Génesis 46:1-34
46 Rü yexguma ga Acóbu ga Iraégu ãégacü rü inaxũãchi namaxã ga guxü̃ma ga natanüxü̃ rü norü yemaxü̃gü. Rü yexguma Bechébawa nanguxgu, rü yéma nanatü ga Ichaáarü Tupanaca̱x naxü̃nagü nadai rü ínanagu.
2 Rü yema chütaxü̃gu rü Cori ya Tupana rü Acóbuxü̃ nango̱xetüxẽxẽ, rü namaxã nidexa rü ñanagürü: —Pa Acóbux, Pa Acóbux —ñanagürü. Rü nüma ga Acóbu rü nanangãxü̃, rü ñanagürü: —Daxe chixĩ, Pa Corix —ñanagürü.
3 Rü nüma ga Tupana rü ñanagürü: —Choma nixĩ i Tupana chixĩxü̃ i cunatüarü Tupana. ¡Rü taxṹ i cumuü̃xü̃ nax Equítuanewa cuxũxü̃ erü ngéma tá nixĩ i cutaawa chachixẽxẽxü̃ i wüxi i duü̃xü̃gütücumü i taxü̃!
4 Rü choma rü tá cuwe charüxũ i Equítuanewa. Rü chomatátama nixĩ i wena chanawoeguxẽxẽxü̃ i cutaagü. Natürü i cuma rü Equítuanegu tá cuyu, rü Yúche rü tá nacuxü̃tagu i ngẽxguma —ñanagürü ga Tupana.
5 Rü yexguma ga Acóbu rü inaxũãchi ga Bechébawa. Rü nanegü rü guma carugü ga Faraóü̃ yéma mugünegu Equítuanewa nanagagü wüxigu tümamaxã ga nataagü rü naneã̱xgü.
6 46:6-7 Rü Acóbu, rü guxü̃ma ga norü yemaxü̃gü ga Canaáü̃anewa nüxü̃́ yexmaxü̃maxã, rü norü wocagümaxã, rü norü carnérugümaxã inaxũãchi nax Equítuanewa naxũxü̃. Rü guxü̃ma ga nanegü, rü naxacügü, rü nataagü rü nawe narüxĩ ga Equítuanewa.
7 Nüü̃ nadau 46:6
8 Rü ñaagü nixĩ i naégagü ga Iraétanüxü̃ ga Equítuanewa ĩxü̃: Nüma ga Acóbu rü nanegü rü nataagü. Rü Rubéü̃ ga Acóbu nane ga rüyamaecü nixĩ ga wüxi.
9 Rü Rubéü̃ nanegü nixĩ ga Anóx, rü Farú, rü Eróü̃ rü Camí.
10 Rü Chimeóü̃ nanegü nixĩ ga Yemué, rü Yamíü̃, rü Oáx, rü Yaquíü̃, rü Chóa, rü ñu̱xũchi Chaú ga Canaáü̃anecüã̱x ngĩne ixĩxü̃.
11 Rü Lebí nanegü nixĩ ga Guerchóü̃, rü Queáx, rü Merarí.
12 Rü Yudá nanegü nixĩ ga Éx, rü Onáü̃, rü Cherá, rü Fáre rü Chéra. (Éx, rü Onáü̃ rü Canaáü̃anegutama nayue). Rü Fáre nanegü nixĩ ga Eróü̃, rü Amúx.
13 Rü Ichacá nanegü nixĩ ga Torá, rü Pubá, rü Yox, rü Chimróü̃.
14 Rü Chaburóü̃ nanegü nixĩ ga Chérex, rü Eróü̃ rü Yareé.
15 Rü yemagü nixĩ ga Acóbu nanegü rü nataagü ga Léawaü̃güxü̃ ga yexguma Padáü̃-aráü̃wa nayexmagügu, rü naétü ga naxacü ga Dína. Rü guxü̃wama ga iyatüxü̃ rü ingexü̃ rü 33 ga duü̃xü̃gü nixĩ.
16 Rü Gáx nanegü nixĩ ga Chefóü̃, rü Aguí, rü Echabóü̃, rü Chuní, rü Erí, rü Arodí, rü ñu̱xũchi Arelí.
17 Rü Aché nanegü nixĩ ga Iná, rü Ichuá, rü Ichuí, rü Beriá, rü ñu̱xũchi naeya̱x ga Chéragu ãégacü. Rü Beriá nanegü nixĩ ga Ébe, rü Maquié.
18 Rü yemagü nixĩ ga Acóbu nanegü ga Chipáwáü̃güxü̃. Rü yema Chipá iyixĩ ga Labáü̃ naxacü ga Léana ngĩxü̃ mucü ngĩrü ngü̃xẽẽruxü̃. Rü ngĩtaagü rü 16 ga duü̃xü̃gü nixĩ ga guxü̃wama.
19 Rü Raqué ga Acóbu naxma̱x ngĩnegü nixĩ ga Yúche, rü Bẽyamíü̃.
20 Rü Yúche nanegü ga naxma̱x ga Achenáwáü̃güxü̃ nixĩ ga Manaché rü Efraíü̃. Rü yema taxre rü Equítuanegu nixĩ ga nabuexü̃. Rü Achená rü Potiféraxacü iyixĩ. Rü nüma ga Potífera rü Óü̃arü chacherdóte nixĩ.
21 Rü Bẽyamíü̃ nanegü nixĩ ga Béra, rü Béque, rü Abéx, rü Guerá, rü Naamáü̃, rü Eixí, rü Róx, rü Mupíü̃, rü Upíü̃, rü Ár.
22 Rü yema nixĩ ga Acóbu nanegü rü nataagü ga Raquéwáü̃güxü̃. Rü 14 ga duü̃xü̃gü nixĩ ga guxü̃wama.
23 Rü Dáü̃ nane nixĩ ga Uchíü̃.
24 Rü Netarí nanegü nixĩ ga Yacheé, rü Guní, rü Yéche, rü Chiléü̃.
25 Rü yemagü nixĩ ga Acóbu nanegü ga Biráwaü̃güxü̃. Rü yema Birá iyixĩ ga Labáü̃ naxacü ga Raquéna ngĩxü̃ mucü ngĩrü ngü̃xẽẽruxü̃. Rü ngĩnegü rü ngĩtaagü rü 7 ga duü̃xü̃gü nixĩ ga guxü̃wama.
26 Rü guxü̃wama ga norü mu ga yema duü̃xü̃gü ga Acóbumaxã wüxigu Equítuanewa ngugüxü̃ rü 66 nixĩ ga norü mu. Rü tama tixugü ga guxema Acóbu nanegü naxma̱x.
27 Rü Yúche nane ga Equítuanegu buexü̃ rü taxre nixĩ. Rü yema Equítuanewa ngugüxü̃ ga Acóbutanüxü̃ rü guxü̃wama 70 ga duü̃xü̃gü nixĩ ga norü mu.
28 Rü yexguma Equítuanewa nanguxgux ga Acóbu, rü nane ga Yudáxü̃ nügüpe̱xe nimu nax Yúchemaxã nüxü̃ yanaxuxü̃ca̱x nax naxü̃tawa naxũxü̃ca̱x ga Gochéü̃anewa.
29 Rü nüma ga Yúche rü norü duü̃xü̃xü̃ namu nax norü caru ga cowaru itúchigüne namexẽẽxü̃ca̱x nax Gochéü̃anewa nanatüxü̃ íyadauxü̃ca̱x. Rü yexguma tüxü̃ nada̱u̱xgu rü tüxna nana̱i̱xãchi, rü tümaãtügu yangücuchiãcüma yéma naxauxecha.
30 Rü yexguma ga nüma ga Acóbu ga Iraégu ãégacü rü Yúchexü̃ ñanagürü: —Ñu̱xmatawaxix nixĩ i marü namexü̃ nax chayuxü̃, erü wena cuxü̃ chadau rü nüxü̃ chacua̱x nax aixcüma cumaxü̃xü̃ —ñanagürü.
31 46:31-32 Rü nüma ga Yúche rü naenexẽgüxü̃ rü nanatüxü̃ ñanagürü: —Faraóü̃xü̃tawa tá chaxũ nax namaxã nüxü̃ chayarüxuxü̃ca̱x nax chauenexẽgü, rü chaunatütanüxü̃ ga Canaáü̃anewa yexmagüxü̃ rü marü nua nangugüxü̃ nax chomaxã wüxiwa nangẽxmagüxü̃ca̱x. Rü namaxã tá nüxü̃ chixu nax nua nanaxãxü̃ i guxü̃ma i norü ngẽmaxü̃gü rü nua nagagüãxü̃ i norü carnérugü rü wocagü, erü norü puracü rü carnéruarü rü wocaarü dauruü̃gü nixĩ.
32 Nüü̃ nadau 46:31
33 46:33-34 Rü ngẽxguma tá Faraóü̃ pexca̱x caxgux rü pexna nacaxgu nax ta̱xacüwa pepuracüexü̃, rü pema rü tá namaxã nüxü̃ pixu nax guxü̃guma carnéruarü yaexẽẽruü̃gü nax pixĩgüxü̃ perü o̱xigürüxü̃. Rü ngẽxguma tá nixĩ i Gochéü̃anewa pexü̃ namugüxü̃ nax ngẽxma pexãpatagüxü̃ca̱x, erü Equítuanecüã̱xgü rü tama norü me nixĩ nax carnéruarü dauruü̃gümaxã wüxigu naxãpatagüxü̃ —ñanagürü ga Yúche.
34 Nüü̃ nadau 46:33
