Génesis 7:1-24
7 Rü yemawena ga Tupana rü Noéxü̃ ñanagürü: —Natanüwa i guxü̃ma i ñaa duü̃xü̃gü rü cuxicatama nixĩ i chorü ngúchaü̃ãcüma cumaxü̃xü̃. ¡Rü ngẽmaca̱x guxü̃ma i cunegümaxã nagu ixüe ya yima wapuru!
2 Rü ngẽma naeü̃gü i mexü̃ nax nangṍxü̃ rü tá cuyamue i 7 chigü i yatüxü̃ rü ñu̱xũchi 7 chigü i ngexü̃. Natürü ngẽma naeü̃gü i tama mexü̃ nax nangṍxü̃ rü tá cuyamue i wüxitama i yatüxü̃ rü ñu̱xũchi wüxitama i ngexü̃.
3 7:3-4 Rü ñu̱xũchi ngẽma wüxichigü i naeü̃ i ixãxpe̱xatüxü̃wa rü tá cuyamue i 7 i yatüxü̃ rü 7 i ngexü̃ nax ngẽmaãcü yamuxü̃ca̱x i guxü̃ i naanewa. Erü ngẽxguma 7 i ngunexü̃wa nanguxgux rü tá chanapuxẽxẽ i 40 i ngunexü̃, rü 40 i chütaxü̃. Rü ngẽmaãcü tá chanadai i guxü̃ma i ñoma i naanewa maxẽxü̃ ga choma chaxüxü̃ —ñanagürü.
4 Nüü̃ nadau 7:3
5 Rü nüma ga Noé rü yema Cori ya Tupana namuxü̃ãcüma nanaxü ga guxü̃ma.
6 Rü yexguma inanguxgu ga ñaa naane namaxã ga gumá mucü ga taxüchicü, rü nüma ga Noé rü nüxü̃́ nayexma ga 600 ga norü taunecü.
7 Rü Noé rü wüxigu nanegümaxã rü naxma̱xmaxã rü naneã̱xgümaxã guma wapurugu nichoü̃ nax tama dexá nanada̱i̱xü̃ca̱x.
8 7:8-9 Rü yexgumarüxü̃ ta guma wapurugu nichoü̃ ga yema naxü̃nagü ga mexü̃ nax nangṍxü̃ rü yema naeü̃gü ga tama mexü̃ nax nangṍxü̃, rü yema naeü̃gü ga ixãxpe̱xatüxü̃, rü yema naxtanecamaxã nügü itúgüxü̃. Rü taxrechigü nichoü̃ rü wüxi ga yatüxü̃ rü wüxi ga ngexü̃ yema Tupana Noémaxã nüxü̃ ixuxü̃rüxü̃.
9 Nüü̃ nadau 7:8
10 Rü marü 7 ga ngunexü̃ nawena ga guma wapurugu nax yachoü̃xü̃, rü inaxügü ga nax inanguxü̃ ga ñaa naane.
11 Rü yexguma Noé nüxü̃́ yexmagu ga 600 ga taunecü rü wüxi ga tauemacü rü 17 ga ngunexü̃, rü yema ngunexü̃gutama nixĩ ga yawã́ĩxü̃chíügüxü̃ ga dexá ga mártamawa, rü yawãxnaxü̃güxü̃ ga dexá ga daxũguxü̃ ga naanewa.
12 Rü 40 ga ngunexü̃ rü 40 ga chütaxü̃ napuecha ga ñaa naanewa.
13 Rü marü 7 ga ngunexü̃ naxü̃pa nax inanguxü̃ ga ñaa naane rü yematama ngunexü̃gu nixĩ ga Noé ga yaxüexü̃ nagu ga guma wapuru tümamaxã ga naxma̱x rü namaxã ga gumá tomaepü̱x ga nanegü ga Chéü̃ rü Cáü̃ rü Yapéx rü tümamaxã ga guxema tomaepü̱x ga naneã̱xgü.
14 Rü yexguma nagu yachoü̃gu ga guma wapuru, rü nichoü̃ ta ga naguxü̃raü̃xü̃ ga naeü̃gü ga naixnecücüã̱x, rü naeü̃gü i naxü̃na ixĩgüxü̃, rü naguxü̃raü̃xü̃ ga naeü̃gü ga waixü̃müanegu nügü itúgüxü̃ rü naguxü̃raü̃xü̃ ga naeü̃gü ga ixãxpe̱xatüxü̃.
15 Rü guxü̃ma ga yema naeü̃gü rü wüxigu Noémaxã guma wapurugu nichoü̃. Rü taxrechigü nichoü̃ ga yema naguxü̃raü̃xü̃ ga naeü̃gü rü werigü.
16 Rü nawüxiraxü̃xü̃ ga naeü̃güwa rü nichoü̃ ga taxrechigü rü wüxi ga yatüxü̃ rü wüxi ga ngexü̃, yerü yemaacü nixĩ ga Tupana ga Noémaxã nüxü̃ yaxuxü̃. Rü yemawena rü nüma ga Cori ya Tupana rü nanawãxta ga ĩã̱x.
17 Rü 40 ga ngunexü̃ nixĩ ga napuxü̃. Rü narübai ga dexá rü yexguma ga guma wapuru rü inayangüãchi.
18 Rü yema nax yexeraãcü nabaichigüxü̃ ga dexá rü guma wapuru rü ningünagüchigü.
19 Rü poraãcü nabainagü ga dexá rü yemaca̱x ga guma ma̱xpǘnegü rü woo máchanexü̃chigüne rü inayi.
20 Rü yexguma marü inayixgu ga guxü̃nema ga ma̱xpǘnegü, rü naétü 7 ga metru nabainagü.
21 Rü yemaacü nayue ga guxü̃ma ga duü̃xü̃gü ga ñoma ga naanewa maxẽxü̃. Rü yexgumarüxü̃ ta nayue ga naeü̃gü ga ixãxpe̱xatüxü̃, rü naxü̃nagü, rü naeü̃gü ga naixnecücüã̱x, rü yema naxtanecamaxã nügü itúgüxü̃.
22 Rü yemaacü nayue ga guxü̃ma ga ta̱xacü ga waixü̃müwa yexmagüxü̃ ga maxü̃ã́xü̃ rü ingü̃ãcüüxü̃.
23 Rü Noé rü guxü̃ma ga guma wapuruwa yexmagüxü̃icatama namaxẽ. Natürü guxü̃ma ga yema togü ga tama wapuruwa yexmagüxü̃ rü nayue ga duü̃xü̃gü, rü naeü̃gü, rü naxü̃nagü, rü naeü̃gü ga ixãxpe̱xatüxü̃ rü naeü̃gü ga naxtanecamaxã waixü̃müanegu ixĩxü̃.
24 Rü 150 ga ngunexü̃ rü guxü̃wama inangu ga naane.
