Isaías 23:1-18
23 Ñaa nixĩ i ore i ĩane ya Tíruca̱x ixĩxü̃: Rü yima wapurugü ya Tárchixwa ne ĩxü̃nearü yoragü rü nügümaxã naxauxe, erü ngẽma Tíruarü türe i nawa ínachoü̃xü̃ rü nachixe. Rü ngẽma türe i wapuruarü choü̃chica i nawa wapurugü íchoü̃xü̃xü̃ i ngẽxguma Chíprewa ne naxĩxgu rü marü poraãcü nachixe.
2 Rü ngẽma nangupetüxü̃ca̱x rü ngẽma duü̃xü̃gü i Tírucüã̱xgü rü ñu̱xũchi ngẽma taxetanüxü̃ i Chidóü̃cüã̱xgü rü ínayachaxãchitanü. Rü yima norü wapurugü ga márgu yarüüxü̃ne rü pexca̱x nanana ga muxü̃ma ga imexü̃ ga norü yemaxü̃gü.
3 Rü yema már nüxü̃́ nanatauxchaxẽxẽ nax togü ga nachixü̃anegüxü̃ namaxã nataxegüxü̃ ga norü yemaxü̃gü. Rü yema trigu ga Equítuanewa naxca̱x nataxegüxü̃wa rü taxü̃ ga diẽru nayauxgü.
4 Natürü i ñu̱xma i pema i Chidóü̃cüã̱xgü rü poraãcü pexãnee. Rü noxri rü márgu pexca̱x ínangugüxü̃ i guxü̃ma i perü ngẽmaxü̃gü, natürü i ñu̱xma rü perü wapurugü ga márgu yarüüxü̃ne rü marü ínayachaxãchitanü. Rü ngẽmaca̱x ñoma wüxi i ngexü̃ i ãtéxü̃ i ngexacüxü̃rüxü̃ pixĩgü, rü poraãcü pengechaü̃gü.
5 Rü ngẽxguma ngẽma Equítuanecüã̱xgü nüxü̃ cuáxchigagügu i ngẽma Tíruarü türemaxã ngupetüxü̃ rü poraãcü nangechaxü̃gü rü nüxü̃́ nangu̱x.
6 Rü ngẽma Equítuanecüã̱xgü rü tá ngẽma duü̃xü̃gü i wapuruãcuxü̃ ñanagürügü tá: —Name nixĩ i Tárchixca̱x pewoegu nax ngéma peyaxauxexü̃ca̱x —ñanagürügü tá.
7 Rü ĩane ya Tíru nixĩ ga nũxcümaxü̃ne ga ĩane ga duü̃xü̃gü guxü̃guma taãẽgu nawa irüchoxü̃ne. Rü ngẽma ĩanecüã̱x ga duü̃xü̃gü nixĩ ga yáxü̃arü naanewa ne ĩxü̃ nax yexma yaxãpatagüxü̃ca̱x.
8 ¿Rü texé tixĩ ya yíxema ãẽ̱xgacüarü ĩane ya Tírumaxã naxueguxe i ngẽma ñu̱xma ngupetüxü̃? Yima ĩanearü taxepataxü̃güarü yoragü rü natachigagü, rü norü taxetanüxü̃ rü guxü̃ma i togü i taxetanüxü̃ i ñoma i naanewa ngẽxmagüxü̃arü yexera nüxü̃ icua̱xüchixü̃ nixĩgü.
9 Rü Cori ya Tupana ya Guxãétüwa Ngẽxmacü nixĩ i namaxã naxuegucü i ngẽma ñu̱xma namaxã ngupetüxü̃ nax ngẽmaãcü naxãneexẽẽxü̃ca̱x i guxü̃ma i ngẽma duü̃xü̃gü i nügü írütagüxü̃ rü nüxna nax nayauxãxü̃ca̱x i norü pora i ngẽma duü̃xü̃gü i ñoma i naanewa nügü írüporaexü̃.
10 ¡Pa Duü̃xü̃gü i Tárchixcüã̱xgüx, name nixĩ ipenaxügüe nax naanewa pepuracüexü̃ rü pitoegüxü̃, erü ngẽma türe i nawa wapurugü ngugüxü̃ rü marü nataxuma!
11 Rü nüma ya Cori ya Tupana rü márwa inanawe̱x i norü pora, rü nachixü̃anegüxü̃ namuü̃xẽxẽ. Rü nanamu nax nagu napogüexü̃ca̱x ya Canaáü̃arü ĩanegü ya meama ípoxegugüne.
12 Rü ĩane ya Chidóü̃xü̃ ñanagürü: —¡Pa Ĩane ya ñoma wüxi i paxü̃ i chixri maxü̃xü̃rüxü̃ nax quixĩxü̃, rü marütama nax petagu icurüxã́ũxü̃! Rü woo tá Chíprewa naxĩ i curü duü̃xü̃gü nax ngẽxma nüxü̃ yanangümaexü̃ca̱x i norü guxchaxü̃gü, natürü ngẽxma rü ta rü tagutáma taãẽxü̃ nayangaugü —ñanagürü.
13 ¡Dücax, Pa Tírucüã̱x rü Chidóü̃cüã̱x, ga yema Babiróniamaxã ngupetüxü̃! Rü yema norü duü̃xü̃gü rü marü natauxe yerü yema Achíriaanecüã̱xgü rü naxca̱x ínayaxüãchi rü nagu napogüe ga guma ĩane wüxigu namaxã ga norü ãẽ̱xgacüpataxü̃gü. Rü ñu̱xma rü ngẽma naeü̃gü i idüraexü̃ i chianexü̃cüã̱x rü ngẽma nachicawa namaxẽ.
14 ¡Pa duü̃xü̃gü i wapurugu rüxĩĩĩxü̃ i Tárchixcüã̱xgü rü pexauxe, erü ngẽma Tíruarü türe i nawa pengugüüxü̃ rü marü nataxuma!
15 Rü ngẽxguma ya Tíru rü 70 ya taunecü tá inarüngeéga, nae̱xpü̱x ya taunecü ya wüxi ya ãẽ̱xgacü nagu maxü̃cü. Rü yima 70 ya taunecüguwena, rü ngẽma Tírucüã̱xgü rü wena tá togü i nachixü̃anegüaxü̃́ nanangúchaü̃xẽxẽ nax wena nataxegüxü̃ca̱x ñoma wüxi i ngexü̃ i naxü̃nemaxã taxexü̃ rü norü wiyaewa yatügüaxü̃́ nangúchaü̃ẽẽxü̃rüxü̃.
16 Rü duü̃xü̃gü rü ngẽma ngexü̃chiga nawiyae rü ñanagürügü: —Pa Cuxunemaxã Taxecü i Cuxü̃ Inangümaecüx, ¡rü nayaxu i curü árpa, rü ĩanegu namaxã iyaxüegu, rü mexü̃ i curü paxetagu napaxeta! ¡Rü muxü̃ma i wiyaegu nawiyae, rü ngürüãchi ngẽmawa tá cuxna nacua̱xãchie! —ñanagürügü.
17 Rü ngẽxguma tá marü 70 ya taunecü inguxgu, rü Cori ya Tupana rü wena tá Tírucüã̱x i duü̃xü̃güna nacua̱xãchi. Rü ngẽxguma i ngẽma Tírucüã̱xgü rü wena tá inanaxügüe nax ngẽma togü i nachixü̃anegüaxü̃́ nangúchaü̃xẽẽãxü̃ nax nügümaxã nataxegüxü̃.
18 Natürü ngẽma norü ngẽmaxü̃gümaxã nax nataxegüxü̃tanüwa ngĩxü̃ nayauxgücü i diẽru rü Cori ya Tupanaca̱x tá ngĩxü̃ ínaxüxüchigü. Rü taxũtáma marü nügüaxü̃́rica ngĩmaxã nanguxü̃gü rü ngĩxü̃ nanutaque̱xegü, natürü tá duü̃xü̃gü i Cori ya Tupanaca̱x puracüexü̃na ngĩxü̃ naxãgü i ngẽma diẽru nax ngẽmaãcü muxü̃ma i õnaca̱x rü naxchiru i mexẽchixü̃ca̱x ngĩmaxã nataxegüxü̃ca̱x.
