Génesis 48:1-22
48 Rü nawena ga ñuxre ga ngunexü̃ rü Yúchemaxã nüxü̃ nixugü ga nax tida̱xawexü̃ ga nanatü. Rü yexguma nüma ga Yúche rü tüxü̃ ínayadau. Rü ínayagagü ta ga yema taxre ga nanegü ga Manaché rü Efraíü̃.
2 Rü yexguma Acóbumaxã nüxü̃ yaxugüegu nax nane ga Yúche rü yéma nanguxü̃ nax íyadauãxü̃ca̱x, rü nüma ga Acóbu rü nügü ínayaporaãchi, rü ínarüto ga norü pechicaxü̃wa.
3 48:3-4 Rü Yúchexü̃ ñanagürü: —Yimá Tupana ya Guxãétüwa Ngẽxmacü rü cha̱u̱xca̱x nango̱x ga Lúxarü ĩanewa ga Canaáü̃anewa, rü yéma mexü̃ chomaxã nanaxuegu. Rü ñanagürü choxü̃: “Rü dücax, choma rü tá chayamuxẽxẽ i ngẽma cunegü, rü cutaagü. Rü ngẽma cutaatanüwa tá ne naxĩ i muxü̃tama i natücumügü i cutanüxü̃. Rü naétü tá ngẽma cutaagüna chanaxã i ñaa naane nax guxü̃gutáma noxrü yixĩxü̃ca̱x”, ñanagürü choxü̃ ga Tupana.
4 Nüü̃ nadau 48:3
5 Rü ngẽmaca̱x i ñu̱xmax i ngẽma cunegü i Efraíü̃, rü Manaché ga nuxã Equítuanegu buexü̃ naxü̃pa nax nua Equítuanewa chaxũxü̃, rü chaunegürüxü̃ nixĩgü naxrüxü̃ i Rubéü̃ rü Chimeóü̃.
6 Natürü ngẽma cunegü i tá naweama buexü̃ rü tá cuxrü nixĩgü. Natürü ngẽma nax Efraíü̃enexẽgü rü Manachéenexẽgü yaxĩgüxü̃ca̱x, rü ngẽmaca̱x tá nanayauxgü i norü naane i Manachéna rü Efraíü̃na üxü̃wa.
7 Rü guxema cué ga Raqué rü namagu choxna tayayu ga yexguma Padáü̃-aráü̃wa chataegugu. Rü ĩane ga Efrátaarü ngaicamagu nixĩ ga choxna tayuxü̃ ga Canaáü̃anewa. Rü yexma namagu nixĩ ga ngĩxü̃ chatáxü̃. Rü yima ĩane ya Efrátatama nixĩ i ñu̱xmax i Beréü̃gu ãégane —ñanagürü.
8 Rü yemawena ga nüma ga Acóbu rü ngürüãchimare Yúche nanegüxü̃ nadau. Rü Yúchena naca rü ñanagürü: —¿Texégü nixĩ ya daa? —ñanagürü.
9 Rü yexguma nüma ga Yúche rü nanatüxü̃ nangãxü̃ rü ñanagürü: —Rü daagü nixĩ ya chaunegü ya Tupana choxna namugücü i nua Equítuanewa —ñanagürü. Rü yexguma nüma ga Acóbu rü ñanagürü: —¡Ẽcü cha̱u̱xca̱x yagagü nax mexü̃ namaxã chaxuegugüxü̃ca̱x! —ñanagürü.
10 Rü nüma ga Acóbu rü marü yaxguã̱x nixĩ rü yemaca̱x marü tama mea tüxü̃ nadau. Rü yemaca̱x ga Yúche rü nanatüca̱x nayagagü ga nanegü. Rü nüma ga Acóbu rü nataagüxü̃ nachúxu rü nüxna nana̱i̱xãchi.
11 Rü ñu̱xũchi Yúchexü̃ ñanagürü: —Choma marü nagu charüxĩnügu rü marü taguchima wena cuxü̃ chadau, natürü ya Tupana rü cunegüxü̃ rü ta choxü̃ nadauxẽxẽ —ñanagürü.
12 Rü yexguma ga nüma ga Yúche rü nayagagachitanü ga yema nanegü ga nanatüã́pü̱xüwa rütogüxü̃. Rü nanatüpe̱xegu nayama̱xãxcuchi ñu̱xmata waixü̃müanewa yaxũcatü.
13 Rü yemawena rü norü tügünechacüümaxã nane ga Efraíü̃xü̃ nayayauxãchi, rü yexgumarüxü̃ ta norü to̱xwechacüümaxã Manachéxü̃ nayayauxãchi. Rü yemaacü norü o̱xi ga Iraéca̱x nayagagü. Rü yexguma nüma ga Efraíü̃ rü norü o̱xi ga Iraéarü to̱xwewaama naxü. Rü yexgumarüxü̃ ta nüma ga Manaché rü norü o̱xiarü tügünewaama naxü.
14 Natürü nüma ga Iraé rü yexguma nataagüétügu naxǘxme̱xchaü̃gu rü nügü nitaixtachacüxü. Rü yemaacü norü tügünechacüümaxã Efraíü̃ ga rübumaecüétügu naxǘxme̱x. Rü norü to̱xwemaxã Manaché ga rüyamaecüétügu naxǘxme̱x.
15 Rü Yúchemaxã mexü̃ naxuegu. Rü ñanagürü: —Pa Chorü Tupanax, cuga nixĩ ga naxĩnüexü̃ ya chorü o̱xi ga Abraáü̃ rü chaunatü ya Ichaá, rü cuma nixĩ ga choxna cudauxü̃ ga noxritama chaxíragucürüwa ñu̱xmata ñoma i ngunexü̃wa nangu.
16 Rü cuma nixĩ i cunamuxü̃ i curü orearü ngeruxü̃ i daxũcüã̱x nax choxü̃ ícupoxü̃xü̃ca̱x nawa i guxü̃ma i ãũcümaxü̃gü. ¡Rü mexü̃ namaxã naxuegu i ñaa buxü̃gü! Rü chanaxwa̱xe i ñaa buxü̃gügagu duü̃xü̃gü nüxna nacua̱xãchie i chauéga rü chorü o̱xi ga Abraáü̃éga rü chaunatü ga Ichaáéga. ¡Rü yamuxẽxẽ i naxacügü nax ngẽmaãcü namuxũchixü̃ca̱x i nataagü i ñoma i naanewa! —ñanagürü.
17 Natürü nüma ga Yúche rü tama norü me nixĩ ga nax nanatüarü tügüneme̱xẽ rü Efraíü̃étüguama naxǘxme̱x. Rü yemaca̱x nanatüme̱xẽgu nayayauxãchi rü Manachéétüwaama tüxü̃ naxügachime̱xẽ.
18 Rü ñanagürü: —Pa Chaunatüx, ¡taxṹ i ngẽmaãcü cunaxüxü̃! Rü daama nixĩ ya chaune ya rüyamaecü, ¡rü naeruguama naxǘ ya curü tügüneme̱xẽ! —ñanagürü.
19 Natürü nüma ga nanatü rü tama yemaacü nanaxüxchaü̃. Rü nanangãxü̃ rü ñanagürü: —Marü nüxü̃ chacua̱x nixĩ, Pa Chaunex, marü nüxü̃ chacua̱x. Nüma i Manaché rü wüxi ya yatü ya tachigacü tá nixĩ rü nawa tá ta ne naxũ i wüxi i natücumü i taxü̃. Natürü yimá naenexẽ ya rübumaecü tá nixĩ i nüxü̃ rüyexeramaecü. Rü ngẽma nataagüwa tá nango̱x i muxü̃ma i nachixü̃anegü —ñanagürü.
20 Rü yematama ngunexü̃gu rü nüma ga Acóbu rü mexü̃ namaxã naxuegu ga nataagü ga Efraíü̃ rü Manaché. Rü ñanagürü: —Guxü̃ma i chautaagü i Iraétanüxü̃ rü peégagu tá duü̃xü̃gümaxã mexü̃ naxuegu. Rü tá ñanagürügü nüxü̃: “¡Tupana cuxü̃ rüngü̃xẽxẽ yema Efraíü̃xü̃, rü Manachéxü̃ nangü̃xẽẽxü̃rüxü̃!” ñanagürügü tá —ñanagürü ga Acóbu. Rü yemaacü nüma ga Acóbu rü Manachéétüwa nanaxǘxẽxẽ ga Efraíü̃.
21 Rü yemawena rü Yúchexü̃ ñanagürü: —Dücax, choma rü tá chayu, natürü ya Tupana rü tá pemaxã nangẽxma rü naxca̱x tá pexü̃ nawoeguxẽxẽ i ngẽma perü o̱xigüarü naane.
22 Rü ngẽma cueneegüna chaxãxü̃arü yexera cuxna chaxã, erü cuxna chanaxã i Chiquéü̃ane ga Amoréugüna chayapuxü̃ ga yexguma namaxã togü tadaixgu —ñanagürü.
