Isaías 27:1-13
27 Rü ngẽma ngunexü̃gu rü nüma ya Cori ya Tupana rü norü tara i tacü i ãũcümacü rü pora ngĩxü̃wa ngẽxmacümaxã, tá nanacua̱xi i ngẽma ngo̱xo i Lebiatáü̃ i ãxtape i wü̃xü̃güãcü paxa ixũxü̃. Rü ñu̱xũchi nüma ya Tupana rü tá nayama̱x i ngẽma ngo̱xo i dragóü̃ i márwa ngẽxmaxü̃.
2 Rü ngẽma ngunexü̃gu rü Cori ya Tupana rü ñanagürü tá: —Nachiga pewiyaegü i Iraétanüxü̃ i ñoma úbanecü i mexẽchixü̃rüxü̃ ixĩxü̃.
3 Rü choma ya Cori ya Tupana nixĩ i guxü̃guma nüxna chadauxü̃ i ngẽma Iraétanüxü̃ ñoma úbanecü dexámaxã imegüxü̃rüxü̃. Rü ngunecü rü chütacü nüxna chadau nax taxúema nachixexẽẽxü̃ca̱x.
4 Rü tama nixĩ i Iraétanüxü̃maxã chanuxü̃, natürü ngẽxguma nangẽxmagügu i tama chauga ĩnüexü̃, rü choma rü tá ichayanaxoxẽxẽ ñoma tuxu rü natüane iguxü̃rüxü̃.
5 Rü ngẽxguma ngẽma Iraétanüxü̃ naxwa̱xegügu nax choma nüxü̃ charüngü̃xẽẽgüxü̃ca̱x, ẽcü cha̱u̱xca̱x nawoegu rü chomaxã inangüxmüe —ñanagürü tá ya Tupana.
6 Rü tá ínangu i ngunexü̃ i Acóbutanüxü̃ rü ñoma nanetügü i muxchúma̱xãxü̃rüxü̃ tá nixĩ nax Iraétanüxü̃ wena ínadagüxü̃ rü yamuxü̃. Rü ngẽmaãcü i norü o rü ñoma i naane tá namaxã nanapa.
7 ¿Ẽ̱xna Tupana rü Iraétanüxü̃xü̃ napoxcuexü̃ yema norü uanügüxü̃ napoxcuexü̃rüxü̃? ¿Rüe̱xna Iraétanüxü̃xü̃ nada̱i̱xü̃ yema norü uanügüxü̃ nada̱i̱xü̃rüxü̃?
8 Rü aixcüma nixĩ nax Iraétanüxü̃xü̃ napoxcuxü̃ ga Tupana, rü wüxi ga norü cue ga ãũcümaxü̃maxã ínanawoxü̃ ga norü naanewa rü to ga nachixü̃anewa nanamugü. Rü yema norü cue, rü ñoma buanecü ya éstewaama ne ũcürüxü̃ nixĩ nax naporaxü̃.
9 Natürü nüma ya Cori ya Tupana rü tá nüxü̃́ nüxü̃ inayarüngüma i ngẽma Iraétanüxü̃arü chixexü̃gü rü tá ínanapi i norü pecadugü i ngẽxguma nagu napogüegu i norü tupananetagüarü ãmarearü guruü̃güarü nutagü, ñoma nuta ya cal íxraxü̃gu pocürüxü, rü ngẽxguma ínawogüãgu i ngẽma naigü i Acheráchicüna̱xãgü i namaxã natupanaã̱xgüxü̃ rü nagu napogüegu i ngẽma guruü̃gü i nawa norü tupananetagüca̱x pumarate̱xe ínagugüxü̃.
10 Rü yima ĩane ya ípoxegune rü nagu napogüe ñoma wüxi ya ĩpata ya ngéma ta̱xmarenerüxü̃. Rü ñoma naane i taxúema ixãpataxü̃warüxü̃ nixĩ. Rü wüxi i nachica i wocagü nawa chibüexü̃ rü naixchacüügü nawa nangõ̱xgüxü̃ rü ñu̱xũchi nagu nacagüxü̃ nixĩ.
11 Rü ngẽma naixchacüxügü rü ngẽxguma yapagügu rü ngẽma ngexü̃gü rü norü üxüxü̃ nanade nax ngẽmamaxã naxãxü̃xü̃güxü̃ca̱x. Rü ngẽma duü̃xü̃gü rü nataxuma i norü cua̱x rü ngẽmaca̱x ya Tupana ya norü ngo̱xẽẽruxü̃ rü taxũtáma yáxna namaxã naxĩnü rü bai tá i namaxã yaxãũxãchixü̃.
12 Rü ngẽma ngunexü̃ i Cori ya Tupana nagu yadexechixü̃ i Iraétanüxü̃, rü natü i Eufrátewa tá inanaxügü ñu̱xmatata Equítuarü natügu yacuáx nax nanutaque̱xeãxü̃ i Iraétanüxü̃ ñoma trigu wüxipü̱xüchigü naxchirena inuxü̃xü̃rüxü̃.
13 Rü ngẽma ngunexü̃gu rü tá nagu nicue ya yimá cornéta ya tagane. Rü ngẽma Iraétanüxü̃ i Achíriaanegu woonexü̃ rü ñu̱xũchi ngẽma Equítuanewa gagüxü̃ rü tá Yerucharéü̃ca̱x nawoegu. Rü yima ma̱xpǘne ya üünenewa tá Cori ya Tupanaxü̃ nicua̱xüü̃gü.
