Isaías 1:1-31
1 Ñaa nixĩ ga ore ga Amú nane ga Ichaíaãẽwa Tupana ínguxẽẽxü̃ ga yexguma Yudáanecüã̱xarü ãẽ̱xgacügü yixĩxgu ga Uchía, rü Yotáü̃, rü Acháx rü Echequía. Rü yema orewa nüxü̃ nixu nax ta̱xacü tá nüxü̃ ngupetüxü̃ ga Yudáane rü ĩane ga Yerucharéü̃.
2 Pa Daxũguxü̃ i Naanecüã̱x rü Ñoma i Naanecüã̱x ¡rü iperüxĩnüe i ñaa Tupanaarü ore i ñaxü̃: —Yema chaunegü ga mea chayaexẽẽxü̃ rü ñu̱xma rü tama chauga naxĩnüe!
3 Rü ngẽma woca rü norü yoraxü̃ nacua̱x, rü ngẽma búru rü nüxü̃ nacua̱x i norü chibüchica i norü yora naxca̱x üxü̃, natürü ngẽma chorü duü̃xü̃gü i Iraétanüxü̃ rü tama choxü̃ nacua̱xgü rü tama naãẽxü̃ nicua̱x —ñanagürü ya Tupana.
4 Pa Duü̃xü̃gü i Chixexü̃ Ügüxü̃ rü Chixexü̃gu Ímaxẽxü̃x, ngúxü̃ pinge erü pema rü chixexü̃arü üruü̃gütaagü pixĩgü, rü nanegü i pecaduã̱xgüxü̃ pixĩgü. Pema rü marü nüxna pixĩgachi ya Iraétanüxü̃arü Tupana ya üünecü rü marü nüxü̃ perüxoe.
5 Rü pema rü Tupanamaxã penue rü tama naga pexĩnüe. Rü ngẽmaca̱x taxuwama marü pexna nanacua̱i̱xcaéga, erü peeruwa rü marü guxü̃wama penapi̱xerugü rü marü pingearü poraxã̱x i ñu̱xmax.
6 Rü pecutüwa inaxügü rü ñu̱xmata peeruwa nangu nax taxuwama namexü̃ i pexene. Rü ngẽma pexene rü o̱xrimaxã rü cuaximaxã rü taixna ichuruxü̃maxã nanapa i guxü̃wama. Rü taxúema texé pexü̃́ tayaxüxü̃gü rü pexü̃́ tayana̱i̱xgü, rü pexü̃́ tayaxĩ̱xãgü chíxü̃maxã i ngextá pexü̃ ínangúxü̃wa.
7 Rü pechixü̃ane rü naxnücüane i chianexü̃xü̃ nayanguxuchi, rü perü ĩanegü rü nixae rü niya̱u̱xragü. Rü ngẽma perü uanügü rü pepe̱xewa nanangõ̱xgü i ngẽma pema petogüxü̃ i penetüarü o. Rü guxü̃ma i perü naane rü naxnücüane i chianexü̃xü̃ nayanguxuchi yema Chodómaxü̃ ngupetüxü̃rüxü̃ ga yexguma yaxaxgu.
8 Rü yima ĩane ya Chióü̃xica ngéma nayaxǘ ñoma wüxi ya düxenü ya úbanecüarü ngãxü̃wa nüxica ngẽxmanerüxü̃. Rü ñoma wüxi i düxgümü i nüxica worachiaanecüarü ngãxü̃wa ngẽxmanerüxü̃ nixĩ. Rü ñoma wüxi ya ĩane i norü uanügü nüxü̃ ichomaegunerüxü̃ nixĩ.
9 Ega ngẽxguma Cori ya Tupana ya Guxãétüwa Ngẽxmacü taxũchima ñuxre i yixema nua tüxü̃ yaxügüxẽẽgu, rü Yerucharéü̃ rü Chodómarüxü̃ rü Gomórarüxü̃ nixĩ.
Cua̱xüxü̃ i Tupana namaxã taãẽxü̃
10 ¡Pa Yerucharẽü̃arü Ãẽ̱xgacügü i Ñoma Chodómaarü Ãẽ̱xgacügürüxü̃ Ixĩgüxe, rü iperüxĩnüe i Cori ya Tupanaarü ore! ¡Pa Duü̃xü̃gü i Yerucharéü̃cüã̱x i Ñoma Gomóracüã̱xrüxü̃ Ixĩgüxe, mea iperüxĩnüe i ngẽma Cori ya Tupana tá pemaxã nüxü̃ ixuxü̃!
11 Rü nüma ya Cori ya Tupana rü ñanagürü pexü̃: —¿Ta̱xacüca̱x chauxü̃tawa penagagü i ngẽma muxü̃ i pexü̃nagü nax cha̱u̱xca̱x penada̱i̱xü̃ca̱x? Rü marü nüxü̃ charüchau i ngẽma carnérugü i cha̱u̱xca̱x ípeguxü̃ rü ngẽma wocaxacügüarü chíxü̃ i ípeguxü̃. Rü yimá nagü i ngẽma woca iyatüxü̃gü rü carnérugü, rü chíbuxacügü rü nawa chanaxoxéga.
12 Rü pemax rü choxna penanaãma i pexü̃nagü, natürü ¿texé pexna naxca̱x taca nax chopataa̱xtügu nax pichocuxü̃?
13 Rü tama chanaxwa̱xe i ãmaregü i taxuwama mexü̃ cha̱u̱xca̱x nua pena, erü choma rü marü tama yáxna namaxã chaxĩnü i ngẽma naema i perü ãmaregü ípeguxü̃. Rü pemax rü duü̃xü̃güna pexu nax penaxüchigaxü̃ca̱x ya tauemacü ya ngexwaca ngócü rü ñu̱xũchi ngü̃xchigaarü ngunexü̃. Natürü choma rü tama namaxã chataãxẽ i duü̃xü̃gü i chixexü̃gu maxẽxü̃güarü petagü.
14 Rü choma rü naxchi chaxai i ngẽma perü petagü i tauemacü ya ngexwaca ngócügu pexüxü̃ rü ñu̱xũchi ngẽma ngutaque̱xegü i pexüxü̃. Rü ngẽma rü choxü̃ nanuxẽxẽ rü marü tama yáxna namaxã chaxĩnü.
15 Rü ngẽxguma pema pexunagüme̱xẽgüãcü peyumüxẽgügu, rü choma rü pexcha̱xwa chidaugachi. Rü woo namuxgu i perü yumüxẽ natürü i choma rü taxũtáma pexü̃ chaxĩnü, erü pema rü pemáeta rü pexme̱xgü rü nagümaxã nixãũãchi.
16 ¡Rü pegü pemexẽxẽarü maxü̃ã̱xgü nax pimexü̃ca̱x! ¡Rü nüxna pixĩgachi i ngẽma chixexü̃ i chope̱xewa nagu pemaxẽxü̃! ¡Rü nüxü̃ perüxoe nax chixexü̃ pexüexü̃!
17 ¡Rü naxca̱x pengúe nax mexü̃ pexügüxü̃! ¡Rü pora pexüe nax mexü̃ i nacümagu pemaxẽxü̃ca̱x! ¡Rü tüxü̃ perüngü̃xẽxẽ ya yíxema duü̃xẽgü ya togü chixri tümamaxã icua̱xgüxe! ¡Rü naétüwa pechogü i taxcutagü rü yutegüxü̃!
Cori ya Tupanaarü cua̱xüxü̃ i aixcüma ixĩxü̃
18 ¡Ẽcü nua pexĩ rü ngĩxã perü chixexü̃chiga tidexagü! Rü ngẽxguma chi perü maxü̃ rü woo nadauxuchigu namaxã i perü chixexü̃, natürü i choma rü ñoma gáuxü̃chara i cómüxü̃chixü̃rüxü̃ tá chayaxĩxẽxẽ. Rü ngẽxguma chi woo wüxi i naxchiru i waxüchixü̃rüxü̃ yixĩxgu i perü pecadugü, natürü i choma rü ñoma wüxi i carnéruta̱xa i cómüxü̃chixü̃rüxü̃ tá chanacómüxẽxẽ.
19 Rü ngẽxguma chi penaxwa̱xegu nax chauga pexĩnüexü̃, rü tá penangõ̱x i ngẽma rümemaegüxü̃ i nanetüarü o i ñoma i naanewa yaexü̃.
20 Natürü ngẽxguma taxũtáma penaxwa̱xegu nax chauga pexĩnüexü̃, rü daigu perü uanügüme̱xẽgu tá peyue —ñanagürü ga Tupana.
Yerucharéü̃cüã̱x rü tama Cori ya Tupanaga naxĩnüe.
21 Pemax, Pa Yerucharéü̃cüã̱x, noxri rü aixcüma meama Tupanaga pexĩnüe, natürü i ñu̱xma rü ñoma wüxi i ngexü̃ i naxü̃nemaxã taxexü̃rüxü̃ pixĩgü. Pema ga noxri rü mexü̃ ga nacümagu pemaxẽ, natürü i ñu̱xma rü máetaguxicatama perüxĩnüe.
22 Rü pema ga noxri rü ñoma diẽrumürüxü̃ pimexü̃, natürü i ñu̱xma rü norü ãũãchixü̃rüxü̃ pixĩgü. Pema ga noxri rü ñoma mecü ya bínurüxü̃ pime, natürü i ñu̱xma rü ñoma dexámarerüxü̃ pixĩgü.
23 Rü perü ãẽ̱xgacügü rü tama Tupanaga naxĩnüe rü namaxã naxãmücügü i duü̃xü̃gü i máxwa̱xegüxü̃. Rü diẽruca̱x rü ãmareca̱x ínacagü nax tama napoxcuexü̃ca̱x i ngẽma chixexü̃ ügüxü̃. Rü taxcutagü rü tama tüxü̃ narüngüxẽẽgü, rü tama tümagu narüxĩnüe ya yixema yutegüxe.
24 Rü ngẽmaca̱x ya Cori ya Tupana ya Guxãétüwa Ngẽxmacü ya Iraétanüxü̃arü Tupana ya poraxüchicü, rü ñanagürü: —Ñu̱xma i choma rü tá nüxü̃́ chaxütanü i chorü uanügü naxca̱x i ngẽma chixexü̃ i naxügüxü̃. Rü tá chanapoxcue.
25 Rü tá wena pexna chanacuaixca rü tá ichayanaxoxẽxẽ i guxü̃ma i ngẽma chixexü̃gü i petanüwa ngẽxmagüxü̃. Rü ngẽmaãcü tá pexü̃́ íchanapi i guxü̃ma i perü ãũãchixü̃.
26 Rü choma rü tá chanaxü nax wena pexü̃́ nangẽxmaxü̃ca̱x i ãẽ̱xgacügü i mexü̃ rü ucu̱xẽruü̃gü i mexü̃ ga yema noxri pexü̃́ yexmagüxü̃rüxü̃. Rü nawena nax marü ngẽma pemaxã chaxüxü̃, rü ngẽxguma ya yima perü ĩane ya Yerucharéü̃ rü wenaxarü Ĩane ya mexü̃arü üruü̃maxã rü Ĩane ya Tupanaga ĩnünemaxã tá nanaxugü.
27 Rü ngẽma Chióü̃cüã̱x i duü̃xü̃gü i wenaxarü chauga ĩnüexü̃ rü choma rü tá chorü poramaxã norü uanügüme̱xẽwa íchananguxü̃xẽxẽ.
28 Natürü ngẽma duü̃xü̃gü i tama chauga ĩnüexü̃ rü ngẽma chixexü̃ ügüamaxü̃ rü tá chanadai. Rü ngẽma duü̃xü̃gü i choxna ixĩgachitanüxü̃ rü tá nayue.
29 Rü pema rü tá na̱xcha̱xwa pexãnee i ngẽma naigü i taxü̃ rü putüraanecügü i perü me ixĩxü̃ i nawa nüxü̃ picua̱xüü̃güxü̃ i ngẽma tupananetachicüna̱xãgü.
30 Rü pemax rü ñoma nai i taxü̃ i rüñẽ̱xátüxü̃rüxü̃ tá pixĩgü, rü putüranecü i ngearü dexáã́xü̃rüxü̃ tá pixĩgü.
31 Rü yimá yatü ya poracü rü ñoma maxẽ ya ipacürüxü̃ tá nixĩ, rü ngẽma chixexü̃ i naxüxü̃ rü üxüarü ya̱u̱xraxü̃rüxü̃ tá nixĩ. Rü ngẽma taxre rü tá wüxigu niyaura, rü taxucürüwa tá texé tayaxoxẽxẽ —ñanagürü ga Tupana.
