuü̃eãcüma namaxã nidexagü.
16 Rü düxwa Faraóü̃xü̃tawa nanguchiga nax yéma Yúchexü̃tawa nangugüxü̃ ga naenexẽgü. Rü nüma ga Faraóü̃ rü norü ngü̃xẽẽruü̃gü rü poraãcü nataãẽgü.
17 Rü yexguma ga Faraóü̃ rü ñanagürü Yúchexü̃: —¡Namaxã nüxü̃ ixu i cuenexẽgü rü norü búrugü yamexẽxẽgü rü paxa nachixü̃aneca̱x nawoegu i Canaáü̃wa!
18 ¡Rü paxa nua tüxü̃ nagagü ya penatü rü guxü̃ma i petanüxü̃! Rü choma rü tá tüxna chanaxã i ngẽma rümemaexü̃ i naane i Equítuanewa ngẽxmaxü̃. Rü nua rü tá mexü̃ tangõ̱xgü rü taxuxü̃táma tüxü̃́ nataxu.
19 ¡Rü namaxã nüxü̃ ixu i cuenexẽgü rü númacüã̱x ya carugü ya búrugü itúgüne ne yangegü nax yimagügu nua tüxü̃ nagagüxü̃ca̱x ya naxma̱xgü rü naxacügü rü penatü!
20 ¡Rü taxṹ i norü naaneca̱x naxoegaãẽgüxü̃! Erü nua Equítuanewa rü ngẽma rümemaexü̃ i naane rü noxrügü tá nixĩ —ñanagürü.
21 Rü yexguma ga Yúche rü nanaxü ga yema Faraóü̃ namaxã nüxü̃ ixuxü̃. Rü naenexẽgüna nanaxã ga carugü rü naxchirugü rü õnagü ga norü namawaxü̃.
22 Natürü gumá naenexẽ ga Bẽyamíü̃na nanaxã ga 5 ga naxchiru rü 300 tachinü ga diẽru.
23 Rü nanatüca̱x yéma nanamugü ga 10 ga búrugü ga yema Equítuanewa rümemaexü̃ ga yemaxü̃maxã ixãxwetaxü̃, rü 10 ga búru ga trigupüü̃maxã ixãxwetaxü̃, rü naguxü̃raü̃xü̃ ga õna ga nanatüarü namawaxü̃.
24 Rü ñu̱xũchi naenexegüxü̃ inamuãchitanü. Rü nayaxucu̱xẽgü rü ñanagürü nüxü̃: —¡Rü taxṹ i pegü ipeyaxüáxü̃ i namawa! —ñanagürü.
25 Rü nüma ga naenexẽgü rü inaxĩãchi, rü Canaáü̃aneca̱x nawoegu ga nanatüxü̃tawa.
26 Rü yexguma ínangugügu, rü nanatümaxã nüxü̃ nixugügü rü ñanagürügü: —Yúche rü namaxü̃. Rü nüma nixĩ i Equítuanemaxã inacuáxü̃ —ñanagürügü. Natürü ga nüma ga Acóbu ga Iraégu ãégacü rü tama nüxü̃́ nayaxõ, yerü marü tama Yúchegu narüxĩnü.
27 Natürü yexguma tümamaxã nüxü̃ yaxugügügu ga yema Yúchearü dexa, rü nüxü̃ tada̱u̱xgu ga gumá carugü ga ixããcune namaxã ga yema õnagü ga Yúche tümaca̱x yéma mugüxü̃, rü tayaxõ rü tataãẽxü̃chi.
28 Rü yemaca̱x ga nüma ga Acóbu* rü ñanagürü: —Rü aixcüma nixĩ ya chaune ya Yúche inamaxü̃xü̃. Rü ngéma tá chaxũ rü tá íchayadau naxü̃pa nax chayuxü̃ —ñanagürü.
Notas
^ 45:28 Iraé.
