Génesis 47:1-31
47 Rü nüma ga Yúche rü Faraóü̃maxã nüxü̃ nayarüxu nax nanatü rü naenexẽgü rü marü Canaáü̃anewa ne naxĩxü̃ rü marü Gochéü̃anewa nangugüxü̃ namaxã ga naxü̃nagü ga carnérugü rü wocagü rü guxü̃ma ga norü yemaxü̃gü.
2 Rü Faraóü̃xü̃tawa nanagagü ga 5 ga naenexẽgü nax Faraóü̃ nüxü̃ cuáxü̃ca̱x.
3 Rü nüma ga Faraóü̃ rü Yúchexenexẽgüna naca rü ñanagürü: —¿Ta̱xacü nixĩ i perü puracü i pemax? —ñanagürü. Rü nüma ga Yúcheenexẽgü rü nanangãxü̃gü rü ñanagürügü: —Pa Ãẽ̱xgacüx, toma i curü puracütanüxü̃ nax tixĩgüxü̃, rü carnérugüarü dauruü̃gü tixĩgü torü o̱xigürüü̃tama.
4 Rü ñu̱xma rü nua taxĩ nax nuxã ñaa nachixü̃anegu taxãchiü̃güxü̃ca̱x, erü poraãcü taiya nangu̱x i Canaáü̃anewa. Rü nataxuma ya maxẽ naxca̱x i torü carnérugü. Rü ñu̱xma, Pa Ãẽ̱xgacüx ¿rü taxũchima cuxü̃́ namexü̃ nax Gochéü̃anegu taxãchiü̃güxü̃? —ñanagürügü.
5 Rü yexguma ga Faraóü̃ rü Yúchexü̃ ñanagürü: —Yimá cunatü rü cuenexẽgü rü nua naxĩ nax wüxiwa cumaxã nangẽxmagüxü̃ca̱x.
6 Rü ñaa Equítuane rü noxrü nixĩ. ¡Ẽcü, nüxna naxã i ngẽma Gochéü̃ane! Erü ngẽma nixĩ i rümemaexü̃ i naane i nua Equítuanewa nax ngẽmagu naxãchiü̃güxü̃ca̱x. Rü ngẽxguma cunangugügügu nax ngẽmatanüwa nangẽxmagüxü̃ i yatügü i aixcüma carnérugüarü dauxü̃ cua̱xgüxü̃, rü chanaxwa̱xe i chauxü̃nagümaxã rü ta inacua̱xgü —ñanagürü.
7 47:7-8 Rü ñu̱xũchi ga Yúche rü yéma ta tüxü̃ naga ga guxema nanatü ga Acóbu nax yemaacü Faraóü̃ tüxü̃ cuáxü̃ca̱x. Rü taãẽãcüma Faraóü̃xü̃ tarümoxẽ ga Acóbu. Rü nüma ga Faraóü̃ rü tüxna naca rü tüxü̃ ñanagürü: —¿Ñuxre ya taunecü cuxü̃́ nangẽxma? —ñanagürü.
8 Nüü̃ nadau 47:7
9 Rü Acóbu nanangãxü̃ rü ñanagürü: —Choma rü 130 ya taunecü marü choxü̃́ nangẽxma nax nuxica ne chanaxũxü̃. Rü yimá chorü taunecügü ga nagu guxchaxü̃gü choxü̃́ yexmacü rü noxretama nixĩ, erü tautama nawa changu ya chorü o̱xigüarü taunecüe̱xpü̱x nax yixĩxü̃ca̱x —ñanagürü.
10 Rü yemawena ga Acóbu rü Faraóü̃xü̃ narümoxẽ rü ñu̱xũchi nüxna nataegu ga yéma.
11 Rü nüma ga Yúche rü nanatüna rü natanüxü̃na nanaxã ga yema rümemaexü̃ ga naane ga Equítuanewa yexmaxü̃ nax yexma taxãchiü̃güxü̃ca̱x, yema Faraóü̃ namuxü̃ãcüma. Rü yemaacü ga guxema nanatü rü ñu̱xũchi yema naenexẽgü, rü Ramchéxanewa nüxü̃́ nayexmagü ga naanegü.
12 Rü nüma ga Yúche rü nanatüna rü guxü̃ma ga naenexẽgüna nanaxã ga õna. Rü yema ñuxre nax nüxü̃́ itauxchigüxü̃ãcü nüxna nanaxã ga wüxichigü.
Yúche rü ãẽ̱xgacüaxü̃́ naxca̱x nataxe ga naane
13 Rü taxuwama ga yema nachixü̃anewa nayexma ga trigu, rü niyexeraguchigü ga taiya. Rü yemaca̱x Equítuanewa rü Canaáü̃anewa rü taiyamaxã nayue ga duü̃xü̃gü.
14 Natürü ga Yúche rü ngĩxü̃ nanutaque̱xe ga yema diẽru ga Equítucüã̱xgü rü Canaáü̃cüã̱xgü ngĩxü̃ ütanügücü naxca̱x ga trigu. Rü ñu̱xũchi guma Faraóü̃patagu ngĩmaxã nanguxü̃.
15 Rü yexguma marü nagúarü diẽruã̱xgügu ga Equítuanewa rü Canaáü̃anewa, rü Yúchexü̃tawa naxĩ ga Equítucüã̱xgü. Rü namaxã nayarüdexagü rü nüxü̃ ñanagürügü: —¡Toxna naxã i õna! Rü ngẽma nax tagúarü diẽruã́xü̃ca̱x, rü tama name nax taiyamaxã nuxã toxü̃ cuyuexẽẽxü̃ —ñanagürügü.
16 Rü Yúche nanangãxü̃gü rü ñanagürü nüxü̃: —Ega ngẽxguma marü pingearü diẽruã̱xgügu ¡rü nua penagagü i pexü̃nagü! Rü nachicüxü tá trigu pexna chaxã —ñanagürü.
17 Rü nüma ga Equítucüã̱xgü rü Yúchexü̃tawa nanagagü ga norü cowarugü, rü carnérugü, rü wocagü, rü búrugü. Rü nüma ga Yúche rü nachicüxü guxü̃guma ga gumá taunecügu trigu nüxna naxã.
18 Rü nagu̱x ga gumá taunecü. Rü yexguma gumá nai ga taunecü ingucuchigu rü wenaxarü Yúchemaxã nüxü̃ nayarüxugüxe rü ñanagürügü: —Rü tama cuxü̃ tawomüxẽẽgü nax marü tingearü diẽruã́xü̃. Rü ñu̱xũchi ngẽma toxü̃nagü rü marü cuxrü nixĩgü. Rü marü nataxuma i to i torü ngẽmaxü̃gü i cuxna taxãxü̃. Rü toanegü, rü toxicatama marü ítayaxügü.
19 ¡Ẽcü toxca̱x rü ñu̱xũchi torü naanegüca̱x nataxe nax ngẽmaãcü trigumaxã toxü̃́ cunaxüchicüüxü̃ca̱x, rü Faraóü̃me̱xẽwa tangexmagüxü̃ca̱x! Rü ñu̱xũchi nüxü̃́ tá tapuracüe i torü naanewa. ¡Rü naxchire toxna ne naxã nax ngẽmaãcü tama ngéma nata̱xmarexü̃ca̱x i ngẽma naane rü ngẽmaãcü nax tachibüexü̃ca̱x! ¿Rü tü̱xcüü̃ toxü̃ ícuwogü nax ngẽmaãcü tayuexü̃ca̱x rü ngéma nawogümarexü̃ca̱x i ngẽma torü naanegü? —ñanagürügü.
20 47:20-21 Rü yexguma ga Yúche rü Faraóü̃axü̃́ naxca̱x nataxe ga guxü̃ma ga yema naanegü ga Equítuanewa yexmagüxü̃. Rü yemaacü taiyagagu norü naanegümaxã nitaxegü ga yema Equítuanecüã̱xgü. Rü yemaacü ga yema naanegü rü Faraóü̃me̱xẽwa nayexma. Rü guxü̃ma ga Equítuanewa Faraóü̃me̱xẽwa nayexmagü ga yema Equítucüã̱xgü nax nüxü̃́ napuracüexü̃ca̱x.
21 Nüü̃ nadau 47:20
22 Rü yema chacherdótegüarü naanegüxicatama nixĩ ga Yúche tama naxca̱x taxexü̃. Yerü nüma ga Faraóü̃ rü trigu nüxna naxãmare. Rü yemaca̱x ga nüma ga chacherdótegü rü tama namaxã nataxegü ga norü naanegü yerü yema trigu ga Faraóü̃ nüxna ãxü̃ nangõ̱xgü.
23 47:23-24 Rü yemawena ga Yúche rü yema duü̃xü̃güxü̃ ñanagürü: —Ñu̱xma i pemax rü ñu̱xũchi perü naanegü rü Faraóü̃arü nixĩ, yerü choma rü Faraóü̃axü̃́ nixĩ ga naxca̱x chataxexü̃. Daagü nixĩ ya nanetüchire nax penatoxü̃ca̱x i ngẽma naane. Natürü ngẽxguma norü buxgüwa nanguxgux rü 5 püü̃ pexü̃́ ngẽxmagu rü tá wüxipüü̃ Faraóü̃na pexã. Rü ngẽma to i 4 püü̃ rü naane namaxã petoxü̃ruxü̃ tá nixĩ rü ñu̱xũchi tá namaxã penangõ̱x i pemax rü penegü, rü guxü̃ma i ngẽma pepatawa maxẽxü̃ —ñanagürü.
24 Nüü̃ nadau 47:23
25 Rü nümagü nanangãxü̃gü rü nüxü̃ ñanagürügü: —Cuma rü tomaxã cumecümaxü̃chi, erü toxü̃ curüngü̃xẽxẽ nax tama tayuexü̃ca̱x. Rü Faraóü̃arü puracütanüxü̃ tá tixĩgü —ñanagürügü.
26 Rü yemaacü ga Yúche rü wüxi ga mu inaxǘ rü guxü̃ ga Equítuanewa rü yexguma tríguarü buxgüwa nanguxgu rü duü̃xü̃gü 5 püü̃ nüxü̃́ ngẽxmagu rü tá wüxipüü̃ Faraóü̃ nanaxã. Rü ñaa mu rü ñu̱xma rü ta nangẽxma. Natürü ga yema chacherdótegü rü taxuxü̃ma naxütanügü, yerü yema norü naanegü rü taguma Faraóü̃arü nixĩ.
Yúche rü nanatü ga Acóbumaxã inaxuneta
27 Rü yema Iraétanüxü̃ rü yéma Equítuanewatama namaxẽ. Rü Gochéü̃anewa nayexmagü rü yéma nimu.
28 Acóbu rü 17 ga taunecü Equítuanewa namaxü̃, rü 147 ga taunecüwa nangu ga norü ya.
29 Rü wüxi ga ngunexü̃gu ga yexguma marü nügü nacua̱xgu nax paxa tá nayuxü̃ ga Acóbu ga Iraégu ãégacü, rü nane ya Yúcheca̱x nangema, rü ñanagürü nüxü̃: —Rü ngẽxguma aixcüma choxü̃ curüngü̃xẽẽchaü̃gux rü ¡choperematüü̃gu naxǘxme̱x, rü chomaxã naxuegu rü tá cunaxüxü̃ i ngẽma tá cuxna naxca̱x chacaxü̃! Rü dücax, cumaxã nüxü̃ chixu rü tama chanaxwa̱xe nax Equítuanegu choxü̃ cutáxü̃.
30 Rü ngẽxguma marü chayu̱xgu rü chorü o̱xigütanügu, ¡rü choxü̃ ínangexechi i nua Equítuanewa rü ngéma chorü o̱xigütanügu choxü̃ yata̱x! —ñanagürü. Rü Yúche tüxü̃ nangãxü̃ rü tüxü̃ ñanagürü: —Rü ngẽmaãcü tá chanaxü —ñanagürü.
31 Natürü ga nanatü ga Iraé rü nüxü̃ tica̱xaxü̃chigüama rü nüxü̃ ñatagürü: —¡Chomaxã naxuegu! —ñatagürü. Rü nüma ga Yúche rü tümamaxã nanaxuegu. Rü yexguma ga guxema nanatü ga Iraé rü tümaarü pechicaxü̃tape̱xeguama tayangücuchi.
