Isaías 13:1-22
13 Ñaa nixĩ i ore i Cori ya Tupana Amú nane ya Ichaíaãẽwa ínguxẽẽxü̃ nachiga i ngẽma guxchaxü̃ i Babiróniaca̱x tá ínguxü̃:
2 —¡Ma̱xpǘne ya máchaneétüwa penawe̱xnagü ya wonera ya daica̱x ícacü! ¡Rü penamuãchitanü i churaragü nax nügü nada̱i̱xü̃ca̱x! ¡Rü pewe̱xnagüchacüügü nax ngẽmaãcü Babiróniaarü ĩanegu pechocuxü̃ca̱x nawa i ngẽma ĩã̱xgü i ãẽ̱xgacügü nawa ichocuxü̃!
3 Rü choma ya Cori ya Tupana rü naxca̱x chaca i ngẽma nüxü̃ chaxunetaxü̃ i chorü churaragü i tama muü̃exü̃. Rü chanamu i ngẽma churaragü nax nadaiaxü̃ca̱x i ngẽma Babiróniacüã̱x rü ngẽmaãcü nataãẽgüxü̃ca̱x i ngẽxguma nüxü̃ chanaporamaexẽẽgügu —ñanagürü ga Tupana.
4 Rü mápü̱xanexü̃wa rü nüxü̃ taxĩnü i muxũchixü̃ i duü̃xü̃gü i ngéma aixta üexü̃. Rü nüxü̃ taxĩnü nax naxãũgaãchitanüxü̃ i nachixü̃anegü rü ĩanegü i wüxigu ngutaque̱xexü̃. Rü nüma ya Cori ya Tupana ya Guxãétüwa Ngẽxmacü rü nüxü̃ nidaugü i norü churaragü i daica̱x ímemaregüxü̃.
5 Rü ngẽma churaragü rü nachixü̃ane i yáxü̃wa ngẽxmaxü̃wa ne naxĩ i ñaa naanearü tuãchiarü yexerawa. Rü Cori ya Tupana rü norü churaragümaxã ngéma ne naxũ nax norü numaxã napoxcuãxü̃ca̱x i guxü̃ma i Babiróniaarü naane.
6 ¡Rü pixauxe, Pa Babiróniacüã̱x, erü Cori ya Tupanaarü ngunexü̃ rü marü ningaica nax ínanguxü̃! Rü nüma ya Cori ya Tupana ya Guxãétüwa Ngẽxmacü rü tá ínangu nax Babiróniagu yapogüxü̃ca̱x.
7 Rü ngẽxguma i guxü̃ma i duü̃xü̃gü i Babiróniacüã̱x rü tá inarümaachitanü rü tá ningearü poraã̱x.
8 Rü tá poraãcü namuü̃e. Rü naxca̱x tá ínangu i taxü̃ i ĩ̱xãchiãxẽ. Rü poraãcü ngúxü̃ tá ningegü ñoma wüxi i ngecü i íxraxacüchaü̃cürüxü̃. Rü muü̃chametüãcü tá nügü narüdaunü rü norü ãnemaxã tá nayadauãchichametügü.
9 Rü marü nawa nangu i ngẽma ngunexü̃ i ãũcümaxü̃ i nagu Tupana norü numaxã tá chianexü̃xü̃ yanguxuchixẽẽxü̃ i ñaa naane. Rü tá nanadai i ngẽma duü̃xü̃gü i chixexü̃arü üruü̃gü i ngẽma naanewa ngẽxmagüxü̃.
10 Rü ngẽma i ngunexü̃gu rü ngẽma woramacurigü rü ẽxtagü i daxũguxü̃ i naanewa ngẽxmagüxü̃ rü tá nixogü. Rü üa̱xcü rü noxri tátama iyanagoxgu rü nixo, rü tauemacü rü tá ta nixo.
11 Rü nüma ya Cori ya Tupana rü ñanagürü: —Tá chanapoxcue i ñoma i naanecüã̱x naxca̱x i ngẽma norü chixexü̃. Rü ngẽma duü̃xü̃gü i chixexü̃gu maxẽxü̃ rü tá chanapoxcu naxca̱x i ngẽma nax namáetagüxü̃. Rü tá ichayanaxoxẽxẽ i nacüma i namaxã nügü ínatagüxü̃ i ngẽma duü̃xü̃gü i nügü icua̱xüü̃güxü̃. Rü tá chanaxãneexẽxẽ i ngẽma nügü írütagüxü̃ rü ngẽma taxuwama toguexü̃ mexẽẽgüxü̃.
12 Rü tá chanadai i ngẽma Babiróniacüã̱x i yatüxü̃gü rü noxretátama íchayaxüxẽxẽ. Rü ngẽmaca̱x i ngẽma úiru i mexẽchixü̃ i Ofíwa ngẽxmaxü̃arü yexera tá nataxu i ngẽma duü̃xü̃gü.
13 Rü ngẽxguma tá nawa nanguxgu i ngẽma ngunexü̃ rü choma rü chorü numaxã tá chayadu̱xruxẽxẽ i daxũguxü̃ i naane. Rü chorü nugagu rü ñoma i naane rü tá nixũgachi i nachicawa.
14 Rü ngẽma togü i nachixü̃anecüã̱x i Babiróniaanearü ĩanewa ngẽxmagüxü̃ rü ñoma wüxi i cowü i nawe nangẽgüxü̃rüxü̃ tá nibuxmü. Rü wüxi i carnérutücumü i ngearü dauruü̃ã̱xgüxü̃rüxü̃ tá naxĩgü. Rü wüxichigü i ngẽma duü̃xü̃gü rü tá nachixü̃aneca̱x nataegu rü ngẽma norü naane i nawa ne naxũxü̃wa tá naxũ.
15 Natürü guxãma ya yíxema yima ĩanegu tüxü̃ yangauxe rü tá tüxü̃ nacanagü. Rü guxãma ya yíxema tüxü̃ yayaxúxe rü tá tüxü̃ nima̱xgü.
16 Rü tümape̱xegügu tá tümaxacügüxü̃ waixü̃müanegu nichi̱xgü. Rü tümapatagüwa tá nanade i tümaarü ngẽmaxü̃gü. Rü tümama̱xgü rü tá tümamaxã namaxẽ.
17 Rü choma rü tá Médiatanüxü̃xü̃ chamu nax Babiróniacüã̱xgüxü̃ nada̱i̱xü̃ca̱x. Rü ngẽma duü̃xü̃gü rü tama diẽrugu narüxĩnüe rü tama úiru nüxü̃́ ngúchaü̃xü̃ i duü̃xü̃gü nixĩgü.
18 Rü ngẽma duü̃xü̃gü rü tá norü chuxchimaxã ngextü̱xü̃güxü̃ nadai. Rü taxũtáma nüxü̃́ taxãũxãchitümüxü̃ ya yíxema ngexwaca íxragüxe rü ñu̱xũchi yíxema marü iyaxüraxe.
19 Pa Babiróniax, cuma nax guxü̃ i nachixü̃anegüarü yexera quixĩxü̃, rü cumaxã nixĩ i nügü yacua̱xüü̃güxü̃ i curü duü̃xü̃gü i Cadéugü. Natürü tá icuyarüxo yexguma Chodóma rü Gomóraxü̃ chayarüxoxẽẽxgurüxü̃.
20 Rü cuwa rü bai tá i ñuxgu wena duü̃xü̃gü cugu ãpatagüxü̃ rü tagutáma wena duü̃xü̃gü cuwa nangẽxmagü. Rü woo i ngẽma duü̃xü̃gü i nu ne naxĩmarexü̃ rü tagutáma cuwa nangugü. Rü woo i ngẽma carnérugüarü dauruü̃gü rü taxũtáma cugu norü carnérugüxü̃ narüngüexẽxẽ.
21 Rü ngéma tá namaxẽ i michigü i naixnecücüã̱x rü cüchanagümaxã tá nanapa ya ĩpatagü. Rü ngẽma naeü̃ i abetrúgü rü ngéma tá namaxẽ. Rü ngéma tá naxĩnüca̱xwa̱xegü i ngẽma dauxchitacüã̱x i chíbugü.
22 Rü airugü i dauxchitacüã̱x rü dauxü̃taechicagüwa tá narüdoxe. Rü yima ãẽ̱xgacüpatagüchire̱x rü ngẽma airugü i dauxchitacüã̱x tá nagu narücho. Rü marü ningaica i curü ngunexü̃, Pa Babiróniax, rü tama muxü̃ i ngunexü̃ cuxü̃́ ínayaxü —ñanagürü ya Cori ya Tupana.
