Isaías 26:1-21
26 Rü ngẽma ngunexü̃ ya Tupana nagu napoxcuexü̃ i norü uanügü rü ngẽma Yudáanecüã̱xgü, rü tá nawiyaegü nagu i ñaa wiyae: —Tüxü̃́ nangẽxma ya daa tórü ĩane ya porane ya tüxü̃ ípoxü̃ne nüxna i tórü uanügü. Erü nüma ya Cori ya Tupana rü tüxü̃ narüngü̃xẽxẽ rü taixü̃ i naxtapü̱xmaxã ínanapoxegu ya daa tórü ĩane.
2 ¡Rü peyawãxna̱x i ngẽma norü ĩã̱xgü ya daa ĩane nax nachocuxü̃ca̱x i ngẽma duü̃xü̃gü i Tupanape̱xewa mexü̃ rü aixcüma naga ĩnüexü̃!
3 Rü cumax, Pa Corix, rü tüxü̃ curüngü̃xmügüxẽxẽ ya yíxema mexü̃ i tümacüma tüxü̃́ ngẽxmaxe rü cuxna rüyoü̃xẽ.
4 ¡Nüxü̃́ peyaxõ ya Cori ya Tupana, erü nüma nixĩ i guxü̃guma pexna nadauxü̃!
5 26:5-6 Rü nüma ya Cori ya Tupana rü nanapoxcue i ngẽma nügü írütagüxü̃. Rü ñu̱xũchi yima ĩane ya nügü írütaxü̃ne rü nanaxãnexẽxẽ ñu̱xmata waixü̃müanegu nangu nax ngẽmaãcü ngẽma duü̃xü̃gü i tama nügü icua̱xüü̃güxü̃ rü ngẽma ngearü diẽruã̱xgüxü̃ nagu púgüexü̃ca̱x —tá nawiyaegü.
6 Nüü̃ nadau 26:5
7 Yíxema aixcüma Tupanape̱xewa mea maxẽ, rü tümacüma rü nawe̱xgu. Rü cumax, Pa Cori Pa Tupanax, rü tüxü̃ curüngü̃xẽxẽ nax yawéxü̃ca̱x i tümacüma.
8 Pa Corix, ngẽxguma naga taxĩnüegu i curü mugü rü taxuca̱xma taxoegaãẽgü. Rü ngẽma guxü̃arü yexera nagu tarüxĩnüexü̃ nixĩ nax cuga taxĩnüexü̃ rü cuxü̃ ticua̱xüü̃güxü̃.
9 Chütacü rü guxü̃ma i chorü ngúchaü̃maxã cugu charüxĩnü. Rü aixcüma chorü maxü̃nemaxã cuxca̱x chadau. Rü ngẽxguma cuma ñoma i naanewa cuxũxgu nax nüxna cucaxü̃ca̱x i duü̃xü̃gü naxca̱x i norü maxü̃, rü ngẽxguma tá nixĩ i aixcüma nüxü̃ nacua̱xgüxü̃ i ta̱xacü nixĩ i ngẽma cupe̱xewa mexü̃.
10 Rü woo nax cuxü̃́ nangechaü̃tümüxü̃güxü̃ i ngẽma chixexü̃gu maxẽxü̃, Pa Corix, natürü nümagü rü tama nüxü̃ nacua̱xgüéga nax ñuxãcü tá mea namaxẽxü̃. Rü woo duü̃xü̃gü i mea imaxẽxü̃tanüwa nangẽxmagügu, natürü chixexü̃ naxügüama rü tama nüxü̃ nacua̱xgüéga i ngẽma Cori ya Tupanaarü mexü̃.
11 Rü cumax, Pa Corix, rü marü naxca̱x icunamexẽxẽ i ngẽma norü poxcu, natürü i nümagü rü tama nüxü̃ nacua̱xgüéga. Natürü ngẽxguma nüxü̃ nadaugügu i ngẽma curü ngechaü̃ i taxü̃ naxca̱x i curü duü̃xü̃gü i mea maxẽxü̃, rü tá naxãnee. ¡Chierüx cuma rü curü nuarü üxüemamaxã cunadaixgu i ngẽma curü uanügü!
12 Pa Cori ya Tupanax, cuma nixĩ i mexü̃ toxca̱x ícunguxẽẽxü̃, rü cuma nixĩ i toxü̃ curüngü̃xẽẽxü̃ nawa i guxü̃ma i torü puracügü.
13 Pa Cori ya Torü Tupanax, togü ga nachixü̃anegüarü ãẽ̱xgacügü rü tomaxã inacua̱xgü, natürü i ñu̱xma rü cuxü̃xicatama nixĩ i tacuáxü̃ nax torü ãẽ̱xgacü quixĩxü̃.
14 Rü ngẽma togü i nachixü̃anegüarü ãẽ̱xgacügü rü marü nayue, rü taxũtáma wena namaxẽ. Rü ñoma naxchipetagürüü̃mare nixĩ rü taxũtáma wena ínarüdagü. Rü cuma rü marü cunapoxcue rü ñu̱xũchi cunadai. Rü ñu̱xma rü taxúema nüxna tacua̱xãchigü.
15 Pa Corix, cuma nixĩ i toxü̃ quimuxẽẽxü̃ nax ngẽmaãcü cuxü̃ ticua̱xüü̃güxü̃ca̱x. Rü ñu̱xũchi toxü̃́ nüxü̃ cutaneta i guxü̃ma i tochixü̃anearü üyeanegü.
16 Rü yexguma guxchaxü̃ toxca̱x ínguxgu, Pa Corix, rü cuxca̱x tadaugüama naétüwa ga yema ngúxü̃ ga toxca̱x ícunguxẽẽxü̃ nax toxü̃ curüwe̱xãchigüxẽẽxü̃ca̱x.
17 Rü cupe̱xewa, Pa Corix, rü toma rü ñoma wüxi ya ngexe ya tacharaü̃xe rü ngẽxguma marü taxíxraxacüchaü̃gu rü norü ngu̱xmaxã tügü rüxãũxü̃xe rü aita üxerüxü̃ tixĩgü.
18 Rü ngẽxgumarüxü̃ ta ngúxü̃ tinge natürü natüca̱xma nixĩ erü tama torü uanügüme̱xẽwa ítananguxuchixẽxẽ i torü naane rü tama timu i ñoma i naanewa.
19 Natürü curü duü̃xü̃gü tixĩgü rü woo tanoxree̱xpü̱x i ñu̱xmax, natürü wena tá timu. Rü woo togü tomaxã inacua̱x i ñaa naanewa, natürü wüxi i ngunexü̃ tá nüxna ítanguxü̃ rü taãẽmaxã tá tawiyaegü. Rü cuma rü tá toxü̃ quimuxẽxẽ rü maxü̃ tá toxna cuxã ñoma cherena rü pa̱xmama tonetüna maxü̃ ãxü̃rüxü̃.
20 Dücax, Pa Chorü Duü̃xü̃güx, rü name nixĩ i nagu pechocu ya yima pepatagü rü penawãtagü i perü ĩã̱xgü. ¡Rü paxaãchi ngẽxma picu̱xgü ñu̱xmata nüxü̃́ nangupetü i norü nu ya Cori ya Tupana!
21 Erü nüma ya Cori ya Tupana rü napatawa tá ínaxũxũ nax ñoma i naanecüã̱x i duü̃xü̃güxü̃ napoxcuexü̃ca̱x nagagu i norü pecadugü i nape̱xewa naxügüxü̃. Rü ñu̱xũchi ñoma i naane rü taxũtáma tüxü̃ nicu̱xgü ya yíxema nagu tüxü̃ nadaixe. Rü tá nango̱x i ngẽma máetagü ga ñoma ga naanewa naxügüxü̃.
