Isaías 20:1-6
20 Rü wüxi ga ngunexü̃gu rü nüma ga Chargóü̃ ga Achíriaanearü ãẽ̱xgacü rü inanamuãchi ga wüxi ga norü churaragüeru i poraxü̃ nax ĩane ga Adúxwa naxũxü̃ca̱x. Rü nüma ga yema churaragüeru rü naxca̱x ínayagoõchi rü nayapu ga guma ĩane.
2 Rü yexgumaü̃cüü ga Cori ya Tupana rü orearü uruxü̃ ga Ichaía ga Amú nanemaxã nidexa rü ñanagürü: —¡Ínacuxuchi i ngẽma cuxchiru i témüxü̃ i nagu quicúxü̃ rü ñu̱xũchi ngẽma curü chapatu i nagu quicuaxixü̃! —ñanagürü. Rü nüma ga Ichaía rü nayanguxẽxẽ ga yema Tupana namaxã nüxü̃ ixuxü̃ rü wixgutaa̱x nangexchiru rü nangearü chapatuã̱x rü yemaacü nixũ.
3 Rü yexguma ga Cori ya Tupana rü ñanagürü: —Chorü duü̃ ya Ichaía rü tomaepü̱x ya taunecü taguma chapatugu nicuaxi rü taguma naxchirugu nicu̱x. Rü ngẽma rü wüxi i cua̱xruxü̃ nixĩ naxca̱x i ngẽma Equítuanecüã̱xgü rü Etiopíaanecüã̱xgü nax ngẽmawa nüxü̃ nacuáxü̃ca̱x i ta̱xacü tá namaxã ngupetüxü̃.
4 Rü ngẽxgumarüxü̃ tá nixĩ i Achíriaanearü ãẽ̱xgacü nax Equítuanecüã̱xgüxü̃ rü Etiopíaanecüã̱xgüxü̃ nachixü̃anewa tüxü̃ nagagüxü̃ ya yaxguã̱xgüxe rü ngextü̱xügüxe. Rü ngearü chapatuã́xẽ rü ngexchiruxe rü ibáitaraxe tá tüxü̃ nigagü nax ngẽmaãcü tüxü̃ naxãneexẽẽxü̃ca̱x.
5 Rü ngẽma togü i nachixü̃anegü i Etiopíaaneaxü̃́ yaxõgüxü̃ nax ínapoxü̃ãxü̃ca̱x rü ngẽma Equítuanecüã̱xmaxã nügü icua̱xüü̃güxü̃ rü tá poraãcü namuü̃e rü naxãnee.
6 Rü ngẽma ngunexü̃gu rü guxü̃ma i duü̃xü̃gü i márpechinücüã̱xgü rü tá ñanagürügü: “¡Dücax, nüxü̃ pedau nax ta̱xacü namaxã nangupetüxü̃ i ngẽma nachixü̃anegü i nüxü̃́ yaxõgüxü̃, rü ngü̃xẽẽca̱x nüxna icagüxü̃ nax Achíriaanearü ãẽ̱xgacüme̱xẽwa tüxü̃ ínanguxü̃xẽẽxü̃ca̱x! ¿Rü ñu̱xma rü texé tá tixĩxü̃ ya tüxü̃ ípoxü̃xẽ?” —ñanagürügü.
