Isaías 25:1-12
25 Pa Corix, cuma nixĩ i chorü Tupana quixĩxü̃. Rü choma rü cuxü̃ chicua̱xüxü̃ rü mexü̃maxã cuxü̃ chixuchiga, erü ngẽma nũxcümacürüwatama nagu curüxĩnüxü̃ rü aixcüma cuyanguxẽxẽ rü taguma cunaxüchicüxü i ngẽma nüxü̃ quixuxü̃.
2 Rü yima ĩanegü rü nutapütagüxü̃ cunanguxü̃xẽxẽ, rü yima ĩanegü ya mea ípoxegugüne rü nagu quipogügü. Rü yima uanügüarü ãẽ̱xgacügüpatagü rü cuyanaxoxẽxẽ rü tagutáma wena marü nimexẽẽgü.
3 Rü ngẽmaca̱x wüxi i nachixü̃ane i poraxü̃ rü tá cuxü̃ nicua̱xüxü̃, Pa Tupanax, rü ngẽma duü̃xü̃gü i taxúxexü̃ma ngechaü̃xü̃ rü tá cuxü̃ namuü̃e.
4 Rü yíxema ngearü poraã̱xgüxeca̱x rü cumax, Pa Corix, rü tümaarü poxü̃ruxü̃ quixĩ. Rü cuma rü tümaarü ngü̃xẽẽruxü̃ quixĩ ya yíxema taxúema tüxü̃ rüngü̃xẽẽgüxe. Rü cuma rü tümaétüwa cuchogü ya yíxema guxchaxü̃wa ngẽxmagüxe. Rü cuma rü tümaarü gáuxpechitaruxü̃ quixĩ ya yíxema üa̱xcüarü naiemaxü̃ tüxü̃ iguxe. Rü tüxü̃ ícupoxü̃ nüxna i ngẽma duü̃xü̃gü i poraãcü chixecümagüxü̃ i ñoma taxüchicü ya buanecü ya pucümaxã íngucürüxü̃ ixĩgüxü̃.
5 Rü woo ngẽma uanü rü norü numaxã ínangu ñoma üa̱xcüema i waixü̃mü i paxü̃gu nguemaxü̃rüxü̃, natürü i cuma rü nüxü̃ curüyexera ñoma wüxi i caixanexü̃ üa̱xcüemaxü̃ tüpechitaxü̃rüxü̃. Rü cuma nixĩ i cuyanangeã̱xgüxẽẽxü̃ i ngẽma duü̃xü̃gü i chixecümagüxü̃.
6 Rü nüma ya Cori ya Tupana rü ma̱xpǘne ya Chióü̃wa tá guxü̃ma i duü̃xü̃gü i ñoma i naanewa maxẽxü̃ca̱x nanaxü i wüxi i õna i taxü̃. Rü ngẽma õna rü maixcuraxü̃ i chi̱xichixü̃ rü bínu ya marü ñuxgumama ixügücü rü namachi i chíxü̃ rü bínu ya rümemaegücümaxã naxca̱x nanamexẽxẽ.
7 Rü ngẽma ngunexü̃gu rü nüma ya Cori ya Tupana rü yima ma̱xpǘnewa tá inayanaxoxẽxẽ i ngẽma yu i ñu̱xma guxü̃ i nachixü̃anecüã̱xgüna ngechaü̃ãxü̃.
8 Rü nüma ya Cori ya Tupana rü noxtacüma tá inayanaxoxẽxẽ i ngẽma yu, rü tá guxẽxü̃tama ínapixetü. Rü ñu̱xũchi guxü̃ i naanewa tá inayaxoxẽxẽ i ngẽma ãne i ñu̱xma norü duü̃xü̃gü ingegüxü̃. Rü nüma ya Cori ya Tupana nixĩ i ngẽma ñacü.
9 Rü ngẽma ngunexü̃gu i ngẽma duü̃xü̃gü rü ñanagürügü tá: —Daa nixĩ ya tórü Tupana ya nagu yaxõgücü rü tüxü̃ ínguxü̃xẽẽcü. ¡Ngĩxã tá taãẽgü rü nüxü̃ ticua̱xüü̃gü erü nüma tüxü̃ ínanguxü̃xẽxẽ! —ñanagürügü tá.
10 Rü yimá Cori ya Tupaname̱xẽ tá nixĩ i ma̱xpǘne ya Chióü̃xü̃ ípoxü̃ne. Natürü Moáxü̃ rü tá nayapuxcuchigü ñoma maxẽ i paxü̃ wüxi i guxchirepáü̃gu yapu̱xcuchixü̃rüxü̃.
11 Rü Moáane rü ñoma wüxi i wẽxgütaexü̃rüxü̃ pora naxü nax yexera naporaxü̃ca̱x. Natürü nüma ya Cori ya Tupana rü tá nayanaxoxẽxẽ nax nügü yacua̱xüxü̃xü̃.
12 Rü nüma ya Cori ya Tupana rü tá nayawa̱xgüxẽxẽ i norü ĩanetapü̱xgü i máchanexü̃ rü taixü̃. Rü natüchi rü waixü̃müanewa tá ninuagümare.
