Isaías 14:1-32
14 Rü nüma ya Cori ya Tupana rü tá Acóbutanüxü̃ nüxü̃́ nangechaü̃tümüxü̃ rü wena tá norü duü̃xü̃gü i Iraétanüxü̃xü̃ nade. Rü tá nüxü̃́ nanatauxchaxẽxẽ i Iraétanüxü̃ nax wena norü naaneca̱x nawoeguxü̃. Rü ngẽma duü̃xü̃gü i to i nachixü̃anewa ne ĩxü̃ rü Iraétanüxü̃ca̱x tá naxĩ rü wüxiwa Acóbuarü duü̃xü̃gütanüwa tá namaxẽ.
2 Rü nüma i Iraétanüxü̃ rü tá ínanayauxü̃ ga yema duü̃xü̃gü ga ü̃paacü ínayauxü̃xü̃. Rü muxü̃ma i ngẽma nachixü̃anecüã̱xgü ga noxri Iraétanüxü̃maxã icua̱xgüxü̃ rü tá Iraétanüxü̃xü̃we narüxĩ rü tá nüxü̃ narüngü̃xẽẽgü nax nachixü̃aneca̱x nawoeguxü̃ca̱x i Iraétanüxü̃. Rü nüma i Iraétanüxü̃ rü ngẽxguma marü nachixü̃ane i Cori ya Tupana nüxna ãgüxü̃wa nangugügu rü tá norü mugüruü̃güxü̃ nayaxĩgüxẽxẽ i ngẽma duü̃xü̃gü ga noxri namaxã icua̱xgüxü̃.
Iraétanüxü̃ rü Babiróniaanearü ãẽ̱xgacüxü̃ nacugüe
3 14:3-4 Rü pemax, Pa Duü̃xü̃gü i Iraétanüxü̃x, rü ngẽxguma nüma ya Cori ya Tupana pexü̃ ínguxü̃xẽẽgu naxme̱xwa i ngẽma Babiróniaanearü ãẽ̱xgacü i ngúxü̃ pexü̃ ingegüxẽẽxü̃ rü ngechaü̃ pexna ãxü̃, rü ñaa oremaxã tá nüxü̃ pecugüe rü penaxuchi̱xẽ: —Dücax ¿ta̱xacüwa cungu i cuma nax cuchixecümaxü̃? rü ¿ta̱xacügu nayagu̱x i ngẽma nax cugü quicua̱xüxü̃xü̃?
4 Nüü̃ nadau 14:3
5 14:5-6 Erü nüma ya Cori ya Tupana rü nayanaxoxẽxẽ i norü pora i ngẽma chixecümaxü̃. Rü íxraxü̃gu nanabüü̃gü ya yima naxnegü i ngẽma norü numaxã chixri nachixü̃anegümaxã icuáxü̃ rü taguma íyachaxãchixü̃ nax togü ga nachixü̃aneca̱x íyagoõchixü̃. Rü norü numaxã tá namaxã inacua̱x i nachixü̃anegü, rü tama nüxü̃́ taxãũãchitümüxü̃ãcü duü̃xü̃güwe ningechigü.
6 Nüü̃ nadau 14:5
7 Rü ñu̱xma i guxü̃ma i naane rü taãẽwa nangẽxmagü rü taxuxü̃ma i ta̱xacü nawa nangupetü, rü duü̃xü̃gü rü norü taãẽmaxã tagaãcü Tupanaca̱x nawiyaegü.
8 Pa Babiróniaanearü Ãẽ̱xgacüx, ngẽma naigü i pinugü rü ocayiwagü i Líbanuanewa ngẽxmagüxü̃ rü ta nataãẽgü nax marü cuyuxü̃ rü ñanagürügü: “Yexguma marü cuyu̱xgu rü taxúema marü toxü̃ tatuxgü”, ñanagürügü.
9 Rü ngẽma yuexü̃ i waixü̃mütüü̃wa ngẽxmagüxü̃ rü nanaxĩ̱xãchiãẽgü cuxca̱x nax ngéma cunguchaü̃xü̃. Rü naãẽgü i ngẽma yuexü̃ rü naba̱i̱xãchie. Rü guxü̃ma i ñoma i naanearü ãẽ̱xgacügü i yuexü̃ rü ínachoxü̃ nax cuxü̃ nayauxgüxü̃ca̱x. Rü guxü̃ma i nachixü̃anegüarü ãẽ̱xgacügü i yuexü̃ rü cuxca̱x inachigü i norü tochicaxü̃wa.
10 Rü guxü̃ma i ngẽma yuexü̃ rü nidexachigü rü cuxü̃ ñanagürüchigü: “Cuma rü ta marü cungearü poraxã̱x, Pa Babiróniaanearü Ãẽ̱xgacüx, rü nawa cungu nax marü torüxü̃ quixĩxü̃.
11 Rü ñu̱xma nax cuyuxü̃ rü marü ngẽxma nayacua̱x nax cugü quicua̱xüxü̃xü̃ rü marü narüchiane ya curü paetaruxü̃gü ya árpagü. Rü õxmitanügu cupe rü cuxchapenüxü̃ rü õ̱xmigü nixĩ”, ñanagürüchigü.
12 Cuma rü marü dauxü̃wa icurünguxü̃ Pa Babiróniaanearü Ãẽ̱xgacüx i Ñoma Ngunetüxü̃arü Woramacurirüxü̃ Ibáixchiréxex. Rü ñu̱xma rü curütáe i cumax nax muxü̃ i nachixü̃anegüxü̃ curüporamaexü̃.
13 Rü cumax rü cugüãẽwa nagu curüxĩnü rü ñacurügü: “Choma rü daxũguxü̃ i naanegu i Tupanaarü ẽxtagüétügu tá chaxĩnagü nax ngéma charütoxü̃ca̱x. Rü yima ma̱xpǘne ya nórtewaama üxü̃ne i nawa nangutaque̱xene i ngẽma tupanagü i duü̃xü̃gü namaxã tupanaã́xü̃ rü yimawa tá chanangexmaxẽxẽ i chorü tochicaxü̃.
14 Rü ngẽma caixanexü̃arü yexeragu tá chaxĩnagü rü naxrüxü̃ tátama chixĩ ya yimá Tupana ya Guxãétüwa Ngẽxmacü”, ñacurügü i cugüãẽwa.
15 Natürü tama ngẽma cuma nagu curüxĩnüxü̃ãcü cuxü̃́ ínanguxuchi, erü nagu curütáe i ngẽma ãxmaxü̃ i yuexü̃ nagu ta̱xgüxü̃.
16 14:16-17 Rü ngẽma duü̃xü̃gü i cuxü̃ daugüxü̃ nax ãmaxü̃gu quixücuchixü̃, rü tá ngéma cuxü̃ narüdaunü rü tá nüxna nacua̱xãchie ga yema cuxüxü̃, rü tá ñanagürügü: “¿Ẽ̱xna ñaachire̱x yixĩxü̃ ga yema yatü ga ñoma i naane idu̱xruxanexẽẽxü̃, rü guxü̃ma ga nachixü̃anegüxü̃ rüporamaexü̃, rü ñoma i naane rü nachica i chianexü̃ yanguxuchixẽẽxü̃, rü ĩanegü rüxoxẽẽgüxü̃, rü poxcuexü̃ tama ínguxü̃xẽẽxü̃?” ñanagürügü tá.
17 Nüü̃ nadau 14:16
18 Rü guxü̃ma i ngẽma ñoma i naanecüã̱x i nachixü̃anearü ãẽ̱xgacügü rü ngẽxguma nayuegu rü mexẽchixü̃ i naxmaxü̃gu i woetama naxca̱x ixĩxü̃gu nayanaxücuchigü.
19 Natürü i cuma rü cuxmaxü̃arü yáxü̃wa tá cuxü̃ nayata̱xgümare ñoma wüxi i guxchire iyixanexü̃rüxü̃ rü ñoma wüxi i yuxü̃ i nawa nangagümarexü̃rüxü̃. Rü duü̃xü̃gü i nada̱i̱xü̃ rü ínadaü̃naagüxü̃tanüwa tá cungexma nax wüxigu namaxã ngẽma ãxmaxü̃ i nutamaxã ããcuxü̃gu cuxü̃ yata̱xcuchigüxü̃ca̱x.
20 Rü taxũtáma mea cuxü̃ inata̱xgü ngẽma togü i ãẽ̱xgacügürüxü̃, erü cuma rü chixexü̃wa cunangexmaxẽxẽ i cuchixü̃ane, rü ñu̱xũchi cunadai i curü ĩanecüã̱x i duü̃xü̃gü. Rü taxúema tá nüxna tacua̱xãchi i cutaagü erü cuma rü chixecümaxü̃ quixĩ.
21 ¡Rü pegü ípemexẽxẽgü nax penada̱i̱xü̃ca̱x i ngẽma nanegü nagagu ga yema máeta ga nanatügü ga Babiróniaanearü ãẽ̱xgacügü üxü̃! Rü nümagü tá nixĩ i naxütanügüãxü̃ ga yema nanatügü üxü̃. Rü nümagü rü taxũtáma nüxí ñoma i naanemaxã inacua̱xgü rü guxü̃wama nügüégagu ĩanegü nixügüetanü —ñaperügügü tá.
22 Rü Cori ya Tupana ya Guxãétüwa Ngẽxmacü rü namaxã nanaxuegu rü ñanagürü: —Choma rü tá ichanaxügü nax chanadaixü̃ i ngẽma Babiróniacüã̱x. Rü noxtacüma tá chayanaxoxẽxẽ i naéga i Babirónia wüxigu namaxã i ngéma nawa yaxǘgüxü̃ i duü̃xü̃gü rü ñu̱xũchi nanegü rü nataagü i Babiróniacüã̱x.
23 Rü ngẽma Babiróniaane rü tá ngóxü̃xü̃ chayaxĩxẽxẽ, rü ngẽma naane rü cüchanagürica tá nawa namaxẽ. Rü ñoma ta̱xacü ibixichixü̃rüxü̃ tá chayanaxoxẽxẽ i guxü̃ma i nawa ngẽxmaxü̃ —ñanagürü ya Cori ya Tupana ya Guxãétüwa Ngẽxmacü.
Achíriaane rü tá inayarüxo
24 Cori ya Tupana ya Guxãétüwa Ngẽxmacü rü nanaxuegu rü ñanagürü: —Ngẽma choma chaxüxchaü̃xü̃ rü aixcüma tá chanaxü rü taxũtáma dora nixĩ. Rü ngẽma nagu charüxĩnüxü̃ rü aixcüma tá ningu.
25 Rü tá chanadai i ngẽma Achíriaanecüã̱xgü i chorü naanewa ngẽxmagüxü̃, rü yima chorü ma̱xpǘnegügu tá chayadai. Rü ngẽma nachixü̃aneme̱xẽwa tá tüxü̃ íchanguxü̃xẽxẽ ya chorü duü̃xẽgü ya chixri tümamaxã inacua̱xgüxe. Rü ngẽma guxchaxü̃gü i tüxü̃ yangexẽẽgüxü̃ rü tá inayarüxo.
26 Rü ngẽma nixĩ i chorü ĩnü i guxü̃ma i nachixü̃anegü i ñoma i naanewa ngẽxmagüxü̃maxã tá chaxüxü̃. Rü daa cho̱xme̱x rü nanaxãxũne i guxü̃ma i nachixü̃anegü —ñanagürü ya Cori ya Tupana.
27 Rü nüma ya Cori ya Tupana ya Guxãétüwa Ngẽxmacü rü aixcüma tá nayanguxẽxẽ i ngẽma naxüxchaü̃xü̃. Rü taxúetama texé tá nüxna tachogü nax tama naxüaxü̃ca̱x i ngẽma naxüxchaü̃xü̃.
Ore i Firitéutanüxü̃maxã tá ngupetüxü̃chiga
28 Rü gumá taunecü ga ãẽ̱xgacü ga Acháx nagu yucügu rü Ichaía rü ñaa orexü̃ nixu rü ñanagürü:
29 —Pa Firitéutanüxü̃x, tama name i naxca̱x petaãẽgü i ngẽma nax nayuxü̃ i Achíriaanearü ãẽ̱xgacü ga naxme̱xwa peyexmagüxü̃ ga chixri pemaxã icuáxü̃. Erü ngextá curá ne ũxü̃wa rü wüxi i ãxtape i düraxü̃ tá ínaxũxũ. Rü ngẽma ãxtapewena rü tá ngéma ínaxũxũ i yexera rüdüramaexü̃chixü̃ i dragóü̃ i ãxpe̱xatüxü̃ rü igoexü̃.
30 Rü ngẽma duü̃xü̃gü i ngearü diẽruã̱xgüxü̃ i chorü naanewa ngẽxmagüxü̃ rü tá nüxü̃́ nangẽxma i nabü naxca̱x i naxü̃nagü. Rü ngẽma duü̃xü̃ i ngearü ngẽmaxü̃xã̱xgüxü̃ rü taxúetama nüxü̃ tachixewe i ngẽxguma nangü̃egu. Natürü ngẽma Firitéutanüxü̃ rü choma rü tá taiya naxca̱x íchanguxẽxẽ rü ngẽmamaxã tá nayue. Rü ngẽma noxre i íyaxügüxü̃ rü tá chanadai.
31 ¡Rü pegümaxã pengechaü̃güx, Pa Firitéutanüxü̃arü Ĩanegüx, rü wáita pexüe naxcha̱xwa i ngẽma ngúxü̃ i tá pexca̱x ínguxü̃, rü muü̃maxã pidu̱xrue! Erü nórtewaama ne naxĩ i churaragü i ñoma buanecü i wanagüemaxü̃rüxü̃ ixĩxü̃. Rü ngẽma churaragü i ngéma ne ĩxü̃ rü ínamemaregü nax pexü̃ nada̱i̱xü̃.
32 ¿Rü ta̱xacü rü oremaxã tá penangãxü̃ i ngẽma Firitéugüarü orearü ngeruü̃gü? ¡Rü namaxã nüxü̃ pixu nax Cori ya Tupana yixĩxü̃ i naxüxü̃ ya Chióü̃, rü nagu tá tayarücu̱xgü ya yíxema norü duü̃xẽgü ya ngúxü̃ ingegüxe! —ñanagürü.
