Isaías 18:1-7
18 ¡Nügümaxã nangechaü̃ i ngẽma nachixü̃ane i munü nawa muxũchixü̃ i Etiopíaanearü natügüarü yexerawa ngẽxmaxü̃!
2 Etiopíaane rü taxtü i Nírugu dexnemena̱xãnaxca̱x i naweü̃gu nanamuãchitanü i norü orearü ngeruü̃gü nax guxü̃wama ngü̃xẽẽca̱x íyaca̱xaxü̃ca̱x. Rü pemax, Pa Orearü Ngeruxü̃güx ya Paxa Ixĩxex, rü name nixĩ nax paxa naxü̃tawa pexĩxü̃ i ngẽma duü̃xü̃gü i máchanexü̃ rü ngoracha̱xmügüxü̃ rü iporaxüchixü̃ i guxãma ya to i nachixü̃anecüã̱xgü ya duü̃xẽgü nüxü̃ muü̃exü̃ rü naane i muarü natüã́xü̃gu ãpatagüxü̃.
3 Rü guxãma i pemax, Pa Ñoma i Naanecüã̱xgü Ixĩgüxe, rü ma̱xpǘnechitaeruwa tá nüxü̃ pedau ya yima wonera ya ngéma wã̱ĩ̱xnagücü, rü tá nüxü̃ pexĩnüe i ngẽxguma naxãgagu ya yima cornéta.
4 Rü Cori ya Tupana rü ñanagürü choxü̃: —Choma i dauxü̃wa íchangexmaxü̃wa meama ichadawenü. Rü choma íchangexmaxü̃wa rü ñoma üa̱xcü ya taunecügu poraãcü ibáxichigurüxü̃ chixĩ, rü ñoma cherena i buxetagüyane nanetüétügu nguxü̃rüxü̃ chixĩ.
5 Rü ngẽxguma marü nangupetügu nax yaxãchacuxü̃ i úbagü i nanecüwa, rü ngẽma nachacu rü norü oxü̃ nanguxü̃ rü ñu̱xũchi norü dauwa nangu. Natürü naxü̃pa nax nabuxuxü̃ i ngẽma norü o, rü cüxchimaxã nanawiü̃tanügü rü ñu̱xũchi ínayawogü i ngẽma natanügü.
6 Rü ngẽxgumarüxü̃ tá ta nixĩ i ngẽma duü̃xü̃gü nax máxpü̱xanexü̃wa nawogümarexü̃ nax ngurucugü rü dauxchitacüã̱x i naeü̃gü namaxã ãwemügüxü̃ca̱x. Rü ngẽxguma taunecügu rü ngurucugü rü ngéma tá nangẽxmagü. Rü yimá tauemacügü i nagu nagáuanecügu rü guxü̃ma i ngẽma naeü̃gü i dauxchitacüã̱x rü ngéma tá namaxã naxãwemügü —ñanagürü ya Tupana.
7 Rü ngẽma ngunexü̃gügu rü Cori ya Tupana ya Guxãétüwa ngẽxmacüxü̃tawa tá nanana i norü ãmaregü i ngẽma duü̃xü̃gü i máxchanexü̃ rü ingoracha̱xmüxü̃güxü̃ rü iporaxüchixü̃ rü nügü írütagüxü̃ rü guxãma ya to i nachixü̃anecüã̱xgü nüxü̃ muü̃xexü̃ i naane i natügü nawa muxũchixü̃gu ãpatagüxü̃. Rü ngẽma duü̃xü̃gü rü yima ma̱xpǘne ya Chióü̃ i Cori ya Guxãétüwa Ngẽxmacüxü̃ iyacua̱xüü̃guxü̃wa tá nanana i norü ãmaregü.
