Isaías 28:1-29
28 Wüxi i ngechaü̃ tá nixĩ naxca̱x ya Chamária ya Efraíü̃anearü ĩane ya taxü̃ne ya namaxã nügü yacua̱xüü̃güne i ngẽma duü̃xü̃gü i ngãxẽxü̃. Yima ĩane ya Chamária ya metachinüxü̃ iyacuáxü̃arü ma̱xpǘnewa ngẽxmane, rü ñoma putüragü i mexü̃gü i paxãma rüñẽ̱xchacuxü̃rüxü̃ nixĩ, rü norü duü̃xü̃gü rü bínumaxã nangãxẽecha.
2 28:2-3 Rü ngẽmaca̱x nüma ya Cori ya Tupana rü ngéma tá nanamugü i norü uanügü i churaragü i poraxüchixü̃. Rü ñoma gáuxü̃ i dauxü̃wa rüyi̱xü̃rüxü̃ rü buanecü ya taxüchicü ya ĩpatagügu pogüxü̃rüxü̃ tá nixĩgü. Rü ñoma pucü ya taxüchicü ya guxü̃wama nanguanexẽẽcürüxü̃ ta nixĩgü i ngẽma churaragü. Rü ngẽma norü uanügü i churaragü rü tá nagu napogüe ya yima ĩane ya Chamária ya namaxã nügü yacua̱xüü̃güne i ngẽma duü̃xü̃gü i ngãxwa̱xegüxü̃ i Efraíü̃anewa ngẽxmagüxü̃.
3 Nüü̃ nadau 28:2
4 Rü yima ĩane ya metachinüxü̃ iyacuáxü̃arü ma̱xpǘnewa ngẽxmane rü ñoma putüragü i paxãma rüñẽ̱xchacuxü̃rüxü̃ tá nixĩgü. Rü ñoma nüxíraxü̃xü̃ i iguarü o i ngẽxguma texé nüxü̃ da̱u̱xgux rü ticawexü̃ rü tangṍxü̃rüxü̃ tá nixĩgü.
5 Rü ngẽma ngunexü̃gu rü nüma ya Cori ya Tupana ya Guxãétüwa Ngẽxmacü, rü norü ãẽ̱xgacü ya mexẽchicü tá nixĩ naxca̱x i ngẽma norü duü̃xü̃gü i íyaxügüxü̃.
6 Rü nüma ya Tupana rü tá ngẽma guxchaxü̃güarü mexẽẽruü̃güna nanaxã i cua̱x nax tama chixri namexẽẽgüãxü̃ca̱x i duü̃xü̃güarü guxchaxü̃gü. Rü ngẽma churaragü ya ĩane ípoxü̃güxü̃, rü nüma ya Tupana rü tá nüxna nanaxã i pora nax tama namuü̃exü̃ca̱x.
Cua̱xruü̃gü rü unetagü i Yerucharéü̃ca̱x ixĩxü̃
7 Natürü nangẽxma i togü i bínuarü ngu̱xmaxã ichü̱xatanücüüxü̃ rü axexü̃ i ngúxü̃maxã itaixteparatanücüüxü̃. Rü ngẽma chacherdótegü rü orearü uruü̃gü rü axexü̃ i ngúxü̃maxã nichü̱xatanücüxü rü nitaixteparatanücüxü. Rü bínumaxã naxãũãẽgü. Rü axeü̃ i ngúxü̃gagu nitaixteparatanücüxü. Rü toxicaxü̃ nixu rü ngéma namuga i ngẽxguma nango̱xetügu. Rü ngãxãcü nanaxuegu i poxcu.
8 Rü guxü̃ma i ngẽma norü mechagü rü oxü i yixixü̃maxã nayapagü rü nataxuma i wüxi i mecha i tama ãũãchixü̃.
9 28:9-10 Rü chauchiga nidexagü rü ñanagürügü: —¿Ẽ̱xna nua cuxũ nax tomaxã nüxü̃ cuyarüxuxü̃ca̱x i ore rü toxü̃ cuyangúexẽẽxü̃ca̱x i ngẽma Cori ya Tupana cuxü̃ wéxü̃? ¿Rü cuxca̱x e̱xna ñoma buxü̃gü i buexüchixü̃ i ngexwaca̱xtama ugütaexü̃ cua̱xgüxü̃ãcü tá tomaxã quidexa? —ñanagürügü.
10 Nüü̃ nadau 28:9
11 Rü dücax, rü ngẽxguma tama Tupanaga pexĩnüegu rü nüma rü to i nagawa tá pemaxã nidexa. Rü wüxi i naga i taxũtáma nüxü̃ pecuáxü̃wa tá nixĩ i pemaxã yadexaxü̃ ya Tupana.
12 Nüma rü marü pemaxã nüxü̃ nixu ga ü̃pa rü ñanagürü: —Nua nixĩ i nangẽxmaxü̃ i taãxẽ. ¡Rü nuxã perüngü̃gü! —ñanagürü. Natürü ga pema rü tama naga pexĩnüechaü̃.
13 Rü ngẽmaca̱x ya Cori ya Tupana rü ñoma buxü̃gü i buexüchixü̃ i ngexwaca̱xtama ugütaexü̃ cua̱xgüxü̃ãcü tá pemaxã nidexa. Rü pema rü ngẽxguma ipexĩxgu rü buxü̃gü i ngexwaca ũxü̃ cua̱xgüxü̃rüxü̃ tá peca̱xwe̱xmaxã ipeyayi rü peyapíe, rü perü uanügü tá pexü̃ ínayaxuxü̃.
14 Rü ngẽmaca̱x, Pa Yatügü i Tauéegama Ĩnüechaü̃xü̃ i Yerucharéü̃maxã Icua̱xgüxü̃x, ¡rü iperüxĩnüe i Cori ya Tupanaarü ore!
15 Pemax rü ñaperügügü: —Taxucürüwa i torü uanü toxü̃ nadai erü marü wüxi i uneta taxü nax tama tayuexü̃ca̱x rü togü toxü̃ ínapoxü̃xü̃ca̱x —ñaperügügü. Natürü ngẽma uneta rü yuwa tá pexü̃ nagagü erü wüxi i womüxẽẽmare nixĩ.
16 Rü ngẽmaca̱x ya Cori ya Tupana rü ñanagürü: —Chióü̃gu tá chanaxǘ ya wüxi ya nuta ya chomatama ichaxunetacü ya mexẽchicü. Rü yimáwa tá nixĩ inaxügüxü̃ i guxü̃ma i ngẽma chaxüxü̃. Rü yíxema nagu iyauxãchíxe rü taxuca̱xma taxoegaãxẽ.
17 Rü choma rü tá mea chanangugü i ngẽma naxüxü̃ i wüxichigü i duü̃xü̃gü. Rü guxü̃ma i ngẽma chaxüxü̃ rü aixcüma nawe̱xgu. Pema rü nüxü̃́ peyaxõ i ngẽma uneta i Equítuanemaxã pexüxü̃ nax pexü̃ ínapoxü̃xü̃, natürü ngẽma rü wüxi i doramare nixĩ rü gáuxü̃pütagü tá naétügu narüyi rü tá inayanaxoxẽxẽ. Rü taxü̃ i dexá tá ínananguxẽxẽ i perü cu̱xchicaxü̃ —ñanagürü ya Tupana.
18 Rü ngẽxguma pexca̱x tá ínangugügu i perü uanüarü churaragü i ãũcümaxü̃, rü tá pexü̃ narüporamaegü. Rü ngẽxma tá narüxomare i ngẽma perü uneta i Equítuanemaxã pexüxü̃ rü perü uanü tá pexü̃ nadai.
19 Rü ngẽxguma ínangugügu i ngẽma churaragü i ãũcümaxü̃ rü tá pexü̃ nigagü. Rü guxü̃ i ngunexü̃ tá ínangugüxü̃, rü ngunecü rü chütacü tá ínangugüxü̃. Rü ngẽxguma nüxü̃ pexĩnüechigagu rü muü̃maxã tá pidu̱xrue.
20 Rü taxü̃ i guxchaxü̃gü tá pexca̱x ínangugü, rü ñoma íxraxü̃ i pechicaxü̃gu cucaxgurüxü̃ rü íxracü ya düxruü̃maxã quidüxügurüxü̃ tá nixĩ.
21 Rü nüma ya Cori ya Tupana rü tá inanawe̱x i norü pora yema ma̱xpǘne ga Perachíü̃wa nawéãgurüxü̃. Rü tá nanango̱xẽxẽ i norü nu yema Gabaóü̃arü doxonexü̃wa nango̱xẽẽãgurüxü̃. Rü ngẽmaãcü tá paxa nayanguxẽxẽ i norü puracü i nüxicatama nüxü̃ nacuáxü̃.
22 ¡Rü ngẽmaca̱x marütama nax Tupanaxü̃ pecugüexü̃ nax tama yexeraãcü pexü̃ napoxcuexü̃ca̱x! Erü marü nüxü̃ chaxĩnü nax Cori ya Tupana ya Guxãétüwa Ngẽxmacü rü tá yanaxoxẽẽãxü̃ i guxü̃ma i ñaa nachixü̃ane.
23 ¡Rü dücax, choxü̃ iperüxĩnüe i ngẽma nüxü̃ chixuxü̃! ¡Rü mea iperüxĩnüe i ngẽma chorü dexagü!
24 Rü ngẽxguma wüxi i naanewa puracüxü̃ natoechaü̃gu, rü tama aiegumüanexü̃ inarüxãũ rüe̱xna caxü̃chimeanexü̃ inarüxãũ rüe̱xna wacuanexü̃ inarüxãũ.
25 Rü noxri rü nanametachinüane rü ñu̱xũchi nagu nanagü ya enéldochire rü comínuchire. Rü ngẽmawena rü meama üxchimüxü̃ãcü inanatogü i trigu. Rü naanepechinügu nanato i chebáda rü chenténu.
26 Rü Tupana nixĩ ya cua̱x nüxna ãcü nax ñuxãcü tá natoexü̃.
27 Rü ngẽma enéldo rü tama tanapu̱x, rü yima comínu rü tama caruchicu naétüwa tadixpetü. Rü ngẽma enéldo rü wüxi i naixmena̱xãmaxã nixĩ i inapoxü̃ nax nagüxẽẽxü̃ca̱x. Rü yima comínu rü ngẽxgumarüxü̃ ta wüxi i naixmena̱xããcümaxã nixĩ i inapoxü̃ nax nagüxẽẽxü̃ca̱x.
28 Rü ngẽxguma trigu ipu̱xgu, rü tama poraãcü tanapu̱x nax tama yapuexü̃ca̱x. Rü ngẽxgumarüxü̃ ta i ngẽxguma ãchicuxü̃maxã napu̱xgu ya triguchire rü tama poraãcü tanapu̱x erü tama tanaxwa̱xe nax ngẽma nachicupüta yapuexẽẽxü̃.
29 Rü guxü̃ma i ngẽma cua̱x rü Cori ya Tupana ya Guxü̃étüwa Ngẽxmacüwa nixĩ i ne naxũxü̃. Nüma ya Cori ya Tupana rü mexü̃ i ĩnügü nüxü̃́ nangẽxma, rü norü cua̱xmaxã nayanguxẽxẽ i ngẽma nagu naxĩnüxü̃.
