Isaías 15:1-9
15 Cori ya Tupanaarü ore i Moáchiga ixĩxü̃: Wüxitama ga chütaxü̃ nixĩ ga nadaiãcuãxü̃ ga guma Moáanearü ĩane ga Ár. Rü yexgumarüxü̃ ta wüxitama ga chütaxü̃ nixĩ ga nadaiãcuãxü̃ ga guma Moáanearü ĩane ga Quíru.
2 Rü ngẽmaca̱x ngẽma duü̃xü̃gü ya ĩane ya Dibóü̃cüã̱xgü rü norü ngutaque̱xepataxü̃ ya ma̱xpǘnegu ünagünewa naxĩ rü ngéma nayaxauxe. Rü Moátanüxü̃ rü nügümaxã nixauxãchie naxca̱x ya norü ĩanegü ya Nébu rü Medebá nax nanguxuchigüxü̃. Rü guxü̃ma i Moátanüxü̃ rü norü ngechaü̃maxã nügü nidüpü̱xüerugü rü nügü nidüxchinagugü.
3 Rü duü̃xü̃gü rü naxchiru i técharaxü̃maxã ĩanearü namagu naxĩ. Rü ĩpatagüétüwa rü duü̃xü̃gü rü taxü̃ i norü ngechaü̃maxã aixta naxüe. Rü ĩanearü plazagüwa rü guxü̃ma i duü̃xü̃gü rü norü ngechaü̃maxã poraãcü naxauxe.
4 Rü duü̃xü̃gü i Ebóü̃cüã̱xgü rü Erarécüã̱xgü rü tagaãcü ngü̃xẽẽca̱x ínacagü, rü ĩane ya Yaáchagu nüxü̃ naxĩnügagü. Rü ngẽmaca̱x i Moátanüxü̃arü churaragü rü poraãcü ínayamuü̃ãchitanü.
5 Rü chorü maxü̃newa rü poraãcü changechaü̃ naxca̱x i Moátanüxü̃. Rü ĩane ya Chóawa rü ĩane ya Égrax-cherichíyawa nabuxmü. Rü duü̃xü̃gü rü auxeãcüma nawa ínayachoõchi i ngẽma Luíxarü tuãchixü̃. Rü ngẽma nama ya ĩane ya Oronaíü̃wa daxü̃gu naxĩxgu rü aita naxüe na̱xcha̱xwa i ngẽma ãũcümaxü̃.
6 Rü yimá puchugü ya Nimríü̃wa ngẽxmagücü rü nichegü, rü maxẽgü rü narüñẽ̱ẽ̱xgü, rü naigü rü nayue rü taxuxü̃ma i nai i ya̱u̱xátüxü̃xü̃ tadau.
7 Rü ngẽmaca̱x i duü̃xü̃gü rü nanade i norü ngẽmaxü̃gü rü natüxacü i Áramuarü tocutüwa naxĩ.
8 Rü guxü̃ma i Moátanüxü̃arü naanewa rü nüxü̃ taxĩnü nax duü̃xü̃gü ngü̃xẽẽca̱x ínacagüxü̃. Rü ngẽma naga nax naxauxexü̃ i ngẽma duü̃xü̃gü rü ñu̱xmata ĩane ya Egraíü̃gu rü ĩane ya Beéx-eríü̃gu nüxü̃ taxĩnü.
9 Rü yimá puchugü ya Dimóü̃wa ngẽxmagücü rü nagümaxã nixããcu, natürü choma rü tá yexeraãcü chanapoxcue. Rü tá chanamu i wüxi i leóü̃ nax ngẽxma nangõ̱xcuãxü̃ca̱x i ngẽma duü̃xü̃gü i Moáwa ibuxmüxü̃ rü ñu̱xũchi ngẽma duü̃xü̃gü i Moáwa yaxǘgüxü̃.
