Isaías 29:1-24
29 29:1-2 Wüxi i taxü̃ i ngechaü̃ nixĩ i cuxca̱x, Pa Yerucharéü̃ ya Dabíarü Ĩane Ixĩxü̃ne. Curü duü̃xü̃gü rü gucü ya taunecügu nanaxügüecha i norü petagü. Natürü i choma ya Cori ya Tupana rü tá guxchaxü̃ pexca̱x íchanguxẽxẽ. Rü aixta tá pexüe rü tá pexauxe erü yimá perü ĩane ya Yerucharéü̃ rü tá nigu ñoma ãmarearü guruü̃wa wüxi i ãmare iguxü̃rüxü̃.
2 Nüü̃ nadau 29:1
3 Rü choma rü cumaxã charüxuanü, Pa Yerucharéü̃x, rü ngéma tá chanamugü i chorü churaragü nax cuxü̃ ínachomaeguãchixü̃ca̱x. Rü cucüwagu tá ichayanu i ngẽma chorü churaragü. Rü ngéma tá ichanachigüxẽxẽ ya chorü toxṍõnegü nax yimáwa cuxca̱x naxĩpetütanüxü̃ca̱x rü cuxca̱x íyaxü̃ãchixü̃ca̱x.
4 Rü taxuwatáma cume rü waixü̃müanegu tá cuyangücuchi rü tá cunanaxchixigaraü̃. Rü ngẽxguma quidexagu rü tá cuxẽgamare.
5 29:5-6 Natürü ngẽxguma tátama ngürüãchimare Cori ya Tupana ya Guxãétüwa Ngẽxmacü rü taxü̃ i duruanegümaxã, rü ĩã̱xãchianegümaxã, rü ãẽmacü i tagacümaxã, rü buanecü ya íxã̱ũ̱xẽmacümaxã, rü pucü ya tacümaxã, rü üxüema i tüxü̃ imáxü̃maxã tá nanapoxcue i ngẽma curü uanügü. Rü ngẽma muxũchixü̃ i curü uanügü i cuxca̱x íyaxüãchixü̃ rü ñoma waixü̃müchicute̱xerüxü̃ tá nixĩgü. Rü ñoma maxẽ ya pacü ya buanecü ngextá cuegücürüxü̃ tá nixĩgü.
6 Nüü̃ nadau 29:5
7 Rü guxü̃ma i ngẽma muxũchixü̃ i uanügü i Yerucharéü̃ca̱x íyaxüãchixü̃ nax nagu napogüexü̃ca̱x i naxtapü̱xgü rü norü duü̃xü̃güxü̃ ínayauxü̃xü̃ca̱x rü tá nibuxmü. Rü ñoma wüxi i nanegürüxü̃ rüe̱xna wüxi i ngo̱xetürüxü̃ tá narütauxe.
8 Rü ngẽma uanügü rü ñoma wüxi i duü̃xü̃ i taiyaxüchixü̃ i nanegüwa chibünetaxü̃rüxü̃ tá nixĩgü, natürü ngẽxguma naba̱i̱xãchigu rü nataiyaama. Rü ñoma wüxi i ta̱xawaxüchixü̃ i nanegüwa axenetaxü̃rüxü̃ tá nixĩ, natürü ngẽxguma naba̱i̱xãchigu rü nita̱xawaama. Rü ngẽmaãcü tá namaxã nangupetü i ngẽma muxũchixü̃ i churaragü i Chióü̃ca̱x íyaxüãchixü̃.
9 Pemax, Pa Iraétanüxü̃x, ñu̱xma rü ta tama peãẽxü̃ pecua̱x rü woo nüxü̃ peda̱u̱xgu i ngẽma Tupana üxü̃, natürü peãẽwa rü pengexetügü. Rü ñoma ngãxẽxü̃rüxü̃ pixĩgü nax pichü̱xatanücüüxü̃ i perü õwa woo taxuxü̃ma i ngúchiáxü̃ pixaxgügu.
10 Rü ngẽmaca̱x i nüma ya Cori ya Tupana rü yaxta i poraxü̃ pexca̱x ngéma namu. Rü ngẽma perü orearü uruü̃güchire̱x nixĩ i pemaxã icua̱xgüxü̃. Natürü tama aixcüma pemaxã nüxü̃ nixugüe i ngẽma tá pexü̃ ngupetüxü̃, erü nüma ya Cori ya Tupana rü düxwa nayatüxetü nax tama nüxü̃ nacua̱xgüxü̃ca̱x.
11 Rü guxü̃ma i ñaa Tupana choxü̃ nüxü̃ dauxẽẽxü̃ rü pexca̱x rü ñoma popera i dixpütaxü̃ rü ñaxtachipe̱xexü̃rüxü̃ nixĩ. Rü ngẽxguma chi wüxi ya poperaarü daumatüxü̃ cuáxena tanaxãxgu nax nüxü̃ tadaumatüxü̃ca̱x rü tüma rü tá ñatagürü: —Taxucürüwa nüxü̃ chadaumatü erü narüñaxtachipe̱xe —ñatagürü tá.
12 Rü ngẽxguma chi wüxi ya tama poperaarü daumatüxü̃ cuáxena tanaxãxgu nax nüxü̃ tadaumatüxü̃ca̱x rü tüma rü tá ñatagürü: —Tama poperaarü daumatüxü̃ chacua̱x —ñatagürü tá.
13 Rü nüma ya Cori ya Tupana rü ñanagürü choxü̃: —Ñaa duü̃xü̃gü rü norü dexawaxicatama nügü nixugüe nax chorü duü̃xü̃gü yixĩgüxü̃, natürü tama chauga naxĩnüe. Rü naã̱xmaxãxicatama choxü̃ nicua̱xüü̃gü, natürü norü maxü̃newa rü tama chaugu narüxĩnüe. Rü ngẽma norü cua̱xüü̃gü rü duü̃xü̃güarü ĩnüwa nanayauxgü.
14 Rü ngẽmaca̱x i choma rü taxü̃ i cua̱xruü̃gü i chorü poramaxã chaxüxü̃ tá ñaa duü̃xü̃güxü̃ ichawe̱x nax ngẽmamaxã íchanaba̱i̱xgüexü̃ca̱x. Rü ngẽma norü ucu̱xẽruü̃gü i cua̱x nüxü̃́ ngẽxmagüxü̃ rü tá nüxü̃́ inarüxomare i norü cua̱x —ñanagürü ya Tupana.
15 ¡Rü tügümaxã tangechaü̃gü ya yíxema Cori ya Tupanacha̱xwa tügü icu̱xgüchaü̃xe wüxigu namaxã i tümaarü chixexü̃ i ẽanexü̃wa taxügüxü̃! Erü ñatagürügü: —Taxúema tüxü̃ tadau rü taxúema nüxü̃ tacua̱x i ngẽma ixügüxü̃ —ñatagürügü.
16 ¿Rü tü̱xcüü̃ ípeyatóxẽxẽ i ngẽma mexü̃ ya Tupana pexca̱x üxü̃? Rü ngẽma waixü̃mü rü taxucürüwama ngẽma üwechiruü̃maxã nügü nawüxiguxẽxẽ. Rü wüxi i tü̃xü̃ rü taxũtá norü üruxü̃xü̃ ñanagürü: —Cuma rü tama nixĩ i choxü̃ cuxüxü̃ —ñanagürü. Rü ngẽma tü̃xü̃ rü taxucürüwama norü üruü̃xü̃ ñanagürü: —Cuma rü tama cuãẽxü̃ cucua̱x nax ñuxãcü choxü̃ cuxüxü̃ —ñanagürü.
Cori ya Tupana rü Iraétanüxü̃maxã nanaxuegu i mexü̃
17 Rü ngẽma Líbanuarü naixnecü rü paxa tá naane i toewa mexü̃xü̃ nayanguxuchi. Rü ngẽma naane i toewa mexü̃ rü naixnecüxü̃ tá nayanguxuchi.
18 Rü ngẽma ngunexü̃gu i ngẽma ngauchi̱xẽgüxü̃ rü tá nüxü̃ naxĩnüe ega ngẽxguma texé poperaxü̃ naxca̱x daumatügu, rü ngẽma ingexetüxü̃ rü tá nidaxuchitanü, rü taxũtáma waanexü̃wa nangẽxmagü.
19 Rü ngẽma iraxü̃ nüxü̃́ ngẽxmagüxü̃ rü Cori ya Tupanamaxã tá nataãẽgü. Rü woo i ngẽma ngearü diẽruã̱xgüxü̃ rü tá Iraétanüxü̃arü Tupana ya üünecümaxã nataãẽgü.
20 Rü ngẽma tama ixĩnüechaü̃xü̃ rü tá nagu̱x. Rü ngẽma nügü írütagüxü̃ rü ngẽma chixexü̃ ügüechaxü̃ rü tá inayarüxo.
21 Rü ngẽxgumarüxü̃ tá ta inayarüxo i ngẽma ãẽ̱xgacüpe̱xewa doraxü̃ ixugüexü̃ nax tapoxcuxü̃ca̱x ya yíxema taxuxü̃ma i chixexü̃ üchiréxe.
22 29:22-23 Rü ngẽmaca̱x yimá Cori ya Iraétanüxü̃arü Tupana ya Abraáü̃xü̃ unetacü rü ñanagürü: —Ñu̱xmawena rü marü taxũtáma naxãnee i ngẽma Acóbutanüxü̃ rü bai tá nanadeãchichametügüxü̃ i ngẽma duü̃xü̃gü, erü ngẽxguma tá nüxü̃ nadaugügu i ngẽma mexü̃ i natanüwa chaxüxü̃, rü tá nüxü̃ nicua̱xãchitanü nax choma rü chaxüünexü̃. Rü tá choxü̃ namuü̃e i choma nax Iraétanüxü̃arü Tupana ya üünecü nax chixĩxü̃.
23 Nüü̃ nadau 29:22
24 Rü ngẽma choxna ixĩgachixü̃ rü tá choxna nacua̱xãchie. Rü ngẽma chixri chauchiga idexagüxü̃ rü tá nanayauxgü i chorü ngu̱xẽẽtae —ñanagürü ya Tupana.
