Isaías 3:1-26
3 ¡Dücax, pexuãẽgü! Cori ya Tupana ya Guxãétüwa Ngẽxmacü rü Yerucharéü̃wa rü Yudáanewa tá nanatauxẽxẽ i guxü̃ma i ta̱xacü ingṍxü̃ i õna rü dexá.
2 3:2-3 Rü nüma rü tá nua inayanatauxexẽxẽ i ngẽma nügü írüporaxü̃, rü churara i daixü̃ cuáxü̃, rü ãẽ̱xgacü i guxchaxü̃arü mexẽẽruxü̃, rü orearü uruxü̃, rü ngẽma ẽxü̃guxü̃xü̃ cuáxü̃, rü ngẽma ĩanearü ãẽ̱xgacü, rü ngẽma churaragümaxã icuáxü̃, rü ngẽma muarü diẽruã́xü̃, rü ngẽma ucu̱xẽruxü̃ ixĩxü̃, rü ngẽma ta̱xacürü üxü̃ mea cuáxü̃, rü ngẽma mea dexaxü̃ cuáxü̃. Rü nüma rü tá inayanatauxexẽxẽ i guxü̃ma i ngẽma.
3 Nüü̃ nadau 3:2
4 Rü nüma ya Tupana rü tá nüxü̃ naxuneta i ñuxre i buxü̃gü nax perü ãẽ̱xgacügü yixĩxü̃ca̱x, rü ngẽma buxü̃gü tá nixĩ i pemaxã icuáxü̃.
5 Rü perü ĩanewa rü tá taxü̃ i guxchaxü̃ ínangu, rü duü̃xü̃gü rü tá nügü nadai, rü woo nügümücügümaxã rü tá ta nügü nadai. Rü ngẽma ingextü̱xüxü̃ rü tá yaxguã̱xgüxü̃ tachoxü̃gagü, rü ngẽma duü̃xü̃gü i taxúema nüxü̃ cuáxchaxü̃xü̃ rü tá naxchi naxaie i ngẽma duü̃xü̃gü i tachigaxü̃.
6 Rü ngẽma ngunexü̃gügu rü nanatüpatawa rü wüxi i naenexẽ rü tá naenexẽxü̃ ñanagürü: —Cuma rü cuxü̃́ nangẽxmaxü̃ra i cuxchiru i nagu quicúxü̃ i tanatüpatawa. Rü ngẽmaca̱x name nax cuma torü ãẽ̱xgacü quixĩxü̃, nax namaxã icucuáxü̃ca̱x ya daa ĩane ya nachitaxü̃xica nua ngẽxmane —ñanagürü tá.
7 Rü ngẽxguma i ngẽma naenexẽ rü tá ñaãcü nanangãxü̃ rü ñanagürü: —Choma rü taxucürüwama chanamexẽxẽ i ngẽma guxchaxü̃gü i nua ngupetüxü̃, erü chopatawa rü nataxuma i õna rü nataxuma i chauxchiru i nagu chicúxü̃. Rü ngẽmaca̱x tama chanayaxu nax ĩanearü ãẽ̱xgacüxü̃ choxü̃ pingucuchixẽẽxü̃ —ñanagürü tá.
8 Rü yima ĩane ya Yerucharéü̃ rü marü nanguxuchi rü Yudáanewa rü duü̃xü̃güchicaxica ínayaxü, erü duü̃xü̃gü rü chixri Cori ya Tupanachiga nidexagü rü nanaxügü i ta̱xacü i tama namaxã nataãẽxü̃, rü ngẽmaãcü tama naga naxĩnüe.
9 Rü ngẽma duü̃xü̃gü rü nachametüwatama nango̱xama nax chixexü̃ naxügüxü̃. Rü ngẽma duü̃xü̃gü rü Chodómacüã̱xgürüxü̃ norü pecadumaxã nügü nicua̱xüxü̃, rü tama naxãnee. Rü wüxi i taxü̃ i ãũcümaxü̃chixü̃ nixĩ naxca̱x i ngẽma duü̃xü̃gü, erü nümagütama naxca̱x nadaugü i norü poxcu.
10 Natürü tá nataãxẽ i ngẽma duü̃xü̃ i mexü̃gu maxü̃xü̃, erü ta̱xacü inaxüxü̃wa rü mea nüxü̃́ ínanguxuchi. Rü nüma tátama namaxã nataãxẽ i ngẽma mexü̃ i naxüxü̃.
11 Natürü wüxi i taxü̃ i ãũcümaxü̃chixü̃ nixĩ naxca̱x i ngẽma duü̃xü̃ i chixexü̃gu maxü̃xü̃. Rü ngẽma chixexü̃ i naxüxü̃gagu rü tá guxchaxü̃ naxca̱x ínangu. Erü Cori ya Tupana rü ngẽma chixexü̃ i naxüxü̃ca̱x tá nanapoxcu.
12 Rü wüxi i buxü̃mare nixĩ i ngẽma chorü ĩanewa ãẽ̱xgacüwa nügü írüporaxü̃, rü ngexü̃gü nixĩ i ĩanemaxã icua̱xgüxü̃. Pa Chorü Ĩanecüã̱xgüx, ngẽma perü ãẽ̱xgacügü rü pexü̃ niwomüxẽẽgümare rü ñu̱xũchi chixexü̃ i nacümawa pexü̃ nagagü.
13 Rü Cori ya Tupana rü marü nügü ínamexẽxẽ nax norü duü̃xü̃güna naca̱xaxü̃ i norü chixexü̃chiga.
14 Rü Cori ya Tupana rü tá naxca̱x nangema i ngẽma yaxguã̱xgü i ĩanemaxã icua̱xgüxü̃ rü ngẽma togü i ãẽ̱xgacügü, rü ñanagürü tá nüxü̃: —Pema rü chorü duü̃xü̃güxü̃ pechixexẽxẽ. Rü tüxü̃́ pengĩ́e ya ngearü ngẽmaxü̃xã̱xgüxe. Rü ngẽma tümaarü ngẽmaxü̃gü i tüxü̃́ naxca̱x pengĩ́xü̃ rü pepatagu nixĩ i namaxã penguxü̃güxü̃.
15 ¿Texé pexü̃ tamu nax chixexü̃gu penayixẽẽxü̃ i chorü duü̃xü̃gü, rü chixri tümamaxã ipecuáxü̃ ya yíxema duü̃xẽgü ya ngearü ngẽmaxü̃xã̱xgüxe? —ñanagürü ya Cori ya Tupana ya Guxãétüwa Ngẽxmacü.
Yerucharéü̃cüã̱x i ngexü̃güxü̃ napoxcue
16 Cori ya Tupana rü ngexü̃gü i Yerucharéü̃cüã̱xgüxü̃ ñanagürü: —Pa Ngexü̃güx i Chióü̃cüã̱xgü i Pegü Írütagüxex, pema rü daxũgu duü̃xẽcha̱xwa pedawenüãcü ipexĩ. Rü pegü picua̱xüü̃ãcüma ipexĩ. Rü ngẽmaãcü penaxãgaxẽxẽ i perü ngã̱xãẽruü̃gü i pexme̱xtüxüwa ngẽxmagüxü̃.
17 Rü ngẽmaca̱x i choma rü churimaxã tá pexü̃ ichagüyáexẽxẽ rü o̱xri i ãũãchixü̃ tá peeruwa narüyi. Rü tá pexü̃ chingexchiruxẽẽgü rü tá piba̱i̱xünemare —ñanagürü.
18 Rü ngẽma ngunexü̃gügu rü Cori ya Tupana rü tá inayanatauxẽxẽ i guxü̃ma i ngẽma ngã̱xãẽruü̃gü: Pexme̱xtü̱xüarü ngã̱xãẽruü̃gü, rü chocueruü̃gü, rü pexchiruarü ngã̱xãẽruü̃gü,
19 rü ngẽma naxmachinügü, rü nga̱xcupü̱xme̱xẽgü, rü tüeruruxü̃ i chixcamüxü̃,
20 rü nga̱xcueruü̃gü, rü cadénaxacügü i pexme̱xtü̱xüwa penucuxü̃, rü goyexü̃gü, rü pumaraxacügü, rü nachagüarü meruü̃gü,
21 rü ãneragü, rü naraü̃arü ngã̱xãẽruü̃gü,
22 rü naxchiru i mexẽchixü̃, rü gáuxü̃chiru i mámüxü̃, rü tüeruruxü̃ i chicamüxü̃, rü gáuxü̃chiru i ngechacüüxü̃, rü chocagü,
23 rü woruagü, rü naxpü i mexẽchixü̃, rü naxchiruchara i tüeruruxü̃, rü tüeruruxü̃ i mámüxü̃. Rü guxü̃ma i ngẽma rü tá inayarüxo.
24 Rü ngẽma pumaraarü paacaanechicüxü rü tá nayixanemare. Rü goyexü̃chicüxü rü naixnütamaxã tá pigoyegü. Rü ngẽma mexẽẽyaechicüxü rü tá naba̱i̱xerugümare. Rü ngẽma mexẽchixü̃ i naxchiruchicüxü rü témüxü̃maxã tá pixãxchiru. Rü ngẽma perü mechametüchicüxü rü fierumaxã tá pexü̃ niguchametü.
25 Rü petegü rü daigu tá nayue rü ngẽxgumarüxü̃ ta i perü churaragü rü daigu tá nayue.
26 Rü yima ĩanearü duü̃xü̃gü rü tá naxauxe. Rü norü yuetagüca̱x tá naxaure. Rü yima ĩanearü duü̃xü̃gü rü tá naxĩgü.
