Génesis 49:1-33
49 Rü nüma ga Acóbu rü guxü̃ma ga nanegüca̱x naca rü ñanagürü:
—¡Nua chauxü̃tawa pexĩ! Rü pemaxã tá nüxü̃ chixu i ngẽma tá pexü̃ ngupetüxü̃.
2 ¡Nua pexĩ rü ipeyarüxĩnüe, Pa Chaunegüx!Rü choma i penatü i Iraé rü tá pemaxã nüxü̃ chixu i chorü ore:
3 “Rü cumax, Pa Rubéü̃, nixĩ i chaune ya yacü ya chorü poraxẽẽruxü̃ quixĩxü̃.Rü yexguma changextü̱xügu rü cuxíra nixĩ ga cuxü̃ chango̱xẽẽxü̃.Rü yemaca̱x cuenexẽgüétüwa cungexma rü namaxã cupora.
4 Natürü i ñu̱xma rü taxũtáma marü cuma nixĩ i cuenexẽgüétüwa cungexmaxü̃.Erü cuma rü ñoma yuape ya tacü ya taxucürüwama íyachaxãchixẽẽcürüxü̃ quixĩ rü chixexü̃ chomaxã cuxü ga yexguma cho̱xma̱xmaxã icupexgu”.
5 “Chimeóü̃ rü Lebí rü nügüenexegü nixĩ.Rü yima naxnegü rü dairuxü̃ nixĩgü.
6 Rü ngẽmaca̱x tagutáma natanüwa changexma i ngẽxguma nügümaxã nangutaque̱xegügu.Yerü yexguma nanuegu rü duü̃egü tüxü̃ nadai.Rü ñu̱xũchi norü chixecümamaxã nayapoyeparagü ga wocagü ga iyatüxü̃.
7 Rü chixexü̃ namaxã chaxuegu i ngẽma norü nu i taxúema ípoxü̃xü̃.Rü ngẽmaca̱x i choma rü guxü̃ma i Iraéanearü ĩanegügu tá chanawoone i nataagü”.
8 “Rü cumax, Pa Yudáx, cuenexẽgü rü tá cuxü̃ nicua̱xüü̃gü.Rü namaxã tá icucua̱x i curü uanügü.Rü cuenexẽgü rü tá cupe̱xegu nacaxã́pü̱xügü.
9 Cumax, Pa Chaunex, Pa Yudáx, Rü ñoma wüxi i leóü̃xacürüxü̃ quixĩ.Rü ngẽxguma naeü̃ nangõ̱xguwena rü nayarümaxãchi rü waixü̃müanegu naca ñoma leóü̃ i yáxü̃rüxü̃.¿Rü texé tá tanachixewe i ngẽxguma?
10 Rü nüma ya Yudá rü taxúetama nüxna tanayaxu i ngẽma norü pora.Rü yimá naixmena̱xã ya norü poraarü cua̱xruxü̃ ya naxme̱xwa ngẽxmane rü taxúetama nüxna tanayaxu ñu̱xmatáta ínangu ya yimá naixmena̱xãarü yora ya guxü̃arü ãẽ̱xgacü ixĩcü.Rü yimága tá nixĩ i naxĩnüexü̃ i guxü̃ma i duü̃xü̃gü.
11 Rü nüma ya Yudá rü úbanegu nanangãxü̃ i norü búru, rü úbachacüxü i rümemaexü̃gu nanangãxü̃ i norü búruxacü.Rü bínuwa naya̱u̱xchiru.Rü úbatüü̃wa nixĩ ga naya̱u̱xãxü̃ i norü gáuxü̃chiru.
12 Rü naxetügü rü bínuchíüarü yexera narüwamaegü, rü napütagü rü lechiarü yexera narücho̱xmaegü”.
13 “Rü Chaburóü̃ rü márcutügu tá naxãpata.Rü ngéma tá nangẽxma i türegü i wapurugü nawa ngugüxü̃.Rü ngẽma norü naanearü üye rü tá Chidóü̃wa nangu”.
14 “Rü Ichacá rü ñoma búru i poraxü̃rüxü̃ nixĩ.Rü nüma rü naxpüxü̃gu narüngü.
15 Rü yexguma nüxü̃ nada̱u̱xgu ga yema nachica nax namexü̃ rü yexma narüngü.Rü nüma rü puracütanüxü̃ nügü nixĩxẽxẽ, rü yemaacü narüma̱xãchi nax naxweta nügüétügu nanugüxü̃ca̱x”.
16 “Rü Dáü̃ rü mea norü duü̃xü̃gümaxã tá inacua̱x, erü nüma rü wüxitücumü i Iraétanüxü̃ nixĩ.
17 Rü nüma i Dáü̃ rü naxrüxü̃ nixĩ i ngẽma ãxtape i namawa ngẽxmaxü̃ i cowaruxü̃ ngõ̱xchinécutüxü̃ rü nanguxẽẽxü̃ i ngẽma cowaruétügu aunagüxü̃”.
18 “¡Pa Corix, choxü̃ ínapoxü̃!”
19 “Rü Gáxca̱x rü wüxitücumü i churaragü tá naxca̱x ínayaxüãchi nax yadaigüãxü̃ca̱x, natürü i nüma rü tá nayabuxmüxẽxẽ rü tá nawe nangẽ”.
20 “Rü Aché rü norü naanewa rü tá namuxũchi i nabü rü ñoma wüxi ya ãẽ̱xgacüwemürüxü̃ tá nixĩ i norü õna”.
21 “Rü Netarí rü ñoma wüxi i cowü i ngexü̃ i nüxica ne naxũxü̃ i metanüxacüxüchixü̃rüxü̃ tá nixĩ”.
22 “Rü Yúche rü ñoma wüxi i nanetü i natüxanacüwa rüxüxü̃ i muarü oṍxü̃rüxü̃ nixĩ.Rü poxeguxü̃tápü̱xgü ĩgüchacüüxü̃rüxü̃ nixĩ.
23 Rü ngẽma naxchi aiexü̃ i würamaxã ixãxnexü̃ rü guxü̃guma nanachixeãẽgü yerü nayamaxcaxü̃negü.
24 Natürü nüma ya Yúche rü nüxü̃́ nangẽxma ya nachacüxü ya porane.Rü Tupanaarü ngü̃xẽẽmaxã ñoma wüxi ya würa ya poranerüxü̃ nixĩ nax naporaxü̃.Rü moxẽ nüxna chaxã ya chorü Tupana ya Guxãétüwa Ngẽxmacü.Rü moxẽ nüxna chaxã ya Tupana ya Iraétanüxü̃arü poxü̃ruxü̃ ixĩcü.
25 Moxẽ nüxna chaxã ya daa cunatüarü Tupana ya Guxãétüwa Ngẽxmacü ya cuxü̃ tá rüngü̃xẽẽcü rü tá mexü̃ cumaxã uegucü.Rü nüma rü tá cuxü̃ narüngü̃xẽxẽ namaxã i ngẽma mexü̃gü i dauxü̃wa ne ĩxü̃ rü ngẽma mexü̃gü i ñoma i naanewa ngẽxmagüxü̃.Rü ngẽxgumarüxü̃ ta mexü̃ cumaxã naxuegu nax cuxma̱x taxãxacüxü̃ca̱x rü taxãgüneniü̃xü̃ca̱x nax ngẽmaãcü quimuxü̃ca̱x.
26 Rü yema chaunatü rü chorü o̱xigü chomaxã ueguxü̃ ga mexü̃güarü yexera nixĩ i choma i cunatü cumaxã chaxueguxü̃.Pa Yúchex, tagutáma nüxü̃ curüngü̃ma i ñaa mexü̃gü i cumaxã chaxueguxü̃ erü guxü̃gutáma cuxca̱x nixĩ ñu̱xmatáta yawa̱xgü ya yima ma̱xpǘnegü ya guxü̃guma ngẽxmagüechane.Erü cuma nixĩ i cueneegütanüwa Tupana cuxü̃ yaxuxü̃”.
27 “Rü cumax, Pa Bẽyamíü̃, rü naxrüxü̃ quixĩ i ngẽma naixnecücüã̱x i airu i pa̱xmama naeü̃ tüxü̃ ngṍxü̃ rü yáuanecü namücügümaxã ngauxü̃ i ngẽma nüxü̃́ íyaxüxü̃”
—ñanagürü ga Acóbu.
28 Rü yemagü nixĩ ga yema 12 ga Iraétücumügü. Rü yema nixĩ ga yema ore ga nanatü nanegümaxã nüxü̃ ixuxü̃ ga yexguma mexü̃ wüxichigümaxã naxuegugu.
Acóbuarü yuxchiga
29 49:29-30 Rü wüxi ga ngunexü̃ ga Acóbu ga Iraégu ãégacü rü nayaxucu̱xẽgü ga nanegü, rü ñanagürü: —Marü íxraxü̃ nataxu nax chayuxü̃. Rü chanaxwa̱xe i chorü o̱xigüxü̃tagu choxü̃ peyata̱x i Canaáü̃anewa. Rü ngẽma naxma̱xü̃ i Maxperáwa i Mamréarü to̱xma̱xtawa ngẽxmaxü̃gu tá nixĩ i choxü̃ peta̱xgüxü̃, yerü yemagu nixĩ ga nata̱xgüxü̃ ga chautanüxü̃. Rü yema nachica nixĩ ga Abraáü̃ naxca̱x taxexü̃ naxü̃tawa ga Itítanüxü̃ ga Efróü̃ nax yexma ngĩxü̃ natáxü̃ca̱x ga chorü noxẽ ga Chára.
30 Nüü̃ nadau 49:29
31 Rü yexma chorü noxẽ ga Cháraxü̃tagu nixĩ ga natáxü̃ ga chorü o̱xi ga Abraáü̃, rü chaunatü ga Ichaá rü chaué ga Rebéca. Rü yexma ta nixĩ ga ngĩxü̃ chatáxü̃ ga cho̱xma̱x ga Léa.
32 Rü yema naane rü yema ãxmaxü̃ i ngéma ngẽxmaxü̃ rü Itítanüxü̃xü̃tawa nixĩ ga naxca̱x nataxexü̃ —ñanagürü ga Acóbu.
33 Rü yexguma Acóbu igúegagu ga nanegüxü̃ nax naxucu̱xẽxü̃, rü inayacaãchi rü nayu.
