Isaías 21:1-17
21 Ñaa nixĩ i Tupanaarü ore i chianexü̃ i márpechinüwa ngẽxmaxü̃chiga ixĩxü̃. Ñoma buanecü ya tacü ya íxã̱ũ̱xẽmacü ya súrwaama ne ũemacü rü chianexü̃waama ne ũcürüxü̃ tá ngẽma chianexü̃ i ãũcümaxü̃wa ne naxĩ i ngẽma churaragü.
2 Rü naxãũcümaxü̃chi nixĩ i ngẽma Cori ya Tupana choxü̃ wéxü̃. Rü ngẽma taechitawa̱xexü̃ rü nanaxü i ngẽma nagu naxĩnüxü̃. Rü ngẽma máxwa̱xexü̃ rü nayama̱x. ¡Pa Eráü̃cüã̱x, rü Pa Médiacüã̱x, paxa ipexĩãchi nax Babiróniaanearü ĩaneca̱x ípeyaxüãchixü̃! Rü choma rü tá chayacua̱xẽxẽ nax Babirónia ngúxü̃ nüxü̃ ingexẽẽgüxü̃ ya naigü ya ĩanegü.
3 Rü ngẽxguma nüxü̃ chada̱u̱xgu i ngẽma Cori ya Tupana Babiróniacüã̱xmaxã üxü̃ rü chauxune narüwẽ rü choxü̃́ nangu̱x rü chaugü charüxã̱ũ̱xü̃ ñoma wüxi i ngexü̃ i íxraxacüchaü̃xü̃rüxü̃. Rü yíxema duü̃xẽgü ya ngúxü̃ ingegüxe nax aita taxügüxü̃, rü tümaga rü taxuxü̃ma choxü̃ naxĩnüxẽxẽ. Rü ngẽxguma nüxü̃ chada̱u̱xgu rü chorü muü̃maxã chabaixãchi.
4 Rü choma rü tama nüxü̃ chacua̱xéga nax ta̱xacü tá chaxüxü̃. Rü chauxune rü muü̃maxã nidu̱xru. Rü ngẽma yáuanecüarü gáuanexü̃ rü noxri chorü me nixĩ, natürü i ñu̱xma nax naxẽanexü̃ rü taxü̃ i muü̃ choxna naxã.
5 Rü nüxü̃ chadau nax Babiróniawa napetaexü̃ rü taxü̃ i õna namexẽẽxü̃. ¡Pa Churaragüerugüx, paxa pegü pemexẽxẽ rü penade i perü poxü̃ruü̃gü nax perü uanümaxã pegü pedaixü̃ca̱x!
6 Rü Cori ya Tupana rü ñanagürü choxü̃: —¡Ngéma naxũ rü ĩanearü poxegü̃étügu namu i wüxi i churara i daxũtaeruxü̃ nax cumaxã nüxü̃ yaxuxü̃ca̱x i guxü̃ma i ta̱xacü i nüxü̃ nadauxü̃!
7 Rü ngẽxguma nüxü̃ nada̱u̱xgu i carugü ya taxre i cowarugü itúchigüne rüe̱xna duü̃xü̃gü i búruétügu aunagüxü̃ rüe̱xna caméyuétügu aunagüxü̃ rü meama nüxü̃ nadawenü —ñanagürü ga Tupana.
8 Rü ngẽma duü̃xü̃ i ngéma dauxü̃taexü̃ rü nica tagaãcü rü ñanagürü: —Pa Corix, guxü̃ma i ngunecü rü chütacü rü nua chauchicawa changexmaecha. Rü taguma chape rü ichadawenüẽcha.
9 Rü nüxü̃ chadau i wüxi ya caru ya taxre i cowarugü itúchigüne —ñanagürü. Rü nüma i ngẽma carugu aunagüxü̃ rü tagaãcü nica rü ñanagürü: —Ĩane ya Babirónia rü marü nanguxuchi. Rü guxü̃ma i norü tupanachicüna̱xãgü rü niwa̱xgü rü íxraxü̃gu napoü̃gü —ñanagürü.
10 Pa Chorü Duü̃xü̃güx, pema rü ngúxü̃ pingegü ñoma tríguarü o i nagu napugüenerüxü̃. Rü choma rü marü pemaxã nüxü̃ chixu ga yema Iraéarü Cori ya Tupana ya Guxãétüwa Ngẽxmacü chomaxã nüxü̃ ixuxü̃.
Ore i Edóü̃maxã tá ngupetüxü̃chiga
11 Wüxi i duü̃xü̃ rü Edóü̃anewa* tagaãcü choxna naca rü ñanagürü: —¿Pa Dauxü̃taeruxü̃x, ñuxgu tá ningune i ñaa chütaxü̃? ¿Pa Dauxü̃taeruxü̃x, ñuxre nataxu nax yangóonexü̃? —ñanagürü.
12 Rü nüma i dauxü̃taeruxü̃ rü nanangãxü̃ rü ñanagürü: —Marü yea ne naxũ i ngóonexü̃, natürü ngẽma chütaxü̃ rü wena tá ínangu. Rü ngẽxguma wena choxna pecachaü̃gu, rü marü name i wena chauxü̃tawa pexĩ —ñanagürü.
Ore i Arábiaanemaxã tá ngupetüxü̃chiga
13 21:13-14 Pema i Arábiaanecüã̱x i taxetanüxü̃ i Dedáü̃wa ne ĩxẽ rü chianexü̃arü chuxchuxü̃necügu pegüxe ¡rü namawa tüxü̃ peyangu̱xẽxẽ ya yíxema duü̃xẽgü ya uanücha̱xwa ibuxmüxẽ, rü dexá tüxna pexã erü tita̱xawae! ¡Rü pemax, Pa Temácüã̱x, rü namawa tüxü̃ peyangu̱xẽxẽ ya yíxema duü̃xẽgü ya uanücha̱xwa ibuxmüxẽ rü õna tüxna pexã!
14 Nüü̃ nadau 21:13
15 Erü yíxema rü taracha̱xwa rü würa ya ímemarenecha̱xwa tibuxmü nax tama daigu tayuexü̃ca̱x.
16 Rü Cori ya Tupana rü chomaxã nidexa rü ñanagürü: —Ñoma wüxi i puracütanüxü̃ i wüxi ya taunecüca̱x nüxü̃ ixunetaxü̃rüxü̃ tá nixĩ nax wüxi ya taunecü inguxgu rü tá nagúxü̃ i norü pora ya yima ĩane ya mexẽchine ya Quedáx.
17 Rü ngẽma norü churaragü i tama muü̃wa̱xegüxü̃ i würamaxã daixü̃ cuáxü̃ rü noxre tátama ínayaxü —ñanagürü. Rü Cori ya Iraétanüxü̃arü Tupana nixĩ ya ngẽma ñacü.
Notas
^ 21:11 To i Edóü̃éga rü Cheí nixĩ.
