Isaías 22:1-25
22 Ñaa nixĩ i ore nachiga i Yerucharéü̃arü doxonexü̃ ya Tupana naxca̱x choxü̃ ngo̱xetüxẽẽxü̃ rü choxü̃ nanawe̱x i ngẽma tá ngéma ngupetüxü̃. ¿Ta̱xacüca̱x nixĩ i guxü̃ma i duü̃xü̃gü rü napataétügu naxĩgüxü̃?
2 Daa ĩane ga noxri ocaü̃maxã yapaxü̃ne rü ñu̱xma duü̃xü̃gü i yuexü̃maxã nanapa. Natürü tama taramaxã nanadai rü tama daigu nayue.
3 Rü guxü̃ma i daa ĩanearü ãẽ̱xgacügü rü churaragü rü wüxigu nibuxmü. Natürü woo würacha̱xwa nax yabuxmüxü̃ rü guxü̃ma rü ínayauxü̃ama.
4 Rü ngẽmaca̱x i choma rü pemaxã nüxü̃ chixu rü ñachagürü: “¡Choxna pixĩgachitanü, erü chorü ngechaü̃maxã tá chaxaxu nagagu i ngẽma taxü̃ i guxchaxü̃ i chorü ĩanemaxã ngupetüxü̃! Rü tama chanaxwa̱xe nax texé choxü̃ taãẽxẽẽxü̃”, ñachagürü.
5 Erü nüma ya Cori ya Tupana ya Guxãétüwa Ngẽxmacü rü marü nanaxuegu nax wüxi i ngunexü̃gu rü ngẽma Yerucharéü̃arü doxonexü̃ ya Tupana naxca̱x choxü̃ ngo̱xetüxẽẽxü̃wa tá ínanguxü̃ i taxü̃ i muü̃ rü taxü̃ i dai rü ĩ̱xãchiãxẽ. Rü yima ĩanearü poxeguxü̃tápü̱x rü nagu ínapogüe. Rü ngẽma nax yaxaixchaxü̃ i duü̃xü̃gü rü máxpü̱xanexü̃wa nangu i naga.
6 Rü ngẽma Eráü̃cüã̱xgü rü marü ínanamexẽẽgü ya naxnegü, rü ñu̱xũchi marü norü carugu nichoü̃ rü norü cowarugügu nitoü̃. Rü ngẽma Quírucüã̱xgü rü nanade i norü poxü̃ruü̃gü nax daiwa naxĩxü̃ca̱x.
7 Rü Yerucharéü̃arü doxonegü i mexẽchixü̃ rü nanapagü namaxã i norü uanüarü carugü i daiweü̃gü. Rü ngẽma churaragü i cowaruétügu ĩxü̃ rü ĩanearü poxeguxü̃arü ĩã̱xwa nichocuchaü̃.
8 Rü Yudáanecüã̱xgü rü taxuxü̃ma ínanapoxü̃. Rü ngẽma i ngunexü̃gu rü Yerucharéü̃cüã̱x rü nüxna narüyoü̃ ya yima Naxnepataxü̃ ya Naixnecüwa Ngẽxmane.
9 Rü nüxü̃ nadaugü nax muxü̃wama nawüxtexü̃ i Dabíarü Ĩanearü poxeguxü̃tápü̱x. Rü ngẽma dexáchiü̃ i ñaxtügu üxü̃ rü dexámaxã nanaxüãcu.
10 Rü yima Yerucharéü̃wa ngẽxmagüne ya ĩpatagü rü nüxü̃ nidaugü, rü nümaxü̃ne ya yima ĩpatagü rü nagu nipogügü nax yima norü nutamaxã namexẽẽgüãxü̃ca̱x i ĩanearü poxeguxü̃tápü̱x.
11 Rü ngẽma taxre i ĩanearü poxeguxü̃tapü̱xarü ngãxü̃gu nanaxügü i wüxi i dexápáxü̃ nax ngẽxma nabagüãxü̃ca̱x i ngẽma dexá i nüxíraxü̃xü̃ i dexápaxü̃wa ngẽxmaxü̃. Rü ngẽmaãcü nügü namexẽẽgü norü uanücha̱xwa. Natürü tama nüxna nacua̱xãchie nax Tupana yixĩxü̃ ga nũxcüma nagu rüxĩnücü i ngẽma poxcu i ñu̱xma ínguxü̃.
12 Rü ngẽma ngunexü̃gu rü nüma ya Cori ya Tupana ya Guxãétüwa Ngẽxmacü rü pemaxã nüxü̃ nixu nax pexauxexü̃ rü témüxü̃ i naxchirugu picu̱xgüxü̃ rü pegü pidüerugüxü̃ nax ngẽmaãcü penawéxü̃ca̱x nax aixcüma tá naga pexĩnüexü̃.
13 Natürü pemax rü taãẽgu, rü petagu iperücho. Rü wocagü rü carnérugü pedai, rü namachiarü ngṍxü̃ rü bínuarü axüxü̃ iperücho. Rü ñaperügügü: —Ngĩxã tachibüe rü taxaxegü erü moxü̃ rü tá marü tayue —ñaperügügü.
14 Rü nüma ya Cori ya Tupana ya Guxãétüwa Ngẽxmacü cha̱u̱xca̱x nango̱x rü choxmachi̱xẽwa chomaxã nidexa rü ñanagürü: —Naxü̃pa nax nayuexü̃ i ngẽma duü̃xü̃gü rü taxũtáma nüxü̃́ nüxü̃ charüngüma i ngẽma chixexü̃ i naxügüxü̃ —ñanagürü. Rü ngẽma nixĩ i Cori ya Tupana ya Guxãétüwa Ngẽxmacüarü ore.
Ore i ãẽ̱xgacüpataarü dauruxü̃ i Chexnáchiga
15 Rü Cori ya Tupana ya Guxãétüwa Ngẽxmacü rü chomaxã nidexa rü ñanagürü: —¡Naxü̃tawa naxũ i Chéna i ãẽ̱xgacüpatamaxã icuáxü̃ rü ñaa orexü̃ namaxã yarüxu!
16 “¿Ta̱xacü nua cuxü? ¿Texé cuxü̃ tamu nax nuxã ma̱xpǘnegu i ãẽ̱xgacügü íta̱xgüxü̃gu cuyacaxmaxü̃ i cuxmaxü̃ nax ngẽxma cutáxü̃ca̱x?
17 Rü woo cupora nax ãẽ̱xgacüpatamaxã nax cucuáxü̃, natürü Cori ya Tupana rü tá cuxü̃ niyaxu rü tá cuxü̃ ínata̱xüchi i curü puracüwa rü yáxü̃gu tá cuxü̃ naña.
18 Rü ñoma wüxi i perutarüxü̃ tá yáxü̃anewatama cuxü̃ nata̱x. Rü nümagü i ngémacüã̱x rü norü puracüruü̃mare tá cuxü̃ nixĩxẽxẽ rü chixri tá cumaxã inacua̱x rü norü naanewa tá cuxü̃ nata̱x. Rü ngẽxma tá cuyu, rü yimá curü carugü ya ñu̱xma namaxã cugü quicua̱xüxü̃ne rü taxuwatáma cuxü̃́ name. Rü curü ãẽ̱xgacüca̱x rü wüxi i ãne tá quixĩ.
19 Rü choma rü tá cuxna chanayaxu i ñaa curü puracü, rü ngẽmaãcü i cuma rü taxũtáma ãẽ̱xgacüpatamaxã icucua̱x.
20 Rü ngẽma ngunexü̃gu rü choma ya Cori ya Tupana rü chorü duü̃ ya Eriaquíü̃ ya Irichía naneca̱x tá chaca.
21 Rü ngẽma naxchiru i máxpaxü̃gu tá chayacu̱xẽxẽ, rü namaxã tá chayagoye i ngẽma curü goyexü̃, rü nüxna tá chanaxã i ngẽma puracü i ñu̱xma cuxü̃́ ngẽxmaxü̃. Rü nüma i Eriaquíü̃ rü ñoma wüxi ya nanatürüxü̃ tá nixĩ naxca̱x i Yerucharéü̃arü duü̃xü̃gü rü guxü̃ma i Yudáanearü duü̃xü̃gü.
22 Rü naxme̱xgu tá chanaxǘ ya Dabípataarü chawi i wãxnaruxü̃. Rü ngẽma nüma yawãxnaxü̃ rü taxúetama tanawãxta. Rü ngẽma nüma nawãxtaxü̃ rü marü taxúetama texé tayawãxna.
23 Rü nüma rü nanatütanüxü̃ca̱x rü taxü̃ i ãẽ̱xgacü tá nixĩ rü namaxã tá nataãẽgü. Rü choma rü ngẽma norü puracüwa tá chanangexmaechaxẽxẽ, ñoma wüxi i itapua i mürapewawa ipocuchixü̃rüxü̃.
24 Rü naxme̱xwa tá nangẽxmagü i guxü̃ma i ngẽmaxü̃gü i nanatütanüxü̃arü rü nataagüarü ixĩgüxü̃. Rü woo i naguxü̃raxü̃ i íxraxü̃ i naxpáü̃gü rü copugü rü ñu̱xmata naguxü̃raü̃xü̃ i baeruü̃gü rü naxme̱xwa tá nangẽxmagü.
25 Natürü wüxi i ngunexü̃ rü Eriaquíü̃ rü tá ta guxchaxü̃ naxca̱x ínangu rü tá ínamuxũchi i norü puracüwa. Rü ngẽxma tá inayarüxo i norü pora rü ngẽxma tá nayacua̱x i norü ngü̃xẽxẽ naxca̱x i guxü̃ma i ngẽma duü̃xü̃gü i nüxü̃́ yaxõgüxü̃” —ñanagürü ya Cori ya Tupana ya Guxãétüwa Ngẽxmacü.
