Isaías 11:1-16
11 Rü ñoma wüxi i naixchime irüxüxü̃rüxü̃ tá nixĩ nax Dabínatü ga Ichaxíwa nangóxü̃ i wüxi i nataxa i guxãarü ãẽ̱xgacü tá ixĩxü̃.
2 Rü Cori ya Tupanaãxẽ rü guxü̃gutáma naxü̃tawa nangẽxma rü namaxã inacua̱x. Rü tá nüxna nanaxã i cua̱x nax mea naãẽxü̃ nacuáxü̃ca̱x. Rü tá nüxna nanaxã i tauxcha nax mea nügümaxã inacuáxü̃ca̱x. Rü tá nüxna nanaxã i pora rü tá nüxü̃ narüngü̃xẽxẽ nax Tupanaarü ngúchaü̃xü̃ nacuáxü̃ rü naga naxĩnüxü̃.
3 Rü nüma rü ngẽxguma duü̃xü̃güna nacaxgu i norü maxü̃chiga, rü taxũtáma ngẽma norü düxétüwa ngóxü̃ca̱xicatama nüxna naca. Rü taxũtáma nanapoxcu naxca̱x i ngẽma togü nüxü̃ ixugüemarexü̃.
4 Rü yíxema tama nüxü̃ cua̱xgüxe nax tügü ítapoxü̃güxü̃ rü nüma rü tá nüxü̃ nacua̱x nax ñuxãcü mea tüxü̃́ namexẽẽãxü̃ i tümaarü guxchaxü̃. Rü tümaétüwa tá nachogü ya yíxema ngearü diẽruã̱xgüxe. Rü ngẽma norü ore rü ñoma wüxi i cua̱i̱xruü̃rüxü̃ tá nixĩ naxca̱x i ngẽma nuwa̱xexü̃ rü ma̱xgu rüxĩnüxü̃. Rü wüxi i cue ñaxü̃maxã tá nanayuxẽxẽ i ngẽma duü̃xü̃ i chixexü̃ üxü̃.
5 Rü nüma ya yimá ãẽ̱xgacü rü meama guxü̃ma i duü̃xü̃gümaxã tá inacua̱x. Rü aixcüma tá nayanguxẽxẽ i ngẽma ore i nüxü̃ yaxuxü̃.
6 Rü ngẽxguma yangucuchigu ya yimá ãẽ̱xgacü, rü ngẽma airu i naixnecücüã̱x rü carnérumaxã tá nügümaxã namecümagü. Rü ngẽma ai rü tá chíbuxacümaxã wüxigu nacagü. Rü ngẽma wocaxacü rü ngẽma aixacü rü tá wüxigu nayae. Rü wüxi i buxü̃ tá namaxã inacua̱x.
7 Rü ngẽma woca rü ngẽma ócha i düraxü̃ rü nügümücü tá nixĩgü rü naxacügü rü wüxigu tá nacagü. Rü ngẽma leóü̃ rü wocarüxü̃ tá maxẽ nanangõ̱x.
8 Rü wüxi ya buxe ya maixe rü tá taxĩnüca̱xwa̱xe naxü̃tawa i ãxtapemaxü̃, rü woo ngẽma ãxtapemaxü̃gu tixücuchigu rü taxũtáma tüxü̃́ naxãũcüma.
9 Rü guxü̃nema ya yima ma̱xpǘne ya chopata nawa ngẽxmanewa rü tataxuma ya texé ya chixexü̃ ǘxe. Erü ngẽma már i dexámaxã napaxü̃rüxü̃ rü ñoma i naane rü ngẽma duü̃xü̃gü i choxü̃ cua̱xgüxü̃maxã tá nanapá.
10 Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü tá wüxi i cua̱xruxü̃ nixĩ naxca̱x i guxü̃ma i duü̃xü̃gü. Rü guxü̃ i nachixü̃anegücüã̱x rü tá naxca̱x nayadaugü rü naxca̱x nangutaque̱xegü. Rü ngẽma nachica i nawa nangẽxmaxü̃ rü tá naxüüne.
Iraétanüxü̃ rü tá nachixü̃aneca̱x nawoegu
11 Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü nüma ya Cori ya Tupana rü tá wena inanawe̱x i norü pora. Rü wena tá nanangutaque̱xexẽxẽ i norü duü̃xü̃gü i Achíriaanewa, rü Equítuanewa, rü Patróxanewa, rü Etiopíaanewa, rü Eráü̃anewa, rü Chináxanewa, rü Amáanewa rü nachixü̃anegü i márcutüwa ngẽxmagüxü̃wa. Rü tá wena Iraéaneca̱x nanawoeguxẽxẽ.
12 Rü nüma ya Cori rü guxü̃ i nachixü̃anegüxü̃ tá nüxü̃ nadauxẽxẽ i wüxi i cua̱xruxü̃. Rü tá nanangutaque̱xexẽxẽ i ngẽma Iraétanüxü̃ i woonexü̃. Rü naanearü guxü̃wama tá ne nanagagü nax nanutaque̱xeãxü̃ i ngẽma duü̃xü̃gu i Yudáanecüã̱x ga woonemarexü̃.
13 Rü ngẽma Efraíü̃tanüxü̃ rü marü taxũtáma nixãũxãchiwa̱xegü rü ngẽxgumarüxü̃ ta i Yudátanüxü̃ rü marü taxũtáma nixãũxãchiwa̱xegü. Rü taxũtáma nügümaxã narüxuanügü.
14 Rü Efraíü̃tanüxü̃ rü Yudátanüxü̃ rü wüxigu tá oéstewa naxĩ nax Firitéutanüxü̃xü̃ nada̱i̱xü̃ca̱x, rü naweama tá ne naxĩ. Rü ngẽxgumarüxü̃ tá ta wüxigu naxca̱x ínayaxüãchi rü nüxna nanapuxü̃ i norü ngẽmaxü̃gü i ngẽma nachixü̃anegü i éstewaama ngẽxmagüxü̃. Rü ngẽma taxre rü tá Edóü̃anemaxã rü Moáanemaxã inacua̱xgü. Rü ngẽma Amóü̃tanüxü̃ rü tá naga naxĩnüe.
15 Rü Cori ya Tupana rü tá nayawáxna i wüxi i nama i Már i Dauchíüxü̃wa. Rü taxtü i Eufráteétügu tá naxuchacüxü. Rü tá ínananguxẽxẽ ya wüxi ya poracü ya buanecü, rü yimá buanecümaxã tá taxtü i Eufráteétügu nicue rü tá 7 i nachacüüxü̃ nayangucuchixẽxẽ. Rü ngẽxguma tá nichoü̃ taxũtáma ínacuaixü̃ãcüma i norü chapatugü.
16 Rü ngẽxguma Achíriaanewa nawoegu̱xgu i ngẽma noxretama i Tupanaarü duü̃xü̃gü i íyaxügüxü̃ rü tá namaxã inayarüxĩ i wüxi i nama i taxü̃ ga yexguma norü o̱xigü ga Iraétanüxü̃ Equítuanewa ichoxü̃gu nagu naxĩxü̃raxü̃xü̃.
