Génesis 50:1-26
50 Rü yexguma ga Yúche rü nanatüna nanã̱ĩ̱xãchi rü naxauxãcüma tüxü̃ nachúxu.
2 Yemawena rü yema dutúrugü ga naxü̃tawa yexmagüxüxü̃ namu nax tama nawa yayixixü̃ i ãte̱xexü̃maxã natüxünegüãxü̃ca̱x ga nanatü ga Iraé. Rü yemaacü nanaxügü ga yema dutúrugü.
3 Rü 40 ga ngunexü̃ nixĩ ga pumaramaxã nachaxü̃negüãxü̃. Erü ngẽxgumaepü̱x i ngunexü̃ nixĩ i naxwa̱xexü̃ nax tüxü̃ naxüxü̃ i ngẽma pumara. Rü yema Equítuanecüã̱xgü rü 70 ga ngunexü̃ Acóbuca̱x nangechaxü̃gü.
4 Rü yexguma yagúegu ga norü ngechaü̃gü, rü nüma ga Yúche rü yema Faraóü̃arü ngü̃xẽẽruü̃gümaxã nayarüdexa. Rü nüxü̃ ñanagürü: —Rü ngẽxguma aixcüma choxü̃ pengechaü̃gu, rü chanaxwa̱xe i choxü̃ perüngü̃xẽxẽ nax Faraóü̃maxã nüxü̃ peyarüxuxü̃ca̱x i ñaa ore:
5 “Yexguma marü nayuxchaü̃gu ga chaunatü rü choxna naxca̱x taca nax tümamaxã chanaxueguxü̃ca̱x nax yema tümatama taxüxü̃ ga yuxetachica i Canaáü̃anewa ngẽxmaxü̃gu nax tüxü̃ chayatáxü̃ca̱x”, ñatagürü choxü̃. Rü ngẽmaca̱x cuxna naxca̱x chaca nax ngéma choxü̃ cumuxü̃ca̱x nax ngẽxma chaunatüxü̃ chayatáxü̃ca̱x. Rü ngẽxguma marü tüxü̃ chata̱xguwena rü tá chataegu —ñanagürü ga Yúche.
6 Rü Faraóü̃ nanangãxü̃ rü nüxü̃ ñanagürü: —¡Ẽcü ngẽxma tüxü̃ yata̱x ya yíxema cunatü yema tüma cumaxã nüxü̃ tixuxü̃rüxü̃! —ñanagürü.
7 Rü nüma ga Yúche rü nanatüxü̃ inayata̱x nagu ga yema naxma̱xü̃ ga Canaáü̃anewa yexmaxü̃. Rü nawe narüxĩ ga guxü̃ma ga Faraóü̃arü ngü̃xẽẽruü̃gü ga ãẽ̱xgacüwa ügüxü̃ ga Equítuanewa.
8 Rü Yúcheeneegü rü guxü̃ma ga natanüxü̃ ga Acóbu, rü Yúchewe narüxĩ. Rü Gochéü̃wa nayaxüãchitanü ga buxü̃gü rü naxü̃nagüxicatama.
9 Rü yexgumarüxü̃ ta Yúchexü̃ ínixümücügü ga duü̃xü̃gü ga carugu ĩxü̃ rü cowaruétügu ĩxü̃. Rü yemaacü namuxũchi ga duü̃xü̃gü ga íyaxümücügüxü̃.
10 Rü yexguma yema nachica ga Goréü̃-a-atáxwa nangugügu ga natü ga Yudáü̃arü éstewa, rü wüxi ga ngechaü̃arü ngutaque̱xe yéma naxügü. Rü yéma ga Yúche rü 7 ga ngunexü̃ nanatüca̱x nangechaü̃.
11 Rü yexguma yema Canaáü̃anecüã̱x ga yexma ãchiü̃güxü̃ nüxü̃ daugügu ga yema ngechaü̃arü ngutaque̱xe ga yéma naxügüxü̃, rü ñanagürügü: —Ngẽma Equítuanecüã̱xgü rü nüxü̃́ nayu i wüxi i duü̃xü̃ i tachigaxü̃ —ñanagürügü. Rü yemaca̱x Abé-mirayíü̃gu nanaxüéga ga yema nachica ga Yudáü̃arü éstewaama yexmaxü̃.
12 Rü yema Acóbu nanegü rü nanaxügü ga guxü̃ma ga yema nanatü namaxã nüxü̃ ixuxü̃ãcüma.
13 Rü Canaáü̃anewa tüxü̃ nangegü. Rü tüxü̃ nayarüxücuchigü nagu ga yema naxma̱xü̃ ga Maxperáwa yexmaxü̃. Rü yema naxma̱xü̃ nixĩ ga Abraáü̃ natanüxü̃ca̱x naxca̱x taxexü̃ naxü̃tawa ga Efróü̃ ga Itítanüxü̃. Rü yema naane rü ñu̱xũchi yema naxma̱xü̃ rü Mamréarü éstewaama nixĩ i nangẽxmaxü̃.
14 Rü yexguma marü nanatüxü̃ inata̱xguwena, rü Equítuaneca̱x nataegu ga Yúche wüxigu namaxã ga naenexẽgü rü guxü̃ma ga yema togü ga íyaxümücügüxü̃.
Yúche nanataãẽxẽxẽ ga naenexẽgü
15 Rü Acóbu marü yuxguwena, rü Yúchexü̃ namuü̃e ga naenexẽgü. Rü nügümaxã ñanagürügü: —Ñu̱xmatawaxix nixĩ i Yúche i naxütanüxü̃ naxca̱x ga guxü̃ma ga yema chixexü̃ ga namaxã ixüxü̃ —ñanagürügü.
16 50:16-17 Rü yemaca̱x naxü̃tawa namugagü, rü ñanagürügü: —Naxü̃pa ga nax tayuxü̃ ga papa, rü toxü̃ tamu nax cumaxã nüxü̃ tixuxü̃ca̱x i tümaarü ore i ñaxü̃: “Rü cuxna chaca nax cuenexẽgüaxü̃́ nüxü̃ curüngü̃maxü̃ca̱x ga yema chixexü̃ ga cumaxã naxügüxü̃ ga yexguma chixri cumaxã nachopetügu”, ñaxü̃. Rü ngẽmaca̱x i toma nax tanatüarü Tupanaarü duü̃xü̃gü tixĩgüxü̃, rü cuxna taca nax toxü̃́ nüxü̃ curüngü̃maxü̃ca̱x ga yema chixexü̃ ga cumaxã taxüxü̃ —ñaxü̃maxã yéma namugagü. Rü yexguma Yúche nüxü̃ ĩnügu ga yema ore, rü naxaxu.
17 Nüü̃ nadau 50:16
18 Rü yemawena yéma Yúchexü̃tawa nangugü ga naenexẽgü. Rü nape̱xegu waixü̃müanegu nanama̱xcuchitanü rü ñanagürügü: —Rü daxegü tixĩgü nax curü duü̃xü̃güxü̃ toxü̃ quixĩgüxẽẽxü̃ca̱x —ñanagürügü.
19 Natürü nüma ga Yúche rü nanangãxü̃, rü ñanagürü: —¡Taxṹ i choxü̃ pemuü̃exü̃! ¿Rü ñuxũcürüwa i choma rü Tupanachicüxü chaugü chixĩxẽẽxü̃ nax ngẽmaãcü pexü̃ chapoxcuexü̃ca̱x?
20 Pema nagu perüxĩnüegu rü chixexü̃ chomaxã pexüxü̃, natürü Tupana rü mexü̃xü̃ nananguxuchixẽxẽ ga yema chixexü̃ ga chomaxã pexüxü̃. Rü yemaca̱x ãẽ̱xgacüxü̃ choxü̃ ningucuchixẽxẽ i nua nax ngẽmaãcü namaxẽxü̃ca̱x i muxü̃ma i duü̃xü̃gü.
21 Rü ngẽmaca̱x tama chanaxwa̱xe i choxü̃ pemuü̃e. Choma rü tá mea pexna chadau wüxigu namaxã i pexacügü —ñanagürü. Rü yemaacü ga Yúche rü naenexẽgüxü̃ nataãẽxẽxẽ yerü nüxü̃ nangechaü̃ãcüma namaxã nidexa.
Yúchearü yuxchiga
22 50:22-23 Rü nüma ga Yúche rü naenexẽgü rü yexmatama Equítuanegu naxãchiü̃gü. Rü nüma ga Yúche rü nawa nangu nax nüxü̃ nadauxü̃ ga nane ga Efraíü̃taagü. Rü yexgumaruxü̃ ta nüxü̃ nadau ga nataxa ga Maquí ga Manaché nane. Rü nüxü̃ nadau ta ga Maquí nanegü. Rü yexguma 110 ga taunecü nüxü̃́ yexmagu ga Yúche rü nayu.
23 Nüü̃ nadau 50:22
24 Rü wüxi ga ngunexü̃ naxü̃pa ga nax nayuxü̃ ga Yúche rü naenexẽgüxü̃ ñanagürü: —Marü taxũtáma nũxcü chayu. Natürü Tupana tá nixĩ ya pexü̃ rüngü̃xẽẽcü. Rü nüma tá nixĩ i pexü̃ ínachoxü̃xẽxẽxü̃ i ñaa nachixü̃anewa nax yema naane ga tórü o̱xigü ga Abraáü̃na, rü Ichaána, rü tanatü ga Acóbuna naxuaxü̃xü̃wa pexĩxü̃ca̱x —ñanagürü.
25 Rü yexguma ga Yúche rü naenexẽgüxü̃ ñanagürü: —Aixcüma Tupana tá pexü̃ narüngü̃xẽxẽ nax ípechoxü̃xü̃ nawa i ñaa nachixü̃ane. Rü ngẽxguma tá ípechoxü̃gu rü chanaxwa̱xe i chomaxã ipexuneta nax peyangexü̃ i chauxchina̱xã —ñanagürü.
26 Rü nüma ga Yúche rü nüxü̃́ nayexma ga 110 ga taunecü ga yexguma Equítuanegu nayu̱xgu. Rü tama nawa yayixixü̃ ga ãte̱xexü̃maxã nanatuxunegü. Rü ñu̱xũchi wüxi ga naxchixü̃gu nayaxǘcuchigü ga naxü̃ne.
