Isaías 10:1-34
10 ¡Rü pegümaxã pengechaü̃gü i pema i ãẽ̱xgacügü nax chixexü̃ i mugü duü̃xü̃güca̱x ipexüxü̃ rü penaxunagüchigaxü̃ i mugü i taxucürüwama duü̃xü̃gü íngu̱xẽẽxü̃!
2 Pema rü tama naétüwa pechogü i ngẽma taxuxü̃ma nüxü̃́ ngẽxmagüxü̃ rü tama nüxü̃ perüngü̃xẽxẽ i ngẽma chorü duü̃xü̃gü i ngearü diẽruã̱xgüxü̃. Rü chixri namaxã ipecua̱x i ngẽma yutegüxü̃, rü naxca̱x pengĩ̱x i ngẽma tacutagüna üxü̃.
3 ¿Rü ta̱xacü tá pexügüxü̃ i ngẽxguma Tupana pexna caxgux naxca̱x i guxü̃ma i ngẽma chixexü̃ i pexüxü̃ rü ngẽxguma nüxü̃ peda̱u̱xgu nax yáxü̃wa pexca̱x ne naxũxü̃ i poxcu? ¿Rü texéca̱x tá pibuxmüxü̃ nax ngü̃xẽẽca̱x ípecaxü̃ca̱x? ¿Rü ngextá tá peyacu̱xgü i perü ngẽmaxü̃gü i ngẽxguma ínangugügu i perü uanügü?
4 Rü ngẽxguma tama perü uanügüme̱xẽwa pegü pengexmaxẽẽgu nax to i nachixü̃anewa pexü̃ nagagüxü̃ca̱x, rü tá pexü̃ nadai. Rü woo ngẽmaãcü napoxcueãxü̃ ya Cori ya Tupana, natürü tama Iraétanüxü̃maxã inarüngü̃xmü, rü yexeraãcü nayaxãxũnechigüama.
Cori ya Tupana rü tá Achíriaanexü̃ namu nax Iraéanexü̃ napoxcuxü̃ca̱x
5 Rü Cori ya Tupana rü ñanagürü: —Achíriaanearü ãẽ̱xgacü nixĩ ya chorü naixmena̱xã ya Iraétanüxü̃xü̃ namaxã chapoxcune. Rü yima nixĩ ya chauxne ya namaxã tá chorü numaxã chacuaixetane.
6 Rü choma tá nixĩ i Achíriaanearü ãẽ̱xgacüxü̃ chamuxü̃ nax duü̃xü̃gü i chixexü̃gu maxẽxü̃ca̱x rü wüxi i nachixü̃ane i choxü̃ nuẽẽxü̃ca̱x íyagoõchixü̃ca̱x nax nüxü̃́ nangĩ́xü̃ca̱x rü nüxna napuxü̃ãxü̃ca̱x i norü ngẽmaxü̃gü rü nagu napugüexü̃ca̱x ñoma ĩanearü namagüwa ngẽxmaxü̃ i ãcharaxü̃gu napugüexü̃rüxü̃.
7 Natürü nüma i Achíriaanearü ãẽ̱xgacü rü tama ngẽmagu narüxĩnü rü tama naãẽwa nangẽxma i ngẽma. Rü ngẽma nüma nagu naxĩnüxü̃ nixĩ nax wüxicana duü̃xü̃güxü̃ nada̱i̱xü̃ rü muxü̃ma i nachixü̃anegümaxã inacuáxü̃.
8 Rü nüma i Achíriaanearü ãẽ̱xgacü rü ñanagürü: “Guxü̃ma i nachixü̃anegüarü ãẽ̱xgacügü rü cho̱xme̱xwa nangẽxmagü nax choma chanaxwa̱xexü̃ãcüma chanamuxü̃.
9 Rü guxü̃nema ya ĩanegü ga nüxü̃ charüporamaene rü cho̱xme̱xwa nangẽxmagü, rü ngẽxgumarüxü̃ ya ĩane ya Canú, rü ĩane ya Caquemí, rü ĩane ya Amá, rü ĩane ya Arpáx, rü ĩane ya Chamária, rü ĩane ya Damácu. Rü guxü̃nema ya yima rü cho̱xme̱xwa nangẽxmagü.
10 Rü choma rü marü nüxü̃ charüporamae ga muxü̃ma ga nachixü̃anegü ga muarü tupananetaxã̱xgüxü̃. Rü guma ĩanegü rü Yerucharéü̃arü yexera rü Chamáriaarü yexera namu ga norü tupananetachicüna̱xãgü.
11 Rü guma ĩane ga Chamáriamaxã rü norü tupananetagümaxã chaxüxü̃, ¿rü tama e̱xna choxü̃́ natauxchaxü̃ nax ngẽmatama chaxüxü̃ namaxã ya yima ĩane ya Yerucharéü̃ rü norü tupananetachicüna̱xãgü?” —ñanagürü.
12 Rü ngẽxguma Cori ya Tupana yanguxẽẽgu i ngẽma poxcu naxca̱x i ngẽma duxü̃xü̃gü i ma̱xpǘne ya Chióü̃wa maxẽxü̃ rü yima ĩane ya Yerucharéü̃wa maxẽxü̃, rü tá Achíriaanearü ãẽ̱xgacüxü̃ napoxcu naxca̱x nax nügü ínataxü̃ rü nügü yacua̱xüxü̃xü̃.
13 Erü nüma ga Achíriaanearü ãẽ̱xgacü rü ñanagürü: —Choma nixĩ i chorü poramaxã togü i duü̃xü̃gümaxã ichacuáxü̃, erü nüxü̃ chacua̱xüchi, rü mea nagu charüxĩnü i ngẽma chaxüxü̃. Rü choma nixĩ i chanaxüchicüüxü̃ i nachixü̃anegüarü üyeanegü, rü chanadexü̃ i norü ngẽmaxü̃gü. Rü ñoma wüxi i poraxüchixü̃rüxü̃ nüxü̃ charüporamae i norü ãẽ̱xgacügü.
14 Rü guma ĩanegüarü ngẽmaxü̃gü rü guxü̃ma cho̱xme̱xwa nangẽxmagü, rü guxü̃ma ga yema norü naane rü chorü nixĩ. Rü ñoma wericharaü̃ ya naxchiãxü̃wa wogüne iyaxuxü̃rüxü̃ chanayaxu ga yema naanegü rü taxuxü̃ma choxna nayanuxũ. Rü tataxuma ya texé ya naxca̱x idexaxe —ñanagürü.
15 Natürü taxucürüwa i wüxi i yuema nügügu narüxĩnü nax norü yora i namaxã icuáxü̃arü yexera nax yixĩxü̃. Rü taxucürüwa i wüxi i chera nügügu narüxĩnü nax norü yora i namaxã puracüxü̃arü yexera nax yixĩxü̃. Rü taxucürüwa i wüxi i caxü̃ruxü̃ i naimare ixĩxü̃ nagu narüxĩnü nax norü yoramaxã inacuáxü̃.
16 Rü ngẽmaca̱x ya Cori ya Tupana ya Guxãétüwa Ngẽxmacü rü ngẽma ãẽ̱xgacüca̱x rü norü churaragüca̱x tá ínananguxẽxẽ i wüxi i da̱xaweane i poraxü̃, rü wüxi i axüne i ñoma üxüwa ixaxü̃rüxü̃, rü ngẽmaãcü tá nanangearü poraã̱x i ngẽma uanügü i nügü írüporaexü̃.
17 Rü nüma ya Cori ya Tupana ya üünecü ya Iraétanüxü̃arü omü ixĩcü, rü üxüemaü̃ tá nügü nixĩxẽxẽ. Rü wüxi i ngunexü̃gu rü tá ínanagu i ngẽma Achíriaanearü churaragü ñoma tuxunecü rü maxẽnecü iguxü̃rüxü̃.
18 Rü nüma ya Cori ya Tupana rü tá nayanaxoxẽxẽ i ngẽma Achíriaanearü ãẽ̱xgacüarü pora ñoma wüxi i üxüema i naixnecügü i mexẽchixü̃ ixaxẽẽxü̃rüxü̃ rü mexü̃ i nanetünecügü ixaxẽẽxü̃rüxü̃. Rü ngẽma norü churaragü rü ngéma tá nawogümare ñoma wüxi i duü̃xü̃ i da̱xawexü̃ i ngearü poraã́xü̃rüxü̃.
19 Rü ngẽma churaragü i noxri naixnecürüxü̃ ixĩxü̃ rü noxre tátama ngéma nayaxügü. Rü ngẽmaca̱x woo wüxi i buxü̃ rü tá nüxü̃́ natauxcha nax yaxugüaxü̃ i ngẽma íyaxügüxü̃.
20 Rü ngẽma ngunexü̃gu rü ngẽma noxretama i Iraéanecüã̱xgü i Acóbutanüxü̃ i íyaxüxü̃, rü taxũtáma wena nüxü̃́ nayaxõgü i ngẽma chixri namaxã icuáxü̃. Rü tá Cori ya Tupana ya üünecü ya norü Tupanaca̱x nawoegu rü yimaaxü̃́ tá aixcüma nayaxõgü.
21 Rü noxretama i Acóbutanüxü̃ rü tá Cori ya Tupana ya poraxüchicüca̱x nawoegu.
22 Pa Iraétanüxü̃x, woo curü duü̃xü̃gü rü namuxũchi ñoma naxnecüchicute̱xe i márpechinüwa ngẽxmacürüxü̃, rü ngẽmatanüwa rü noxre tátama nixĩ i Tupanaca̱x woeguxü̃. Rü ngẽma poxcu rü marü naxuegu nagagu i ngẽma chixexü̃ i pexüxü̃.
23 Erü nüma ya Cori ya Tupana ya Guxãétüwa Ngẽxmacü rü guxü̃ma i Iraéanemaxã tá nayanguxẽxẽ i ngẽma poxcu i ueguxü̃.
24 Rü Cori ya Tupana ya Guxãétüwa Ngẽxmacü rü ñanagürü: —Pa Chorü Duü̃xü̃gü i Ma̱xpǘne i Chióü̃gu Ãpatagüxü̃x ¡rü taxṹ i nüxü̃ pemuü̃exü̃ i ngẽma Achíriaanecüã̱xgü woo norü naixmena̱xãmaxã pexna nacua̱i̱xcaãgu rü chixri pemaxã inacua̱xgügu yema Equítuanecüã̱xgü ü̃pa chixri pemaxã icua̱xgügurüxü̃!
25 Erü marü noxretama i ngunexü̃ nataxu nax naxca̱x íchananguxẽẽxü̃ i norü poxcu, rü ngẽma chorü numaxã tá chanadai.
26 Rü Cori ya Tupana ya Guxãétüwa Ngẽxmacü rü tá nanapoxcue i Achíriaanecüã̱xgü, yexguma Madiáü̃anecüã̱xgüxü̃ rü nuta ga Orégu nadaixgurüxü̃. Rü Achíriaanecüã̱xgüxü̃ tá nanawe̱x i norü pora, yexguma Equítuanecüã̱xgüxü̃ nawe̱xãgurüxü̃.
27 Rü ngẽma ngunexü̃gu i choma rü tá cuxü̃ íchanaxügachi i ngẽma cuxweta i cuca̱xwegu naxünagügüxü̃ i ngẽma Achíriaanecüã̱xgü, rü tá pexü̃ íchanguxü̃xẽxẽ naxme̱xwa i ngẽma chixri pemaxã icuáxü̃ —ñanagürü.
Ningaicagü i Achíriaanecüã̱xgü nax Iraétanüxü̃arü daiwa naxĩxü̃
28 Rü ngẽma Achíriaanearü churaragü rü Rimóü̃wa nixĩ ne naxĩxü̃, rü Aiáwa nangugü. Rü ñu̱xma rü marü Migróü̃xü̃ nachopetü, rü Mixmágu nananu i naxwetagü.
29 Rü ngẽma dexá i poraü̃chiüxü̃ rü marü nichoü̃ rü Guébagu napegü. Rü ĩane i Ramácüã̱xgü rü poraãcü nüxü̃ namuü̃e. Rü ĩane ya Guibeá ga Chaúarü ĩanecüã̱xgü rü naxcha̱xwa nibuxmü.
30 ¡Rü wáita pexüe, Pa Bax-garíü̃cüã̱x! ¡Rü pemax, Pa Laichácüã̱x rü nüxü̃ pexĩnüe nax wáita naxüexü̃! ¡Rü pemax, Pa Anatócüã̱x rü penangãxü̃ga!
31 Rü ĩane ya Maxmenácüã̱xgü rü naxcha̱xwa nibuxmü, rü ĩane ya Guebíü̃cüã̱xgü rü naxcha̱xwa nicu̱xgü.
32 Rü ñu̱xma i ngẽma uanügü rü ĩane ya Nóxwa nayachaxãchitanü, rü wüxi i cua̱xruxü̃ nügüna naxãgü nax Yerucharéü̃arü ma̱xpǘne ya Chióü̃ca̱x íyaxüãchixü̃ nax tüxü̃ nada̱i̱xü̃ca̱x.
33 ¡Rü dücax, nüxü̃ pedau ya Cori ya Tupana ya Guxãétüwa Ngẽxmacü rü taxü̃ i norü poramaxã tá Achíriaanearü churaragüxü̃ niwa̱xtanüxẽxẽ ñoma wüxi i naixnecü iyexü̃ rü iwa̱xtanüxü̃rüxü̃! Rü woo i ngẽma norü churaragüerugü rü ñoma naigü ya itaxü̃ne rü iyexü̃nerüxü̃ tá niwa̱xgü. Rü ngẽma Achíriaanearü ãẽ̱xgacügü rü ñoma imáchanexü̃chine ya naigü iyexü̃nerüxü̃ tá niwa̱xgü.
34 Rü nüma ya Tupana rü ñoma wüxi i yuemamaxã muxũchixü̃ i naigü iyexü̃rüxü̃ tá wüxixü̃cüxü nanadai i ngẽma Achíriaanecüã̱xgü. Rü ñoma ocayiwa i máchanene i Líbanuwa ngẽxmane natuxuxü̃rüxü̃ tá nixĩgü.
