Isaías 30:1-33
30 Nüma ya Cori ya Tupana rü ñanagürü: —Wüxi i ngechaü̃ nixĩ naxca̱x i ngẽma chaunegü i tama chauga ĩnüexü̃. Nümagü rü tama choxna nacagüãcüma nanaxü i ngẽma nagu naxĩnüexü̃ rü tama chauxü̃tagu naxca̱x nadaugü i chorü ucu̱xẽ. Rü ngẽmaãcü nanayexeraxẽxẽ i norü pecadugü.
2 Erü tama chorü ngü̃xẽẽca̱x nadaugü. Rü Equítuanewa naxĩ nax Faraóü̃xü̃tagu ngü̃xẽẽca̱x yadaugüxü̃ca̱x nax ngẽma ínapoxü̃güxü̃ca̱x.
3 Natürü nüma i Faraóü̃ rü taxũtáma ínanapoxü̃. Rü ngẽma nax Equítuaneaxü̃́ yaxõgüãxü̃ rü tá düxwa ngechaü̃ naxca̱x ínanguxẽẽgümare.
4 30:4-5 Rü woo i pema rü Equítuanearü ĩanegü ga Choáü̃wa rü Anéwa penamugü i perü orearü ngeruü̃gü, natürü guxü̃ma i ngẽmagü rü taxuwama pexü̃́ name. Erü ngẽma nachixü̃ane i turaxü̃ rü taxũtáma pexü̃ ínapoxü̃, rü guxchaxü̃ rü ãnexicatama tá pexca̱x ínangu̱xẽxẽ —ñanagürü ga Tupana.
5 Nüü̃ nadau 30:4
6 Rü ñaa nixĩ i Cori ya Tupanaarü ore nachiga i ngẽma Négueanewa ngẽxmagüxü̃ i ngo̱xogü. Rü ngẽma naane i ãũcümaxü̃ i nawa ngẽxmagüxü̃ i leóü̃gü rü ãxtapegü i tüxü̃ ngóxü̃ rü ãxtapegü i tüxna yuxuxü̃, rü ngẽma naanegu búrutagügu rü caméyutagügu ngẽma Iraétanüxü̃ nayana i norü ngẽmaxü̃gü rü norü diẽrugü nax Equítuanearü ãẽ̱xgacüna yanaxãxü̃ca̱x nax ínapoxü̃ãxü̃ca̱x.
7 Natürü natüca̱xma nixĩ i ngéma nanaãxü̃ i norü ngẽmaxü̃gü rü norü diẽrugü, erü Equítuane rü tama napora nax nüxü̃ nangüxẽẽxü̃ca̱x. Rü ngẽmaca̱x nixĩ i: —Ngo̱xo i natüca̱xma ixĩxü̃ i Taxuxü̃ma Üxü̃gu chanaxüégaxü̃ —ñanagürü ga Tupana.
8 Rü yexguma ya Cori ya Tupana rü Ichaíaxü̃ ñanagürü: —¡Nua naxũ rü duü̃xü̃güpe̱xewa wüxi i mürapewatachinügu naxümatü i ñaa dexagü nax ngéma nangẽxmaechaxü̃ca̱x rü guxü̃guma ngẽmawa duü̃xü̃gü nüxna nacua̱xãchiexü̃ca̱x i ngẽma nüxü̃ chixuxü̃! —ñanagürü.
9 Ñaa duü̃xü̃gü rü duü̃xü̃gü i tama ixĩnüechaü̃xü̃ rü tama yaxõgüchaü̃xü̃ nixĩgü. Rü tama norü Coriarü ucu̱xẽgü inarüxĩnüechaxü̃.
10 Rü ngẽmaca̱x yíxema ngo̱xetügüexü̃ ñanagürügü: —¡Marütama nax pengo̱xetügüxü̃! —ñanagürügü. Rü yíxema orearü uruü̃güxü̃ rü ñanagürügü: —¡Taxṹ i tomaxã nüxü̃ pixuxü̃ i ngẽma Tupana pexü̃ wéxü̃ woo aixcüma namexgu! ¡Rü dexagü i toõẽwa mexü̃xü̃ tomaxã pixu rü taxṹ i toxna peyañaxẽẽxü̃ i ngẽma torü taãẽgü! —ñanagürügü.
11 Rü ñanagürügü ta: —Nüetama ega tama Tupanaga taxĩnüegu. Rü marü name nax nüxna ítachocuxü̃ i ngẽma nama i mexü̃. ¡Rü taxṹ i nape̱xewa toxü̃ pengẽxmagüxẽẽxü̃ ya yimá Iraétanüxü̃arü Tupana ya Üünecü! —ñanagürügü.
12 Rü ngẽmaca̱x i Iraétanüxü̃arü Tupana ya Üünecü rü ñanagürü: —Pemax rü tama penayauxgüchaü̃ i chorü ucu̱xẽgü rü nagu peyaxõgü i ngẽma churaragüarü pora rü ngẽma tama mexü̃. Rü ngẽmamaxã nixĩ i pegü ipepoxü̃güxü̃.
13 Rü ngẽmaca̱x pegagu nixĩ i ngẽma tá pexü̃ üpetüxü̃. Rü ñoma wüxi i naxtapü̱x i máchanexü̃ rü ngǘxtexü̃ rü ngürüãchi iwáxü̃rüxü̃ pixĩgü.
14 Rü ñoma wüxi i tüxü̃ i waixü̃münaxca̱x i íxraxü̃gu poü̃güxü̃rüxü̃ tá pixĩgü. Rü nataxutama i wüxi i natüchi i mexü̃ i ã́xwe namaxã iyaxuxü̃ i üxümacutawa rüe̱xna puchuwa dexá namaxã iyaxuxü̃ —ñanagürü.
15 30:15-16 Rü yimá Cori ya Iraétanüxü̃arü Tupana ya Üünecü rü ñanagürü: —¡Cha̱u̱xca̱x pewoegu rü chauga pexĩnüe rü ngẽmaãcü taxũtáma pexü̃ nangupetü! Rü ngẽxguma mea perüchogu rü chauga pexĩnüegu rü ngẽmaãcü tá nixĩ i pexü̃́ nangẽxmaxü̃ i perü pora —ñanagürü. Natürü i pema rü tama chauga pexĩnüechaü̃, rü ñaperügügüama: —Tomagü rü cowarugu tá tibuxmüama —ñaperügügü. Rü aixcüma tá nixĩ i ngẽmaãcü perü uanügücha̱xwa pibuxmüxü̃. Rü pema rü ñaperügügüama: —Cowarugü i poraexüchixü̃gu tá tibuxmüama —ñaperügügüama. Natürü perü uanügü i pewe ngẽgüxü̃ rü tá pexü̃ narüporamaegüama.
16 Nüü̃ nadau 30:15
17 Rü wüxitatama i perü uanü rü tá 1,000 i pema pexü̃ nibuxmüxẽxẽ. Rü ngẽxguma 5 yixĩxgu i perü uanügü rü guxãma i pema rü tá na̱xcha̱xwa pibuxmü. Rü noxretama i pema tá ípeyaxügü ñoma wüxi i wonerapaweru i nüxica ma̱xpǘneétügu puxü̃rüxü̃. Rü ñoma wüxi i naixmena̱xã i cua̱xruxü̃ i nüxica ma̱xpǘneétügu puxü̃rüxü̃ tá pixĩgü.
Cori ya Tupana rü mexü̃ Iraétanüxü̃maxã naxuegu
18 Natürü nüma ya Cori ya Tupana rü pexü̃ ínanangu̱xẽxẽ nax naxca̱x pewoeguxü̃ nax ngẽmaãcü nüxü̃́ pengechaü̃tümüxü̃güxü̃ca̱x. Rü nüma rü ínamemare nax pexü̃ nawéaxü̃ nax poraãcü pexü̃ nangechaü̃xü̃. Erü nüma ya Cori ya Tupana rü aixcüma mexü̃ namaxã naxuegu i ngẽma naga ĩnüexü̃. Rü tá taãẽgü ya guxãma ya yíxema nüxü̃́ yaxõgüxe.
19 Pa Duü̃xü̃gü i Chióü̃cüã̱x i Yerucharéü̃wa Maxẽxü̃x, rü taxũtáma pexauxe. Erü nüma ya Cori ya Tupana rü ngẽxguma nüxü̃ naxĩnügu i pega nax ngü̃xẽẽca̱x nüxna pecaxü̃ rü tá nüxü̃́ pengechaü̃tümüxü̃gü. Rü ngẽxguma pexü̃ naxĩnügu rü paxa tá pexü̃ nangãxü̃ga.
20 Rü woo ñoma paũrüxü̃ rü dexárüxü̃ nüma ya Cori ya Tupana rü pexca̱x ínanguxẽẽgu i guxchaxü̃gü, natürü nüma nax perü ngu̱xẽẽruxü̃ yixĩxü̃ rü taxũtáma pexcha̱xwa inicu̱x. Rü pexetümaxã tá nüxü̃ pedau.
21 Rü ngẽxguma namawa tügünewaama ícutüxgu rüe̱xna to̱xwewaama ícutüxgu, rü tá cuweama nüxü̃ cuxĩnü i wüxi i naga i cuxü̃ ñaxü̃: —Nuama nixĩ i nama. ¡Rü nuama naxũ! —ñaxü̃.
22 Rü ñoma wüxi i ãũãchixü̃rüxü̃ tá nüxü̃ cuxo i ngẽma curü naxchicüna̱xãgü i diẽrumünaxca̱x rü ngẽma curü tupananetachicüna̱xãgü i úirumaxã ichagüétüxü̃. Rü ñoma ta̱xacü i ãũãchixü̃rüxü̃ tá nüxü̃ cuxo rü cuxca̱x rü guxchirerüxü̃ tá nixĩ.
23 Rü nüma ya Cori ya Tupana rü tá pucü ínanguxẽxẽ naxca̱x i naxchire i cuanegu cutogüxü̃. Rü ngẽma cuanewa rü muxü̃tama i trigu i baxcaxü̃ tá nawa narüxügü. Rü ngẽma curü wocagü rü ngẽma ngunexü̃gu rü taanexü̃wa tá nachibüe
24 Rü woo curü wocagü rü búrugü i cuanewa namaxã cupuracüxü̃ rü tá nanangõ̱xgü ya yimá baxcacü ya maxẽ rü ngẽma mea ícuexechite̱xexü̃ i trigu
25 Rü ngẽxguma ínanguxgu i ngẽma ngunexü̃ i nagu Cori ya Tupana tá tümaarü uanüxü̃ daixü̃ rü yima ĩanearü poxeguxü̃ tá niwa̱xgü. Rü guxü̃nema ya itaxü̃ne ya ma̱xpǘnegüwa rü ngüchitaeruxü̃wa tá inarüyaegü i natügü rü dexá i poraü̃chiüxü̃.
26 Rü nüma ya Cori ya Tupana rü tá norü duü̃xü̃güarü o̱xrigü nixüxü̃gü rü ñu̱xũchi nüxü̃ nayana̱i̱xgü. Rü yimá tauemacü rü ñoma üa̱xcürüxü̃ tá poraãcü inabaxi. Rü ngẽma üa̱xcüema rü 7 e̱xpü̱xcüna tá yexera nanaiemaxüchi, ñoma 7 ya üa̱xcü nügüxü̃tawa ibáxixü̃rüxü̃.
Cori ya Tupana rü tá Achíriaaneca̱x poxcu ínanguxẽxẽ
27 Dücax, nüma ya Cori ya Tupana rü yáxü̃wa ne naxũ. Rü ngẽma norü nu rü ninai caixemaxü̃ i pamüemaxü̃maxã. Rü ngẽma naberagü rü numaxã nanapagü. Rü yima norü conü rü ñoma üxüema i tüxü̃ iguxü̃rüxü̃ nixĩ.
28 Rü ngẽma norü ngü̃ãcüxü rü ñoma wüxi i natü irübaixü̃ i guxü̃wama inanguanexẽẽxü̃rüxü̃ nixĩ. Rü ngẽma nachixü̃anegü i tama naga ĩnüexü̃, rü nüma ya Tupana rü tá guxchaxü̃ naxca̱x ínanguxẽxẽ nax ngẽmaãcü nüxü̃ nacua̱xgüxü̃ca̱x nax natüxü̃wa nangẽxmagüxü̃. Rü tá namaxã inacua̱x i norü uanügü nax ngẽmaãcü ínatüexü̃ca̱x.
29 Natürü i pemax, Pa Tupanaarü Duü̃xü̃güx, rü pexca̱x tá nangẽxma i taãxẽ i ngẽxguma peta i üünexü̃ i chütacü ípexügügurüxü̃. Rü tá petaãẽgü ngẽxguma woweru picueãcüma yima ma̱xpǘne ya Cori ya Tupanapata nawa ngẽxmanegu pexĩgügu. Rü nüma nixĩ i Iraétanüxü̃arü poxü̃ruxü̃ yixĩxü̃.
30 Rü nüma ya Cori ya Tupana rü tá pexü̃ nüxü̃ naxĩnüxẽxẽ i naga i tagaxüchixü̃ rü tá pexü̃ nanawe̱x i norü pora. Rü perü uanümaxã tá poraãcü nanu. Rü üxüema i guxü̃xü̃ iguxü̃ tá naxca̱x nango̱xẽxẽ, rü ãẽmacügü tá naxca̱x nanaxüxẽxẽ rü taxüchicü ya pucü tá ínanguxẽxẽ rü gáuxü̃püta tá narüyixẽxẽ.
31 Rü ngẽxguma nüxü̃ naxĩnüegu i ngẽma Cori ya Tupanaga rü nüxna nanguxgu i ngẽma norü poxcugü, rü nüma i Achíriaanecüã̱xgü rü tá poraãcü namuü̃e.
32 Rü nüma ya Cori ya Tupana rü Achíriaanecüã̱xmaxã tá nügü nadai. Rü ngẽxguma wüxichigüarü cua̱i̱xca nüxna naxãxgu ya Tupana, rü tá naxãga i paü̃dérugü rü árpagü.
33 Erü nũxcümacürüwatama nixĩ ga Achíriaanearü churaragüca̱x rü norü ãẽ̱xgacüca̱x ínamexẽẽãxü̃ i wüxi i nachica i taxü̃ rü mátamaxü̃ i üxü nawa ngẽxmaxü̃. Rü ngéma nangẽxma ya tacü ya üxü i muxü̃ma i üxü nawa ngẽxmane. Rü nüma ya Cori ya Tupana rü wüxi i cuemaxã tá nayanaixẽxẽ. Rü ñoma üxüema i achúfremaxã inaixü̃rüxü̃ tá nixĩ.
