Isaías 19:1-25
19 Dücax, Cori ya Tupana rü wüxi i caixanexü̃étügu Equítuanewa naxũ. Rü ngẽma Equítuanecüã̱xgüarü tupananetachicüna̱xãgü rü Cori ya Tupanaarü poracha̱xwa nidu̱xrue. Rü duü̃xü̃gü i Equítuanecüã̱xgü rü tá poraãcü inayayiãxẽ.
2 Rü nüma ya Cori ya Tupana rü ñanagürü: —Choma rü tá chayatoye i Equítuanecüã̱xgü, rü norü duü̃xü̃gü rü tá nügü chanadaixẽxẽ. Rü nügümücü ixĩgüxü̃ i duü̃xü̃gü rü tá nügü chanadaixẽxẽ. Rü wüxi ya ĩanecüã̱xgü i duü̃xü̃gü rü nai ya ĩanecüã̱xgü i duü̃xü̃gümaxã tá nügü chanadaixẽxẽ, rü Equítuanecüã̱xgü rü tá to i nachixü̃anecüã̱xgümaxã nügü nadai.
3 Rü tá íchananu̱xãẽxẽẽgü nax tama naãẽxü̃ yacuáxü̃ca̱x. Rü ngẽma nagu naxĩnüexü̃ rü tá nüxü̃́ nagu chanachixexẽxẽ. Rü ngẽmaca̱x i nümagü rü tá norü tupananetachicüna̱xãgüna rü yuüxü̃güna nacagü. Rü tá yuetaãẽca̱x nangemagü nax nüxna nacagüxü̃ca̱x. Rü ñu̱xũchi duü̃xü̃gü i ẽxü̃guxü̃arü uruü̃güna tá nacagü.
4 Natürü i choma rü wüxi i ãẽ̱xgacü i chixecümaxü̃ i tama norü duü̃xẽgüxü̃ ngechaü̃xü̃me̱xẽgu tá chananguxẽxẽ i Equítuane —ñanagürü ya Tupana ya Guxãétüwa Ngẽxmacü.
5 Rü ngẽma taxtü i Níru rü tá niiche, rü guxü̃watáma nipatama.
6 Rü ngẽma cateanegü i dexá nagu iya̱xgüxü̃ rü tá nipagü rü nayixane. Rü ngẽma Equítuanewa ne yáxü̃ i dexá rü tá nichechigü ñu̱xmata yapachitamamare. Rü ngẽma dexnenecügü rü maxẽ i dexáwa rüxügüxü̃ rü tá narüñexgü.
7 Rü ngẽma maxẽnecügü i taxtü i Níruxanacüwa rüxügüxü̃, rü guxü̃ma i nanetügü i Nírupechinüwa ngẽxmagüxü̃ rü tá narüñexgü rü nayue.
8 Rü guxü̃ma i ngẽma choxnietanüxü̃ i taxtü i Níruwa choxniegüxü̃ rü tá nangechaü̃gü rü naxauxe. Rü ngẽma duü̃xü̃gü i taxtü i Níruwa norü püchamaxã püchaegüxü̃ rü tá nangechaü̃gü.
9 Rü ngẽma duü̃xü̃gü i línuchiwa puracuexü̃ rü tá nangechaxü̃gü. Rü ngẽma línuchiarü ixüchapa̱xaruü̃gü rü ngẽma línuchiarü muwa puracüexü̃ rü tá nangechaxü̃gü erü tá nangearü puracüã̱xgü erü tá nüxü̃́ nataxu i línu.
10 Rü ngẽma duü̃xü̃gü i naxchirucharaarü muwa puracüexü̃ rü tá narümaxachigü. Rü guxü̃ma i ngẽma duü̃xü̃gü i ta̱xacüarü üxü̃ icuáxü̃ rü tá poraãcü naxoegaãẽgü erü nangearü puracüã̱xgü.
11 Pa Ĩane ya Choáü̃arü Ãẽ̱xgacügüx, pema nixĩ i Equítuanearü ãẽ̱xgacüarü ucu̱xẽruü̃gü i yexera cua̱x pexü̃́ ngẽxmagüxü̃, natürü tama aixcüma cua̱x pexü̃́ nangẽxma. ¿Rü tü̱xcüruxü̃ Faraóü̃maxã nüxü̃ pixu i ore i ñaxü̃?: —Tomagü rü nataagü tixĩgü i nũxcümaü̃güxü̃ ga ãẽ̱xgacügü ga cua̱x nüxü̃́ yexmaxü̃ —ñaxü̃.
12 ¿Pa Faraóü̃, ngexü̃gü nixĩ i ngẽma curü ucu̱xẽruü̃gü nax cuxü̃ nangu̱xẽẽgüxü̃ca̱x rü cumaxã nüxü̃ yaxugüxü̃ca̱x i ngẽma Cori ya Tupana ya Guxãétüwa Ngẽxmacüarü ĩnü i Equítuanemaxã naxüxchaü̃xü̃?
13 Rü ngẽma Choáü̃arü ãẽ̱xgacügü i tama naãẽxü̃ icuáxü̃ rü nanawomüxẽẽgü i ngẽma Ménfiarü ãẽ̱xgacügü. Rü ngẽma Equítuanearü ĩanegüarü ãẽ̱xgacügü rü guxchaü̃wa nanagagü i norü duü̃xü̃gü.
14 Cori ya Tupana rü Equítuanearü ãẽ̱xgacügüna nanamu i wüxi i naãxẽ i ínatüexẽẽxü̃. Rü nümagü nixĩ i guxü̃wama guxchaxü̃wa nagagüãxü̃ i Equítuane. Rü ñoma wüxi i duü̃xü̃ i ngãxü̃xü̃ i nügü oxgüxü̃ rü ichü̱xacüüxü̃rüxü̃ nixĩ.
15 Rü taxúetama ta̱xacü Equítuaneca̱x taxü nax ítanapoxü̃xü̃, rü woo norü ãẽ̱xgacü rüe̱xna norü duü̃xü̃gü i Equítuanecüã̱x. Rü woo norü ãẽ̱xgacü i ñoma temarüxü̃ naporagu rüe̱xna ngẽma duü̃xü̃gümare i ñoma dexnerüxü̃ tama naporagu rü taxucürüwa ta̱xacü naxügü nax Equítuanexü̃ ínapoxü̃güxü̃.
16 Rü ngẽma ngunexü̃gu i Equítuanecüã̱xgü rü ñoma ngexü̃gürüxü̃ tá poraãcü namuü̃e. Rü tá naba̱i̱xãchie i ngẽxguma nüxü̃ nadaugügu i ngẽma Cori ya Tupana ya Guxãétüwa ngẽxmacüarü pora i namaxã napoxcueãxü̃.
17 Rü ngẽma Equítuanecüã̱xgü i duü̃xü̃gü rü Yudáanecüã̱xgüxü̃ tá namuü̃e. Rü ngẽxguma ngẽma Yudáanecüã̱xgüna nacua̱xãchiemaregu rü tá naba̱i̱xãchie, erü tá nüxna nacua̱xãchie i ngẽma ãũcümaxü̃ i poxcu i Cori ya Tupana ya Guxãétüwa Ngẽxmacü namaxã ueguxü̃ i Equítuane.
18 Rü ngẽma ngunexü̃gu rü Equítuanewa tá nangẽxma ya wüxime̱e̱xpü̱x ya ĩanegü ya Ebréugawa duü̃xü̃gü nawa idexagüne rü nügü ixugüne nax Cori ya Tupana ya Guxãétüwa Ngẽxmacüga naxĩnüexü̃. Rü wüxi ya yima ĩane rü naéga nixĩ i Üa̱xcüarü Ĩane.
19 Rü ngẽma ngunexü̃gu i Equítuanewa rü tá nangẽxma i wüxi i ãmarearü guruxü̃ i Cori ya Tupanaca̱x ixĩxü̃. Rü Equítuanearü üyeanearü ngaixcamagu rü Cori ya Tupanaégagu tá nanaxügü i wüxi i cua̱xruxü̃ i nutanaxca̱x.
20 Rü ngẽma rü wüxi i cua̱xruxü̃ tá nixĩ nax ngẽmawa duü̃xü̃gü nüxü̃ nacua̱xgüxü̃ca̱x nax Equítuanewa Cori ya Tupanaxü̃ yacua̱xüü̃güxü̃. Rü ngẽxguma ngẽma Equítuanecüã̱xgü rü Cori ya Tupanana nacagügu nax ngẽma duü̃xü̃gü i chixri namaxã chopetüxü̃me̱xẽwa ínanguxü̃xẽẽãxü̃ca̱x, rü nüma ya Cori ya Tupana rü tá natanüwa nanamu i wüxi i norü ngü̃xẽẽruxü̃ nax ínapoxü̃ãxü̃ca̱x rü ínanguxü̃xẽẽãxü̃ca̱x naxme̱xwa i norü uanügü.
21 Rü nüma ya Cori ya Tupana rü tá Equítuanecüã̱xgüxü̃ nügü nacua̱xẽxẽ, rü nümagü rü tá nüxü̃́ nayaxõgü. Rü tá naga naxĩnüe rü tá naxca̱x nangutaque̱xegü nax nüxü̃ yacua̱xüü̃güxü̃ca̱x. Rü tá naxü̃nagü naxca̱x nadai nax ngẽmaãcü ãmare nüxna naxãgüxü̃. Rü Cori ya Tupanamaxã tá inaxunetagü rü ñu̱xũchi aixcüma tá nayanguxẽẽgü i ngẽma uneta i Cori ya Tupanamaxã nüxü̃ yaxugüxü̃.
22 Rü Cori ya Tupana rü tá Equítuanearü duü̃xü̃güca̱x ngúxü̃ ínanguxẽxẽ. Natürü yixcama rü tá nanaxoxẽxẽ i ngẽma ngúxü̃ i yangegüxü̃. Rü nüma i Equítuanecüã̱xgü rü tá Cori ya Tupanaca̱x nawoegu, rü nüma rü tá nüxü̃́ nangechaü̃tümüü̃gü rü tá nayanaxoxẽxẽ i ngẽma ngúxü̃ i yangegüxü̃.
23 Rü ngẽma ngunexü̃gu rü tá nangẽxma i wüxi i nama i mexü̃ i Equítuanewa ixügüxü̃ rü Achíriaanewa daxü̃. Rü ngẽxguma i Achíriaanecüã̱xgü rü tá tauxchaãcü Equítuanewa naxĩ, rü ngẽxgumarüxü̃ tá ta i nüma i Equítuanecüã̱xgü rü tauxchaãcü Achíriaanewa naxĩ. Rü wüxigu nügümaxã tá Tupanaxü̃ nicua̱xüü̃gü.
24 Rü ngẽma ngunexü̃gu rü Iraéane rü Equítuanemaxã rü Achíriaanemaxã tá taãẽwa nangẽxmagü. Rü ngẽxguma i Iraéane rü tá wüxi i ngü̃xẽxẽ nixĩ naxca̱x i guxü̃ma i nachixü̃anegü i ñoma i naanewa ngẽxmagüxü̃.
25 Rü Cori ya Tupana ya Guxãétüwa Ngẽxmacü rü norü ngü̃xẽxẽ naxuegu rü ñanagürü: —Choma rü tá nüxü̃ charüngü̃xẽẽxü̃ i Equítuanecüã̱x i chorü duü̃xü̃gü ixĩgüxü̃. Rü ngẽxgumarüxü̃ tá ta nüxü̃ charüngü̃xẽẽxü̃ i Achíriaanecüã̱x i cho̱xme̱xmaxã chaxüxü̃, rü tá nüxü̃ charüngü̃xẽẽxü̃ i Iraéanecüã̱x i woetama chorü duü̃xü̃gü ixĩxü̃ —ñanagürü ga Tupana.
