Isaías 16:1-14
16 Rü Moáanearü ãẽ̱xgacü rü ĩane ya Cheráwa inanamuãchitanü i carnérugü. Rü ínachianexü̃guama namaxã naxĩ ñu̱xmata Chióü̃arü ma̱xpǘnewa nanagagü nax Yudáanearü ãẽ̱xgacüna yamugüãxü̃ca̱x.
2 Rü ngẽma Moátanüxü̃arü ngexü̃gü rü natü i Arnóü̃wa nichoü̃ nax yabuxmüxü̃ca̱x ñoma werigü i baixãchiexü̃ rü naxchiãü̃güna ibuxmüxü̃rüxü̃.
3 Rü ñaa oremaxã Yudáanearü ãẽ̱xgacüca̱x ínayachoõchi rü ñanagürügü: —Tanaxwa̱xe nax toxna cudauxü̃ rü toxü̃ ícupoxü̃xü̃. Rü tanaxwa̱xe i cuchipetamaxã toxü̃ quidüxü ñoma waanexü̃ tocuchigu üa̱xcü idüxüxü̃rüxü̃. ¡Rü wüxi i nachica i nagu ticu̱xgüxü̃ toxna naxã, rü taxṹ i naxme̱xgu toxü̃ cuyixẽẽxü̃ i torü uanügü!
4 ¡Rü tauxcha nüxna naxã, Pa Ãẽ̱xgacüx, nax cuxü̃tagu yanacu̱xgüxü̃ca̱x i ngẽma Moátanüxü̃ i torü uanücha̱xwa ibuxmüxü̃! Rü ngẽxguma yacua̱xgu i ngẽma guxchaxü̃gü rü ngẽma uanü marü yaxũgachigu, rü nüma rü tá ñoma i naanewa inarütaxu —ñanagürügü.
5 Rü wüxi i Dabí nataxa rü tá ãẽ̱xgacü nixĩ i Iraéanewa. Rü nüma ya yimá ãẽ̱xgacü rü tá mea norü duü̃xü̃gümaxã inacua̱x rü taxũtáma nanawomüxẽxẽ. Rü ãẽ̱xgacü i ixaixcümacü tá nixĩ rü guxãmaxã tá namecüma. Rü paxa tá nanamexẽxẽ i duü̃xü̃güarü guxchaxü̃gü.
6 Nüxü̃ tacua̱x rü ngẽma Moátanüxü̃ rü natachiga naxca̱x nax nügü yacua̱xüü̃güxü̃ rü nügü ínatagüxü̃. Rü nüma rü nügü guxãxü̃ma narüyexeragü, natürü naechitamare nidexagü.
7 Rü ngẽmagagu i guxü̃ma i Moácüã̱xgü rü tá norü naaneca̱x naxauxe rü poraãcü tá nanaxĩ̱xãchitanüãxẽ. Rü tá nüxü̃́ nangu̱x i ngẽxguma nüxna nacua̱xãchiegu ga yema paũ ga úbamaxã ãéü̃xü̃ ga Quix-arechéxwa nüxü̃́ yexmagüxü̃.
8 Rü ngẽma úbanecü ya Ebóü̃wa rü Chibáwa ngẽxmagüxü̃ rü narüñẽẽxgü yerü Achíriaanecüã̱xgü nayachexe. Rü yema úbanecügu rü nitachitaxü̃xüchichire̱x, rü nanecüanewa rü ĩane ya Yachéxwa inaxügü rü chianexü̃wa nada rü ñu̱xmata Már i Ngearü Maxü̃ã́xü̃gu nayacua̱x ga nanecü.
9 Rü ngẽmaca̱x nixĩ i ñu̱xma i naxca̱x chaxaxuxü̃ ga yema úbanecügu ga Chibáwa rü Yachéxwa yexmagüxü̃. Rü naxca̱x ichabagüxü̃xetü ga yema úbanecügu ga Ebóü̃wa rü Eraréwa yexmagüxü̃. Erü marü nataxuma i taãxẽ naxca̱x i norü o i buxuxü̃ rü ngẽma úbanecüwa nüxü̃ ĩnüxü̃xicatama nixĩ nax aixta naxüexü̃ i ngẽma nügü daixü̃.
10 Rü marü tama nüxü̃ taxĩnüe i duü̃xü̃gü i naanewa tagatanüxü̃ norü taãẽmaxã. Rü yema úbanecügüwa rü marü tama nüxü̃ taxĩnüe i duü̃xü̃gü i norü taãẽmaxã wiyaegüxü̃, rü taxuxü̃ma tadau i duü̃xü̃gü i úba i ñúxcharaxü̃ rü ínayo̱xpetüxü̃ nax bínu ínaxüãxü̃. Rü guxü̃ma i ngẽma duü̃xü̃güarü taãxẽ rü marü inayacua̱x.
11 Rü ngẽmaca̱x Moátanüxü̃ca̱x rü ñu̱xũchi ĩane ya Quíru-erécheca̱x chidu̱xruxarü maxü̃neã̱x, ñoma wüxi i árpacunü idu̱xruxü̃rüxü̃.
12 Rü woo chi ngẽma Moátanüxü̃ rü ma̱xpǘnegüwa naxĩxgu nax ngéma norü tupananetagüna ngü̃xẽẽca̱x yacagüxü̃ca̱x rüe̱xna woo chi norü ngutaque̱xepataü̃wa naxĩxgu rü ngéma yayumüxẽgügu rü taxuwatáma naxca̱x ne naxũ i norü ngü̃xẽxẽ.
13 Rü yema nixĩ ga ore ga nũxcüma Cori ya Tupana Moátanüxü̃maxã ueguxü̃.
14 Rü ñu̱xma ya Cori ya Tupana rü ñanagürü: —Wüxi i puracütanüxü̃ rü tomaepü̱x ya taunecü inaxuneta nax napuracüxü̃. Rü ngẽxgumarüxü̃ tá ta tomaepü̱x ya taunecü rü Moáanearü pora rü tá inayacua̱x, rü ngẽma muxü̃ i norü duü̃xü̃gü rü tá nayue. Rü noxre tátama i duü̃xü̃gü ínayaxügü natürü tá nangearü poraã̱x —ñanagürü ya Cori ya Tupana.
