Isaías 24:1-23
24 Dücax, Cori ya Tupana rü tá chianexü̃xü̃ nananguxuchixẽxẽ i ñaa naane, rü ngẽma duü̃xü̃gü i nawa maxẽxü̃ rü tá nanawoonexẽxẽ.
2 Rü ngẽmatátama nüxü̃ nangupetü i ngẽma chacherdóte rü ñu̱xũchi ngẽma duü̃xü̃gü, rü ngẽxgumarüxü̃ tá ta nixĩ i ngẽma cori rü norü ngü̃xẽẽruxü̃, rü ngéma chiũra rü ngĩxrü ngü̃xẽẽruxü̃, rü ngẽma naxca̱x taxexü̃ rü ñu̱xũchi ngẽma namaxã taxexü̃, rü ngẽma toguxena diẽru paxaãchi ngĩxü̃ ãxü̃ rü ñu̱xũchi ngẽma paxaãchi ngĩxü̃ yaxuxü̃, rü ngẽma diẽruã́xü̃ rü ñu̱xũchi ngẽma ngearü diẽruã́xü̃.
3 Rü ñoma i naane rü tá chianexü̃xü̃ nayanguxuchi rü tá nangeãcuanemare. Erü ngẽma nixĩ i Cori ya Tupana nüxü̃ ixuxü̃.
4 Rü guxü̃ i naanewa tá nipagüane rü tá narüñẽẽxgü i naigü rü nanetügü. Rü ngẽma nügü írüporagüxü̃ rü tá ningearü poraa̱x.
5 Rü ngẽma duü̃xü̃gü i nawa maxẽxü̃ i ñoma i naane rü chixexü̃maxã nanapáxẽẽgü, erü tama nayanguxẽẽgü i Tupanaarü mugü, rü tama naga naxĩnüe i norü ucu̱xẽgü. Rü woo Tupanamaxã nüxü̃ nixugüe nax guxü̃gutáma yanguxẽẽgüãxü̃ ga yema uneta ga Tupanamaxã naxügüxü̃, natürü tama aixcüma nayanguxẽẽgü.
6 Rü ngẽmaca̱x nixĩ i chixexü̃ naxca̱x ínguxü̃ i ñoma i naane rü ngẽma duü̃xü̃gü i nawa maxẽxü̃ rü ngúxü̃ yangegüxü̃. Rü ngẽmaca̱x nixĩ i ínagu̱xü̃ i ngẽma duü̃xü̃gü i ñoma i naanewa maxẽxü̃ rü ínaxĩxü̃ i norü mu, rü noxretama íyaxügüxü̃.
7 Rü yimá bínu rü marü wixgu nataxu, rü ngẽma úbanecügü rü norü da̱xaweane naxca̱x ínangugü. Rü ngẽma duü̃xü̃gü ga noxri taãẽgüchiréxü̃ rü ñu̱xma rü ngechaü̃wa nangẽxmagü.
8 Rü marü nayagu̱x i ngẽma taãxẽ i ngẽma tutugümaxã rü árpagümaxã napetaegüxü̃. Rü marü nachiane i ngẽma petawa ãũgatanüxü̃.
9 Rü marütama nax paxetagüacüma bínu pixagüxü̃, erü ngẽma axewa̱xegüxü̃ca̱x ya yimá bínu rü tá naxüxchíxü.
10 Rü yima ĩane ya duü̃xü̃gü noxri chixexü̃gu maxẽxü̃ nawa maxẽne rü ñu̱xma rü nangeãcu rü narüwãtagü ya ĩpatagü nax taxúema texe nagu ücuxü̃ca̱x.
11 Rü ngẽma duü̃xü̃gü rü namagüwa naxauxe erü marü nataxuma ya bínu. Rü guxü̃ma i ngẽma taãxẽ rü marü nüxü̃́ inayacua̱x rü marü inarüxo i ñoma i naanewa.
12 Rü yima ĩane rü marü nagu napogüe, rü ngẽma norü poxeguxü̃arü ĩã̱x rü marü niwa̱x rü napoü̃gü.
13 Rü ñoma oribu ibuxuxguwena rü noxretama natanüwa yaxügüxü̃rüxü̃, rü ñoma úba ega norü buxguwena naxca̱x idaugügu i ngẽma noxretama i natanüwa yaxügüxü̃rüxü̃ tá nixĩ nax noxretama i duü̃xü̃gü íyaxügüxü̃ nawa i ngẽma nachixü̃anegü i ñoma i naanewa ngẽxmagüxü̃.
14 Rü ngẽma duü̃xü̃gü i íyaxügüxü̃ rü norü taãẽgümaxã tá aita naxüe. Rü ngẽma oéstecüã̱x rü tá Cori ya Tupanaxü̃ nicua̱xüü̃gü i ngẽxguma nüxü̃ nadaugügu i norü pora ya Cori ya Guxü̃arü Ãẽ̱xgacü ixĩcü.
15 Rü éstewaama rü ñu̱xũchi ngẽma nachixü̃anegü i márpechinüwa ngẽxmagüxü̃wa rü Cori ya Iraétanüxü̃arü Tupanaxü̃ tá nicua̱xüü̃gü.
16 Rü guxü̃ma i ñoma i naanearü tagu nüxü̃ taxĩnü nax ñaxü̃gu nawiyaegüxü̃: —Name ya Tupana ya aixcüma mexü̃gu rüxĩnücü —ñaxü̃gu nawiyaegüxü̃. Natürü i choma rü ñachagürü: —Poraãcü chaugümaxã changechaü̃, erü ngẽma taechitawa̱xegüxü̃ rü taxü̃ i chixexü̃ naxügü rü taxúema nüxü̃́ tangechaü̃tümüxü̃ —ñachagürü.
17 Rü ngẽma ñoma i naanewa maxẽxü̃ i duü̃xü̃gü rü ñoma naeü̃gü i cueneegüxü̃ nawe ngẽgüxü̃rüxü̃ tá nixĩgü. Rü ãũcümaxü̃wa nangẽxmagü erü ñoma ãxmaxü̃gu rüe̱xna yütagu nayixchaü̃xü̃rüxü̃ nixĩgü.
18 Rü yíxema cueneecügücha̱xwa iñaxẽ rü ãxmaxü̃gu tá tingucuchi. Rü yíxema ngẽma ãxmaxü̃wa inguxuchixe rü yütagu tá tangu. Rü pucü ya tacü tá narüngu rü ñoma i naane rü poraãcü tá naxĩã̱xãchiane.
19 Erü ñoma i naane rü poraãcütama naxĩã̱xãchiane, rü tá nawǘxcuane rü tá narüwĩ́ẽmüane.
20 Rü ñoma i naane rü wüxi i ngãxü̃xü̃rüxü̃ tá nichü̱xacüxü, rü ñoma wüxi ya ĩpata ya chixri ipugüparanerüxü̃ tá nixĩã̱xcüxü. Erü norü duü̃xü̃güarü chixexü̃ rü poraãcü nataxüchi rü ngẽmaca̱x i ñoma i naane rü tá inayangu rü tagutáma wena ínarüda.
21 24:21-22 Rü ngẽma ngunexü̃gu ya Cori ya Tupana rü tá nanapoxcue i ngẽma naãẽgü i chixexü̃ i dauxü̃wa ngẽxmagüxü̃ rü ñu̱xũchi ngẽma ñoma i naanewa ngẽxmagüxü̃ i ãẽ̱xgacügü i chixexü̃gü. Rü tá nanangutaque̱xexẽxẽ, rü wüxi i poxcuchicaxü̃gu tá nanawocu rü ngẽxma tá nanawãxtaxü̃. Rü ñu̱xũchi muxü̃tama i ngunexü̃güwena rü tá namaxã nanaxuegu i norü poxcu.
22 Nüü̃ nadau 24:21
23 Rü ngẽxguma nüma ya Cori ya Tupana ya Guxãétüwa Ngẽxmacü ãẽ̱xgacü yixĩxgu i ma̱xpǘne ya Chióü̃wa i Yerucharéü̃wa, rü yimá tauemacü rü tá nadauemamare rü yimá üa̱xcü rü tá naxeemamare. Rü yima ĩanearü ãẽ̱xgacügü rü tá nüxü̃ nadaugü ya Cori ya Tupanaarü üüne.
